Far West, Missouri, xb’aan laj Al Rounds

13–19 octubre: “Lix mayej q’axal loq’aq wi’chik choq’ we chiru lix k’iijik”

Tzolʼlebʼ ut Sumwank 115–120

Wan xyaalal naq eb’ laj santil paab’anel ke’saho’ xch’ool chirix li ak’ na’ajej li te’ruuq raj wi’ chi wank, Far West, Missouri. Li tenamit ki’ok chi nimank sa’ junpaat, chanchan naq xiikil ruuchinihom li ch’och’ ut nach’ wan rik’in Adan-Ondi-Aman, jun na’ajej aajel ru sa’ musiq’ej, najter ut moqon (chi’ilmanq Tzol’leb’ ut Sumwank 107:53–56; 116). A’ut, toj ch’a’aj tana choq’ reheb’ laj santil paab’anel naq ink’a’ te’xk’oxla li k’a’ru kisach chaq chiruheb’. Chirix naq ke’isiik chaq aran Independence, lix na’aj Sion, eb’ laj santil paab’anel tento ajwi’ naq ke’el aran Kirtland ut ke’xkanab’ lix raarookil santil ochoch chirix ka’ajwi’ wiib’ chihab’. Ut anajwan, maawa’eb’ ka’ajwi’ laj xik’ ilonel li moko wankeb’ ta sa’ li Iglees li ke’xyoob’ li ch’a’ajkilal—ke’wan ajwi’ li komon li ke’xpo’resi xch’ool chirix laj Jose Smith, jo’eb’ li kaahib’ reheb’ li komon sa’ xMolameb’ li Kab’laju.

Sa’ xna’aj xk’eeb’aleb’ xch’ool chirix li k’a’ru kisach chiruheb’, li tiik aj paab’anel ke’ok chi k’anjelak aran Sion, aran Far West. Ke’xk’uub’ xkab’lankil jun ak’ santil ochoch. Ke’b’oqe’ kaahib’ chik ak’ apostol. Ke’xtzol naq xb’aanunkil lix k’anjel li Dios ink’a’ naraj naxye naq maajo’q’e tatt’ane’q, a’ b’an naq “tatwakliiq wi’chik.” Ut us ta tento tatmayejaq, loq’eb’ li mayej a’an sa’ rilob’aal li Dios, ut “q’axal loq’aq wi’chik … chiru laa k’iijik” (Tzol’leb’ ut Sumwank 117:13).

Chi’ilmanq Santos, 1:300–303.

Li na’leb’ re tzolok sa’ li ochoch ut sa’ li iglees

Tzol’leb’ ut Sumwank 115:3–6

Lix k’ab’a’ li Iglees aajel ru choq’ re li Qaawa’.

Li Awa’b’ej Russell M. Nelson kixye naq lix k’ab’a’ li Iglees a’an “jun na’leb’ aajel ru” (“Tz’aqal xk’ab’a’ li Iglees,” Jolomil ch’utub’aj-ib’ re octubre 2018). K’oxla k’a’ut naq yaal a’an naq yooqat chirilb’al Tzol’leb’ ut Sumwank 115:4–6. Chan ru naq lix k’ab’a’ li Iglees naxk’am rib’ rik’in lix k’anjel?

Chi’ilmanq ajwi’ 3 Nefi 27:1–11.

Tzol’leb’ ut Sumwank 115:5–6

Sion ut eb’ li roqechal wankeb’ choq’ “muheb’aal chiru li kaq-sut-iq’.”

Naq taatzol li na’leb’ li nim xwankil sa’ Tzol’leb’ ut Sumwank 115:5–6, k’e reetal lix k’anjel li Qaawa’ li naraj naq laa’at, jo’ komon sa’ lix Iglees, taab’aanu. Qayehaq, k’a’ru naru nakab’aanu re naq “tatwakliiq ut tatlemtz’unq” malaj “tatwanq choq’ xaqxookil eetalil chiruheb’ li tenamit”? (raqal 5). K’a’ chi musiq’ejil kaq-sut-iq’ nakak’e reetal naq wan sa’ laa sutam? Chan ru naru nakataw “jun kolb’a-ib’ na’ajej” sa’ li ch’utub’ank? (raqal 6).

Lix Iglees li Kolonel naru nawan jo’ jun saqen ut jun kolb’a-ib’ na’ajej sa’ li kaq-sut-iq’.

Tzolʼlebʼ ut Sumwank 117

Eb’ lin mayej loq’eb’ choq’ re li Qaawa’.

K’oxla naq laa’at laj Newel K. Whitney malaj li rixaqil a’an, xElizabeth, li chaab’ileb’ xyu’am aran Kirtland ut chirix a’an ke’raj elk aran. K’a’ru nakataw sa’ Tzol’leb’ ut Sumwank 117:1–11 li maare katxtenq’a raj chixb’aanunkil li mayej a’an? K’a’ru li mayej nakak’e choq’ re li Dios? K’a’ru neke’xk’ut chawu li raqal a’in chirix ani li Dios ut k’a’ru naxb’aanu?

Li mayej kipatz’man re laj Oliver Granger jalan chiru li re laj Whitney: li Qaawa’ kixk’e xk’anjel chi kanaak aran Kirtland ut chirilb’al xtuminal li Iglees. Us ta kik’anjelak choq’ re li Iglees chi tiik, sa’ xraqik moko ki’el ta chi uub’ej. K’oxla chan ru naq li raatin li Qaawa’ sa’ Tzol’leb’ ut Sumwank 117:12–15 neke’k’anjelak choq’ re li k’a’aq re ru naxpatz’ aawe.

Chi’ilmanq ajwi’ “Far West y Adán-ondi-Ahmán,” sa’ Revelaciones en contexto, 251–257.

Tzol’leb’ ut Sumwank 119–20

Li lajetqil nintoj natenq’an chixwaklesinkil li rawa’b’ejihom li Dios.

Li na’leb’ wan sa’ li tasal 119 ut 120 neke’aatinak chirix li lajetqil: naqak’e “lix lajetq raqal” li qak’iijik (malaj qatumin) rajlal chihab’ (chi’ilmanq Tzol’leb’ ut Sumwank 119:4). A’b’an li k’utb’esinb’il na’leb’ a’in moko ka’ajwi’ ta neke’xch’olob’ k’a’ru a’an. Li Qaawa’ kixye reheb’ laj santil paab’anel naq li lajetqil “tixsantob’resi li ch’och’ Sion.” Ut chi maak’a’ li chaq’rab’ a’in, chan a’an “maawa’aq jun ch’och’ Sion choq’ eere” (raqal 6). Ma aak’oxlahom jun sutaq xk’eeb’al laa lajetqil chi jo’kan? Chan ru naq xtojb’al li lajetqil naru nakatxtenq’a chi santob’resiik ut chi kawob’resiik choq’ re Sion?

K’a’ru nakatzol sa’eb’ li k’utb’esinb’il na’leb’ a’an chirix chan ru naq eb’ lix moos li Qaawa’ neke’roksi lix tuminal li lajetqil? K’a’ru xyaalalil choq’ aawe li aatin “xb’aan lix yaab’ inkux laa’in reheb’” sa’ Tzol’leb’ ut Sumwank 120?

Li Elder David A. Bednar kixch’olob’ chan ru na’oksiman li lajetqil ut li osob’tesihom neke’chal sa’ xk’ab’a’ xpaab’ankil li chaq’rab’ a’in sa’ “Las ventanas de los cielos” (Liahona, noviembre 2013, 19–20). Eb’ li patz’om a’in naru nakate’xtenq’a chixtzolb’al li raatin a’an:

The Windows of Heaven

• Ani nayehok re chan ru na’oksiman li lajetqil chirix naq natojman a’an sa’ li Iglees?

• K’a’ru aj-e li lajetqil?

• K’a’ru li osob’tesihom nak’ulman sa’ xk’ab’a’ xtojb’al li lajetqil? Qayehaq, chan ru naq xtojb’al li lajetqil naxkawob’resi li qasumwanjik rik’in li qaChoxahil Yuwa’ ut li Jesukristo?

• K’a’ru naru nakatzol sa’ lix b’oqom li Elder Bednar?

• Chan ru naru nakatenq’aheb’ laa was aawiitz’in chixnimob’resinkil lix paab’aaleb’ chirix lix chaq’rab’ li Qaawa’ re li lajetqil?

Chi’ilmanq ajwi’ Malakias 3:8–12; “ El diezmo de mi pueblo ,” sa’ Revelaciones en contexto, 266–272.

Tenq’aheb’ laa was aawiitz’in chixk’anjelankil li yookeb’ chixtzolb’al. Wan naq wan ani naraj xtojb’al xlajetqil, a’b’an ink’a’ naxnaw chan ru xb’aanunkil. Wi laa’at aj k’utunel sa’ laa junkab’al, naru taachap aahoonal re xch’olob’ankil chan ru natojman li lajetqil, maare sa’ internet malaj rik’in xhuhil li lajetqil ut xkomon chik li mayej. (Chi’ilmanq Li K’utuk jo’ li Kolonel, 27.)

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Tzol’leb’ ut Sumwank 115:4–5

Laa’in komon sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan.

• Re xtenq’ankileb’ laa kok’al chixtzolb’al xk’ab’a’ li Iglees ut xtawb’al ru k’a’ut naq aajel ru, naru nakapatz’ re junaq ma naru naxye xk’ab’a’ li Iglees. Chirix a’an naru nakak’ut lix k’ab’a’ li Iglees chiruheb’ li wan sa’ Tzol’leb’ ut Sumwank 115:4 ut taapatz’ reheb’ naq te’xka’suti. Naq teeb’aanu a’an, naru nakaka’jultijaheb’ li aatin aajeleb’ ru ut k’a’ut naq aajeleb’ ru. Naru ajwi’ nakawil “Ch’ol 43: Li Jesukristo naxk’e xk’ab’a’ lix Iglees” (sa’ Eb’ li Esilal sa’ li Tzol’leb’ ut Sumwank, 164, malaj li video sa’ li Biblioteca del Evangelio) malaj b’icha “Lix Iglees li Jesukristo” (B’ichleb’aal choq’ reheb’ li Kok’al, 48).

Chapter 43: Jesus Christ Names His Church: April 1838

Tzol’leb’ ut Sumwank 115:4–6

Lin b’aanuhom naru naxtenq’aheb’ li was wiitz’in chi chalk rik’in li Kristo ut xtawb’al xkawileb’ xch’ool.

• Eb’ laa kok’al maare neke’xnaweb’ ru kristiaan li yookeb’ chixyalb’al xq’e ut neke’raj ru “xkolb’a-ib’ na’aj” chiruheb’ li “kaq-sut-iq’ re li yu’am” (raqal 6). Chan ru naq te’xtenq’aheb’ li kristiaan a’an? Naru nakab’oqeb’ laa kok’al chi xaqliik naq taaye li aatin waklinqex li wan sa’ Tzol’leb’ ut Sumwank 115:5. Naru neke’xyu’ li ru’uj ruq’eb’ jo’ xsaqen li saq’e naq taaye li aatin lemtz’unqex. Jultika reheb’ laa kok’al naq li qasaqen nachal rik’in li Jesukristo ut tenq’aheb’ chixk’oxlankil chan ru naru “neke’lemtz’un” jo’ a’an.

• Laa kok’al naru neke’xyiib’ junaq jalam-uuch li taareetali Tzol’leb ut Sumwank 115:6. Qayehaq, naru neke’xyiib’ xjalam-uuch junaq kaq-sut-iq’ rik’ineb’ kristiaan neke’xkol rib’ sa’ junaq rochochil li Iglees. K’a’ru naru nareetalil li kaq-sut-iq’? Chan ru natenq’an lix Iglees li Kolonel? Tenq’aheb’ laa kok’al chixk’oxlankil junaq raamiiweb’, xjunkab’aleb’, malaj rech kab’aleb’ li wan rajom ru. Chan ru naru neke’qab’oq a’an chixtawb’al xtenq’ankileb’ sa’ lix Iglees li Jesukristo?

Tzolʼlebʼ ut Sumwank 117

Eb’ lin mayej loq’eb’ choq’ re li Qaawa’.

• Patz’ reheb’ laa kok’al naq te’xk’oxla naq a’aneb’ laj Newel K. Whitney. K’a’ raj ru te’reek’a wi ta li Qaawa’ tixpatz’ raj reheb’ naq te’xkanab’ lix trab’aaj ut te’xik sa’ junaq ak’ na’ajej? (Naru natenq’an “Ch’ol 41: Li ch’a’ajkilal sa’ Kirtland,” sa’ Eb’ li Esilal sa’ li Tzol’leb’ ut Sumwank, 158–160, malaj li video sa’ li Biblioteca del Evangelio.) Naq teeril Tzol’leb’ ut Sumwank 117:1–11, patz’ reheb’ laa kok’al naq te’xye aawe naq taakanab’ xyaab’asinkil naq te’rab’i junaq na’leb’ naru natenq’ank reheb’ chixtawb’al xpaab’aaleb’ re ab’ink chiru li Qaawa. K’a’ru naqab’aanu re ab’ink chiru li Qaawa’? Chan ru naq nokorosob’tesi a’an?

Chapter 41: Trouble in Kirtland: 1837–1838

Tzol’leb’ ut Sumwank 119–20

Li qaChoxahil Yuwa’ naroksi li lajetqil re rosob’tesinkileb’ li ralal xk’ajol.

• Naab’aleb’ reheb’ li kok’al maare toj kok’eb’ re sik’ok tumin ut xtojb’al li lajetqil, a’b’an us naq te’xtaw ru chan ru naq li lajetqil natenq’an sa’ lix k’anjel li Qaawa’ chiru li ruchich’och’. Naru nakawoksiheb’ li jalam-uuch sa’ li perel re kok’ k’anjel sa’ xraqik li tusleb’ aatin a’in re xtenq’ankileb’ chixtawb’al ru k’a’ru li lajetil. (Chi’ilmanq ajwi’ “Ch’ol 44: Li lajetqil,” sa’ Eb’ li Esilal sa’ li Tzol’leb’ ut Sumwank, 165–166, malaj li video sa’ li Biblioteca del Evangelio.) Chan ru naq li qaChoxahil Yuwa’ naroksi li lajetqil re rosob’tesinkileb’ li ralal xk’ajol? Wotz laa week’ahom chirix li chaq’rab’ re li lajetqil ut chan ru naq nakatrosob’tesi.

Chapter 44: Tithing: July 1838

Naq naqatoj li lajetqil, naqak’ut li qapaab’aal chirix li Jesukristo.

Re xtawb’al xkomon chik li na’leb’, chi’ilmanq li hu Amigos re li po a’in.