« Te fa’aro’o o te hō’ē ari’i vahine », Te mau ’ā’amu o te Buka a Moromona (2023)
« Te fa’aro’o o te hō’ē ari’i vahine », Te mau ’ā’amu o te Buka a Moromona
Te fa’aro’o o te hō’ē ari’i vahine
Te ’itera’a i te ’oa’oa i roto ia Iesu Mesia
Tē fa’atere ra te hō’ē ari’i vahine ’āti Lamana ’e tāna tāne, te ari’i Lamoni. Tē ani ra te ari’i i te hō’ē ’āti Nephi ’o Amona te i’oa, ’ia ha’api’i iāna nō ni’a i te Fatu. ’Ua ti’aturi te ari’i i te mea tā Amona i parau iāna. ’Ua tūturi te ari’i nō te pure ’e ’ua ani i te Fatu ’ia fa’a’ore mai i tāna hara. ’A pure ai ’oia, topa a’e ra te ari’i i raro. Mai te huru ra ē, ’ua pohe ’oia.
’Ua ’āfa’i atu te mau tāvini o te ari’i iāna i te ari’i vahine ra. ’Ua tu’u rātou iāna i ni’a i tōna ro’i. ’Ua tārava ’oia i reira ’e ’aita i ha’uti e piti mahana ’e e piti pō.
I taua taime ra, ’ua ’oto roa te ari’i vahine ’e tāna mau tamari’i. ’Ua fa’aea noa rātou i pīha’i iho i te ari’i ’e ’ua ta’i i ni’a iāna. ’Ua parau te tahi mau ta’ata ē e ti’a ’ia hunahia te ari’i. ’Ua hina’aro rā te ari’i vahine e paraparau nā mua ia Amona. ’Ua fa’aro’o ’oia ē, e mana tō Amona nō te Atua. ’Ua ani te mau tāvini o te ari’i vahine ia Amona ’ia haere mai i te ari’i vahine ra.
’Ua parau te ari’i vahine ia Amona ē, ’ua fa’aro’o ’oia e peropheta Amona nā te Atua. ’Ua ani ’oia ia Amona ’ia haere e hi’o i te ari’i. ’Ua ’ite Amona ē, tē ora noa ra te ari’i. Nā te mana o te Atua i fa’ata’oto i te ari’i. ’Ua parau Amona i te ari’i vahine ē e ara mai tāna tāne i te mahana nō muri iho.
’Ua ti’aturi te ari’i vahine ia Amona ’e e fa’aro’o rahi tōna i te Atua. ’Ua ti’aturi ’oia e ara mai tāna tāne fa’aipoipo ’a po’ipo’i a’e. ’Ua parau Amona ē, e ha’amaita’ihia ’oia nō tōna fa’aro’o rahi. ’Ua parau ’oia i te ari’i vahine ē, ’ua hau a’e tōna fa’aro’o i te fa’aro’o o tōna iho nūna’a. ’Ua fa’aea noa ’e ’ua ’ara noa te ari’i vahine i pīha’i iho i tāna tāne fa’aipoipo ē ao noa a’e.
I te mahana i muri mai, ’ua ara mai te ari’i. ’Ua parau ’oia i te ari’i vahine ē, ’ua ’ite ’oia ia Iesu Mesia. ’Ua ’ite te ari’i vahine ’e te ari’i i tō Iesu here ia rātou, ’e ’ua ’ī rātou i te ’oa’oa.