Alama 23–27

Te mau Aniti-Nephi-Lehi

Te mau ta’ata tei mā’iti e here i tō rātou mau ’enemi

E rave rahi ’āti Lamana tei ha’api’i mai nō ni’a i te Atua nā roto mai ia Amona ’e tōna mau taea’e. E fa’aro’o pūai tō teie mau ’āti Lamana i te Fatu ’e ’ua pe’e i te mau fa’auera’a a te Atua. ’Ua hina’aro rātou i te hō’ē i’oa ’āpī, nō reira ’ua pi’i rātou ia rātou iho te mau Aniti-Nephi-Lehi ’eiaha fa’ahou te mau ’āti Lamana.

Alama 23:3–7, 16–17

’Ua taui te mau Aniti-Nephi-Lehi nō tō rātou fa’aro’o i te Atua. ’Ua tātarahapa rātou nō te mau mea ’ino tā rātou i rave na. ’Ua ’ite rātou ’ua here te Atua ia rātou ’e ’ua fa’a’ore i tā rātou mau hara.

Alama 24:8–14

’Ua ’ino’ino roa te mau ’āti Lamana ’e ’ua fa’aineine ia rātou nō te ’aro atu i te mau Aniti-Nephi-Lehi. ’Āhiri i te ’arora’a atu, ’ua rave te mau Aniti-Nephi-Lehi i te hō’ē fafaura’a i te Atua. ’Ua parau rātou e’ita roa rātou e ha’apēpē fa’ahou i te ta’ata. Nō te fa’a’ite i te reira, ’ua huna atu rātou i tā rātou mau mauiha’a tama’i. ’Ua mā’iti rātou ’ia here i tō rātou mau ’enemi ’eiaha rā ’ia ha’apēpē ’aore rā e taparahi pohe ia rātou.

Alama 24:1–19; 26:31–34

’Ua ’aro atu te mau ’āti Lamana tei ’ore i ti’aturi i te Atua i te mau Aniti-Nephi-Lehi.

Alama 24:20

E fa’aro’o tō te mau Aniti-Nephi-Lehi ē, mai te peu e taparahi-pohe-hia rātou e ora ïa rātou ’e te Atua. ’Ua tāpe’a rātou i tā rātou fafaura’a e te Atua ’e ’aita i ’aro atu i te mau ’āti Lamana.

Alama 24:16, 21

’Āhiri i te ’arora’a atu, ’ua pure te mau Aniti-Nephi-Lehi. I tō te mau ’āti Lamana ’itera’a i te reira, e rave rahi o rātou tei fa’aea i te ’aro atu. ’Ua māuiui rātou nō te taparahi-pohe-ra’a i te ta’ata. ’Ua mā’iti ato’a teie mau ’āti Lamana ’eiaha roa atu e ha’apēpē fa’ahou i te ta’ata. ’Ua ’āmui atu rātou i te mau Aniti-Nephi-Lehi.

Alama 24:21–27; 25:13–16

I te roara’a o te tau, e rave rahi ta’ata tei haere mai e ’aro. ’Ua ’oto Amona ’e tōna mau taea’e i te mea ē, tē mamae nei te mau Aniti-Nephi-Lehi. ’Ua ani rātou i te ari’i ’ia ’āfa’i i tōna nūna’a e ora i pīha’i iho i te mau ’āti Nephi. ’Ua parau te ari’i e haere rātou mai te mea te reira te hina’aro o te Fatu. ’Ua pure Amona. ’Ua parau te Fatu e ti’a ia rātou ’ia haere ’e e pāruru ’oia ia rātou.

Alama 27:2–15

’Ua hōro’a te mau ’āti Nephi i te fenua nō te mau Aniti-Nephi-Lehi ’ia ora i reira ’e ’ia pāruruhia rātou. ’Ei fa’aho’ira’a, e hōro’a te mau Aniti-Nephi-Lehi i te mā’a i te mau ’āti Nephi. E fa’aro’o rahi tō te mau Aniti-Nephi-Lehi ’e ’ua here i te Atua. E feiā ha’avare ’ore rātou i te mau ta’ata ato’a ’e ’ua tāpe’a i tā rātou parau fafau, ’eiaha e tama’i fa’ahou. E feiā ha’apa’o maita’i rātou i te tā’āto’ara’a o tō rātou orara’a.

Alama 27:20–30