« 29 nō Tiurai–4 nō ’Ātete : ‘’A hi’o atu i te Atua ’e ’a ora.’ Alama 36–38 », Mai, pe’e mai—Nō te ’utuāfare ’e te fare purera’a : Buka a Moromona 2024 (2023)
« 29 nō Tiurai–4 nō ’Ātete. Alama 36–38 », Mai, pe’e mai—Nō te ’utuāfare ’e te fare purera’a : 2024 (2023)
Woman [Vahine], nā Jen Tolman, ’eiaha e tāhōho’a
29 nō Tiurai–4 nō ’Ātete : « ’A hi’o atu i te Atua ’e ’a ora »
Alama 36–38
I te ’itera’a Alama i te ’ino ’āti a’e iāna, ’ua teiaha roa ’oia i « te ’oto », « te mau ’ati e rave rahi », ’e « te māuiui rahi o te ’ā’au » (Alama 8:14). ’Ua parau ’oia nō te mau ’āti Zorama, nō te « mau ’ohipa ’ī’ino i rotopū i teie nei mau ta’ata », « tē māuiui nei tō’u nei vārua » (Alama 31:30). Hō’ē ā tōna mana’o i te ho’ira’a mai ’oia mai tāna misiōni i rotopū i te mau ’āti Zorama—’ua hi’o ’oia i te « ’ā’au ’eta’eta o te mau ta’ata, ’e ’ua ha’amata rātou i te riri nō te pāpū o te parau », e nō reira « ’ua pūai roa ihora te ’oto o tōna ’ā’au » (Alama 35:15). E aha tā Alama i rave nō ni’a i tāna i ’ite ’e i mana’o ? ’Aita ’oia i ha’aparuparu noa te mana’o ’aore rā i fa’atupu noa i te riri rahi nō ni’a i te vaira’a o te ao. ’Aita, « ’ua ha’aputuputu mai rā ’oia i tāna mau tamari’i tamāroa ato’a », ’e ’ua ha’api’i ia rātou « nō ni’a i te mau mea parauti’a » (Alama 35:16). ’Ua ha’api’i ’oia ia rātou ē « ’aita atu e rāve’a e fa’aorahia ai te ta’ata, maori rā nā roto i te Mesia. … Inaha, ’o ’oia te parau mau ’e te parauti’a » (Alama 38:9).
Mana’o nō te ’apo i te ha’api’ira’a i te ’utuāfare ’e i te fare purera’a
E nehenehe au e fānauhia i te Atua.
Mea iti roa o tātou e fāri’i i te mau ’ohipa ri’ari’a mai te fa’afāriura’a ’o Alama. Terā rā, e ti’a i te tā’āto’ara’a ’ia « fānauhia i te Atua », noa atu ē, e tupu marū noa te reira (Alama 36:23 ; 38:6). ’Ia tai’o ’oe te Alama 36, ’a feruri i te aura’a o te parau fānauhia i te Atua. ’Ei hi’ora’a, i roto i te ’ohipa nō te fānaura’ahia i te Atua, e aha tō ’oe mana’o nō ni’a i te hara ? nō ni’a ia Iesu Mesia ? Nāhea te fānaura’ahia i te Atua i te fa’atupu i te hō’ē ’ohipa i ni’a i te mea tā ’oe e rave ’ei pāhonora’a i tā ’oe iho mau hape ? E aha te tahi atu mau tauira’a e tupu i roto i tō ’oe mau ti’aturira’a ’e tā ’oe mau ’ohipa ? ’A feruri i te huru ’a ora ai ’oe i teie mau tauira’a.
Hi’o ato’a Mosia 5:7 ; 27:25–26 ; Alama 5:14 ; 22:15 ; Helamana 3:35 ; « Alma the Younger Is Converted unto the Lord [’Ua fa’afāriuhia Alama tamaiti i te Fatu ra] » (video), Vaira’a buka ’evanelia.
Tē mono nei Iesu Mesia i te ’oto i te ’oa’oa.
I te tahi taime, e mata’u te ta’ata ’ia tātarahapa nō te mea tē hi’o nei rātou i te tātarahapara’a mai te hō’ē fa’autu’ara’a māuiui nō te hara. I tō ’oe mana’o, e aha tā Alama e parau nō ni’a i te reira ? Nō te ’ite, e nehenehe ’oe e fa’aau i te huru o te orara’a ’o Alama hou ’a tātarahapa ai ’oia (hi’o Alama 36:6–17) ’e tāna fa’ata’ara’a nō ni’a iāna iho i muri a’e i tōna tātarahapara’a (hi’o te mau ’īrava 18–27). ’Ia au te Alama 36:17–18, nāhea tō Alama fāri’ira’a i teie fa’a’orera’a hara ?
Hi’o ato’a Matthew S. Holland, « Te hōro’a maita’i roa a te Tamaiti », Liahona, Novema 2020, 45–47.
’Ua fa’ahereherehia te mau pāpa’ira’a mo’a « nō te ’ōpuara’a pa’ari ».
’A feruri na i te temeio ’e te ha’amaita’ira’a o te fāri’ira’a i te mau papa’ira’a mo’a i teie mahana ! ’Ia tai’o ’oe te Alama 37, ’a ’imi i te mau ha’amaita’ira’a e tae mai nā roto i te fāri’ira’a i te mau pāpa’ira’a mo’a (hi’o, ’ei hi’ora’a, te mau ’īrava 7–10, 18–19, 44–45).
I roto te Alama 37:38–47, tē fa’aau nei Alama i « te parau a te Mesia ra » i te Liahona. ’A feruri ai ’oe i teie fa’aaura’a, ’a feruri i te huru tō ’oe orara’a i te temeio ’e te mana o te mau ha’api’ira’a a te Mesia « i terā mahana ’e i terā mahana » (Alama 37:40).
Hi’o ato’a D. Todd Christofferson, « Te ha’amaita’ira’a o te papa’ira’a mo’a », Liahona, Mē 2010, 32–35 ; « ’Ia tai’o vau ’ia tai’o vau i te parau mo’a », Te mau Hīmene, N°169 ; « Alma Testifies to His Son Helaman [Tē fa’a’ite pāpū nei Alama i tāna tamaiti ’o Helamana] » (video), Vaira’a buka ’evanelia.
E ha’api’i te mau pāpa’ira’a mo’a ia tātou nāhea ’ia pe’e i te Atua
« Nā roto i te mau mea iti ’e te pāpū e fa’atupuhia ai te mau mea rarahi ».
I te tahi taime e feruri paha tātou ē, e mea rahi roa ’e te rave ’atā tō tātou mau fifi, ’e nō reira, e tītauhia te mau rāve’a rarahi ’e te rave ’atā. E ’ere rā te reira i te mau taime ato’a i te haere’a a te Fatu. ’Ia tai’o ’oe te Alama 37:1–14, ’a feruri i te mea tā ’oe e fa’ahiahia nei, nō ni’a i te huru ’a rave ai ’oia i tāna ohipa. I muri iho e nehenehe ’oe e feruri ’e e pāpa’i i te mau rāve’a tā ’oe i ’ite i teie parau tumu i roto i tō ’oe orara’a.
Mai te mea e ha’api’i ’oe i teie parau tumu i te tahi ta’ata, e aha te mau hi’ora’a nō roto mai i te nātura ’aore rā te orara’a i te mau mahana ato’a tā ’oe e fa’a’ohipa nō te fa’ahōho’a i te reira ? E nehenehe e ’itehia ia ’oe te tahi i roto i te parau poro’i a te peresideni Dallin H. Oaks « Te mau mea iti ’e te ’ōhie », (Liahona, Mē 2018, 89–92).
E aha te tahi mau mea iti ’e te ’ōhie ’o tē ha’afātata nei ia ’oe i te Metua i te ao ra ’e ia Iesu Mesia ?
Pinepine tā tātou mau mā’itira’a i « te mau mea iti ’e te ’ōhie » i te fa’atupu i te mau ta’a-’ē-ra’a rahi i roto i tō tātou orara’a. E nehenehe e rave mai i te hō’ē tumu parau i roto te Nō te pūai o te feiā ’āpī : E arata’i nō te rave i te mau mā’itira’a, ’e ’ia ui ia ’oe iho i te mau uira’a mai teie : Nāhea tā’u mau mā’itira’a nō ni’a i teie i te fa’atupu i te hō’ē mea i ni’a iā’u ’e i ni’a i te mau ta’ata ’ati a’e iā’u ? E aha te mau tauira’a iti ’e te ’ōhie tā’u e nehenehe e rave ’o tē arata’i atu i te hau ’e i te ’oa’oa rahi a’e ?
Hi’o ato’a Michael A. Dunn, « Hō’ē i ni’a i te hānere maita’i atu ā », Liahona, Novema 2021, 106–8 ; Vaira’a buka ’evanelia.
Fa’a’ohipa i te mau iti ’e te ’ōhie. Mai te tahi atu mau mea e rave rahi i roto i te orara’a, e nehenehe te ha’api’ira’a ’e te ’apora’a mai i te ’evanelia e ravehia nā roto i te mau mea iti ’e te ’ōhie. ’Ei hi’ora’a, nāhea e nehenehe ai e fa’a’ohipa i te tahi tuha’a iti miti ’aore rā te hopue nō te ha’api’i i te mana o te mau mea iti ’e te ’ōhie ? (hi’o Mataio 5:13 ; 13:33).
« ’A paraparau atu i te Fatu ».
I roto te Alama 37:35–37, ’a ’imi i te mau anira’a a Alama i tāna tamaiti ia Helamana. ’O tei hea mau anira’a tā ’oe e mana’o ra ē, tē fa’auruhia ra ’oe ’ia ’ohipa ? ’Ei hi’ora’a, e nehenehe ’oe e feruri e aha te aura’a « ’a paraparau atu i te Fatu » (’īrava 37). Nāhea ’oe i te tāmatara’a i te rave i te reira ? Nāhea ’oia i te arata’ira’a ia ’oe nō te maita’i ?
Te fa’a’itera’a i tō’u ’itera’a pāpū nō Iesu Mesia, e ha’apūai ïa te reira i te feiā tā’u i here.
E hi’ora’a maita’i te mau parau a Alama i tāna tamaiti ia Sibelona, nō te huru ’ia ha’apūai ’e ’ia fa’aitoito i te feiā tā tātou i here ’ia ora i te ’evanelia. E nehenehe te tuatāpapara’a te Alama 38 e hōro’a mai ia ’oe i te tahi mau mana’o nō te tauturu i te mau melo o te ’utuāfare ’e te mau hoa, ’ia ’ite i te pūai i roto ia Iesu Mesia. Pāpa’i i te mau mea tei ’itehia ia ’oe.
Nō te tahi atu ā mana’o, ’a hi’o i te ve’a Liahona ’e Nō te pūai o te feiā ’āpī nō teie ’āva’e.
Mana’o nō te ha’api’i i te tamari’i
I te tātarahapara’a e tupu ai te ’oa’oa i roto ia Iesu Mesia.
-
Nō te tauturu i tā ’oe mau tamari’i ’ia hāro’aro’a ē, e hōro’a mai te tātarahapa i te ’oa’oa, e nehenehe ’oe e hōro’a ia rātou i te hō’ē ’api parau ma te hō’ē hōho’a mata ’oa’oa i te hō’ē pae, ’e te hō’ē hōho’a mata ’oto i te tahi pae. E ani ia rātou ’ia fa’aro’o ’a tai’o ai ’aore rā ’a ha’apoto ai ’oe te Alama 36:13, 17–20 ’e ’a ’āfa’i i ni’a i te hō’ē o nā hōho’a mata nō te fa’a’ite e aha te mana’o ’o Alama. E nehenehe te mau tamari’i pa’ari e pāpa’i i te mau ta’o aore rā te mau pereota e fa’a’ite ra i tōna mana’o. E aha te mea i ’oto ai Alama, ’e e aha tei hōro’a mai i te ’oa’oa i roto iāna ? I muri iho, e nehenehe ’oe e parau ia rātou i te ’oa’oa tā ’oe e fāri’i ’ia tātarahapa ana’e ’oe.
« Nā roto i te mau mea iti ’e te pāpū e fa’atupuhia ai te mau mea rarahi ».
-
E au paha tā ’oe mau tamari’i ’ia ’imi i te mau tao’a na’ina’i ’o tē fa’atupu i te mau mea rarahi. E riro te mau tauiha’a mai te hō’ē putu uira, te hō’ē tāviri pereo’o, aore rā te hō’ē ha’uti e tāmāhanahana ia rātou ’ia riro ’ei hi’ora’a. I muri iho, e nehenehe ’outou e tai’o ’āmui te Alama 37:6–7 ’e ’ia feruri i te tahi mau mea iti ’aore rā ’ōhie tā te Atua e hina’aro ’ia rave tātou. E aha te mau mea rarahi e nehenehe e tupu ’ia ha’apa’o ana’e tātou i teie mau fa’auera’a iti ’aore rā, ’ōhie ?
-
E nehenehe ato’a tā ’oe mau tamari’i e tāmata i te hō’ē mea mai teie : Ha’amata i te fa’a’ī i te hō’ē hāpaina i te pape, hō’ē tōpata i te taime hō’ē. E aha tō teie tū’atira’a i te Alama 37:6–7 ? I muri iho e nehenehe ’oe e paraparau nāhea « te mau mea iti ’e te ’ōhie », a te Fatu, mai te tai’ora’a i te mau pāpa’ira’a mo’a i te mau mahana ato’a, e riro ai mai te mau tōpata pape i roto i te hō’ē hāpaina.
-
E tauturu i tā ’oe mau tamari’i ’ia feruri i te mau rāve’a nō te fa’atupu i te mau mea rarahi i te fare, i te fare ha’api’ira’a, ’aore rā i te fare purera’a. Tē fa’ahōho’a ato’a nei te hīmene « Donne’ dit le ruisseau », (Chants pour les enfants, 116) i teie parau tumu.
E nehenehe te mau pāpa’ira’a mo’a e tauturu iā’u i te mau mahana ato’a.
-
Nāhea e ti’a ai ia ’oe ’ia tauturu i tā ’oe mau tamari’i ’ia fa’ananea te here i te parau a te Atua, mai tā Alama i rave nō Helamana ? E nehenehe e fa’a’ite i te hō’ē hōho’a o te Liahona (mai terā tō te Buka hōho’a o te ’evanelia, nūmera 68), ’aore rā e ani i te mau tamari’i ’ia pāpa’i hōho’a hō’ē ’a fa’a’ite mai ai rātou i te mea tā rātou i ’ite nō ni’a i te reira (hi’o Alama 37:38–47 ; 1 Nephi 16:10, 28–29). Nāhea te mau pāpa’ira’a mo’a e riro ai mai te Liahona ?
Nō te tahi atu ā mana’o, ’a hi’o i te ve’a Hoa nō teie ’āva’e.
Angel Appears to Alma and the Sons of Mosiah [Tē fā ra te melahi ia Alama ’e i te mau tamaiti a Mosia], nā Clark Kelley Price