Te tāpena Moroni ’e ’o Zerahemana

Hō’ē ’arora’a ’e hō’ē fafaura’a ’ia ora ma te hau

Tē arata’i nei Zerahemana i tāna mau nu’u

E ra’atira Zerahemana nō te mau nu’u ’āti Lamana. ’Ua hina’aro ’oia e fa’atere i te mau ’āti Nephi ’e ’ia fa’ahepo ia rātou e tāvini i tōna nūna’a. Zerahemana e arata’i ra i tāna mau nu’u nō te ’aro atu i te mau ’āti Nephi.

Alama 43:3–8

Te nu’u ’āti Nephi e hi’ohi’o ra i te nu’u ’āti Lamana

’Ua hina’aro te mau ’āti Nephi e pāruru i tō rātou fare, tō rātou ’utuāfare ’e tā rātou ha’apa’ora’a fa’aro’o. ’Ua ’ite rātou e’ita e ti’a ia rātou ’ia ha’amori i te Fatu, mai te mea e fa’atere te mau ’āti Lamana ia rātou. ’Ua mā’iti te mau ’āti Nephi e ’aro i tō rātou mau ’enemi.

Alama 43:9–10, 14–15

Moroni e tīa’i maite ra ’e te mau ata i muri

Hō’ē ta’ata ’o Moroni te i’oa ’o te tāpena ïa o te mau nu’u ’āti Nephi. ’Ua ha’apāpū Moroni ē, ’ua ineine tāna mau nu’u nō te ’aro atu.

Alama 43:16–17

’Ua ineine te tāpena Moroni ’e te mau fa’ehau ’āti Nephi nō te ’aro atu

’Ua hōpoi mai te mau fa’ehau a Moroni i te mau mauiha’a tama’i, ’e ’ua hōro’a Moroni ia rātou i te mau ha’ana pāutuutu ’e te mau pāruru ’ōuma nō te pāruru ia rātou.

Alama 43:18–19

Te mau ’āti Lamana e hi’o ra i te mau nu’u ’āti Nephi ’e te huru ri’ari’a

’Ua ’āfa’i Moroni i tāna mau nu’u nō te ’aro atu i te mau ’āti Lamana. I te ’itera’a rā te mau ’āti Lamana i te mau ’āti Nephi e mau ha’ana ’e e mau pāruru ’ōuma tō rātou, ’ua ri’ari’a rātou i te ’aro atu. E ’ahu rairai noa tō te mau ’āti Lamana ’e ’aita e ha’ana tō rātou nō te pāruru ia rātou.

Alama 43:19–21

Te mau fa’ehau ’āti Lamana e horo ’ē ra i roto i te uru rā’au

’Ua tu’u’ati atu te mau ’āti Lamana. ’Ua tāmata rātou i te ne’e atu i te hō’ē fenua ’āti Nephi ’ē atu. ’Ua mana’o rātou ē, e’ita Moroni e ’ite i hea rātou e haere ai.

Alama 43:22

Tē moemoe ra te mau tu’umata ’āti Nephi i te mau fa’ehau ’āti Lamana e horo ’ē ra

I te fa’aru’era’a rā te mau ’āti Lamana, ’ua tono atu Moroni i te mau tu’umata nō te pe’e atu ia rātou.

Alama 43:23

Fa’ehau ’āti Nephi e fa’aro’o ra ia Alama

I muri iho, tono atu ra Moroni i te hō’ē ve’a i te peropheta Alama. ’Ua hina’aro ’oia ’ia ani Alama i te Fatu i te ’ohipa tā te mau ’āti Lamana e ’ōpua rā e rave. ’Ua parau te Fatu ia Alama ē, tē ’ōpua nei te mau ’āti Lamana e ’aro atu i te hō’ē fenua paruparu tei pi’ihia ’o Manti. ’Ua fa’aro’o Moroni ia Alama. ’Ua arata’i ’oia i tāna mau nu’u nō te ’aro atu i te mau ’āti Lamana.

Alama 43:23–33

Tē ’aro nei te mau fa’ehau ’āti Lamana ’e te mau fa’ehau ’āti Nephi te tahi ’e te tahi

’Ua ’aro te mau nu’u. Mea pūai a’e te mau ’āti Lamana ’e te riri ho’i. ’Ua ri’ari’a te mau ’āti Nephi i te mau ’āti Lamana ’e tē ha’amata ra i te horo ’ē. ’Ua fa’aha’amana’o rā Moroni ia rātou i tō rātou ’utuāfare ’e tō rātou fa’aro’o, nō reira ’ua tāmau noa rātou i te ’aro.

Alama 43:34–37, 43–48

Moroni e fa’atoro ra i tōna rima nō te tāpe’a i te ’arora’a

’Ua pure te mau ’āti Nephi i te Fatu nō te tauturu. ’Ua pāhono mai te Fatu i tā rātou pure ’e ’ua hōro’a mai ia rātou i te pūai rahi. I teienei, ’ua ri’ari’a te mau ’āti Lamana. ’Ua topa rātou i roto i te herepata ’e ’aita e ti’a ia rātou e horo ’ē atu. I tō Moroni ’itera’a ē ’ua ri’ari’a te mau ’āti Lamana, ’ua parau ’oia i tāna mau fa’ehau ’ia fa’aea te ’arora’a. ’Aita Moroni i hina’aro e taparahi pohe i te mau ’āti Lamana.

Alama 43:49–53; 44:1–2

Moroni e paraparau ra i te mau ’āti Lamana

’Ua parau Moroni ia Zerahemana ē, e nehenehe te mau ’āti Lamana e haere ’ē mai te mea e fafau rātou ē, e’ita rātou e ’aro fa’ahou i te mau ’āti Nephi. ’Ua riri Zerahemana ’e ’ua tāmata i te tāmau noa i te ’aro, ’aita rā i ti’a iāna ’ia upo’oti’a i ni’a i te mau fa’ehau a Moroni. I muri iho, ’ua fafau Zerahemana ’e tāna mau nu’u ’ia ora ma te hau, ’e ’ua vaiiho Moroni ia rātou ’ia haere ’ē atu.

Alama 44:1–20