Etera 1–4 ; 6

Iareda ’e tōna ’utuāfare

E tere arata’ihia e te Fatu.

’Ua ora Iareda ’e tōna ’utuāfare i Babela e rave rahi tauatini matahiti, hou Iesu Mesia ’a fānauhia mai ai. ’Ua ha’apa’o rātou te fa’auera’a a te Fatu. ’Aita rā te rahira’a o te mau ta’ata nō Babela i ha’apa’o i te fa’auera’a a te Fatu. ’Ua ha’amata teie mau ta’ata i te patu i te hō’ē pare nō te tāmata i te tāpae atu i te ra’i. ’Ua taui te Fatu i te reo o te mau ta’ata ’ia ’ore rātou e māramarama i te tahi ’e te tahi.

Genese 11:4–9 ; Etera 1:33

E taea’e tō Iareda. ’Ua ti’aturi te Fatu i te taea’e o Iareda. ’Ua ani Iareda i tōna taea’e ’ia pure i te Fatu nō te tauturu. I roto i tāna pure, ’ua ani te taea’e o Iareda i te Fatu ’eiaha e taui i te reo o tōna ’utuāfare ’e o tōna mau hoa. Mai te reira e nehenehe noa rātou e māramarama i te tahi ’e te tahi.

Etera 1:33–36

E aroha rahi tō te Fatu ’e te hāmani maita’i. ’Aita ’oia i taui i te reo o te ’utuāfare ’e te mau hoa o Iareda. I muri a’e, ’ua parau te Fatu i te taea’e o Iareda ē, ’ua fa’aineine ’oia i te hō’ē fenua ta’a ’ē nō rātou. ’Ua parau te Fatu e arata’i ’oia ia rātou i reira.

Etera 1:35–42

’Ua ha’aputuputu Iareda ’e tōna taea’e i tō rāua ’utuāfare ’e mau hoa. ’Ua ha’aputuputu ato’a rātou i tā rātou mau ’ānimara ’e te mau huru huero ato’a. I muri iho ’ua fa’aru’e rātou i tō rātou fare ’e ’ua rātere nā roto i te mēdēbara. ’Ua arata’i te Fatu ia rātou nā roto i te paraparaura’a ia rātou nā roto mai i te ata.

Etera 1:40–43 ; 2:1–6

I muri a’e i te rāterera’a maoro, ’ua tāpae rātou i tahatai. ’Ua ora rātou i te pae tahatai e maha matahiti. E mea maoro, ’aita te taea’e o Iareda i pure i te Fatu.

Etera 2:13–14

’Ua parau te Fatu i te taea’e o Iareda ’ia pure fa’ahou. ’Ua tātarahapa te taea’e o Iareda ’e ’ua pure i te Fatu. ’Ua fa’a’ore te Fatu i tāna hapa.

Etera 2:14–15

’Ua ha’api’i te Fatu i te taea’e o Iareda ’ia hāmani i te mau poti pārahurahu tei pi’ihia te mau pahī. E nehenehe te mau ’utuāfare e fano nā ni’a te moana i roto i te mau pahī, nō te tae atu i te fenua i parauhia ra.

Etera 2:15–17

’Ua hāmani te taea’e o Iareda ’e tōna ’utuāfare i te mau pahī. ’Ua ’ite ’oia ē ’aita e mōrī i roto i te mau pahī. ’Ua ani ’oia i te Fatu e ti’a ānei ia rātou e rātere nā ni’a i te moana nā roto i te pōiri. ’Ua parau te Fatu i te taea’e o Iareda ’ia feruri i te hō’ē rāve’a ’ia roa’a te mōrī i roto i te mau pahī.

Etera 2:16–19, 22–25

’Ua hāmani te taea’e o Iareda 16 ’ōfa’i ri’i teatea. ’Ua ani ’oia i te Fatu ’ia tāpe’a ’e ’ia fa’a’ana’ana i te reira. ’Ua fa’atoro te Fatu i tōna rima ’e ’ua tāpe’a tāta’ihō’ē i te mau ’ōfa’i i tōna manimani rima. ’Ua ti’a i te taea’e o Iareda ’ia ’ite mata i te manimani rima o te Fatu. ’Ua māere ’oia i te mea e tino tō te Fatu mai tōna ra te huru.

Etera 3:1–8

’Ua parau te Fatu e fa’aro’o rahi tō te taea’e o Iareda. I muri iho ’ua fā mai te Fatu ’e ’ua fa’a’ite i tōna tino vārua i te taea’e o Iareda. ’Ua parau te Fatu, « ’o vau ’o Iesu Mesia ». ’Ua parau ’oia ’ua mā’itihia ’oia ’ia riro ’ei Fa’aora. ’Ua ha’api’i ’oia i te taea’e o Iareda e rave rahi atu ā mau mea.

Etera 3:9–20, 25–27

’Ua ho’i te taea’e o Iareda i tōna ’utuāfare ra ’e tōna mau hoa. ’Ua pāpa’i ’oia i te mea tāna i ’apo mai ’a pārahi ai ’oia i pīha’i iho i te Fatu. ’Ua tu’u ato’a ’oia i te mau ’ōfa’i i roto i te mau pahī. E mōrī tō rātou i teienei nō tō rātou tere.

Etera 4:1 ; 6:2–3

’Ua tomo te mau ’utuāfare i roto i te mau pahī nō te rātere nā ni’a i te miti. ’Ua ti’aturi rātou i te Fatu nō te aupuru ia rātou. E rave rahi vero ’e te mau ’are. I te tahi taime, e tāpo’i-hope-roa-hia te mau pahī e te pape. ’Ua pure rā rātou ’e ’ua fa’aho’i-fa’ahou-hia mai rātou e te Fatu i ni’a i te pape. ’Ua hīmene rātou e rave rahi hīmene ha’amāuruuru i te Fatu.

Etera 6:4–10

Fātata hō’ē matahiti i muri mai, ’ua tae rātou i te fenua tā te Fatu i parau fafau ia rātou. ’Ua ’oto rātou i te ’oa’oa ’e ’ua ha’amāuruuru iāna.

Etera 6:11–12