« Te tumu rā’au nō te ora », Te mau ’ā’amu o te Buka a Moromona (2023)
« Te tumu rā’au nō te ora », Te mau ’ā’amu o te Buka a Moromona
Te tumu rā’au nō te ora
Te moemoeā fa’auruhia a Lehi
I te hō’ē pō, ’ua fa’ari’i Lehi i te hō’ē moemoeā nō ’ō mai i te Fatu ra. ’Ua fa’ati’a ’oia i tōna ’utuāfare i teie moemoeā.
I roto i tāna moemoeā, ’ua ’ite Lehi i te hō’ē ta’ata tei ’ahu i te hō’ē ’ahu ’uo’uo. ’Ua parau taua ta’ata ra ia Lehi ’ia pe’e iāna.
’Ua ’ite ’o Lehi tei roto ’oia i te hō’ē vāhi pōiri ’e te ta’ata ’ore. ’Ua haere ’āvae ’oia e rave rahi hora i te maoro. ’Aita rā te pōiri i haere ’ē atu. I te pae hope’a, ’ua pure Lehi nō te tauturu.
I te otira’a tāna pure, ’ua ’ite ’oia i te hō’ē ’āua rahi. I roto i taua ’āua ra, e tumu rā’au ïa ’e tōna hotu teatea ho’i. ’Ua mana’o ’o Lehi e fa’a’oa’oa te hotu iāna, ’e nō reira ’ua ’amu ’oia. ’Ua ’ī tōna vairua i te ’oa’oa.
Mea au maita’i te hotu, hau a’e i te tahi atu mau hotu. E mea monamona ’e te mārū ho’i. ’Ua hina’aro Lehi e fa’atāmata i te reira i tōna ’utuāfare. ’Ua ’ite ’oia ē, e fa’a’oa’oa ato’a te reira ia rātou. ’Ua ’ite atu ra Lehi ia Saria, Samu ’e ia Nephi i te ti’a-noa-ra’a i pīha’i iho i te hō’ē ’ānāvai. E au ē ’ua mo’e rātou. ’Ua pi’i atu ra ’o Lehi ia rātou ma te reo pūai. ’Ua ani iho ra ’oia ia rātou ’ia haere mai ’e e ’amu i te hotu ra.
’Ua haere mai ra ’o Saria, Samu ’e ’o Nephi i te tumu rā’au ra ’e ’amu a’era i taua hotu ra. ’Ua ’imi Lehi ia Lamana ’e ia Lemuela. ’Ua hina’aro ato’a ’oia ia rāua ’ia fa’ari’i i te ’oa’oa o taua hotu ra. ’Aita rā rāua i haere mai e ’amu i te mā’a hotu ra.
’Ua ’ite a’era Lehi i te hō’ē ’ē’a ’e te hō’ē ’āuri tei arata’i atu i te tumu rā’au ra. ’Ua ’ite ’oia e rave rahi ta’ata e hāhaere ra nā ni’a i taua ’ē’a ra. I reira iho, tae mai nei te hō’ē pōiri me’ume’u. Nō te pōiri ho’i e mea fifi roa ’ia hi’o. Hō’ē noa rāve’a nō te haere i te tumu rā’au ra, ’o te tāpe’a-pāpū-ra’a ïa i te ’āuri.
’Ua fa’aru’e te tahi mau ta’ata i te ’ē’a ’e ’ua mo’e rātou. Vetahi ’ua tāpe’a maita’i i te ’āuri ’e ’ua tāmau ā i te haere i mua.
’Ia tae rātou i te tumu rā’au ra, ’ua ’amu rātou i te hotu.
Hi’o a’era Lehi i ni’a ’e ’ua ’ite atu ra i te hō’ē fare rahi tei ’ī i te ta’ata e rave rahi. ’Ua fa’ao’ō’o rātou i te mau ta’ata tei ’amu i te hotu ra. Vetahi pae o tei ’amu i te hotu ’ua ha’amā ïa i te feiā tei fa’ao’ō’o ia rātou, nō reira ’ua fa’aru’e rātou i te tumu rā’au. ’Ua hahi ’ē atu rātou ’e ’ua mo’e roa atu.
I roto i tāna moemoeā, ’ua ’ite ’o Lehi e rave rahi ta’ata tei tāpe’a pāpū i te ’āuri. ’Ua haere rātou i mua hō’ē tu’ura’a ’āvae i muri i te tahi ē tae atu i te tumu rā’au. I muri iho ’ua tūturi rātou i mua i te tumu rā’au ’e ’ua ’amu i te hotu. ’Aita rātou i fa’aro’o i te mau ta’ata i roto i te fare rahi. ’Ua mā’iti rātou e fa’aea i pīha’i iho i te tumu rā’au.
I tō Lehi arara’a mai, ’ua ha’ape’ape’a ’oia nō Lamana ’e nō Lemuela. ’Aita rāua i ’amu i te hotu i roto i tāna moemoeā. ’Ua here ’o Lehi ia Lamana ’e ia Lemuela. ’Ua hina’aro ’oia ia rāua ’ia ha’afātata noa i te Fatu. ’Ua ani ’oia ia rāua ’ia ha’apa’o i te mau fa’auera’a a te Atua.