« Te peropheta Etera », Te mau ’ā’amu o te Buka a Moromona (2023)
Te peropheta Etera
Te fa’aarara’a a te Fatu i te hō’ē nūna’a
’Ua ’āfa’i te Fatu i te taea’e o Iareda ’e tōna ’utuāfare i te fenua i parauhia ra. E mea ha’eha’a rātou ’e te ha’apa’o i te mau fa’auera’a a te Atua. ’Ua tupu i te rahi te pupu e rave rahi matahiti ’e ’ua hina’aro rātou ’ia arata’i te hō’ē ari’i ia rātou. ’Ua fa’aara atu te taea’e o Iareda ia rātou ē, te roa’ara’a te hō’ē ari’i e nehenehe e arata’i mai i te mau fifi, ’ua vaiiho rā ’oia ia rātou ’ia mā’iti i te hō’ē ari’i.
E rave rahi hānere matahiti, ’ua ora te mau ’āti Iareda i roto i te fenua i parauhia ra. I te tahi taime, e arata’i tō rātou mau ari’i ia rātou ’ia rave i te ’ohipa maita’i, i te tahi rā mau taime ’aita rātou i nā reira nei. E fa’aara te mau peropheta a te Atua i te mau ta’ata ’ia tātarahapa. ’Ia fa’aro’o ana’e rātou ’e ’ia ha’apa’o i te mau fa’auera’a a te Atua, e ha’amaita’i ’oia ia rātou. ’O Etera te i’oa o te peropheta hope’a ’āti Iareda.
Etera 7:23–27 ; 9:26–30 ; 10:16–17, 28 ; 11:1–8, 12–13, 20–22 ; 12:2
’Aita te nūna’a e ha’apa’o nei i te parau a te Atua. Tē pārahi ra rā te Vārua o te Fatu i pīha’i iho ia Etera. ’Ua ha’api’i ’oia ia rātou mai te po’ipo’i ē tae roa atu i te ru’i. ’Ua parau ’oia ’ia ti’aturi i te Atua ’e ’ia tātarahapa ’aore rā e ha’amouhia rātou. Mai te mea e fa’aro’o tō rātou, e nehenehe rātou e ti’aturi e ora fa’ahou i pīha’i iho i te Atua, ’e ’ia roa’a te pūai nō te rave i te mau ’ohipa maita’i ’Aita rā te ta’ata i ti’aturi.
Etera 11:22 ; 12:2–5 ; 13:2
Etera e hi’o ra i te mea tā te nūna’a e rave ra. ’Ua tāpuni atu ’oia i roto i te hō’ē ana i te ao ’e ’ua pāpa’i i te mea tāna i ’ite. ’Aita te mau ta’ata i tātarahapa ’e ’ua ha’amata i te ’aro te tahi ’e te tahi.
’Ua ’ite Etera ē, tē tītauhia ra te ari’i ’āti Iareda, ’o Korianetumera, i te ’aro atu e rave rahi ta’ata tei hina’aro i te ti’ara’a ari’i. ’Ua fa’a’ohipa Korianetumera i tāna nu’u nō te pāruru iāna iho.
I te hō’ē mahana, ’ua parau te Fatu ia Etera ’ia fa’aara atu ia Korianetumera ’e i tōna nūna’a ’ia tātarahapa. Mai te mea e nā reira rātou, e tauturu te Fatu i te nūna’a ’e e vaiiho ia Korianetumera ’ia tāpe’a noa i tōna bāsileia. Mai te mea ’aita, e ha’amou te mau ta’ata i te tahi ’e te tahi. E ora maoro Korianetumera nō te hi’o ē, e parau mau te mau parau a te Fatu. I muri iho e pohe ato’a ’oia.
’Aita Korianetumera ’e tōna nūna’a i tātarahapa. ’Ua tāmata te nūna’a e taparahi pohe ia Etera, ’ua horo ’ē rā Etera i roto i tōna ana. ’Ua ’aro te hō’ē ta’ata ’o Siza te i’oa ia Korianetumera. ’Ua mā’iti te ta’ata e ’āmui atu i te nu’u a Siza ’aore rā i te nu’u a Korianetumera. E rave rahi ’arora’a tei tupu i roto i nā nu’u tama’i e piti. E rave rahi ta’ata tei pohe.
Etera 13:22–25 ; 14:17–20 ; 15:2
’Ua ha’amana’o Korianetumera i te mea tā Etera i parau. ’Ua ’oto ’oia i te mea ē, e rave rahi o tōna mau ta’ata tei pohe. Tē ha’amana’o ra ’oia ē, ’ua fa’aara te mau peropheta ato’a ē e tupu mau te reira. ’Ua ha’amata ’oia i te tātarahapa ’e ’ua hāpono i te hō’ē rata ia Siza ra. ’Ua parau ’oia ē, e fa’aru’e ’oia i te bāsileia mai te mea e fa’aorahia tōna mau ta’ata. ’Ua hina’aro rā ’o Siza e ’aro.
’Ua riri te nūna’a o Korianetumera ’e ’ua hina’aro rātou e ’aro atu. ’Ua riri ato’a te mau ta’ata o Siza ’e ’ua hina’aro ato’a rātou e ’aro atu. ’Aita te ta’ata e hina’aro e tātarahapa. ’Ua ’ite atu Etera ē, ’ua haere te ta’ata tāta’itahi i te tama’i. E rave rahi atu ā ta’ata tei pohe.
’Ua hina’aro Korianetumera e tāpe’a i te tama’i. ’Ua ani ’oia ia Siza ’ia rave atu i te bāsileia ’e ’eiaha e ha’apēpē i tōna mau ta’ata. ’Ua riri rā te mau ta’ata ato’a. ’Aita te Vārua o te Fatu e vai ra ia rātou. ’Ua hi’o atu Etera ē, ’ua tāmau noa te mau ta’ata ato’a i te ’aro ē tae roa ’o Korianetumera ana’e te tahi atu ’āti Iareda tei ora mai. ’Ua mata pōirihia Korianetumera, i muri iho.
’Ua ’ite mata atu Etera ē, te mau mea ato’a tā te Fatu i parau, ’ua tupu mau ïa. ’Ua fa’aoti Etera i te pāpa’i i te ’ohipa i tupu. I muri iho, ’ua ha’apāpū maita’i ’oia e nehenehe te mau ta’ata e ’ite mai i tāna mau pāpa’ira’a, i muri a’e i tōna revara’a. ’Ua ti’aturi Etera i te Atua ’e te tīa’ira’a e vai ’oia i pīha’i iho i te Atua i te hō’ē mahana.