Alama 14

Alama ’e ’o Amuleka i roto i te fare tāpe’ara’a

Te fa’aro’o i te Fatu i roto i te mau taime fifi

Alama ’e ’o Amuleka ’e te mau tīa’i

’Ua ha’api’i Alama ’e ’o Amuleka i te ’evanelia i roto i te ’oire nō Amoniha. ’Ua ti’aturi te tahi mau ta’ata i te Fatu ’e ’ua tātarahapa. E rave rahi rā ta’ata tei riri ia Alama ’e ia Amuleka ’e ’ua hina’aro e ha’amou ia rāua. ’Ua ruru’u te feiā riri ia Alama ’e ia Amuleka i te taura ’e ’ua arata’i atu i nā ta’ata i mua i te ha’avā rahi o te ’oire.

Alama 8:29–30 ; 14:1–4

Alama ’e ’o Amuleka ma tō rāua rima i ruru’uhia

’Aita te ha’avā rahi i ti’aturi ē, e tītauhia i tōna nūna’a ’ia tātarahapa. ’Ua riri te nūna’a ia Alama ’e ia Amuleka. ’Ua fa’ahepo rātou i te mau tāne tei ti’aturi i te mea tā Alama ’e tā Amuleka i ha’api’i, ’ia haere i rāpae i te ’oire. I muri iho, ’ua taora rātou i roto i te auahi te mau vahine ’e te mau tamari’i tei ti’aturi i te Fatu.

Alama 14:3, 5–9, 14, 16

Amuleka ’e ’o Alama i roto i te ’oto rahi

E ’oto rahi tō Amuleka i te ’itera’a ’oia i te ta’ata e māuiui ra. ’Ua ani ’oia ia Alama ia fa’a’ohipa i te mana o te Atua nō te fa’aora ia rātou. ’Ua parau rā Alama ē, e’ita te Vārua o te Atua e vaiiho iāna ’ia nā reira. ’Ua parau ’oia ia Amuleka ē, tei te Fatu ra te mau vahine ’e te mau tamari’i. E ha’avā te Fatu i te mau ta’ata tei ha’apohe ia rātou.

Alama 14:9–11

te ha’avā rahi e ’ata ra

’Ua fa’ao’ō’o te ha’avā rahi ia Alama ’e ia Amuleka, nō te mea ’aita te Fatu i pāruru i te mau vahine ’e te mau tamari’i. ’Ua ’āfa’i ’oia ia Alama ’e ia Amuleka i roto i te fare tāpe’ara’a.

Alama 14:14–17

Alama ’e Amuleka i roto i te fare tāpe’ara’a

Toru mahana i muri iho, ’ua haere atu te ha’avā rahi ’e tāna mau tahu’a ha’avare i te fare tāpe’ara’a. ’Ua ui atu rātou e rave rahi uira’a. ’Aita rā Alama ’e ’o Amuleka i pāhono atu ia rātou.

Alama 14:18–19

te ha’avā rahi e fa’ao’ō’o ra ia Alama ’e ia Amuleka i roto i te fare tāpe’ara’a

E mea ’ino mau te ha’avā rahi ’e tāna mau tahu’a i ni’a ia Alama ’e ia Amuleka. ’Aita ato’a rātou i hōro’a i te mā’a ’e te pape nā Alama ’e nā Amuleka. ’E ’ua fa’ao’ō’o rātou i te mea tā Alama ’e tā Amuleka i ha’api’i.

Alama 14:19–22

Amuleka ’e ’o Alama tei tā’amu’amuhia ’e te ha’avā rahi ’aita i ātea roa.

E rave rahi mahana tō Alama ’e tō Amuleka māuiuira’a. ’Ua haere fa’ahou mai te ha’avā rahi ’e tāna mau tahu’a. ’Ua parau ’oia ia Alama ’e ia Amuleka ē, mai te mea e mana o te Atua tō rāua, e ti’a ïa ia rāua e tātara i te mau taura tei ruru’uhia ia rāua. I reira ’oia e ti’aturi ai ia rāua.

Alama 14:23–24

Amuleka ’e ’o Alama e ti’a ra

’Ua putapū Alama ’e ’o Amuleka i te mana o te Atua. Tiʼa a’era rāua i ni’a. E fa’aro’o tō Alama i te Fatu ’e ’ua ani i te mana ’ia tātara i te mau taura.

Alama 14:25–26

te mātarara’a te mau taura

’Ua mātara te mau taura ia Alama rāua Amuleka. ’Ua ri’ari’a te ha’avā rahi ’e tāna mau tahu’a. ’Ua tāmata rātou i te horo ’ē, ’ua ha’amata rā te fenua i te ’āueue.

Alama 14:26–27

Amuleka ’e ’o Alama i ni’a i te vāhi teitei o te fare tāpe’ara’a tei pararī-hu’ahu’a-roa

Topa ihora te mau papa’i o te fare tāpe’ara’a i ni’a i te ha’avā rahi ’e i tāna mau tahu’a ’e ’ua pohe rātou. ’Ua pāruru maita’i rā te Fatu ia Alama ’e ia Amuleka. I te fa’aro’ora’a te mau ta’ata i te taparuru, ’ua horo mai rātou e hi’o i te ’ohipa e tupu ra. ’O Alama ’e o Amuleka ana’e tei haere mai i rāpae i te fare tāpe’ara’a. Nō tō rātou ri’ari’a rahi ia Alama ’e ia Amuleka, ’ua horo ’ē atu rātou.

Alama 14:27–29