« Alama i te mau pape nō Moromona », Te mau ’ā’amu o te Buka a Moromona (2023)
Alama i te mau pape nō Moromona
Te rirora’a ’ei nūna’a nō te Atua
E tahu’a Alama nō te hō’ē ari’i ’o Noa te i’oa. ’Ua tāmata Alama i te fa’aora ia Abinadi, te hō’ē peropheta a te Atua, tei taparahi-pohe-hia e Noa. ’Ua riri rā Noa ia Alama ’e ’ua hina’aro e ha’apohe ato’a ia Alama. ’Ua horo ’ē atu ra Alama ia Noa nō te pāruru iāna. ’Ia ao, e tāpuni Alama i pīha’i iho i te hō’ē vāhi tei pi’ihia te mau pape nō Moromona.
’Ua ti’aturi Alama i te mea tā Abinadi i ha’api’i nō ni’a ia Iesu Mesia. ’Ua ani ’oia i te Atua ’ia fa’a’ore mai i tāna mau hara ’e i tāna mau hape.
E fārerei ’ōmo’e Alama i te mau ta’ata ’e e ha’api’i ia rātou nō ni’a ia Iesu ’Ua ha’api’i ’oia i te mau ta’ata ato’a e hina’aro e fa’aro’o mai.
E rave rahi ta’ata tei ti’aturi ia Alama. ’Ua haere atu rātou i te mau pape nō Moromona nō te fa’aro’o ia Alama ’ia ha’api’i.
’Ua hina’aro te feiā i ti’aturi ’ia pi’ihia rātou te nūna’a o te Atua, e tauturu i te feiā hepohepo, ’e e paraparau i te ta’ata nō ni’a i te Atua. Nō reira ’ua ani Alama ia rātou ’ia bāpetizohia. Nā roto i te bāpetizora’a, e fafau rātou ’aore rā e parau fafau rātou i te Atua e tāvini iāna ’e e ha’apa’o i tāna mau fa’auera’a. I tōna pae, e ha’amaita’i mai te Atua ia rātou nā roto i tōna Vārua.
’Ua ’oa’oa roa te nūna’a. ’Ua pōpō rātou ’e ’ua parau mai ē, tē hina’aro nei rātou ’ia bāpetizohia rātou. ’Ua bāpetizo tāta’itahi Alama ia rātou i roto i te mau pape nō Moromona. ’Ua ’ī rātou pā’āto’a i te Vārua o te Atua ’e ’ua putapū i te here o te Atua nō rātou. ’Ua riro mai rātou ’ei melo nō te ’Ēkālesia a te Mesia.
’Ua ’ite Noa ē, tē fa’aru’e ra te tahi pae o tōna mau ta’ata i tōna fenua. ’Ua tono ’oia i te mau tāvini nō te hi’o haere ia rātou. ’Ua ’ite te mau tāvini i te nūna’a i te haerera’a i te fenua o Moromona nō te fa’aro’o i te mau ha’api’ira’a a Alama. ’Ua riri roa Noa. ’Ua tono ’oia i tōna nu’u nō te taparahi pohe ia Alama ’e i te mau ta’ata tā Alama e ha’api’i ra.
’Ua fa’aara te Atua ia Alama nō ni’a i te nu’u. Nā roto i te tauturu a te Atua, ’ua fa’aru’e Alama ’e tōna mau ta’ata i te fenua ma te pāruruhia. ’Aita rātou i roa’a i te haruhia e te nu’u. ’Ua haere rātou e va’u mahana nā roto i te medebara ’e ’ua tae atu i te hō’ē fenua nehenehe. ’Ua patu rātou i te mau fare ’āpī i reira. ’Ua ha’api’i Alama i te nūna’a, ’e ’ua tāpe’a i tā rātou fafaura’a i te Atua.