Teanekuma ’e ’o Moroni

Fa’a’itera’a i te itoito rahi

Amorona ’e te nu’u ’āti Lamana e ’aro ra i te nu’u ’āti Nephi

I muri a’e i te pohera’a o Amalikia, ’ua riro mai tōna taea’e ’o Amorona ’ei ari’i ’āti Lamana. ’Ua tāmau noa Amorona i te ’aro i te mau ’āti Nephi. ’Ua tupu te tama’i e rave rahi matahiti. ’Ua ha’amata te mau ’āti Nephi i te upo’oti’a, nō reira ’ua horo ’ē atu te mau nu’u ’āti Lamana ato’a i roto i te hō’ē ana’e ’oire. ’Ua haere Moroni, Teanekuma, ’e te hō’ē atu tāpena ’āti Nephi e tāpapa i te mau ’āti Lamana ’e tō rātou mau nu’u.

Alama 52:3–4 ; 54:16–24 ; 62:12–35

Hōho’a

Teanekuma e tāpe’a ra i te hō’ē tāvero ’e ’ua ha’afātata atu i te ’oire i te pō

’Ua riri roa Teanekuma nō te mea ’ua fa’atupu ’Amalikia ’e ’o Amorona i teie tama’i rahi, te roa. Nō te tama’i, e rave rahi ta’ata tei pohe ’e ’ua iti roa te mā’a. ’Ua hina’aro Teanekuma ’ia fa’aea te tama’i. ’Ua tomo atu ’oia i roto i te ’oire i te pō nō te ’imi ia Amorona.

Alama 62:35–36

Hōho’a

Teanekuma e tāpe’a ra i te hō’ē taura ’e te ’ānohi ’e ’ua ’ōu’a atu nā ni’a i te patu

’Ua pa’i’uma Teanekuma nā ni’a i te patu o te ’oire. ’Ua haere ’oia nō roto i te ’oire e tae roa ’ua ’itehia mai iāna te vāhi i reira Amorona i te ta’otora’a.

Alama 62:36

Hōho’a

Teanekuma e ti’a ra i te vāhi tomora’a o te fare ie ’e te tāvero ’e te taura

’Ua tāora Teanekuma i te tāvero i ni’a ia Amorona. ’Ua puta te reira i pīha’i iho i tōna māfatu. ’Ua fa’aara rā Amorona i tōna mau tāvini hou ’oia ’a pohe ai.

Alama 62:36

Hōho’a

Teanekuma i mua i te mau fa’ehau ’āti Lamana ’e tā rātou mau ’ōmore

’Ua tāpapa te mau tāvini o Amorona ia Teanekuma ’e ’ua taparahi pohe iāna. ’Ua oto roa te tahi feiā fa’atere ’āti Nephi i te pohera’a Teanekuma. ’Ua ’aro itoito ’oia nō te ti’amāra’a o tōna mau ta’ata.

Alama 62:36–37

Hōho’a

’ua haru mai te mau fa’ehau ’āti Nephi i te mau fa’ehau ’āti Lamana

Noa atu ’ua pohe ’oia, ’ua tauturu Teanekuma i te mau ’āti Nephi ’ia manuia i te tama’i. ’Ua fa’a’ere ’oia i te mau ’āti Lamana i tō rātou ti’a fa’atere. I te po’ipo’i a’e, ’ua ’aro Moroni i te mau ’āti Lamana ’e ’ua upo’oti’a. ’Ua fa’aru’e te mau ’āti Lamana i te fenua o te mau ’āti Nephi, ’e ’ua fa’aea te tama’i.

Alama 62:37–38

Hōho’a

Te tāpena Moroni e fa’atere nei i te mau tāne e patu nei i te hō’ē ’oire, ’e tē māta’ita’i ra te mau ’utuāfare

’Ua tae mai te hau i te pae hope’a. ’Ua ’ohipa itoito Moroni nō te fa’ariro i te fenua o te mau ’āti Nephi ’ei vāhi pāruruhia i te mau ’āti Lamana. I muri iho ’ua ho’i Moroni i te fare nō te ora ma te hau. ’Ua ha’api’i te mau peropheta i te ’evanelia ’e ’ua arata’i i te ’Ēkālesia a te Atua. ’Ua ti’aturi te nuna’a i te Fatu, ’e ’ua ha’amaita’i ’oia ia rātou.

Alama 62:39–51