E piti tauatini fa’ehau ’āpī, nā Arnold Friberg

19–25 nō ’Ātete : « Fa’aorahia rātou e tōna mana ta’a ’ē »

Alama 53–63

’Ia fa’aauhia ’e te mau nu’u ’āti Lamana, ’aita hō’ē rāve’a tā « te nu’u fa’ehau iti » (Alama 56:33) te mau taure’are’a a Helamana Ta’a ’ē noa atu tō rātou nūmera iti, « e mea ’āpī roa ho’i rātou pā’āto’a » te mau fa’ehau a Helamana ’e « ’aita ā rātou i tama’i » na (Alama 56:46–47). I te tahi mau hi’ora’a, e nehenehe tō rātou vaira’a e riro ’ei vaira’a mātauhia e te tahi pae o tātou, ’ia mana’o ana’e tātou i te tahi taime ē, e mea iti roa tātou, ’e ’ua teimaha roa tātou i roto i tā tātou ’arora’a i te mau mahana hope’a nei ia Sātane ’e i te mau pūai o te ’ino i roto i te ao nei.

Terā rā, tē vai ra tā te nu’u a Helamana te tahi mau vāhi maitāta’i i ni’a i te mau ’āti Lamana, e ’ere roa atu nō ni’a i te nūmera ’aore rā te ’aravihi o te nu’u. ’Ua mā’iti rātou ia Helamana, hō’ē peropheta, nō te arata’i ia rātou (hi’o Alama 53:19) ; « ’ua ha’api’ihia rātou e tō rātou mau metua vahine, ’e mai te mea ’aita rātou e fē’a’a, e fa’aora te Atua ia rātou » (Alama 56:47) ; ’e « nō tō rātou fa’aro’o rahi ’ia ti’aturi i tei ha’api’ihia ia rātou ». Nō reira, ’ua pāruruhia rātou e te « mana ta’a ’ē ’o te Atua » (Alama 57:26). Nō reira, ’ia fa’aruru ana’e tātou i te mau arora’a o te orara’a, e nehenehe tātou e fa’aitoito. Tē ha’api’i mai nei te nu’u a Helamana ia tātou ē « tē vai ra te Atua parauti’a ; ’e ’o rātou ’o tē ’ore e fē’a’a, e fa’aorahia rātou e tōna mana ta’a ’ē » (Alama 57:26).

Mana’o nō te ’apo i te ha’api’ira’a i te ’utuāfare ’e i te fare purera’a

Alama 53:10–22 ; 56:43–49, 55–56 ; 57:20–27 ; 58:39–40

E tauturu te roa’ara’a tē fa’aro’o i te Atua iā’u ’ia upo’oti’a i ni’a i te mata’u.

’Āhani ’aita tō rātou e fa’aro’o, ’ua roa’a ïa i te mau fa’ehau taure’are’a a Helamana te hō’ē tumu nō te ri’ari’a. Nō tō rātou rā fa’aro’o, ’ua rahi atu ā ïa te tumu ’ia vai itoito noa. ’Ia tai’o ana’e ’oe nō ni’a i te reira i roto te Alama 53–58, ’a ’imi i te mau mea e tauturu ia ’oe ’ia fa’aruru i tō ’oe mau mata’u ma te fa’aro’o i te Mesia. E nehenehe e rōtahi i ni’a i te mau ’īrava i muri nei : Alama 53:10–22 ; 56:43–49, 55–56 ; 57:20–27 ; e 58:39–40. E nehenehe teie tāpura e tauturu ia ’oe ’ia pāpa’i te mau mea tei ’itehia mai ia ’oe.

Te huru o te mau fa’ehau ’āpī a Helamana :
Te mau tumu i pūai ai tō rātou fa’aro’o i te Mesia :
Te mau mea tā rātou i rave nō te fa’a’ohipa i te fa’aro’o i te Mesia :
Nāhea te Atua i te ha’amaita’i ia rātou :

Nō te upo’oti’a i ni’a i tā tātou mau ’arora’a pae vārua, e hina’aro ato’a tātou i te mana o Iesu Mesia. Nāhea e roa’a ai ia ’oe tōna mana ? ’A ’imi i te mau pāhonora’a i roto i te parau poro’i a te peresideni Russell M. Nelson « Faʼahaere mai i te mana o Iesu Mesia i roto i tō tātou oraraʼa » (Liahona, Mē 2017, 39–42). E nehenehe ’oe e fa’aau i tāna a’ora’a i te mau mea tā te mau fa’ehau a Helamana i rave.

I muri a’e i te tuatāpapara’a i teie mau mea, ’a feruri i tā ’oe iho mau ’arora’a pae vārua. ’A pāpa’i i te mea e fa’auruhia ra ia ’oe ’ia rave nō te fa’a’ohipa i tō ’oe fa’aro’o ia Iesu Mesia.

Hi’o ato’a Neil L. Andersen, « Puta », Liahona, Novema 2018, 83–86 ; « ’A ha’apa’o tātou i te ’evanelia », Te mau Hīmene, N°156 ; « Drawing upon the Power of God in Our Lives [Faʼahaere mai i te mana o Iesu Mesia i roto i tō tātou oraraʼa] » (video), Vaira’a buka ’evanelia.

’Aita rātou i fē’a’a, nā Joseph Brickey

Alama 58:1–12, 31–37 ; 61

E’ita te mau pipi a Iesu Mesia e ’ino’ino ’ōhie noa.

Tē vai ra te mau tumu i tupu ai te ’ino’ino ’o Helamana ’e ’o Pahorana. ’Aita ’o Helamana i fāri’i i te tauturu nō tāna mau nu’u, ’e ’ua fa’ahapa-hape-hia Pahorana e Moroni nō te ’orera’a e hōro’a i terā tauturu (hi’o Alama 58:4–9, 31–32 ; 60). E aha te mea tā ’oe i fa’ahiahia nō ni’a i tō rātou huru i roto te Alama 58:1–12, 31–37 ’e te Alama 61 ? I tō ’oe mana’o nō te aha rātou i pāhono ai mai te reira te huru ?

’Ua fa’atoro Elder David A. Bednar i ni’a ia Pahorana ’ei hi’ora’a nō te marū ’e ’ua ha’api’i ē « Te mau hiʼoraʼa hanahana ʼe te faufaʼa rahi roa aʼe e ’itehia ïa i roto i te oraraʼa o te Faʼaora iho » (« O te haehaʼa ʼe te marū te ʼāʼau », Liahona, Mē 2018, 32). ’A feruri hōhonu nāhea te Fa’aora i te fa’a’itera’a i te marū. Hi’o ’ei hi’ora’a, Mataio 27:11–26 ; Luka 22:41–42 ; Ioane 13:4–17. Nāhea e ti’a ai ia ’oe ’ia pe’e i tōna hi’ora’a ?

Alama 60:7–14

E hōpoi’a nā’u ’ia fa’ateitei i te ta’ata ’ati a’e iā’u.

’Ua pāpa’i Moroni ē, ’ua tu’u te Atua i te hopoi’a i ni’a ia Pahorana mai te mea e tau’a ’ore ’oia i te mau hina’aro o te mau nu’u ’āti Nephi. E aha tā ’oe i ha’api’i mai i roto te Alama 60:7–14 nō ni’a i te aupurura’a i te ta’ata i roto te fifi ? E aha tā ’oe e nehenehe e rave nō te ’ite hau atu ’e nō te pāhono i te mau hina’aro o vetahi ’ē ?

Alama 62:39–51

Mai te mea e mea ha’eha’a vau, e nehenehe te mau tāmatara’a o te orara’a e fa’afāriu i tō’u ’ā’au i te Atua ra.

’A tu’u i te hō’ē huero moa ota ’e hō’ē ’ūmara pūtete i roto i te pape piha nō te tauturu ia ’oe ’ia feruri, e nāhea e nehenehe ai ia ’oe ’ia mā’iti ’ia « tāmarūhia » ’aore rā ’ia « ha’apa’arihia » e tō ’oe mau tāmatara’a. ’A ’ama noa ai tā ’oe huero moa ’e te ’ūmara, ’a tuatāpapa i te Alama 62:39–51, ’e ’a hi’o nāhea te ta’ata i te ’ohipara’a i mua i te tāvinira’a a Helamana i muri a’e i tā rātou tāma’i roa ’e te ’āti Lamana. I muri iho e nehenehe ’oe e fa’aau i te reira i te huru o tā rātou ’ohipa i rave i mua i tāna porora’a e 13 matahiti nā mua atu (hi’o Alama 45:20–24). E aha te ta’a-’ē-ra’a o te huru o te ’āti Nephi i mua i teie ā mau huru ’ati ? ’Ia ’ama ana’e te huero moa ’e te ’ūmara pūtete, ’a tūpararī i te huero moa ’e ’a tāpū i te ūmara pūtete. E aha te ta’a-’ē-ra’a tā te pape piha’a i fa’atupu i ni’a ia rāua ? E aha tā ’oe i ha’api’i mai nō ni’a i te huru e nehenehe tātou e mā’iti i te rave i mua i te ’ati ? Nāhea e ti’a ai ia ’oe ’ia fāriu atu i ni’a i te Atua i roto i tō ’oe mau ’ati ?

’A fa’a’ohipa maita’i i te mau ’ohipa e tupu i roto i te ’utuāfare. Mai te mea e ha’api’i ’oe i te hō’ē piha ha’api’ira’a a te ’Ēkālesia, ’a ani i te mau pīahi ’ia fa’a’ite mai i te mau mea tā rātou i ha’api’i mai i te fare. ’Ei hi’ora’a, ’a ’imi e aha tā rātou i ha’api’i mai nō ni’a i te mau ’ati ’e te ha’eha’a nā roto mai i te tunura’a i te huero moa ’e te mau ’ūmara.

Nō te tahi atu ā mana’o, ’a hi’o i te ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Alama 53:20–21 ; 56:47–48

E nehenehe au ’ia vai ha’apa’o maita’i noa i mua i te Atua mai te mau fa’ehau ’āpī a Helamana.

• E nehenehe ’oe e fa’a’ohipa e rave rahi rāve’a tauturu nō te fa’a’ite i te ’ā’amu o te mau fa’ehau a Helamana, tae noa atu i te mau hōho’a i roto i teie arata’i ha’api’ira’a ’e te « Pene 34 : Helamana e nā 2 000 fa’ehau ’āpī » (Te mau ’ā’amu nō te Buka a Moromona, 93–94). E nehenehe te ’api fa’a’ana’anataera’a nō teie hepetoma e tauturu i tā ’oe mau tamari’i, ’ia feruri i te mau rāve’a e nehenehe ai rātou ’ia riro mai te nu’u a Helamana. E nehenehe e fa’a’ite i te tahi mau maita’i o te mau fa’ehau ’āpī i roto te Alama 53:20–21 nō te ha’amata i te reira. E nehenehe ato’a ’outou e hīmene ’āmui « Proclamons la vérité » (Chants pour les enfants, 92).

Alama 56:45–48 ; 57:21

E nehenehe au e ha’apa’o maita’i i te mea tā tō’u nā metua e ha’api’i nei ma te parauti’a.

• ’Ua hi’o te mau fa’ehau ’āpī a Helamana i te fa’aro’o o tō rātou metua vahine, ,a fa’aruru ai rātou i te hō’ē tāmatara’a rahi. Penei a’e e nehenehe ’oe e tai’o te Alama 56:46–48 ’e tā ’oe mau tamari’i, ’e e ani ia rātou ’ia fa’aro’o e aha tā te mau metua vahine ’o teie feiā ’āpī tamāroa i ha’api’i ia rātou nō ni’a i te fa’aro’o. E nehenehe ’oe e ui ia rātou e aha tā rātou i ha’api’i mai nā roto mai i tō rātou mau metua—’aore rā te tahi atu feiā pa’ari ha’apa’o maita’i—nō ni’a i te Fa’aora. Nō te aha e mea faufa’a ’ia ha’apa’o i te parau « ma te hapa ’ore » ? (Alama 57:21).

• Nāhea e nehenehe ai ia ’oe—mai te mau metua vahine o te mau fa’ehau taure’are’a—’ia ha’apāpū ē, ’ua ’ite tā ’oe mau tamari’i i tō ’oe fa’aro’o i te Atua ? Hō’ē rāve’a ’o te fa’a’itera’a ïa e aha tā tō ’oe fa’aro’o i fa’atupu i ni’a i tō ’oe orara’a. ’Ei hi’ora’a, nāhea ’oia i te « fa’aorara’a » ia ’oe i te taime « ’aita ’oe i fē’a’a » ?

Huero nō te fa’aro’o, nā Jay Ward

Alama 53:10–18

E nehenehe au e ha’apa’o i tā’u mau fafaura’a i te Metua i te ao ra.

• E nehenehe tā ’oe mau tamari’i e paraparau nō ni’a i te hō’ē taime, ’a rave ai ’e ’a ha’apa’o ai te hō’ē ta’ata i te hō’ē parau fafau i mua ia rātou. E aha tei tupu i roto ia rātou i te ha’apa’ora’hia te parau fafau ? E nehenehe ’oe e tai’o te Alama 53:10–18 ’e e ani i tā ’oe mau tamari’i, ’ia ’imi e mea nāhea tō Helamana, te nuna’a ’o Amona, ’e te mau tamaiti a te nūna’a ’o Amona, ravera’a ’e te ha’apa’ora’a i tā rātou mau parau fafau. E nehenehe ’oe e fa’a’ite, nāhea te Metua i te ao ra i te ha’amaita’ira’a ia ’oe ’a ha’apa’o ai ’oe i tā ’oe mau fafaura’a.

Alama 61:3–14

E nehenehe au e mā’iti ’eiaha e riri.

E nehenehe e ani i tā ’oe mau tamari’i ’ia feruri i te hō’ē taime ’a parihia ai rātou, i te ravera’a i te hō’ē mea tā rātou i ’ore i rave. ’A parau ia rātou nāhea te reira i te tupura’a i ni’a ia Pahorana (hi’o Alama 60–61 ; hi’o ato’a « Pene 35: Te tapena Moroni ’e ’o Pahorana », Te mau ’ā’amu o te Buka a Moromona, 95–97). Nō te ’apo mai, e mea nāhea tō Pahorana pāhonora’a, ’a tai’o te tahi i muri mai i te tahi i te mau ’īrava i roto te Alama 61:3–14. E aha tā Pahorana i rave ’a pari hape ai Moroni iāna ? (hi’o Alama 61:2–3, 8–9). E aha tā tātou i ha’api’i mai nō ni’a i te fa’a’orera’a i te hapa nā roto mai i te hi’ora’a o te Fa’aora ? (hi’o Luka 23:33–34).

Nō te tahi atu ā mana’o, ’a hi’o te ve’a Hoa nō teie ’āva’e.

’Oia mau, tei ’ī’ō nei pā’āto’a rātou ’e ’ua tai’ohia rātou, nā Clark Kelley Price.