« ថ្ងៃទី ២១–២៧ តុលា ៖ ‹ គ្មានប្រជាជនណាដែលរីករាយសប្បាយជាងប្រជាជននេះឡើយ › ។ នីហ្វៃទី៣ ២៧–នីហ្វៃទី៤ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរមរមន ឆ្នាំ ២០២៤ ( ឆ្នាំ ២០២៣ )
« ថ្ងៃទី ២១–២៧ ខែ តុលា ។ នីហ្វៃទី៣ ២៧–នីហ្វៃទី៤ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៤ ( ឆ្នាំ ២០២៣ )
ថ្ងៃទី ២១–២៧ ខែ តុលា ៖ « គ្មានប្រជាជនណាដែលរីករាយសប្បាយជាងប្រជាជននេះឡើយ »
នីហ្វៃទី៣ ២៧–នីហ្វៃទី៤
ការបង្រៀនរបស់ព្រះយេស៊ូវគ្រីស្ទគឺពុំគ្រាន់តែជាទស្សនវិជ្ជាដ៏ល្អមួយដើម្បីពិចារណាប៉ុណ្ណោះទេ ។ ការបង្រៀនទាំងនោះមានបំណងបំផុសគំនិតយើងឲ្យក្លាយដូចជាទ្រង់ ។ គម្ពីរនីហ្វៃទី៤ បង្ហាញពីរបៀបដែលដំណឹងល្អរបស់ព្រះអង្គសង្គ្រោះអាចផ្លាស់ប្ដូរមនុស្សបានទាំងស្រុង ។ បន្ទាប់ពីការងារបម្រើដ៏ខ្លីរបស់ព្រះយេស៊ូវ នោះជម្លោះជាច្រើនសតវត្សរ៍រវាងពួកសាសន៍នីហ្វៃ និងពួកសាសន៍លេមិនត្រូវបានបញ្ចប់ ។ ជាតិសាសន៍ពីរដែលធ្លាប់បានដឹងថាបានបែកខ្ញែកគ្នា និងមានអំនួតបានទៅជា « រូបមួយ គឺជាកូនចៅនៃព្រះគ្រីស្ទ » ( នីហ្វៃទី៤ ១:១៧ ) ហើយពួកគេចាប់ផ្ដើមមាន « របស់របរទាំងអស់រួមគ្នាទូទៅនៅក្នុងចំណោមពួកគេ » ( នីហ្វៃទី៤ ១:៣ ) ។ « សេចក្ដីស្រឡាញ់នៃព្រះ…ស្ថិតនៅក្នុងចិត្តរបស់មនុស្ស » ហើយ « ពិតជាគ្មានប្រជាជនណាដែលរីករាយសប្បាយជាងប្រជាជនដែលបានត្រូវបង្កើតដោយព្រះហស្តនៃព្រះឡើយ » ( នីហ្វៃទី៤ ១:១៥–១៦ ) ។ នេះគឺជារបៀបដែលការបង្រៀនរបស់ព្រះអង្គសង្គ្រោះបានផ្លាស់ប្ដូរពួកសាសន៍នីហ្វៃ និងពួកសាសន៍លេមិន ។ តើការបង្រៀនទាំងនោះផ្លាស់ប្ដូរបងប្អូនដោយរបៀបណា ?
គំនិតសម្រាប់ការរៀនសូត្រនៅឯគេហដ្ឋាន និងសាសនាចក្រ
សាសនាចក្រនៃព្រះយេស៊ូវគ្រីស្ទត្រូវបានហៅតាមព្រះនាមរបស់ទ្រង់ ។
នៅពេលសិស្សរបស់ព្រះអង្គសង្គ្រោះបានចាប់ផ្ដើមស្ថាបនាសាសនាចក្ររបស់ទ្រង់នៅទូទាំងដែនដីនោះ មានសំណួរមួយបានចោទសួរឡើងដែលមនុស្សមួយចំនួនអាចមើលទៅថាវាជាចំណុចដ៏តូចមួយ—តើគួរដាក់ឈ្មោះសាសនាចក្រយ៉ាងណា ? ( សូមមើល នីហ្វៃទី៣ ២៧:១–៣ ) ។ តើបងប្អូនរៀនអ្វីខ្លះអំពីសារៈសំខាន់នៃឈ្មោះនេះមកពីចម្លើយរបស់ព្រះអង្គសង្គ្រោះនៅក្នុង នីហ្វៃទី៣ ២៧:៤–១២ ?
ព្រះអង្គសង្រ្គោះបានបើកសម្ដែងឈ្មោះសាសនាចក្ររបស់ទ្រង់នៅសព្វថ្ងៃនេះនៅក្នុង គោលលទ្ធិ និង សេចក្តីសញ្ញា ១១៥:៤ ។ សូមពិចារណាពាក្យនីមួយៗនៅក្នុងឈ្មោះនោះ ។ តើពាក្យទាំងនេះជួយយើងយ៉ាងដូចម្ដេច ដើម្បីឲ្យស្គាល់ថាខ្លួនយើងជានរណា តើយើងជឿទៅលើអ្វី ហើយតើយើងគួរធ្វើសកម្មភាពយ៉ាងដូចម្ដេច ?
សូមមើលផងដែរ រ័សុល អិម ណិលសុន « The Correct Name of the Church » Liahona ខែ វិច្ឆិកា ឆ្នាំ ២០១៨ ទំព័រ ៨៧–៨៩; « Jesus Christ Declares the Name of His Church and His Doctrine » ( វីដេអូ ) នៅលើបណ្ណាល័យដំណឹងល្អ ។
ព្រះយេស៊ូវគ្រីស្ទប្រកាសឈ្មោះសាសនាចក្រ និងគោលលទ្ធិរបស់ទ្រង់ ៣ នីហ្វៃ ២៧
Jesus answers the prayer of the prophet Nephi and appears to him and the other disciples of Ancient America. The Lord tells Nephi that His Church will be known by His name, just as His followers are known by His name.
សាសនាចក្ររបស់ព្រះយេស៊ូវគ្រីស្ទត្រូវបានស្ថាបនាឡើងនៅលើដំណឹងល្អរបស់ទ្រង់ ។
បន្ទាប់ពីពន្យល់ថា សាសនាចក្ររបស់ទ្រង់ត្រូវតែ « សង់លើដំណឹងល្អរបស់ [ ទ្រង់ ] » ( នីហ្វៃទី៣ ២៧:១០ ) ព្រះអង្គសង្គ្រោះបានពិពណ៌នាថា តើដំណឹងល្អរបស់ទ្រង់គឺជាអ្វី ។ តើបងប្អូនអាចនឹងសង្ខេបនូវអ្វីដែលទ្រង់បានមានបន្ទូលនៅក្នុង នីហ្វៃទី៣ ២៧:១៣–២២ ដោយរបៀបណា ? ដោយផ្អែកលើនិយមន័យនេះ តើវាមានន័យយ៉ាងណាចំពោះសាសនាចក្រ—និងចំពោះបងប្អូន—ដើម្បីសង់លើដំណឹងល្អរបស់ទ្រង់ ?
សូមកត់ត្រាអ្វីដែលបងប្អូនកំពុងរៀន ។ សូមកត់ចំណាំនូវអ្វីដែលព្រះអង្គសង្រ្គោះបានបង្រៀនសិស្សរបស់ទ្រង់នៅក្នុង នីហ្វៃទី៣ ២៧:២៣–២៦ ។ តើហេតុអ្វីវាមានសារៈសំខាន់ក្នុងការរក្សាកំណត់ត្រានៃបទពិសោធន៍ខាងវិញ្ញាណ ? តើបងប្អូនមានអារម្មណ៍បំផុសគំនិតឲ្យកត់ត្រាអ្វីខ្លះ នៅពេលដែលបងប្អូនសិក្សាអំពីការងារបម្រើរបស់ព្រះអង្គសង្រ្គោះនៅក្នុងនីហ្វៃទី៣ ?
« តើអ្នករាល់គ្នាប្រាថ្នាអ្វី ? »
តើបងប្អូននឹងនិយាយអ្វីខ្លះ ប្រសិនបើព្រះអង្គសង្គ្រោះសួរបងប្អូន ដូចដែលទ្រង់បានសួរទៅដល់ពួកសិស្សទ្រង់ថា « តើអ្នករាល់គ្នាប្រាថ្នាអ្វីពីយើង ? » ( នីហ្វៃទី៣ ២៨:១ ) ។ សូមគិតអំពីសំណួរនេះ នៅពេលបងប្អូនអាន នីហ្វៃទី៣ ២៨:១–១១ ។ តើបងប្អូនរៀនអ្វីខ្លះអំពីបំណងប្រាថ្នាក្នុងដួងចិត្តរបស់ពួកសិស្ស ចេញមកពីចម្លើយរបស់ពួកលោកចំពោះសំណួររបស់ទ្រង់ ។ តើបំណងប្រាថ្នារបស់បងប្អូនផ្លាស់ប្តូរយ៉ាងដូចម្ដេច កាលបងប្អូនរស់នៅតាមដំណឹងល្អនៃព្រះយេស៊ូវគ្រីស្ទនោះ ?
ទំនុកតម្កើងតែងតែបង្ហាញពីបំណងប្រាថ្នាដ៏ស្មោះ—« ឲ្យខ្ញុំកាន់តែវិសុទ្ធ » គឺជាគំរូដ៏ល្អមួយ ( ទំនុកតម្កើង ល.រ. ៧១ ) ។ សូមពិចារណាស្វែងរកទំនុកតម្កើងមួយ ដែលឆ្លុះបញ្ចាំងពីបំណងប្រាថ្នារបស់បងប្អូន ។
ព្រះគម្ពីរមរមនគឺជាទីសម្គាល់មួយថា កិច្ចការនៅថ្ងៃចុងក្រោយរបស់ព្រះនឹងត្រូវបានបំពេញ ។
សូមគិតអំពីទីសម្គាល់ដែលអនុញ្ញាតឲ្យបងប្អូនដឹងថា អ្វីមួយនឹងកើតឡើង ។ ឧទាហរណ៍ តើបងប្អូនដឹងថា មេឃនឹងភ្លៀង ឬរដូវកំពុងប្រែប្រួលយ៉ាងដូចម្ដេច ? យោងទៅតាម នីហ្វៃទី៣ ២៩:១–៣ តើបងប្អូនដឹងថា កិច្ចការរបស់ព្រះក្នុងការប្រមូលផ្តុំប្រជាជនរបស់ទ្រង់ « កំពុងតែចាប់ផ្ដើមបំពេញហើយ » ដោយរបៀបណា ? ( សូមមើលផងដែរ នីហ្វៃទី៣ ២១:១–៧ ) ។ បងប្អូនក៏អាចកត់ចំណាំផងដែរនៅក្នុង នីហ្វៃទី៣ ២៩:៤–៩ នូវរឿងទាំងឡាយដែលមនុស្សនឹងបដិសេធនៅក្នុងជំនាន់របស់យើង ។ តើព្រះគម្ពីរមរមនពង្រឹងសេចក្តីជំនឿរបស់បងប្អូនទៅលើរឿងទាំងនេះយ៉ាងដូចម្ដេច ?
ការធ្វើតាមការបង្រៀនរបស់ព្រះយេស៊ូវគ្រីស្ទនាំឲ្យមានសាមគ្គីភាព និងសុភមង្គល ។
តើវានឹងមានសភាពបែបណា ដែលបានរស់នៅប៉ុន្មានឆ្នាំបន្ទាប់ពីការយាងមករបស់ព្រះអង្គសង្គ្រោះ ? ពេលបងប្អូនសិក្សា នីហ្វៃទី៤ ១:១–១៨ សូមពិចារណាសរសេររៀបរាប់ពរជ័យដែលប្រជាជនបានទទួល ។ បងប្អូនក៏អាចគូសសម្គាល់ ឬកត់ចំណាំអំពីជម្រើសដែលពួកគេបានធ្វើ ដែលបានជួយនាំឲ្យមានជីវិតដ៏មានពរនេះផងដែរ ។ តើព្រះយេស៊ូវបានបង្រៀនពួកគេអំពីអ្វីខ្លះ ដែលអាចបំផុសគំនិតដល់ការជ្រើសរើសដ៏សុចរិតរបស់ពួកគេ ? នេះជាគំរូមួយចំនួន ប៉ុន្តែបងប្អូនអាចរកឃើញគំរូផ្សេងទៀតផងដែរ ៖ នីហ្វៃទី៣ ១១:២៨–៣០; ១២:៨–៩, ២១–២៤, ៤០–៤៤; ១៣:១៩–២១, ២៨–៣៣; ១៤:១២; ១៨:២២–២៥ ។
សូមពិចារណាអំពីអ្វីដែលបងប្អូនអាចធ្វើបានដើម្បីជួយដល់គ្រួសារ វួដ ឬសហគមន៍របស់បងប្អូនឲ្យរស់នៅក្នុងសាមគ្គីភាព និងសុភមង្គលកាន់តែខ្លាំងឡើង ។ តើបងប្អូនអាចធ្វើអ្វីខ្លះ ដើម្បីជួយយកឈ្នះលើការបែកបាក់ ហើយពិតជាក្លាយជា « រូបមួយ » ជាមួយនឹងបុត្រាបុត្រីដទៃទៀតរបស់ព្រះ ? តើការបង្រៀនរបស់ព្រះយេស៊ូវគ្រីស្ទអ្វីខ្លះ ដែលជួយបងប្អូនឲ្យសម្រេចបានគោលដៅនេះ ?
គួរឲ្យស្តាយនៅទីបំផុត សង្គមស៊ីយ៉ូនដែលបានពិពណ៌នានៅក្នុង នីហ្វៃទី៤ បានធ្លាក់ចូលទៅក្នុងអំពើទុច្ចរិត ។ ពេលបងប្អូនអាន នីហ្វៃទី៤ ១:១៩–៤៩ សូមស្វែងរកអាកប្បកិរិយា និងឥរិយាបថដែលបានបញ្ចប់សុភមង្គល និងសាមគ្គីភាពរបស់ពួកគេ ។ តើបងប្អូនអាចធ្វើអ្វីខ្លះដើម្បីចៀសវាងពីអាកប្បកិរិយា ឬឥរិយាបទទាំងនេះ ?
សូមមើលផងដែរ ម៉ូសេ ៧:១៨; ឌី ថត គ្រីស្តូហ្វឺសិន « Sustainable Societies » Liahona ខែ វិច្ឆិកា ឆ្នាំ ២០២០ ទំព័រ ៣២–៣៥; រ៉េណា អ៊ី អាប៊ើតូ « With One Accord » Liahona ខែ ឧសភា ឆ្នាំ ២០១៨ ទំព័រ ៧៨–៨០; Gospel Topics « Belonging in the Church of Jesus Christ » នៅលើបណ្ណាល័យដំណឹងល្អ ។
សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។
គំនិតសម្រាប់បង្រៀនកុមារ
ខ្ញុំជាសមាជិកសាសនាចក្រនៃព្រះយេស៊ូវគ្រីស្ទ ។
-
ដើម្បីណែនាំអំពីសារៈសំខាន់នៃឈ្មោះសាសនាចក្ររបស់ព្រះយេស៊ូវ សូមនិយាយជាមួយកូនៗរបស់បងប្អូនអំពីឈ្មោះរបស់ពួកគេផ្ទាល់ ។ ហេតុអ្វីឈ្មោះរបស់យើងមានសារៈសំខាន់ ? បន្ទាប់មក បងប្អូនអាចអាន នីហ្វៃទី៣ ២៧:៣ ជាមួយគ្នាដោយស្វែងរកសំណួរដែលសិស្សរបស់ព្រះយេស៊ូវមាន ។ សូមជួយកូនៗរបស់បងប្អូនឲ្យស្វែងរកចម្លើយនៅក្នុង នីហ្វៃទី៣ ២៧:៥–៨ ។ ហេតុអ្វីឈ្មោះរបស់សាសនាចក្រមានសារៈសំខាន់ ?
-
បងប្អូនក៏អាចជួយកូនៗរបស់បងប្អូនឲ្យគិតពីក្រុមផ្សេងៗគ្នាផងដែរ ដែលពួកគេជាសមាជិកនៅក្នុងក្រុមនោះដូចជា ក្រុមគ្រួសារ ឬថ្នាក់អង្គការបឋមសិក្សាជាដើម ។ សូមសួរពួកគេថា តើពួកគេចូលចិត្តអ្វីអំពីការធ្វើជាសមាជិកនៅក្នុងក្រុមនីមួយៗ ។ បន្ទាប់មក បងប្អូនអាចច្រៀង « សាសនាចក្រព្រះយេស៊ូវគ្រីស្ទ » ( សៀវភៅចម្រៀងកុមារ ទំព័រ ៤៨ ) ជាមួយគ្នា ហើយនិយាយអំពីមូលហេតុដែលបងប្អូនមានអំណរគុណ ដែលក្លាយជាសមាជិកសាសនាចក្ររបស់ព្រះអង្គសង្គ្រោះ ។
សាសនាចក្ររបស់ព្រះយេស៊ូវគ្រីស្ទត្រូវបានស្ថាបនាឡើងនៅលើដំណឹងល្អរបស់ទ្រង់ ។
-
ព្រះអង្គសង្គ្រោះបានសង្ខេបដំណឹងល្អរបស់ទ្រង់នៅក្នុង នីហ្វៃទី៣ ២៧ ។ បងប្អូនអាចពន្យល់ដល់កូនៗរបស់បងប្អូនថាពាក្យ ដំណឹងល្អ មានន័យថា « ដំណឹងដ៏ល្អ » ។ តើយើងរកឃើញដំណឹងដ៏ល្អអ្វីខ្លះនៅក្នុង នីហ្វៃទី៣ ២៧:១៣–១៦ ? សូមប្រើ ទំព័រសកម្មភាពសប្តាហ៍នេះ ដើម្បីបង្រៀនថា សាសនាចក្ររបស់ព្រះអង្គសង្គ្រោះត្រូវបានស្ថាបនាឡើងនៅលើដំណឹងល្អរបស់ទ្រង់ ។
ព្រះវរបិតាសួគ៌អរព្រះទ័យ ពេលបុត្រាបុត្រីរបស់ទ្រង់ត្រឡប់មករកទ្រង់វិញ ។
-
សូមពិចារណាលេងបិទពួន ដែលមានម្នាក់លាក់ខ្លួន និងអ្នកផ្សេងទៀតព្យាយាមស្វែងរកគាត់ ឬនាង ។ ល្បែងនេះអាចនាំឲ្យមានការសន្ទនាអំពីអារម្មណ៍អំណរដែលយើងមាន នៅពេលយើងរកឃើញនរណាម្នាក់ដែលបានបាត់ ។ បន្ទាប់ពីអាន នីហ្វៃទី៣ ២៧:៣០–៣១ បងប្អូនអាចនិយាយអំពីរបៀបជួយគ្នាទៅវិញទៅមកឲ្យនៅជិតព្រះវរបិតាសួគ៌ដើម្បី « … គ្មាននរណាម្នាក់បានវង្វេងបាត់ឡើយ » ។
នីហ្វៃទី៤
ការដើរតាមព្រះយេស៊ូវគ្រីស្ទនាំឲ្យខ្ញុំមានអំណរ ។
-
ដើម្បីជួយកូនៗរបស់បងប្អូនឲ្យរៀនអំពីសុភមង្គលរបស់ប្រជាជនដែលបានពិពណ៌នានៅក្នុងនីហ្វៃទី៤ បងប្អូនអាចបង្ហាញរូបភាពរបស់មនុស្សដែលមានភាពសប្បាយរីករាយ ។ បន្ទាប់មក នៅពេលបងប្អូនអានរួមគ្នាក្នុង ខទី ២–៣ និង ១៥–១៧ ( ឬ « ជំពូកទី ៤៨ ៖ ភាពសុខសាន្តនៅទ្វីបអាមេរិក » ដំណើររឿងព្រះគម្ពីរមរមន ទំព័រ ១៣៦–១៣៧ ) ពួកគេអាចចង្អុលទៅរូបភាព នៅពេលដែលបងប្អូនទៅដល់ចំណុចមួយក្នុងរឿងដែលនាំឲ្យមានសុភមង្គល ។
-
ដើម្បីជួយកូនៗរបស់បងប្អូនឲ្យអនុវត្តអ្វីដែលបានបង្រៀននៅក្នុង នីហ្វៃទី៤ ១:១៥–១៦ បងប្អូនអាចបង្ហាញនូវស្ថានភាពដែលប្រជាជនខឹងសម្បារនឹងគ្នា ។ សូមអញ្ជើញពួកគេឲ្យដើរតួសម្តែងថា តើស្ថានភាពនេះអាចទៅជាយ៉ាងណា ប្រសិនបើយើងមាន « សេចក្ដីស្រឡាញ់របស់ព្រះ » នៅក្នុងដួងចិត្តរបស់យើងនោះ ។
សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។
Christ with Three Nephite Disciples [ ព្រះគ្រីស្ទជាមួយនឹងពួកសិស្សសាសន៍នីហ្វៃបីរូប ] ដោយ ហ្គែរី អិល ខាប