« Te ari’i Noa ’e te ari’i Limehi », Te mau ’ā’amu o te Buka a Moromona (2023)
Te ari’i Noa ’e te ari’i Limehi
Pāhemora’a mai i te mau ’āti Lamana
Tē fa’atere ra te ari’i Noa i te hō’ē pupu ’āti Nephi. ’Ua rave ’oia e rave rahi ’ohipa ’ī’ino, ’e ’ua riri te tahi mau ta’ata iāna. ’Ua ’aro te hō’ē ta’ata ’o Gideona te i’oa, ia Noa i te ’o’e. ’Ua horo ’ē atu Noa ’e ’ua pa’iuma atu i ni’a i te hō’ē pare. Nā ni’a mai i te pare, ’ua ’ite atu ’oia i te hō’ē nu’u ’āti Lamana i te haerera’a mai. ’Ua ha’avare atu Noa ē, tē pe’ape’a nei ’oia nō tōna nūna’a, nō reira ’ua vaiiho atu Gideona iāna ’ia ora.
Noa ’e tōna nūna’a e horo ’ē ra. ’Ua a’ua’u rā te mau ’āti Lamana ia rātou ’e ’ua ha’amata i te aro atu ia rātou. ’Ua parau atu Noa i te mau tāne e vaiiho atu i tō rātou ’utuāfare i muri ’e ’ia haere nā muri iāna.
’Ua haere atu te tahi mau tāne nā muri ia Noa. E rave rahi tāne tei mā’iti e fa’aea noa i pīha’i iho i tō rātou ’utuāfare. ’Ua mā’iti ato’a te tamaiti a Noa ’o Limehi e fa’aea mai.
E rave rahi tamāhine tei ti’a atu i mua i te nu’u ’e ’ua ani i te mau ’āti Lamana ’eiaha e hāmani ’ino i tō rātou mau ’utuāfare. ’Ua fa’aro’o te mau ’āti Lamana i te mau tamāhine ’e ’ua vaiiho i te mau ’āti Nephi ’ia ora. Teie ra, ’ua haru mai te mau ’āti Lamana i te mau ’āti Nephi.
’Ua hina’aro te mau tāne tei horo ’ē e ho’i i pīha’i iho tō rātou ’utuāfare. ’Ua tāmata Noa i te tāpe’a ia rātou, nō reira ’ua ha’apohe te mau tāne iāna. I muri iho, ’ua ho’i atu rātou i pīha’i iho i tō rātou ’utuāfare.
’Ua ’oa’oa roa te mau tāne i te mea ē, ’ua ora mai tō rātou ’utuāfare. ’Ua fa’ati’a rātou ia Gideona i te ’ohipa i tupu nō Noa.
’Ua mā’iti te nūna’a ia Limehi ’ia riro ’ei ari’i ’āpī nō rātou. ’Ua fafau Limehi i te ari’i o te mau ’āti Lamana ē, e ’aufau rātou nā te mau ’āti Lamana te ’āfara’a o tā rātou mau faufa’a ato’a. I tōna pae, ’ua fafau mai te ari’i o te mau ’āti Lamana ma te parau ē, e’ita ’oia e hāmani ’ino i te nūna’a o Limehi.
’Ua ora rātou i roto i te hau e rave rahi matahiti. I muri iho ’ua ha’amata te mau ’āti Lamana e hāmani ’ino i te nūna’a o Limehi. ’Ua hina’aro te nūna’a ’ia ti’amā fa’ahou rātou. ’Ua tāmata rātou i te ’aro i te mau ’āti Lamana, ’ua pau rā rātou. ’Ua pure te nūna’a i te Atua ’ia tauturuhia mai rātou.
I te hō’ē mahana, ’ua haere te hō’ē ’āti Nephi ’o Amona te i’oa e fārerei ia Limehi ’e i tōna nuna’a. Nō te hō’ē fenua mai o Amona i te haerera’a mai, tei pi’ihia ’o Zarahemela. ’Ua ’oa’oa Limehi i te ’itera’a ia Amona.
E nehenehe Amona e arata’i i te nūna’a o Limehi i Zarahemela, nā mua rā e ti’a ia rātou e pāhemo atu i te mau ’āti Lamana. E ’ōpuara’a tā Gideona
I te pō, ’ua hōro’a Gideona i te mau tīa’i ’āti Lamana i te tahi atu ā uaina nō te ha’avare’a ta’oto ia rātou. ’A ta’oto ai te mau tīa’i, ’ua horo ’ē Limehi ’e tōna nūna’a ato’a i rāpae i te ’oire.
’Ua haere atu rātou i Zarahemela ’e ’ua ’āmui atu i te mau ’āti Nephi i reira. ’Ua ha’api’i rahi mai ā Limehi ’e tōna mau ta’ata nō ni’a i te Atua. ’Ua fafau rātou, ’aore rā ’ua parau fafau ta’a ’ē, e tāvini i te Atua ’e e ha’apa’o i tāna mau fa’auera’a. ’Ua bāpetizohia rātou ’e ’ua riro mai ’ei mau melo nō te ’Ēkālesia a te Atua. ’Ua ha’amana’o rātou ē, ’ua tauturu mai te Atua ia rātou ’ia pāhemo i te mau ’āti Lamana.