1 Nephi 1–2

’Ua fa’aru’e Lehi ’e ’o Saria ia Ierusalema

Te fa’aarara’a a te Fatu i te hō’ē ’utuāfare

’Ua ora ’o Lehi ’e ’o Saria i Ierusalema ’e tā rāua mau tamari’i. ’Ua ’ite Lehi i te hō’ē ’ōrama nō ’ō mai i te Fatu. ’Ua ’ite ’oia ē, e haere mai te hō’ē Fa’aora i te ao nei ’ia tae i te hō’ē mahana. ’Ua fa’a’ite ato’a te Fatu iāna ē, e ha’amouhia Ierusalema.

1 Nephi 1:4–18

’Ua parau Lehi i te mau ta’ata nō ni’a i tāna ’ōrama. ’Ua parau ’oia ia rātou ē, e haere mai Iesu Mesia i te hō’ē mahana nō te fa’aora i tō te ao nei.

1 Nephi 1:18–19

’Ua parau ato’a Lehi i te mau ta’ata ē e ha’amouhia Ierusalema. ’Ua ani ’oia ia rātou ’ia tātarahapa.

1 Nephi 1:14, 18–19

’Ua riri te mau ta’ata. ’Ua paraparau fa’ahou te Fatu ia Lehi i roto i te hō’ē moemoeā. ’Ua ha’api’i mai Lehi ē, e’ita ’oia ’e tōna ’utuāfare e pāruruhia i Ierusalema. E mea ti’a ia rātou ’ia fa’aru’e i reira.

1 Nephi 1:19–20 ; 2:1–2

’Ua ha’apa’o Lehi ’e ’o Saria i te parau a te Fatu. ’Ua fa’aru’e rātou i te ’oire ’e tō rātou ’utuāfare. E maha tamāroa tā Lehi ’e Saria, ’o Lamana, Lemuela, Samu ’e ’o Nephi. Tītauhia ia rātou ’ia fa’aru’e i tō rātou fare ’e tā rātou mau faufa’a maitata’i.

1 Nephi 2:3–5

’Ua rātere te ’utuāfare nā roto i te mēdēbara i pīha’i iho i te miti ’Ute’ute. ’Ua ha’amāuruuru Lehi i te Fatu nō te ha’amaita’ira’a i tōna ’utuāfare. ’Ua ha’api’i ’oia i tōna ’utuāfare ’ia pe’e i te Fatu ’e ’ia ha’apa’o i tāna mau fa’auera’a.

1 Nephi 2:5–10

’Ua amuamu Lamana ’e ’o Lemuela. ’Ua mihi rāua i tō rātou fare ’e i te mau tao’a ato’a tā rātou i vaiiho i muri. ’Aita rāua i māramarama nō te aha te Fatu i ani ai ia rātou ’ia haere i rāpae. ’Aita rāua i ti’aturi ē e nehenehe te hō’ē ’oire rahi mai ia Ierusalema e mou.

1 Nephi 2:11–13

’Ua mana’o Lamana ’e ’o Lemuela ē, e ta’ata hāha’anūnui ’o Lehi. E aha tē tupu mai ’āhani tō rātou ’utuāfare i mo’e na i roto i te mēdēbara ē a muri noa atu ?

1 Nephi 2:11

’Ua hina’aro Nephi ’ia ’ite ato’a ’oia iho ē, e parau mau ānei tā Lehi. ’Ua pure ’oia i te Fatu ’e ’ua ani ’oia iāna.

1 Nephi 2:16

’Ua tono mai te Fatu i te Vārua Maita’i nō te tauturu ia Nephi ’ia ti’aturi i te mau parau a tōna metua tāne. ’Ua ti’aturi Nephi i te Fatu ’e ’ua fa’a’ite i te mea tāna i ha’api’i mai i tōna mau taea’e. ’Ua fa’aro’o ’o Samu ia Nephi ’e ’ua ti’aturi iāna, ’aita rā ’o Lamana ’e ’o Lemuela i fa’aro’o.

1 Nephi 2:16–18