“Eb’ li xyaab’ kuxej re li k’ojob’ank wi’chik: Li musiq’ejil k’utb’esihom ut li santil ochoch re Kirtland,” Kim, Taaqehin—Choq’ re li ochoch ut li iglees: Li Tzol’leb’ ut Sumwank 2025 (2025)

“Li musiq’ejil k’utb’tesihom ut li santil ochoch re Kirtland,” Kim, Taaqehin—Choq’ re li ochoch ut li iglees: 2025

Eb’ li xyaab’ kuxej re li k’ojob’ank wi’chik

Li musiq’ejil k’utb’tesihom ut li santil ochoch re Kirtland

A’in li raatineb’ laj santil paab’anel li ke’wan sa’ li santil ochoch re Kirtland naq ki’osob’tesiman, ut sa’ xkomon chik li ch’utam chirix a’an. Ke’wan naab’al li ke’xjuntaq’eeta li ke’xk’ul rik’in li ke’xk’ul li najter aj santil paab’anel naq “ke’tiqib’aaq rik’in li wankilal kichal chaq taqe’q” (Lukas 24:49; chi’ilmanq ajwi’ Hechos 2:1–4; Tzol’leb’ ut Sumwank 109:36–37).

Eliza R. Snow

“Eb’ li loq’laj k’anjel re li osob’tesink a’an naru chi seraq’imank, a’b’an maak’a’ li ruchich’och’il aatin naru chi ch’olob’ank re li choxahil k’utb’esink ke’wan sa’ li kutan a’an. Wankeb’ li ke’xk’ut rib’ anjel chiruheb’, ut chixjunileb’ li wankeb’ aran ke’reek’a xwanjik li choxahilal, ut li junjunq chi aamej kinujak rik’in jun xnimal sahil ch’oolej nujenaq chi loq’alil.””

Sylvia Cutler Webb

“Chalen chaq inka’ch’inal toj najultiko’ we li rosob’tesinkil li santil ochoch. Lin yuwa’ kooxq’alu sa’ xb’een ra ut kixye qe k’a’ut naq tooxik ut k’a’ru xyaalalil rosob’tesinkil jun li ochoch choq’ re li Dios. Ut us ta toj ka’ch’inin chaq, toj najultiko’ we chi us. Chirix xnumikeb’ li chihab’ toj naru nawil, jo’ kiwil sa’ li kutan a’an, laj Jose li Profeet, xaqxo aran chi ye’b’il li ruq’ sa’ xjayal li choxa, yoo chaq chi yaab’ak naq ki’aatinak sa’ li xnimal ru kutan a’an. Yooko chi yaab’ak chiqajunil. Q’axal latz’ li kab’l ut q’alunb’ileb’ lix k’ihaleb’ li kok’al xb’aaneb’ li ninq; lin yuwa’ xq’alu li wanab’, ut lin na’ xinixq’alu laa’in. Najultiko’ ajwi’ we li t’ikr tiqib’anb’ilo wi’. Toj ka’ch’inin chaq, jo’kan naq ink’a’ kintaw ru xtz’aqalil lix aajelil ru, a’b’an rik’in xnumikeb’ li chihab’ nin’ok chixtawb’al ru, ut ninb’antioxi naq kin’osob’tesiik chi wank aran.”

Oliver Cowdery

“Sa’ li ewu kinwan wochb’eeneb’ laj k’anjel re li iglees sa’ li rochoch li Qaawa’. Kihoyman li Musiq’ej—kiwil lix loq’al li Dios, jo’ jun nimla choql, chi kub’eek ut chi kanaak sa’ xb’een li kab’l, ut kixnujob’resi jo’ jun li kawil iq’. Kiwileb’ ajwi’ li jek’inb’il ru’uj aq’ej chanchan re ru xam chi kanaak sa’ xb’eeneb’ naab’al, … naq yookeb’ chi aatinak rik’in jalanil aatinob’aal chixyeeb’al profeetil aatin.”

Benjamin Brown

“Naab’al li kik’utb’esiman. Junaq kiril jun li choql chi kanaak sa’ xb’een li kab’l, q’axal nalemtz’un jo’ xlemtz’unkil li saq’e chiruheb’ li choql. Wiib’eb’ chik ke’ril oxib’ li anjel xaxqookeb’ sa’ iq’, chapchookeb’ li laaw sa’ ruq’eb’, jo’ ajwi’ jun li kadeen lemtz’un ru.”

Orson Pratt

“Kiwan li Dios aran, jo’eb’ ajwi’ lix anjel, li Santil Musiq’ej kiwan sa’ xyanqeb’ li kristiaan … ut ke’nujob’resiik chixjunil lix junxaqalileb’ rik’in xwankil ut xmusiq’ahom li Santil Musiq’ej.”

Nancy Naomi Alexander Tracy

“Naq kichoyman lix kab’lankil li santil ochoch ut naq ki’osob’tesiman … a’aneb’ wiib’ reheb’ kutan q’axal saheb’ chiru inyu’am. Li b’ich li kitz’iib’aman choq’ re li kutan a’an, a’an “Lix Musiq’ li Dios jo’ jun xam naxamnak.” Tz’aqal yaal naq lix wankil li choxahilal kikana sa’ xb’een li kab’l a’an. … Kiweek’a naq li choxa wan sa’ ruchich’och’.”