« Ari’i Beniamina », Te mau ’ā’amu o te Buka a Moromona (2023)
Ari’i Beniamina
Te tāvinira’a i te ta’ata ’e i te Atua
E peropheta te ari’i Beniamina nā te Atua tei fa’atere i te fenua nō Zarahemela. ’Ua ’ohipa itoito ’oia nō te tāvini i tōna nūna’a ’e nō te ha’api’i ia rātou nō ni’a i te Atua. Ma te tauturu a te tahi atu mau peropheta a te Atua, ’ua fa’ariro Beniamina ia Zarahemela ’ei vāhi hau ’e te pāruruhia nō te ora.
Te mau Parau a Moromona 1:17–18 ; Mosia 1:1–7
’Ua pa’ari o Beniamina. ’Ua ani ’oia i tāna tamaiti ia Mosia ’ia ’āmui mai i te mau ta’ata. ’Ua hina’aro Beniamina e parau ia rātou ē, e riro Mosia ’ei ari’i ’āpī nō rātou.
’Ua haere mai te nūna’a nā te mau vāhi ato’a o te fenua. ’Ua fa’ati’a i tō rātou mau ti’ahapa i pīha’i iho i te hiero nō te fa’aro’o ia Beniamina.
’Ua paraparau Beniamina mai ni’a mai i te hō’ē pare ’ia ti’a i te mau ta’ata e rave rahi ’ia fa’aro’o iāna. ’Ua parau Beniamina ē, ’ua tauturu te Atua iāna i te arata’i ia rātou. ’Ei ari’i, ’ua ha’api’i ’oia ia rātou ’ia ha’apa’o i te mau fa’auera’a a te Atua. ’Aita ’oia i rave i tā rātou moni ’aore rā i fa’ariro ia rātou ’ei tāvini nōna. ’Ua ha’a rā ’oia nō te tāvini i tōna nūna’a ’e i te Atua.
’Ua parau Beniamina i te nūna’a ē, ’a tāvini ai rātou te tahi ’e te tahi, tē tāvini ato’a ra ïa rātou i te Atua. I muri iho ’ua parau ’oia ia rātou ē, te mau mea ato’a tā rātou e fa’ari’i nei nō ’ō mai ïa i te Atua ra. ’Ei fa’aho’ira’a, ’ua hina’aro te Atua ’ia ha’apa’o rātou i tāna mau fa’auera’a. ’Ia ha’apa’o ana’e rātou, hōro’a rahi mai te Atua nō rātou i te mau ha’amaita’ira’a
’Ua parau Beniamina ia rātou ē, e’ita ’oia e riro fa’ahou ’ei ari’i ’aore rā ’ei ’orometua ha’api’i nō rātou. E riro tāna tamaiti ’o Mosia ’ei ari’i ’āpī nō rātou.
I muri iho ’ua parau Beniamina i tōna nūna’a ē, ’ua haere mai te hō’ē melahi e fārerei iāna. ’Ua parau mai te melahi ē, e haere mai te Tamaiti a te Atua, ’o Iesu Mesia, i ni’a i te fenua nei. E fa’atupu ’oia i te mau temeio ’e e fa’aora i te mau ta’ata. E māuiui ’oia ’e e pohe nō te fa’aora i te mau ta’ata ato’a. ’Ua ha’api’i Beniamina ē, e fa’a’ore Iesu i te hapa a te mau ta’ata ato’a e fa’aro’o tō rātou iāna ’e ’o tē tātarahapa.
’Ua ti’aturi te nūna’a i te mea tā Beniamina i ha’api’i ia rātou nō ni’a ia Iesu. ’Ua ’ite rātou ē, e ti’a ia rātou ’ia tātarahapa. ’Ua pure te mau ta’ata ato’a ’e ’ua ani i te Atua ’ia fa’a’ore mai i tā rātou hapa. I muri a’e i tō rātou purera’a, tei pīha’i iho te Vārua o te Atua ia rātou. ’Ua fa’ari’i rātou i te oa’oa ’e ’ua ’ite rātou ē, ’ua fa’a’ore te Atua i tā rātou hapa nō tō rātou fa’aro’o ia Iesu.
E mana’o ta’a ’ē ’e te ’āpī tei tupu i roto i te ta’ata nō te mea e fa’aro’o tō rātou ia Iesu. I teienei, ’ua hina’aro rātou e rave i te mau mea maita’i i te mau taime ato’a. ’Ua fafau rātou e pe’e i te mau fa’auera’a a te Atua nō te toe’a o tō rātou orara’a. Nō te mea ’ua ti’aturi rātou ia Iesu ’e ’ua rave i teie fafaura’a, ’ua pi’ihia rātou te nūna’a nō Iesu.