Alama 53 ; 56–57

E nu’u fa’ehau ’āpī

Mau tamāroa tei ti’aturi i te Atua

mau fa’ehau ’āpī e mau ra i te mau pāruru ’ōuma, te mau ’ōmore ’e te mau ’o’e

Tei roto te mau ’āti Nephi i te tama’i i mua i te mau ’āti Lamana ’e ’ua hina’aro rātou i te tauturu. ’Ua hina’aro te mau Aneti-Nephi-Lehi e tauturu. ’Ua fafau rā rātou i te Fatu ’eiaha e ’aro atu. E piti tauatini o tā rātou mau tamāroa ’āpī tei ’ore i rave i teie fafaura’a. ’Aita rā, ’ua fafau mai te mau tamāroa e ’aro nō te pāruru i tō rātou mau ’utuāfare. ’Ua pi’ihia teie mau tamāroa te mau fa’ehau ’āpī.

Alama 53:8, 13–18, 22 ; 56:1–8

Helamana e arata’i nei i te mau fa’ehau ’āpī i te hō’ē ’oire

’Ua mā’iti te mau fa’ehau ’āpī i te peropheta Helamana nō te arata’i ia rātou. E pupu na’ina’i rātou ’ia fa’aauhia i te nu’u rahi ’āti Lamana. ’Ua ’ite rā Helamana ē, e mau fa’ehau ’āpī parauti’a rātou, te itoito ’e te ha’apa’o maita’i. Nā roto i te arata’ira’a a Helamana, ’ua haere rātou e tauturu i te mau ’āti Nephi.

Alama 53:19–22 ; 56:9–10, 17, 19

mau fa’ehau ’āpī e patu ra i te hō’ē pare ’e te mau fa’ehau ’āti Nephi, ’e te mau metua e ’āfa’i mai ra te mā’a

’Ua rohirohi roa te mau fa’ehau ’āti Nephi. I te taera’a mai rā te mau fa’ehau ’āpī, ’ua ’oa’oa a’era te mau ’āti Nephi. ’Ua hōro’a te nu’u feiā ’āpī ia rātou i te tīa’ira’a ’e te pūai. ’Ua fa’aineine ’āmui rātou ia rātou nō te ’aro atu i te mau ’āti Lamana. ’Ua tauturu ato’a te mau metua o te mau fa’ehau ’āpī ma te ’āfa’ira’a mai i te mā’a ’e te mau tauiha’a nō rātou.

Alama 56:16–17, 19–20, 22, 27

te feiā fa’atere ’āti Nephi ’e te mau fa’ehau ’āpī e putuputu ra i raro a’e i te hō’ē fare ’ie

’Ua haru te mau ’āti Lamana e rave rahi mau ’oire ’e ’ua tāpe’a i tā rātou mau nu’u i reira. Tē hina’aro nei te feiā fa’atere ’āti Nephi ’ia vaiiho mai te mau ’āti Lamana i te hō’ē o te mau ’oire. ’Ua rave rātou i te hō’ē fa’anahora’a ’e ’ua ani i te tauturu i te mau fa’ehau ’āpī.

Alama 56:18–30

te nu’u ’āti Lamana e horo ’ē ra ’e te mau mauiha’a tama’i i mua i te mau fa’ehau ’āpī

’Ua fa’ahua te mau fa’ehau ’āpī i te ta’ita’i i te mā’a nā te mau ’āti Nephi e ora ra i roto i te hō’ē ’oire fātata. I te ’itera’a te mau ’āti Lamana i taua pupu na’ina’i ra, ’ua fa’aru’e rātou i tō rātou ’oire ’e ’ua tāpapa atu i te mau fa’ehau ’āpī. ’Ua mana’o te mau ’āti Lamana e mea ōhie a’e i te haru mai ia rātou.

Alama 56:30–36

mau fa’ehau ’āpī e haere ra nā te rēni roa, tē tāpapa ra te hō’ē nu’u ’āti Lamana ia rātou, ’e tē pe’e ra te hō’ē nu’u ’āti Nephi i te nu’u ’āti Lamana

’Ua horo ’ē atu te mau fa’ehau taure’are’a i te mau ’āti Lamana. I muri iho, ’ua tāpapa mai te hō’ē nu’u ’āti Nephi i te mau ’āti Lamana. ’Ua hina’aro te mau ’āti Lamana e haru mai i te mau fa’ehau taure’are’a, hou rātou ’a roa’ahia mai ai e te mau ’āti Nephi. ’Ua ’ite te mau ’āti Nephi tei roto te mau fa’ehau taure’are’a i te fifi ’e ’ua haere vitiviti atu rātou nō te tauturu ia rātou.

Alama 56:36–41

e fa’ehau ’āpī e ’imi ra i te tahi atu mau nu’u ’e tē pe’ape’a ra ’oia

I te tahi taime i muri mai, ’aita te mau fa’ehau taure’are’a i ’ite fa’ahou i te mau ’āti Lamana. ’Ua ha’amata rātou i te uiui ē, ’ua roa’ahia ānei i te mau ’āti Nephi te mau ’āti Lamana ’e tē ’aro ra rātou.

Alama 56:42–43

Helamana e fa’ateitei ra i tāna ’o’e

’Ua pe’ape’a roa Helamana. ’Ua mana’o ’oia tē tāmata nei te mau ’āti Lamana i te rāmā ia rātou. ’Ua ani ’oia i tāna mau fa’ehau ’āpī e haere ānei rātou e ’aro i te mau ’āti Lamana.

Alama 56:43–44

’ua ’āfa’i te mau fa’ehau ’āpī i tā rātou ’o’e i ni’a

’Ua ha’amana’o te mau fa’ehau ’āpī i te mea tā tō rātou mau metua vahine i ha’api’i ia rātou. ’Ua ha’api’i tō rātou mau metua vahine ia rātou ’ia ti’aturi i te Atua ’e ’eiaha e fē’a’a, nō te mea e pāruru ’oia ia rātou. ’Ua ti’aturi teie mau tamaiti i te Atua ’e ’ua hina’aro rātou e ha’apa’o i tā rātou fafaura’a e pāruru i tō rātou mau mau ’utuāfare. ’Ua parau rātou ia Helamana ē, ’ua ineine rātou nō te haere ’e ’ia ’aro atu.

Alama 56:46–48

Helamana e haere ra ’e te mau fa’ehau ’āpī

’Ua māere roa Helamana i tō rātou itoito. ’Ua arata’i ’oia ia rātou nō te ’aro i te mau ’āti Lamana.

Alama 56:45, 49

Helamana ’e te mau fa’ehau ’āpī e ti’a ra i ni’a i te ’aivi ’e te mau mauiha’a tama’i

’Ua ’ite atu te mau fa’ehau taure’are’a i te mau ’āti Lamana ’e te mau ’āti Nephi i te ’arora’a. ’Ua rohirohi roa te mau ’āti Nephi. Tē fātata ra rātou i te pau, ’a haere mai ai te mau fa’ehau ’āpī.

Alama 56:49–52

tē mata’u ra te mau fa’ehau ’āti Lamana

’Ua ’aro te mau fa’ehau ’āpī ma te pūai o te Atua. ’Ua ri’ari’a te mau ’āti Lamana ’e ’ua fa’aea i te ’aro atu. ’Ua tauturu te mau fa’ehau ’āpī i te upo’oti’ara’a i roto i te ’arora’a !

Alama 56:52–54, 56

Helamana e fa’atoro ra i te rima i te mau fa’ehau ’āpī

I roto i te ’arora’a, e rave rahi ’āti Nephi ’e ’āti Lamana tei pohe. ’Ua pe’ape’a Helamana i te mea ē, ’ua pohe ato’a paha te tahi o tāna mau fa’ehau ’āpī. I muri a’e rā i te ’arora’a, ’ua tai’o atu Helamana ia rātou pā’āto’a. ’Ua ’oa’oa roa ’oia i te ’itera’a ē, ’aita roa hō’ē a’e o rātou i pohe. ’Ua pāruru te Atua ia rātou.

Alama 56:55–56

’ua pēpē te mau fa’ehau ’āpī ’e ’ua ti’a ’āmui atu rātou pā’āto’a

’Ua ’āmui mai te tahi atu mau tamāroa i roto i te mau fa’ehau ’āpī. ’Ua tāmau noa rātou i te tauturu i te mau ’āti Nephi i te ’arora’a. I roto i te tahi atu mau ’arora’a, ’ua pēpē te mau fa’ehau taure’are’a, ’aita rā hō’ē o rātou i pohe. ’Ua ha’amana’o rātou i te mea tā tō rātou mau metua vahine i ha’api’i ia rātou. ’Ua ti’aturi rātou i te Atua, ’e ’ua pāruru ’oia ia rātou.

Alama 57:6, 19–27 ; 58:39–40