“Agosto 18–24: “Usa ka Baroganan uban sa Saad”: Doktrina ug mga Pakigsaad 89–92,” Dali, Sunod Kanako—Alang sa Panimalay ug sa Simbahan: Doktrina ug mga Pakigsaad 2025 (2025)
“Doktrina ug mga Pakigsaad 89–92,” Dali, Sunod Kanako—Alang sa Panimalay ug sa Simbahan: 2025
“Agosto 18–24: “Usa ka Baroganan uban sa Saad”
Doktrina ug mga Pakigsaad 89–92
Sa Tulunghaan sa mga Propeta, gitudloan ni Propeta Joseph Smith ang mga elder sa Israel mahitungod sa pagtukod sa gingharian sa Dios dinhi sa yuta. Naghisgot sila og espirituhanong mga kamatuoran, dungan nga pag-ampo, pagpuasa, ug pagpangandam sa pagsangyaw sa ebanghelyo. Apan adunay butang mahitungod sa palibot nga siguro morag lain nato karon, ug morag dili usab kadto husto alang ni Emma Smith. Atol sa mga miting, ang kalalakin-an manigarilyo ug mag-usap og tabako, nga kasarangan niadtong panahona, apan nakamantsa kini og itom sa mga salog nga kahoy ug nagbilin og isog nga baho. Gipakigbahin ni Emma ang iyang mga kabalaka ngadto ni Joseph, ug nangutana si Joseph sa Ginoo. Ang Iyang tubag mao ang usa ka pagpadayag nga sobra pa sa panigarilyo ug mantsa sa tabako. Mihatag kini sa mga Santos, sulod sa mga henerasyon nga moabot, og “usa ka baroganan uban sa saad”—mga saad sa pisikal nga kahimsog, “kaalam,” ug “dako nga mga bahandi sa kahibalo” (Doktrina ug mga Pakigsaad 89:3, 19).
Tan-awa usab sa Mga Santos,; 1:189–92.
Mga Ideya alang sa Pagkat-on diha sa Panimalay ug sa Simbahan
Ang Ginoo mihatag nako sa Pulong sa Kaalam aron sa pagtabang nako nga mahimong himsog sa lawas ug espiritu.
Sa dihang ang mga elder sa Tulunghaan sa mga Propeta unang nakadungog nga gibasa ni Joseph Smith ang Pulong sa Kaalam, dali silang “miitsa sa ilang mga hunsoy ug mga pudyot sa usapunong tabako ngadto sa kalayo” (Mga Santos,, 1:192). Gusto nilang ipakita ang ilang pagkaandam sa pagsunod sa Ginoo. Seguro imo nang “giitsa” gikan sa imong kinabuhi ang mga butang nga gipasidaan sa Pulong sa Kaalam, apan unsa pa man ang imong nakat-onan gikan niining pagpadayag? Ikonsiderar kini nga mga ideya:
-
Hunahunaa ang pagpadayag isip “usa ka baroganan uban sa saad” (bersikulo 3)—malungtarong mga kamatuoran nga mogiya sa paghimo og desisyon. Unsa nga mga baroganan ang imong nakit-an nga makagiya sa imong mga desisyon? Unsa nga mga panalangin ang gisaad sa Ginoo? (tan-awa sa mga bersikulo 18–21). Giunsa Niya pagtuman niadto nga mga saad sa imong kinabuhi?
-
Unsa nga mga ehemplo ang imong nakita sa “mga daotan ug sa mga laraw … diha sa mga kasingkasing sa daotan nga mga tawo”? (bersikulo 4). Agi og dugang niini nga pagpadayag, unsa ang gihatag sa Ginoo aron sa pagtabang nimo o pagbuntog niini nga mga daotan?
-
Unsa ang gitudlo niining pagpadayag kanimo mahitungod sa Ginoo? Sa unsa nga paagi nga ang Pulong sa Kaalam may kalabotan sa Doktrina ug mga Pakigsaad 29:34–35?
-
Unsa ang giaghat nga imong buhaton aron mas maatiman ang imong lawas?
Tingali ikaw adunay mga oportunidad sa pagpasabot ngadto sa uban ngano nga ikaw mosunod sa Pulong sa Kaalam—ug ikaw tingali adunay mas daghan nga oportunidad sa umaabot. Ikonsiderar kon unsaon nimo sa paggamit kini nga mga oportunidad sa pagpamatuod sa Manluluwas, ang kasagrado sa atong lawas, ug sa ubang espirituwal nga mga kamatuoran. Alang sa mga ideya, tan-awa ang “Ang inyong lawas sagrado,” Alang sa Kalig-on sa mga Kabatan-onan: Usa ka Giya sa Paghimo og mga Pagpili, 22–29.
Tan-awa usab sa 1 Mga Taga-Corinto 6:19–20; Thomas S. Monson, “Mga Baroganan ug mga Saad,” Liahona, Nob. 2016, 78–79; Mga Hilisgotan ug mga Pangutana [Topics and Questions], “Pulong sa Kaalam [Word of Wisdom],” Librarya sa Ebanghelyo [Gospel Library]; “The Word of Wisdom,” sa Revelations in Context, 183–91; “Pagkaadik,” “Pisikal nga Kahimsog,” Tabang sa Kinabuhi, Librarya sa Ebanghelyo.
Principles and Promises
President Monson testifies of the blessings that come as we obey the Word of Wisdom.
Pagkat-on ug pagtudlo pinaagi sa mga baroganan. Imbis nga mohimo og mga listahan sa buhaton ug dili buhaton, kita makasunod sa mga baroganan sa paggamit sa atong kabubut-on ug hugot nga pagtuo diha kang Kristo. Pananglitan, ikonsiderar ang mga pangutana nga gibase sa baroganan nga sama niini kabahin sa Pulong sa Kaalam: Unsa nga mga baroganan ang makahatag og pag-awhag ngadto sa usa ka tawo kinsa nakigbisog sa pagsunod sa Pulong sa Kaalam? Unsa nga mga baroganan ang makahupay kanako kon ako adunay mga problema sa panglawas bisan pa sa pagsunod sa Pulong sa Kaalam?
Gusto sa Langitnong Amahan nga atimanon nato ang atong mga lawas.
Doktrina ug mga Pakigsaad 90:1–17
Ang Unang Kapangulohan naghupot sa “mga yawe sa gingharian.”
Diha sa seksiyon 90, ang Ginoo mihatag og mga instruksiyon mahitungod “sa pangalagad ug sa kapangulohan” (bersikulo 12) nila ni Joseph Smith, Sidney Rigdon, ug Frederick G. Williams—mga sakop sa unsay gitawag nato karon og Unang Kapangulohan. Unsay imong nakat-onan mahitungod sa Unang Kapangulohan gikan sa mga bersikulo 1–17? Rebyoha ang bag-ong mga mensahe gikan sa mga sakop sa Unang Kapangulohan. Unsay ilang gibuhat aron sa “[pag]tukod sa kahan-ayan sa tanan nga mga kalihokan niini nga simbahan ug gingharian”? (bersikulo 16). Unsaon nimo sa pagpakita nga kini dili “usa ka butang nga walay bili” nganha kanimo? (bersikulo 5).
Ikonsiderar ang pagkanta o pagbasa sa mga pulong sa “Dali, ug Paminawon Nato ang Pulong sa Propeta” (Mga Himno,, nu. 15) o laing kanta mahitungod sa mga propeta nga mokonektar sa mga pagtulun-an niini nga mga bersikulo. Sa unsang paagi ang serbisyo sa Unang Kapangulohan nakatabang nimo nga makaila sa Langitnong Amahan ug ni Jesukristo?
Doktrina ug mga Pakigsaad 90:24
“Ang tanan nga mga butang maghiusa sa paglihok alang sa [akong] kaayohan.”
Pamalandongi ang bisan unsa nimong mga kasinatian nga nagpamatuod sa saad sa Ginoo diha sa Doktrina ug mga Pakigsaad 90:24. Ikonsiderar ang pagrekord sa imong mga kasinatian ug ipakigbahin kini ngadto sa usa ka sakop sa pamilya o minahal sa kinabuhi—tingali usa ka tawo nga nagkinahanglan og kaseguroan o pag-awhag. Kon ikaw naghulat pa og piho nga mga panalangin, pamalandongi kon unsay imong mabuhat aron magpabiling matinud-anon samtang maghulat ka aron makita kon sa unsang paagi nga ang “tanan nga mga butang maghiusa sa paglihok alang sa imong kaayohan.”
Doktrina ug mga Pakigsaad 90:28–31
Kinsa man si Vienna Jaques?
Si Vienna Jaques natawo niadtong Hunyo 10, 1787, didto sa Massachusetts. Usa ka babaye nga adunay hugot nga pagtuo kinsa adunay daghang salapi, unang nahimamat ni Vienna ang mga misyonaryo niadtong 1831. Human makabaton og espirituhanong pagsaksi nga ang ilang mensahe tinuod, mibiyahe siya aron mahimamat ang Propeta didto sa Kirtland, Ohio, diin siya nabunyagan.
Gituman ni Vienna ang tambag sa Ginoo ngadto kaniya diha sa Doktrina ug mga Pakigsaad 90:28–31. Ang iyang pagpahinungod ngadto sa Ginoo, nga naglakip sa mga donasyon nga iyang gihatag sa sayo pa didto sa Kirtland, miabot sa mahinungdanong panahon alang sa Simbahan, sa dihang ang mga lider misulay sa pagpalit sa yuta diin pagatukoron ang Kirtland Temple. Si Vienna usa ka “matinud-anon, ug dili … tapulan” sa tibuok niyang kinabuhi ug sa kataposan nakahimo sa “[pag]pahimutang diha sa kalinaw” (bersikulo 31) didto sa Walog sa Salt Lake, diin siya namatay sa edad nga 96.
“Ang Espiritu mopadayag sa kamatuoran.”
Kitang tanan makasugat og mga mensahe nga naglakip og “daghan nga mga butang … nga mga tinuod” ug “daghan nga mga butang … nga dili mga tinuod” (Doktrina ug mga Pakigsaad 91:1–2). Unsa nga tambag ang imong makita sa seksiyon 91 nga makatabang nimo sa pag-ila sa kamatuoran sa mga mensahe nga imong masugatan? Sa unsa nga paagi ang Espiritu mitabang nimo sa pag-ila sa kamatuoran gikan sa kasaypanan?
Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.
Mga Tawo, Mga Dapit, Mga Panghitabo
Mga Ideya sa Pagtudlo sa mga Bata
Ang Pulong sa Kaalam nagtabang nako nga mahimsog sa lawas ug sa espiritu.
-
Sa pagpaila sa seksiyon 89, tingali ikaw ug ang imong mga anak mahimong motan-aw sa usa ka litrato sa templo o mokanta og usa ka kanta mahitungod sa pisikal nga kahimsog, sama sa “Ang Ginoo Naghatag Kanako og Templo” (Songbook sa mga Bata, 73), sa pagtudlo nga ang atong mga lawas sama sa mga templo alang sa atong mga espiritu. Tabangi ang imong mga anak sa pagdrama og mga paagi nga sila makaatiman sa ilang mga lawas.
-
Aron makat-on mahitungod sa mga sugo sa Ginoo sa Doktrina ug mga Pakigsaad 89:10–17, ikaw ug ang imong mga anak mahimong magdrowing o motan-aw og mga litrato sa maayong mga butang nga atong kan-on o buhaton aron sa paghimo sa atong lawas nga himsog (tan-awa ang litrato ug sa pahina sa kalihokan sa kataposan niini nga latid). Unsa ang gipasidaan sa Ginoo kanato nga dili gamiton? Ngano nga gusto Niya nga atong atimanon ang atong mga lawas?
-
Si Elder Gary E. Stevenson mitambag sa mga batan-on sa pagplano sa sayo pa unsay ilang himoon kon tintalon nga mogamit og alkohol o mga drugas. Siya mitudlo, “Inyong makita nga ang tintasyon wala kaayoy kontrol diha kaninyo. Nakahimo na kamo og desisyon kon unsaon ninyo paglihok ug unsay inyong buhaton. Dili na kamo kinahanglan mohimo og desisyon sa matag higayon” (“Basahon sa mga taktika ug mga angayang buhaton [Playbook] sa Imong Pagkapari,” Liahona, Mayo 2019, 48). Human magbasa og dungan sa Doktrina ug mga Pakigsaad 89:4 ug sa pamahayag ni Elder Stevenson, pagtinambagay uban sa imong mga anak kon unsaon nila paghimo og hukom karon—alang sa nahibilin sa ilang mga kinabuhi—sa pagsunod sa Pulong sa Kaalam. Mahimo gani kamong magdrama unsaon nila sa pagtubag kon adunay usa ka tawo, bisan usa ka higala, nga motanyag nila og butang nga supak sa Pulong sa Kaalam. Unsaon sa Ginoo pagpanalangin nato samtang mosunod kita sa Pulong sa Kaalam? (tan-awa sa mga bersikulo 18–21).
Ang atong mga lawas gasa gikan sa Dios.
Doktrina ug mga Pakigsaad 90:5
Ang Dios mihatag nato og mga propeta sa paggiya ug pagpanalipod nato.
-
Mahimo kamong motan-aw og mga litrato sa karaan nga mga propeta o manganta og kanta sama sa “Sunda ang Propeta” (Songbook sa mga Bata, 58–59). Giunsa sa Dios pagpanalangin ang Iyang mga anak pinaagi sa Iyang mga propeta? Ngano nga kita kinahanglan nga maminaw sa mga propeta sa Dios? (tan-awa sa Doktrina ug mga Pakigsaad 90:5). Dayon ikaw ug ang imong mga anak makatan-aw sa usa ka litrato sa buhi nga propeta ug mopakigbahin sa pipila ka butang nga gitudlo o gipasidaan sa Ginoo kanato pinaagi kaniya. Unsaon man nato sa pagsunod sa propeta?
Ang Espiritu makatabang kanako nga makahibalo unsa ang tinuod.
-
Mahimo nimong i-summarize ang ulohan sa seksiyon sa Doktrina ug mga Pakigsaad 91 aron sa pagtabang sa imong mga anak nga makasabot ngano nga kini nga pagpadayag gihatag. Makahunahuna dayon sila sa mga dapit, sama sa media, diin atong makita ang “daghang mga butang … nga tinuod” ug “daghang mga butang … nga dili tinuod” (mga bersikulo 1–2). Unsa ang gitudlo sa mga bersikulo 4–6 kanato mahitungod sa Espiritu Santo? Sa unsa nga paagi ang Espiritu Santo motabang kanato nga makahibalo unsay eksakto?
Alang sa dugang nga mga ideya, tan-awa ang isyu karong bulana sa Higala nga magasin.
“Ang tanan nga mga lugas maayo alang sa pagkaon sa tawo; usab ang bunga sa bagon.”