“Dagiti Timek ti Pannakaisubli: Ti Relief Society,” Umaykayo, Sumurot Kaniak—Para iti Pagtaengan ken Simbaan: Doktrina ken Katulagan 2025 (2025)
“Ti Relief Society,” Umaykayo, Sumurot Kaniak—Para iti Pagtaengan ken Simbaan: 2025
Dagiti Timek ti Pannakaisubli
Ti Relief Society
Idi 1842, kalpasan ti pannakabuangay ti Relief Society iti Nauvoo, illinois, kinuna ni Propeta Joseph Smith, “Saan pay a naan-anay ti pannakabukel ti Simbaan agingga a nabukel dagiti babbai.” Maipada ditoy, ti panagadal iti Pannakaisubli ti Simbaan ti Apo ken ti priesthoodna ket saan a kumpleto agingga nga iramanna ti panagadal iti Relief Society, a mismo a daytoy ti “pannakaisubli ti nagkauna a pagtuladan” dagiti babbai a disipulo ni Jesucristo.
Addaan ni Eliza R. Snow iti napateg nga akem iti dayta a pannakaisubli. Adda isuna idi damo a nabukel ti Relief Society ken, kas sekretaria ti gimong, nagisurat kabayatan dagiti miting. Mismo a nasaksianna idi nabukel ti Relief Society a “maibatay iti pagtuladan ti priesthood.” Iti baba ket dagiti balikasna, a naisurat bayat ti panagserbina a kas maikadu a Sapasap a Presidente ti Relief Society, tapno matulongan dagiti kakabsatna a babbai a maawatanda ti nadiosan nga aramid a naitalek kadagiti natulagan nga annak a babbai ti Dios.
Tapno masursuro ti ad-adu pay maipapan no kasano a nabukel ti Relief Society, kitaen iti Daughters in My Kingdom: The History and Work of Relief Society (2017), 1–25; The First Fifty Years of Relief Society (2016), 3–175.
Naipinta a ladawan ti timpuyog ti Relief Society ni Paul Mann
Eliza R. Snow
“Nupay ti nagan a [Relief Society] ket mabalin nga addaan iti moderno a petsa, nagkauna ti nagtaudan ti timpuyog. Imbaga kadatayo ni [Joseph Smith], a ti isu met la nga organisasion nga adda iti simbaan idi un-unana, a mayarngi iti sumagmamano kadagiti surat a nairekord iti Baro a Tulag, nga usaren ti paulo, ‘napili a babai’ [kitaen iti 2 Juan 1:1; Doktrina ken Katulagan 25:3].
“Daytoy ti maysa nga organisasion a saan a mapaadda no awan ti Priesthood, gapu iti kinapudno nga aggapu ti amin a turay ken bilegna manipud iti dayta a pagtaudan. Idi naawan ti Priesthood manipud iti daga, daytoy a timpuyog a kas met tunggal sabali a nayon ti pudno nga urnos ti simbaan ni Jesucristo iti daga, ket napukaw. …
“Ti kaaddak idi mabuangay ti organisasion ti ‘Female Relief Society of Nauvoo,’ … ken kasta met ti kaadda iti nawadwad a padas iti dayta a gunglo, nalabit a makapagsaritaak iti sumagmamano a paripirip a makatulong kadagiti babbai nga annak ti Zion iti panakikameng iti daytoy napateg unay a posision, a napnuan kadagiti baro ken napaadu a pagrebbengan. No adda man kadagiti annak a babbai ken inna iti Israel a makarikrikna iti limitasion kadagiti agdama a kabaelanda, makabirokda itan iti makaanay nga abilidad iti tunggal bileg ken kabaelan para iti panagaramid iti nasayaat a siwawaya a naited iti kaaduan kadakuada. …
Nabuangay ti Relief Society iti siled ti ngato ti Paglakuan a Nalabaga a Radrilio (Red Brick Store).
“No adda rumsua a saludsod iti panunot, iti ania man, Ania ti panggep a tun-oyen ti Relief Society dagiti Babbai? Ti sungbatko—agaramid iti naimbag—a mangyeg iti panangusar ti tunggal kabaelan nga adda kadatayo nga agaramid iti nasayaat, saan laeng iti panangngaasi kadagiti nakurapay ngem iti panangisalakan kadagiti kararua. Ad-adu ti maipatungpal ti nagkaykaysa a panagkagumaan ngem ti mabalin a maipatungpal dagiti kasasamayan a panagkagumaan ti tunggal maysa. …
“Iti panangtulong kadagiti nakurapay, ti Relief Society dagiti Babbai ket addaan iti sabali pay a pagrebbengan nga akmen a saan laeng nga ayuda dagiti kasapulan ti bagi. Ti kinapanglaw ti panunot ken sakit ti puso, agkasapulan met iti panangasikaso; ket iti mamin-adu a nasayaat a panangipeksa—iti sumagmamano a balikas a pammagbaga, wenno uray pay ti nabara ken naayat a panangalamano iti ima ket ad-adunto ti naimbag a maipaayna ken nasaysayaat ti pannakabigbig iti pategna ngem ti sangasupot a balitok. …
“No aguummong dagiti Santo manipud iti adayo, ganggannaetda iti tunggal maysa, ken isuda ti puntirya a yaw-awan dagiti mangpadas a mangallilaw, ti [Relief] Society koma ti nadaras a mangkitkita [kadakuada], ken mangyam-ammo kadakuada iti gimong a mangubog ken mangitag-ayto, ken kangrunaan ti amin mangpapigsa kadakuada iti pammati ti Ebanghelio, ket iti panangaramid iti daytoy, mabalin a ramit iti pannakaisalakan iti adu.
“Kasapulan daytoy ti adu a libro tapno a mailadawan ditoy dagiti naituding nga aramiden, pribilehio ken pagrebbengan a sumangbay iti uneg dagiti pagrebbengan iti Relief Society. … Mapankayo iti daytoy (babaen ti panangiturong ti bishopyo), sipapakumbaba, sitatallugod, sireregta, sikakaykaysa ken sikakararag, ken bendisionannakayto ti Dios kadagiti panagkagumaanyo nga addaan iti balligi.”