Alama 50

E tāvini vahine ’āti Nephi

Tauturura’a ’ia pāruru i tōna nūna’a

Morianitona e tāpe’a ra te ti’arama ’e tē a’o ra i te naho’a ta’ata, ’e te hō’ē tāvini vahine i pīha’i mai

Tē ha’a nei te hō’ē tāvini vahine nō te hō’ē ti’a fa’atere ’āti Nephi ’o Morianitona te i’oa. Tē fa’atupu ra Morianitona i te ’ārepurepu i rotopū i te nūna’a. ’Ua aro atu ’oia i te hō’ē pupu ’āti Nephi ’e ’ua tāmata i te haru mai i tō rātou fenua. I muri iho, ’ua ’ōpua ’oia e rātere atu i te pae apato’erau ’e tōna mau ta’ata nō te haru mai i te fenua i reira.

Alama 50:25–30

te tāvini vahine e horo ’ē ra ia Morianitona i te pō

I te hō’ē mahana, ’ua riri Morianitona i te tāvini vahine. ’Ua hāmani ’ino roa ’oia iāna ’e ’ua ha’amāuiui iāna. ’Ua tāponi te tāvini vahine ’e ’ua horo atu i te pūhapa o te tāpena Moroni. ’Ua fa’ati’o ’oia ia Moroni i te mau ’ohipa ’ī’ino tā Morianitona i rave. ’Ua ti’aturi Moroni iāna.

Alama 50:30–31

te tāvini vahine e fa’a’ite ra i te hōho’a fenua ’e e paraparau ra i te tāpena Moroni

’Ua parau ato’a te tāvini vahine ē, tē hina’aro nei Morianitona e tere ’e e haru mai i te mau fenua i te pae apato’erau. ’Ua pe’ape’a roa Moroni. E nehenehe te mau ’āti Nephi e ha’afifihia mai te mea e haru Morianitona i te mau fenua i te pae apato’erau. E riro te reira e fa’a’ore i te ti’amāra’a o te mau ta’ata.

Alama 50:31–32

te tāvini vahine e hi’o ra ia Moroni ’e te nu’u

’Ua tono atu Moroni i te hō’ē nu’u nō te tāpe’a ia Morianitona. ’Ua aro te nūna’a o Morianitona i te nu’u ’e ’ua pau ihora. ’Ua fafau rātou ’ia vai hau noa ’e ’ua ho’i atu i tō rātou fenua. Maoti te fa’aarara’a a te tāvini vahine ia Moroni, ’ua vai pāruru-noa-hia te mau ’oire ’āti Nephi.

Alama 50:33, 35–36