« Te tāpa’o o te ti’amāra’a », Te mau ’ā’amu o te Buka a Moromona (2023)
Te tāpa’o nō te ti’amāra’a
Pārurura’a i te ti’ara’a nō te ti’aturi i te Atua
E ’āti Nephi rahi ’e te pūai ho’i ’o Amalikia. ’Ua hina’aro ’oia ’ia riro ’ei ari’i. ’Ua fafau ’oia e hōro’a i te mana i te mau ta’ata e tauturu iāna. E rave rahi ta’ata tei here iāna ’e ’ua tāmata i te fa’a’amu’amu ia vetahi ’ē ’ia pe’e iāna. ’Ua arata’i Amalikia i te ta’ata ’ia rave i te mau ’ohipa ’ī’ino. ’Ua hina’aro ’oia ’e tōna mau ta’ata e taparahi pohe i te mau ta’ata e ha’api’i nei nō ni’a ia Iesu Mesia.
’Ua ti’aturi te tāpena Moroni, te fa’atere o te mau nu’u ’āti Nephi, ia Iesu. ’Ua ’ite ’oia ’ua ha’amaita’ihia te mau ’āti Nephi nō tō rātou ha’apa’ora’a i te mau fa’auera’a a te Atua. ’Ua riri roa ’oia i te mea ē tē fa’aātea nei Amalikia i te ta’ata i te Atua, ma te tāmatara’a ’ia riro ’ei ari’i, ’e i te ha’amāuiui i te ta’ata.
’Ua tūmahae Moroni i tōna perēue. ’Ua pāpa’i ’oia i ni’a iho ē, e ti’a i te ta’ata ’ia ha’amana’o i tō rātou Atua, tō rātou ti’amāra’a, ’e tō rātou ’utuāfare. I muri iho, ’ua tā’amu Moroni i te reira i ni’a i te hō’ē rā’au ’e ’ua pi’i i te reira, te tāpa’o o te ti’amāra’a. ’Ua pure Moroni nō te ha’amaita’ira’a a te Atua. ’Ua fa’a’ite ’oia i te mau ’āti Nephi i te tāpa’o o te ti’amāra’a ’e ’ua ani ia rātou ’ia ’āmui mai iāna i roto i te ’arora’a ia Amalikia.
’Ua ’ō’omo te nūna’a i tō rātou ha’ana tama’i ’e ’ua horo atu ia Moroni ra. ’Ua ineine rātou nō te ’aro nō te Atua ’e nō tō rātou mau fare, tō rātou mau ’utuāfare, ’e tō rātou ti’amāra’a. ’Ua rave rātou i te hō’ē fafaura’a, ’aore rā te hō’ē parau tapu ta’a ’ē i te Atua ē, e pe’e noa rātou iāna. I muri iho ’ua fa’aineine ia rātou nō te ’aro atu ia Amalikia.
E mea rahi mau te nu’u a Moroni. ’Ua mata’u Amalikia. ’Ua tāmata ’oia i te horo ’ē atu ’e tōna mau ta’ata ’āpe’e. E rave rahi rā o rātou e ha’ape’ape’a nei i te mea ē, tē ’aro nei Amalikia nō te mau tumu hape. E rave rahi tei ’ore i pe’e fa’ahou iāna. ’Ua tāpe’a te nu’u a Moroni i te feiā ’o tei pe’e noa ia Amalikia, terā rā ’ua horo ’ē atu Amalikia ’e vetahi o rātou.
’Ua haere atu Amalikia i te fenua o te mau ’āti Lamana. ’Ua hina’aro ’oia ’ia tauturu te mau ’āti Lamana iāna i te ’aro atu i te mau ’āti Nephi. I muri iho, ’ua roa’a mai iāna i te hō’ē nu’u rahi a’e ’e te pūai ho’i. ’Ua arata’i ’oia e rave rahi ’āti Lamana ’ia riri i te mau ’āti Nephi. ’Ua parau te ari’i o te mau ’āti Lamana i te mau ’āti Lamana ato’a ’ia fa’aineine nō te ’aro i te mau ’āti Nephi.
’Ua here te ari’i ia Amalikia. ’Ua fa’ariro ’oia ia Amalikia ’ei hō’ē o te mau fa’atere i ni’a i te nu’u ’āti Lamana. ’Ua hina’aro rā Amalikia i te mana rahi atu ā.
’Ua fa’anaho Amalikia i te hō’ē ’ōpuara’a nō te fa’atere i ni’a i te mau ’āti Lamana. ’Ua rave mai ’oia i te nu’u tā’āto’a o te mau ’āti Lamana. I muri iho, ’ua ani ’oia i tāna mau tāvini ’ia taparahi pohe i te ari’i ’e ’ia ha’avare nō ni’a i te ta’ata i rave i te reira ’ohipa.
’Ua fa’ahua Amalikia i te riri i tō te ari’i taparahi pohera’ahia. ’Ua here roa te mau ’āti Lamana ia Amalikia. ’Ua fa’aipoipo ’oia i te ari’i vahine ’e ’ua riro mai te ari’i ’āpī. ’Ua hina’aro ato’a ’oia e fa’atere i te mau ’āti Nephi. ’Ua paraparau ’ino ’oia nō te mau ’āti Nephi ’ia riri te mau ’āti Lamana ia rātou. ’Oi’oi roa, e rave rahi ’āti Lamana tei hina’aro e ’aro atu ia rātou.
’A tītau ai Amalikia i te mana ma te ha’avarera’a, ’ua fa’aineine Moroni i te mau ’āti Nephi ’ia ti’aturi i te Atua. ’Ua tu’u ’oia i te tāpa’o o te ti’amāra’a i ni’a i te mau pare tāta’itahi o te fenua, nō te fa’aha’amana’o ia rātou i tā rātou parau fafau. ’Ua fa’aineine ato’a te mau nu’u a Moroni i te mau ’oire ’āti Nephi nō te tama’i. ’Ua patu rātou i te mau papa’i ’e ’ua heru i te mau ’āpo’o repo nō te pāruru i te mau ’oire ’e nō te ha’apa’ari.
I te taera’a te mau ’āti Lamana i te vāhi arora’a, ’aita i ti’a ia rātou e tomo atu i roto i te mau ’oire ’āti Nephi. ’Ua tāpe’ahia rātou e te mau papa’i ’e te mau ’āpo’o repo ’o tā te mau nu’u a Moroni i hāmani. E rave rahi ’āti Lamana tei pohe ’a ’aro ai rātou i te mau ’āti Nephi. ’Ua riri roa Amalikia. ’Ua fafau ’oia e taparahi pohe ia Moroni.
’Ua ha’amāuruuru te mau ’āti Nephi i te Atua nō te tauturura’a ’e nō te pārurura’a ia rātou. ’Ua fa’ariro rātou i tō rātou mau ’oire ’ei vāhi pāruruhia ’e ’ua patu i te tahi atu mau ’oire. ’Ua tāmau noa te tama’i ’e te mau ’āti Lamana, ’ua tauturu rā te Atua ia Moroni ’e tōna mau nu’u i te pārurura’a i te mau ’āti Nephi. ’Ua ’oa’oa te mau ’āti Nephi. ’Ua ha’apa’o rātou i te parau a te Atua ’e ’ua vai ha’apa’o maita’i noa iāna.