« Amona », Te mau ’ā’amu o te Buka a Moromona (2023)
Amona
E tāvini ha’eha’a
’Ua hina’aro Amona ’e tōna mau taea’e e ha’api’i i te mau ’āti Lamana nō ni’a i te Fatu. ’Ua haere atu rātou i te fenua i reira te mau ’āti Lamana e ora ai. I ni’a i te ’ē’ati’a, ’ua ha’apae rātou i te mā’a ’e ’ua pure nō te ani i te Fatu i te tauturu. ’Ua tāmāhanahana te Fatu ia rātou. ’Ua parau ’oia ia rātou ’ia fa’a’oroma’i ’e ’ia riro ’ei mau hi’ora’a maita’i. ’Ua haere rātou tāta’itahi i te mau vāhi ta’a ’ē nō te ha’api’i atu.
’Ua haere Amona i te hō’ē vāhi tei pi’ihia ’Īsemā’ela. ’Ua tā’amu’amu te mau ta’ata i te reira vāhi iāna ’e ’ua ’āfa’i atu iāna i te ari’i Lamoni ra. ’Ua parau Amona i te ari’i Lamoni ē, tē hina’aro nei ’oia e ora i rotopū i te mau ’āti Lamana. ’Ua au roa Lamoni ia Amona ’e ’ua fa’ati’amā ’oia iāna. ’Ua hina’aro te ari’i ’ia fa’aipoipo Amona i te hō’ē o tāna mau tamāhine, ’ua mā’iti rā Amona ’ia riro ’ei tāvini nō Lamoni.
’Ua parau Lamoni ia Amona ’ia aupuru i tāna mau ’ānimara. I te hō’ē mahana, ’ua ’āfa’i Amona ’e te tahi atu mau tāvini i te mau ’ānimara e fa’ainu i te pape. ’A inu noa ai te mau ’ānimara, ’ua haere mai te feiā ’eiā e fa’ari’ari’a i te mau ’ānimara. ’Ua mata’u te tahi atu mau tāvini ’ia fa’autu’ahia rātou nō te mo’era’a te mau ’ānimara a Lamoni.
’Ua ’ite Amona ē, teie te taime nō te fa’a’ite i te mana o te Fatu. ’Ua parau ’oia i te tahi atu mau tāvini ’eiaha e ha’ape’ape’a ’e ’ua tauturu ia rātou ’ia ’imi haere mai i te mau ’ānimara tei mo’e.
’Ua ho’i fa’ahou mai te feiā ’eiā e fa’ari’ari’a fa’ahou i te mau ’ānimara. I te reira rā taime, ’ua parau Amona i te tahi mau tāvini ’ia fa’aea noa ’e ’ia tāpe’a i te mau ’ānimara ’eiaha ’ia horo ’ē.
’Ua haere Amona e tāpe’a i te feiā ’eiā ’eiaha ’ia fa’ari’ari’a i te mau māmoe. ’Aita te feiā ’eiā i mata’uri’i a’e ia Amona. ’Ua mana’o rātou e mea pūai a’e rātou iāna. ’Aita rā rātou i ’ite ē, tē tauturu nei te Fatu ia Amona.
’Ua tāora Amona i te mau ’ōfa’i i ni’a i te feiā ’eiā ma tāna pata ’ōfa’i. Vetahi ’o rātou ’ua pohe roa. ’Ua fa’ariri te reira i te tahi atu feiā ’eiā, ’e ’ua hina’aro rātou e taparahi pohe ia Amona. ’Ua māere roa rātou nō te mea ’aita Amona e tano i tā rātou mau ’ōfa’i. ’Aita rātou i mana’o ē, mai te reira te pūai rahi o Amona.
’Ua tāmata te feiā ’eiā i te tā’iri ia Amona i tā rātou mau rā’au rahi. Terā rā, i te mau taime ato’a ’a tāmata ai rātou, e tāpū Amona i tō rātou rima i tāna ’o’e, ’ia ’ore rātou ’ia ’aro mai. ’Aita i maoro roa, ’ua mata’u roa rātou i te tāmau noa i te ’aro ’e ’ua horo ’ē atu ra.
’Ua parau te mau tāvini ia Lamoni nāhea tō Amona fa’aorara’a i te mau ’ānimara. ’Ua maere Lamoni. ’Ua mana’o ’oia ia Amona ’o te Vārua Rahi, e mana rahi tōna ’e ’ua ’ite ’oia i te mau mea ato’a.
’Ua hina’aro Lamoni e paraparau ia Amona, ’ua pe’ape’a ato’a rā ’oia.
’Ua haere Amona e hi’o ia Lamoni, ’aita rā Lamoni i ’ite e aha te parau. ’Ua tauturu te Fatu ia Amona ’ia ’ite i te mau mana’o o Lamoni. ’Ua parau atu Amona iāna e ’ere ’oia te Vārua Rahi. ’Ua parau Amona ia Lamoni ē, te Vārua Rahi o te Atua ïa. ’Ua hina’aro Lamoni ’ia ha’api’i rahi mai ā nō ni’a i te Atua.
’Ua parau Amona ē, ’ua poiete te Atua i te ao nei ’e te mau ta’ata ato’a e ora nei i ni’a iho. I muri iho parau a’e ra Amona ia Lamoni ē, e fa’anahora’a nō te fa’aorara’a tā te Atua. ’Ei tuha’a nō taua fa’anahora’a ra, e haere mai Iesu Mesia. ’Ua ti’aturi Lamoni i te mea tā Amona i parau. ’Ua pure Lamoni ’e ’ua ani i te Atua ’ia aroha mai iāna ’e tōna nūna’a.