« Abisa », Te mau ’ā’amu o te Buka a Moromona (2023)
Abisa
Tauturura’a i tōna nūna’a ’ia ti’aturi ia Iesu
’Ua rave ’ohipa Abisa nā te hō’ē ari’i vahine ’āti Lamana. ’Ua ha’api’i mai Abisa nō ni’a ia Iesu Mesia nā roto mai i te hō’ē ’ōrama nō tōna metua tāne. E rave rahi matahiti, ’ua ti’aturi ’oia ia Iesu ’e ’ua hina’aro e pe’e iāna. ’Aita rā ’oia i parau a’e i te tahi atu mau ’āti Lamana.
I te hō’ē mahana, ’ua haere mai te hō’ē ’āti Nephi ’o Amona te i’oa i te bāsileia, nō te ha’api’i i te mau ’āti Lamana nō ni’a ia Iesu ’e te Atua. ’Ua ti’aturi te ari’i vahine ’e te ari’i i te mea tā Amona i ha’api’i. ’Ua ’ite te ari’i vahine ’e te ari’i ē, e haere mai Iesu i te fenua nei ’e e rave nō te mau ta’ata ato’a e ti’aturi iāna ’ia fa’a’orehia tā rātou mau hapa.
Alama 17:12–13; 18:33–36, 39–40; 19:9, 13
’Ua putapū te ari’i vahine ’e te ari’i i te Vārua Maita’i ’e nō tō rāua ’oa’oa rahi topa a’era rāua i ni’a i te repo. ’Ua topa ato’a a’era Amona ’e te mau tāvini. ’O Abisa ana’e te ta’ata e ti’a ra.
’Ua hina’aro Abisa e fa’ati’a i te mau ta’ata i teie temeio. Tē tīa’i rahi nei ’oia ē, e ti’aturi te mau ta’ata i te mana o te Atua ’ia ’ite ana’e rātou i te ’ohipa i tupu. Nō reira, ’ua horo atu Abisa i terā fare ’e terā fare. ’Ua parau ’oia i te nūna’a ’ia haere e hi’o i te mea tā te Atua i rave nō te ari’i vahine ’e te ari’i.
E rave rahi ta’ata tei haere i te fare o te ari’i vahine ’e o te ari’i. ’Ua māere roa rātou nō te mea e au ra ē ’ua pohe te ari’i vahine, te ari’i, ’e tā rāua mau tāvini ato’a.
’Ua tapitapi te mana’o o te mau ta’ata. ’Ua ’aimārō rātou nō te ’ohipa i tupu i te ari’i vahine ’e te ari’i.
I te ho’ira’a mai Abisa, tē ’ite nei ’oia i te mau ta’ata e ’aimāro ra. ’Ua ’oto ’oia nō te mea ’aita rātou e ’ite ra i te mana o te Atua. I muri iho, ’ua rave mai ’oia i te rima o te ari’i vahine ’e ’ua ti’a mai ra te ari’i vahine ’e ’ua ’ārue ia Iesu.
’Ua rave mai te ari’i vahine i te rima o tāna tāne, ’e ’ua ti’a mai ra ’oia i ni’a. ’Ua parau te ari’i i te nūna’a nō ni’a ia Iesu. I muri iho, ti’a mai ra Amona ’e te tahi atu mau tāvini i ni’a. ’Ua parau pā’āto’a rātou i te nūna’a ē, ’ua taui Iesu ia rātou. I teienei, ’ua hina’aro rātou e rave noa i te mau mea maita’i. E rave rahi ta’ata tei ti’aturi ia rātou.
Mai tā Abisa i ti’aturi nā, ’ua ’ite mata te nūna’a i te mana o te Atua. E rave rahi ta’ata tei ti’aturi ia Iesu ’e tei bāpetizohia. Tei ia rātou te Vārua o te Atua. ’Ua ha’amau ato’a rātou i te ’Ēkālesia i roto i tō rātou fenua. ’Ua ’ite mata rātou ē, e tauturu Iesu i te ta’ata ato’a ’o tē tātarahapa ’e ’o tē ti’aturi iāna.