Mosia 25–28 ; Alama 36

Alama tamaiti

Hō’ē tauira’a pūai hope

’Ua hōro’a te ari’i Mosia ia Alama i te mana nō te fa’atere i te ’Ēkālesia i Zarahemela. ’Ua ha’api’i Alama i te nūna’a ’ia tātarahapa ’e ’ia roa’a te fa’aro’o i te Fatu.

Mosia 25:19–24 ; 26

E tamaiti tā Alama tei pi’i-ato’a-hia ’o Alama. ’Aita Alama tamaiti i ti’aturi i te mea tā tōna metua tāne i ha’api’i.

Mosia 27:8

E mau tamaiti tā Mosia tei ’ore ato’a i ti’aturi i te Fatu. E mau hoa rātou nō Alama tamaiti. ’Ua hina’aro rātou pā’āto’a ’ia fa’aru’e te mau ta’ata i te ’Ēkālesia. ’Ua arata’i Alama ’e te mau tamaiti a Mosia e rave rahi ta’ata ’ia rave i te mau ’ohipa e pāto’i i te mau fa’auera’a a te Atua.

Mosia 27:9–10 ; Alama 36:6

I te hō’ē mahana, ’ua tono te Fatu i te hō’ē melahi nō te tāpe’a ia rātou. ’Ua parau te melahi ia rātou ’ia fa’aea i te tāmata i te ha’amou i te ’Ēkālesia. Nō te mata’u rahi o Alama ’e te mau tamaiti a Mosia, ’ua ma’iri ihora rātou i raro.

Mosia 27:11–18 ; Alama 36:6–9

’Aita Alama e nehenehe e paraparau ’aore rā e ha’utiuti e toru mahana ’e e toru pō. ’Ua māuiui roa ’oia nō te mau mea hape ato’a tāna i rave. ’Ua pe’ape’a ato’a ’oia nō te mea ’ua arata’i ’ē atu ’oia e rave rahi ta’ata i te Fatu.

Mosia 27:19 ; Alama 36:10–16

Nō te māuiui rahi tā Alama e putapū nei nō tāna mau hara. ’Ua ha’amana’o ’oia i muri iho, i tōna metua tāne i te paraparaura’a nō ni’a ia Iesu Mesia, te Tamaiti a te Atua.

Alama 36:17

’Ua pure Alama ’ia fa’a’ore mai Iesu i tāna mau hara. I muri a’e i tōna purera’a, ’aita ’oia i ha’amana’o fa’ahou i tōna māuiui. ’Ua ’ite ’oia ē, ’ua fa’a’ore te Fatu i tāna hara. ’Aita ’oia i māuiui fa’ahou i tāna mau hara. ’Aita rā, ’ua ’oa’oa roa Alama.

Mosia 27:24, 28–29 ; Alama 36:18–22

’Ua ho’i fa’ahou mai te pūai o Alama. ’Ua fa’aoti ’oia ’e te mau tamaiti a Mosia e tātarahapa ’e e tāmata i te tātā’i i te mau māuiui ato’a tā rātou i fa’atupu. ’Ua tāvini rātou i te Fatu mai taua taime ra nā roto i te tauturura’a ia vetahi ’ē ’ia tātarahapa. ’Ua rātere rātou nā roto i te fenua tā Mosia i fa’atere ’e i ha’api’i i te nūna’a nō ni’a ia Iesu.

Mosia 27:20–24, 32–37 ; Alama 36:23–26

’Ua hina’aro Alama ’e te mau tamaiti a Mosia e fa’a’ite i te ’oa’oa, tā te mau ha’api’ira’a a Iesu i hōpoi mai i roto i tō rātou orara’a. ’Ua ha’a itoito rātou nō te tāvini i te Fatu ’e i te nūna’a. ’Ua mā’iti te mau tamaiti a Mosia e haere ’e e ha’api’i i te mau ’āti Lamana nō ni’a ia Iesu. ’Ua mā’iti Alama e fa’aea noa ’e e tāmau noa i te ha’api’i i te ’āti Nephi.

Mosia 27:32–37 ; 28:1–10 ; 29:42–43