Alama 59–62

Te tāpena Moroni ’e ’o Pahorana

Te pūai nō ’ō mai i te Atua ra

Tei roto te mau ’āti Nephi ’e te mau ’āti Lamana i te tama’i. ’O Moroni te tāpena o te mau nu’u ’āti Nephi. ’Aita te feiā fa’atere o te mau ’āti Nephi i tono i te mau fa’ehau ’e te mā’a e rava’i maita’i. ’Ua riri Moroni ’e ’ua pāpa’i i te hō’ē rata ia Pahorana, te ti’a fa’atere o te mau ’āti Nephi.

Alama 59:3–13 ; 60:1, 3–5

I roto i tāna rata, tē ani nei Moroni ia Pahorana nō te aha ’aita ’oia i ’āfa’i mai i te tauturu. ’Ua mana’o Moroni ē, ’aita Pahorana e tāu’a nei i te mau ta’ata ’e ’ua hina’aro noa i te mana. ’Ua hina’aro Moroni ’ia ti’amā tōna mau ta’ata.

Alama 60

’Ua ’oto Pahorana ē, ’aita e tauturu tā te mau nu’u. ’Ua hina’aro ’oia e tauturu ia Moroni, ’aita rā tāna e nehenehe. Tē ’aro nei te tahi mau ’āti Nephi iāna.

Alama 61:1–4

’Ua pi’ihia teie mau ’āti Nephi te mau ta’ata-hina’aro-ari’i. ’Ua hina’aro rātou ’ia roa’a te mana nō rātou iho ’e ’ia fa’atere i te nūna’a. ’Ua haru rātou i te fa’aterera’a hau a Pahorana.

Alama 51:5 ; 61:3–5, 8

’Ua hina’aro Pahorana e tāmau noa i te arata’i i te mau ’āti Nephi, ’ia ti’a iāna e tauturu ia rātou. Mai ia Moroni, ’ua hina’aro ’oia ’ia pe’e te mau ’āti Nephi i te Atua ’e ’ia tāpe’a i tō rātou ti’amāra’a. Tē tītau nei ’oia ’eiaha rātou ’ia ’aro fa’ahou atu i te ta’ata. ’Ua ineine rā ’oia nō te ’aro atu mai te mea e tauturu te reira i te pāruru-pāpū-ra’a i tōna mau ta’ata.

Alama 61:9–14, 19–20

’Ua ani Pahorana i te mau ’āti Nephi e tauturu iāna ’ia ’aro, nō te pāruru i tō rātou ’utuāfare, tō rātou ti’amāra’a ’e tō rātou ti’ara’a nō te ha’amori i te Atua. ’Ua ’ite ’oia ē, tei ia rātou ra te Vārua o te Atua ’ia mā’iti ana’e rātou e ’aro nō te mea ti’a. E rave rahi ’āti Nephi tei haere e tauturu ia Pahorana ’ia pāruru i tō rātou fenua.

Alama 61:5–7, 14–15

’Ua pāpa’i Pahorana ia Moroni i te hō’ē rata. ’Aita ’oia i riri a’e ia Moroni. ’Ua fa’ati’a ’oia ia Moroni i te mau mea ato’a tei tupu. ’Ua ani ’oia ia Moroni e haere mai e tauturu iāna ’ia ’aro i te mau ta’ata-hina’aro-ari’i. ’Ua ’ite Pahorana ē mai te mea e pe’e rātou i te Atua, e’ita e ti’a ia rātou ’ia mata’u. E pāruru mai te Atua ia rātou ’e e tauturu ia rātou.

Alama 61:9, 14–21

’Ua ’ī Moroni i te tīa’ira’a maoti te fa’aro’o o Pahorana. ’Ua ’oto rā ’oia nō te tahi mau ’āti Nephi e ’aro nei i tō rātou iho mau ta’ata ’e ’aita e ha’apa’o nei i te parau a te Atua. ’Ua rave Moroni i te hō’ē nu’u ’e ’ua haere atu e tauturu ia Pahorana. ’Ua tāhiri ’oia i te reva nō te ti’amāra’a i te mau vāhi ato’a tāna i haere. E rave rahi tauatini ’āti Nephi tei fa’aoti e ’aro nō te pāruru i tō rātou ti’amāra’a.

Alama 62:1–5

’Ua upo’oti’a Moroni, Pahorana ’e tā rāua nu’u fa’ehau i ni’a i te mau ta’ata-hina’aro-ari’i. ’Ua riro fa’ahou mai Pahorana ’ei ti’a fa’atere nō te mau ’āti Nephi. ’Ua tono Moroni e rave rahi tāne nō te tauturu i te mau nu’u ’āti Nephi. ’Ua hāpono ato’a ’oia i te mā’a nā te nu’u. I teienei, ’ua tāhō’ēhia te mau ’āti Nephi, ’ua upo’oti’a rātou e rave rahi ’arora’a. ’Ua haru mai rātou e rave rahi ’oire ’āti Nephi tei haruhia e te mau ’āti Lamana.

Alama 62:6–32