« Abinadi ’e te ari’i Noa », Te mau ’ā’amu o te Buka a Moromona (2023)
Abinadi ’e te ari’i Noa
E poro’i nā te hō’ē peropheta
Tē fa’atere ra te ari’i Noa i te mau ’āti Nephi e ora ra i te fenua o Nephi. ’Ua fa’ahepo Noa i tōna nūna’a e hōro’a nāna e rave rahi moni ’e ’ua ha’amāu’a i te reira nō te ho’o i te mau tao’a nehenehe nōna iho. ’Ua pi’i ’oia i te mau tahu’a te’ote’o nō te tauturu iāna ’ia fa’atere. ’Aita Noa i ha’apa’o i te mau fa’auera’a a te Atua. Nō reira, ’ua rave ’oia i te mau ’ohipa ’ī’ino.
’Ua arata’i ato’a Noa i tōna nuna’a ’ia riro ’ei nūna’a ’ī’ino. ’Aita rātou i pe’e i te Fatu.
Tē ora ra te hō’ē peropheta a te Atua ’o Abinadi te i’oa i te fenua o Nephi. ’Ua tono atu te Fatu ia Abinadi e parau ia Noa ’e i tōna nūna’a ’ia tātarahapa.
’Ua parau Abinadi i te nūna’a ē, tē hina’aro nei te Fatu ’ia tātarahapa rātou. ’Ia ’ore rātou e tātarahapa, e vaiiho te Fatu i te mau ’enemi ’ia tomo mai i roto i tō rātou fenua ’e e fa’atere ia rātou. E fa’ariro tō rātou mau ’enemi i te orara’a ’ei mea fifi roa nō Noa ’e tōna nūna’a.
’Ua riri te nūna’a ia Abinadi nō te mea tāna i parau. ’Ua hina’aro rātou e taparahi pohe iāna, ’ua pāruru rā te Fatu ia Abinadi ’e ’ua tauturu iāna ’ia ora.
’Ua hina’aro ato’a Noa e taparahi pohe ia Abinadi. ’Aita Noa i ti’aturi i te Fatu. ’Aita ’ōna ’e tōna nuna’a i tātarahapa.
Piti matahiti i muri mai, ’ua tono te Fatu ia Abinadi nō te fa’aara i te nūna’a. ’Ua parau Abinadi i te nūna’a ē, e haru tō rātou mau ’enemi i te fenua nō te mea ’aita rātou i tātarahapa. ’Ua riri roa te nūna’a ia Abinadi. ’Ua parau rātou ē, ’aita rātou i rave i te ’ohipa ’ino ’e e’ita rātou e tātarahapa. ’Ua ruru’u rātou ia Abinadi ’e ’ua arata’i atu iāna i mua ia Noa.
’Ua fa’anaho Noa ’e tāna mau tahu’a i te hō’ē ’ōpuara’a. ’Ua tāmata te mau tahu’a i te rāmā ia Abinadi ma te ui iāna e rave rahi uira’a. ’Ua pāhono itoito rā Abinadi ia rātou. ’Ua māere roa te mau tahu’a i te mau pāhonora’a a Abinadi. ’Aita i roa’a ia rātou i te rāmā iāna. ’Ua parau Abinadi i te mau tahu’a ē, mea nounou rahi a’e nā rātou te moni i te ravera’a i te mea tano.
’Ua parau Noa i tāna mau tahu’a e taparahi pohe ia Abinadi. ’Ua fa’aara rā Abinadi ia rātou ’eiaha e tāpe’a noa mai iāna. ’Ua ’ana’ana tōna hōho’a mata i te mana o te Atua. ’Ua parau atu Abinadi ē, ’aita te mau tahu’a i ha’api’i i te mau ture a te Atua. ’Ua ha’api’i Abinadi ia rātou ē, e fānauhia mai Iesu Mesia, e pohe nō tātou, ’e e ti’afa’ahou mai. ’Ua parau ’oia e fa’a’ore Iesu i tā rātou hara mai te mea e tātarahapa rātou.
’Ua hōro’a-hope-roa Abinadi i te poro’i tā te Fatu i tono iāna ’ia hōro’a atu. Tē riri noa ra Noa. ’Ua parau ’oia i tāna mau tahu’a e haru ia Abinadi ’e e ha’apohe iāna.
’Ua ti’aturi te hō’ē tahu’a, ’o Alama, ia Abinadi. ’Ua tāmata Alama i te fa’aora ia Abinadi. I teienei rā, ’ua riri ato’a Noa ia Alama ’e ’ua fa’ahepo iāna ’ia haere ’ē.
’Ua parau te mau tahu’a ia Abinadi ē, e ora ’oia mai te mea e parau ’oia ē, e ’ere te mea tāna i ha’api’i i te parau mau. ’Ua parau rā Abinadi ē, ’ua ha’api’i ’oia i te parau mau. Taravana-fa’ahou-hia ihora Noa ’e tāna mau tahu’a. ’Ua ha’apohe rātou ia Abinadi i roto i te auahi. ’Ua tāmata ato’a te mau tīa’i o Noa e ha’apohe ia Alama. ’Ua tāpuni rā Alama ’e ’ua pāpa’i i te mau parau ato’a a Abinadi.