Sanza ya Misato 10–16: “Bokoli ya Eklezia ya Klisto”

Malongi mpe Mayokani 20–22

Mosala ya Mobikisi ya kobimisa Buku ya Mormon esilaki sikawa. Kasi mosala na Ye ya Bozongisi ebandaki kaka kobanda. Kolongola bozongisi ya malongi mpe likoki ya bonganganzambe, Nkolo asalaki yango polele na nzela ya bimoneseli ya ebandeli ete Ye alingaki lisusu kozongisa lingomba ya kala—Eklezia na Ye (tala Malongi mpe Mayokani 10:53; 18:5). Na mokolo ya 6, sanza ya minei, 1830, bandimi koleka motango 40 basanganaki na ndako ya libota ya Whitmer na Fayette, New York, mpo na kozala banzeneneke ya lingomba ya Eklezia ya Yesu Klisto.

Bato mosusu bamitunaka mpo na nini ezali ntina kozala na Eklezia ebongisama? Eyano ekoki kozwana, ata na moke, na bimoniseli oyo ekangamaki na liyangani wana ya yambo ya Eklezia na 1830. Elimboli mapamboli oyo ekokaki kosalema te soki Eklezia ya solo ya Yesu Klisto “ebongisamaki te mpe etiamaki te engebene na mibeko” na mikolo ya nsuka (Malongi mpe Mayokani 20:1)

Tala lisusu Basantu,, 1:84–86; “Botonga Eklezia na Ngai,” Revelations in Context,, 29–32.

Makanisi mpo na Koyekola na Ndako mpe na Eklezia

Malongi mpe Mayokani 20–21

Yesu Klisto azongisaki Eklezia na Ye.

Mpo na nini tozali na Eklezia moko ebongisama? Ntango mosusu eyano ya malamu mpenza ezali “Mpo ete Yesu Klisto abongisaki moko oyo.” Ntango bozali kotanga Malongi mpe Mayokani 20–21, bokoki komona bokokani katikati ya Eklezia Ye atiaki na kala mpe moko oyo Ye azongisi lelo. Bosalela milongo oyo elandi mpo na koyekola oyo etali Eklezia ya Mobikisi na bantango ya kala: Matai 16:15–19; Yoane 7:16–17; Baefese 2:19–22; 3 Nefi 11:23–26; Moroni 4–5. Bosalela milongo oyo elandi mpo na koyekola oyo etali Eklezia ezongisama: Malongi mpe Mayokani 20:17–25, 60, 72–79; 21:1–2. Bokoki kokoma maye bozwi na etando lokola moko oyo:

	Malongi	Makuli	Likoki ya Bonganganzambe	Baprofeta
Eklezia ya kala ya Klisto	Malongi	Makuli	Likoki ya Bonganganzambe	Baprofeta
Eklezia ezongisama ya Klisto	Malongi	Makuli	Likoki ya Bonganganzambe	Baprofeta

Nini boyekoli uta na molulu oyo etali mpo na nini Yesu Klisto atiaki—mpe azongisaki—Eklezia na Ye?

Tala lisusu Dallin H. Oaks, “The Need for a Church [Bosenga ya Eklezia],” Liahona, Sanza ya Zomi na Moko 2021, 24-26.

Bobengisami mpo na kokabola. Ntango bobengisi bato mpo na kokabola maye bazalaki koyekola na bango moko, bakomiyoka kopesama mpiko mpo na kokoba na boyekoli na bango ya moto ye moko. Nini bokokoka kobengisa basusu bakabola?

Malongi mpe Mayokani 20:37, 75–79; 22

Makuli ya bule esungaka ngai nakoma lokola Mobikisi.

Ntango Eklezia ebongisamaki, Nkolo ateyaki Basantu na Ye oyo etali makuli ya bule, kosangisaka libatisi mpe elambo. Ntango bozali kotanga oyo etali makuli oyo, bomanyola lolenge nini esalisaka bino bomiyoka ya kokangama na Mobikisi. Ndakisa, lolenge nini makuli oyo esalisaka bino bokanga ya bino “mokano ya kosalela [Yesu Klisto] kino na nsuka”? (molongo 37). Bokoki lisusu kotanga nsambo ya elambo (milongo 77, 79) mpe bobanza ete bozali koyoka yango mpo na mbala ya yambo. Boyebi ya mozindo nini bozwi?

Tala lisusu D. Todd Christofferson, “Why the Covenant Path [Mpo na nini nzela ya Boyokani,” Liahona, Sanza ya mitano 2021, 116–19.

Malongi mpe Mayokani 20:38–60

Mosala ya Bonganganzambe epambolaka bandimi ya Eklezia mpe mabota na bango.

Bokanisi ata mokolo moko oyo etali mpo na nini ezalaki motuya na Mobikisi azongisa bonganganzambe kati na Eklezia na Ye? Kotanga maye Ye asengaka bato bazali na bonganganzambe basala na Malongi mpe Mayokani 20:38–60 ekoki kopesa bino boyebi ya mozindo mosusu. Lolenge nini Mobikisi apambolaki bino mpe libota na bino na nzela ya mosala oyo elimbolami na milongo oyo?

Kolongola baoyo bakulisama na bonganganza, basi oyo batiami pembeni mpo na kosala kati na Eklezia lisusu basalelaka likoki ya Nzambe ntango basalaka elongo na mosala na Ye. Mpo na koyekola lolenge nini, botala nsango ya Mokambi Dallin H. Oaks “The Keys and Authority of the Priesthood[Bafungola mpe Likoki ya Bonganganzambe]” (Liahona, Sanza ya mitano 2014, 49–52).

Tala lisusu Makambo mpe Mituna, “Joseph Smith’s Teachings about Priesthood, Temple, and Women,” topics.ChurchofJesusChrist.org.

Malongi mpe Mayokani 21

Kotosa liloba ya Nzambe na nzela ya baprofeta na Ye ekopesa ngayi bobateli ya bonzambe.

Malongi mpe Mayokani 21:4–9 ezali na mabiangi ya kolanda profeta ya Nkolo mpe bilaka ya nguya elakama mpo na bato oyo balandaka. Makanisi oyo elandi ekoki kosalisa bino bomanyola milongo oyo:

• Maloba nini na milongo 4–5 elimboli maye Mobikisi alingaka bino bosala na maloba ya profeta na Ye na bomoi? Mpo na nini bokanisi “bokitisi motema mpe bondimi” esengelami mpo na kosala yango?

• Bomanyola lisese Mobikisi asaleli na molongo 6 mpo na kolimbola mapamboli ya kolanda profeta na Ye. Bokanisi ete “Bikuke ya lifelo” elimboli nini? Lolenge nini Nkolo “apanzaka banguya ya molili” mpo na bino? Elingi koloba nini mpo ete “balola eningana mpo na bolamu na bino”?

• Nini Nkolo azali kosenga bino bosala na nzela ya Mokambi ya mikolo oyo ya Eklezia? Lolenge nini Nkolo akokisi bilaka na Ye ntango bolandi toli na Ye?

Bosala molongo ya boyebi ya mozindo mosusu oyo bozwi uta na kolandaka biteni ya nsango ya Mpaka Neil L. Andersen “The Prophet of God” (Liahona, Sanza ya mitano 2018, 24–27):

• Mpo na nini Biso Tolandaka Profeta:

• Mokengeli likolo ya Linongi:

• Bokamwa te:

Botala lisusu “Watchman on the Tower [Mokengeli likolo ya Linongi]” (video), ChurchofJesusChrist.org; Makambu mpe Mituna, “Baprofeta,” Biblioteke ya Nsango Malamu; “We Listen to a Prophet’s Voice [Toyokelaka Mongongo ya Profeta],” Hymns, no. 22.

Watchman on the Tower

Mpo na makanisi koleka, botala nsango ya sanza oyo na bamagazini Liahona mpe Mpo na Bokasi ya Bilenge .

Makanisi mpo na Koteya Bana

Malongi mpe Mayokani 20–21

Eklezia ya Yesu Klisto ezongisamaki.

• Bokanisa kosalela eteni ya moto mpo na Malongi mpe Mayokani 21, Mokapo 9 ya Masolo ya Malongi mpe Mayokani, to video “Organization of the Church [Bobongisi ya Eklezia]” (ChurchofJesusChrist.org) mpo na kosalisa bana basosola maye masalamaki na mokolo Eklezia ebongisamaki.

• Ntango mosusu bana na bino bakoki kobalisa bililingi ya Yesu Klisto, moto moko kosalisaka, libatisi, mpe elambo elongo na milongo na eteni 20 (tala milongo 21–23, 47, 72–74, 75–79). Bosalela bililingi mpe milongo oyo mpo na kosolola na ntina ya mapamboli tozali na yango mpo ete Yesu Klisto azongisaki Eklezia na Ye.

Malongi mpe Mayokani 20:37, 41, 71–74

Ntango nabatisami mpe nakuli nkotisa, nalaki kolanda Yesu Klisto.

• Bana na bino bakoki kosepela kotala elilingi ya mwana moko kobatisamaka mpe kokulaka nkotisa. Bakoki kolakisa lolenge nini ekokani na malako na Malongi mpe Mayokani 20:41, 71–74. Boyekoli nini uta na Malongi mpe Mayokani 20:37 etali bato oyo balingaka kobatisama? Bokoki lisusu koyemba “When I Am Baptized[Ntango Nabatisami]” elongo (Children’s Songbook, 103) to botala video “The Baptism of Jesus[Libatisi ya Yesu]” (Gospel Library).

  The Baptism of Jesus

  

• Soki bana na bino basila kozwa libatisi mpe kokula nkotisa, bosenga bango oyo etali boyebi na bango. Bazali na bililingi oyo bakoki kokabola? Bosolola elongo na bango oyo etali maye bazali kosala mpo na kolanda Yesu Klisto mpe lolenge nini Ye azali kopambola bango.

Malongi mpe Mayokani 20:75, 79

Nakoki kozwa nkombo ya Yesu likolo na ngai mpe ntango nyonso komikundola Ye.

• Bana na bino bakoki koluka liloba “kolinga” na nyonso mibale Malongi mpe Mayokani 20:37 (etali libatisi) mpe molongo 77 (losambo ya elambo). Nini Yesu Klisto alingi biso tozala na bolingi ya kosala? Ntango mosusu bana na bino bakoki kotala eloko moko oyo ezali na nkombo likolo na yango (ndakisa nkombo ya eloko to nkombo ya moto). Nkombo yango elobeli biso nini na oyo etali eloko yango? Nini elingi koloba kokamata nkombo ya Klisto likolo na biso?

• Bokanisa kotanga elongo Malongi mpe Mayokani 20:77 mpe kosenga bana na bino bamona bilaka tosalaka lokola eteni ya elambo. Ntango mosusu bakoki kosakana na ngala kosalaka likambo moko bakoki kosala mpo na “komikundola ntango nyonso” Mobikisi mpe kobanzaka misala moko na mosusu ezali nini. Engebene na molongo 77, lolenge nini topambolami ntango tozali komikundola ntango nyonso Mobikisi?

Malongi mpe Mayokani 21:4–6

Yesu apambolaka ngai ntango nazali kolanda profeta na Ye.

• Nsima ya komona mabiangi mpe bilaka na Malongi mpe Mayokani 21:4–6, bana na bino bakoki kotala na elilingi ya profeta ya mikolo oyo mpe bokabola likambo moko bayekoli to bayoki uta na ye. Bokabola na moko na mosusu banzela Yesu Klisto apamboli bino mpo na kolanda profeta na Ye.

Mpo na makanisi koleka, botala nsango ya sanza oyo na magazini Moninga .

Oliver Cowdery azali kokulisa Joseph Smith, na Walter Rane