« Alama, Amuleka, ’e Zeezeroma », Te mau ’ā’amu o te Buka a Moromona (2023)
Alama, Amuleka ’e Zeezeroma
Mā’itira’a ’ia ti’aturi i te Atua ’e ’ia ha’apa’o i tāna parau
’Ua ’ite Alama ē, e rave rahi melo o te ’Ēkālesia ’aita e ha’apa’o nei i te mau fa’auera’a a te Atua. Nō reira, ’ua haere atu Alama mai terā ’oire i terā ’oire i te ha’api’ira’a i te parau a te Atua. E rave rahi ta’ata tei tātarahapa. I muri iho, ’ua haere Alama i te hō’ē ’oire tei pi’ihia ’o Amoniha. ’Aita te mau ta’ata i reira i fa’aro’o iāna. ’Ua tūtuha rātou i ni’a iāna ’e ’ua tīahi iāna i rāpae i te ’oire.
Alama 4:11–20 ; 5–7 ; 8:1–13
’Ua ’oto roa Alama ’a fa’aru’e ai ’oia i te ’oire. Tē ha’ape’ape’a nei ’oia nō te nūna’a. I muri iho, ’ua haere mai ra te hō’ē melahi iāna ra. ’Ua nā ’ō mai ra te melahi ē, e ti’a ia Alama ’ia ’oa’oa nō te mea ’ua ha’apa’o ’oia i te parau a te Atua. ’Ua parau mai te melahi ia Alama ’ia ho’i fa’ahou i te ’oire ’e ’ia fa’aara atu i te nūna’a. Mai te mea ’aita rātou e tātarahapa, e ha’amouhia rātou. ’Oi’oi roa Alama i te ho’i-fa’ahou-ra’a atu.
I tō Alama taera’a i te ’oire, ’ua po’ia roa ’oia. ’Ua ha’apae ’oia i te mā’a e rave rahi mahana. ’Ua ani atu Alama i te mā’a i te hō’ē ta’ata ’o Amuleka te i’oa.
’Ua fa’ati’a Amuleka ia Alama i te hō’ē ’ōrama tāna i fāri’i. I roto i te ’ōrama, ’ua parau te hō’ē melahi ia Amuleka ē, e peropheta Alama nā te Atua. ’Ua hina’aro Amuleka e tauturu ia Alama.
Amuleka e ’āfa’i ra ia Alama i tōna fare ’e ’ua fa’atāmā’a iāna. ’Ua fa’aea Alama i te fare o Amuleka e rave rahi mahana. ’Ua ha’amaita’i te Atua ia Amuleka ’e tōna ’utuāfare. I muri iho, ’ua parau te Atua ia Alama ’e ia Amuleka ’ia parau i te mau ta’ata i roto i te ’oire ’ia tātarahapa. ’Ua ha’apa’o Alama ’e ’o Amuleka i te parau. ’Ua hōro’a te Atua ia rāua i tōna mana nō te tauturu ia rāua ’ia ha’api’i.
Hō’ē o te mau ta’ata e fa’aro’o ra ia rāua ’ia ha’api’i ’o Zeezeroma ïa te i’oa. E ta’ata māramarama roa ’oia ’e ’ua hina’aro e ramā ia Alama ’e ia Amuleka. ’Ua parau Zeezeroma ia Amuleka e hōro’a ’oia i te hō’ē tino moni rahi nāna, mai te mea e parau ’oia e ’ere te Atua i te mea mau. ’Ua hina’aro ’oia ’ia ha’avare Amuleka, ’ia ’ore te mau ta’ata ’ia ti’aturi i te mea tā Amuleka ’e tā Alama e ha’api’i ra.
Alama 10:29–32 ; 11:21–25 ; 12:4–6
’Aita rā Amuleka i ha’avare nō ni’a i te Atua. ’Ua parau ’oia e mea mau te Atua. ’Ua ’ite Amuleka ’e ’o Alama i te mau mana’o o Zeezeroma. ’Ua māere roa Zeezeroma ’e ui ia rāua e rave rahi uira’a. ’Ua ha’api’i rāua ia Zeezeroma ē, e fa’anahora’a tā te Atua nō te mau ta’ata ato’a. ’Ua ti’aturi Zeezeroma i te mea tā Alama ’e tā Amuleka i ha’api’i nō ni’a i te Atua ’e ia Iesu Mesia.
Alama 11:23–46 ; 12:1–18, 24–34 ; 14:6–7 ; 15:6–7
’Ua pe’ape’a roa Zeezeroma nō te mau ’ohipa ’ino tāna i rave. ’Ua ma’i-roa-hia ’oia. ’Ua haere Alama ’e ’o Amuleka e fārerei iāna. ’Ua parau Alama e nehenehe Zeezeroma e fa’aorahia maoti te fa’aro’o o Zeezeroma ia Iesu. ’Ua ani Alama i te Atua ’ia fa’aora iāna. ’Ua ti’a tā’ue mai Zeezeroma i ni’a. ’Ua fa’aorahia oia ! ’Ua bāpetizohia ’oia ’e ’ua ha’api’i i te nūna’a i te toe’a o tōna orara’a.