Detalye manipud iti Ni Joseph Smith iti Nauvoo, 1840, ni Theodore Gorka

Nobiembre 10–16: “‘Nakitak ti Panagsaksakripisiom iti Panangtungpalmo”

Doktrina ken Katulagan 129–132

Babaen ken ni Joseph Smith, innala ti Apo ti sumagmamano a misterio manipud iti kinaagnanayon. Ti kinaindaklan ti Dios, ti dayag ti langit, ken ti kinalawa ti kinaagnanayon ket mabalin a kasla dandani pamiliar iti lawag ti naisubli nga ebanghelio, uray pay kadagiti addaan patinggana a panunot a kas kadatayo. Dagiti paltiing iti Doktrina ken Katulagan 129–32 ti nasayaat a pagarigan. Ania ti langa ti Dios? Isu ket “addaan iti bagi a nagtagilasag ken nagtagitulang a marikna a kas iti tao.” Ania ti langa ti langit? “Dayta met laeng a pannakipulapol nga adda kadatayo ditoy addanto kadatayo sadiay” (Doktrina ken Katulagan 130:22, 2). Kinapudnona, maysa kadagiti makaparagsak unay a kinapudno maipapan iti langit ket mabalin nga iramanna dagiti ipatpategtayo a relasion ti pamilia, no mailantip babaen ti umno a turay. Dagiti kinapudno a kas kadagitoy ti mamagbalin a mariknatayo a di unay adayo ti langit—nadayag, ngem magaw-at.

Ngem kalpasanna, no dadduma mabalin a kiddawen ti Dios kadatayo nga agaramid kadagiti banag a saan unay a nagin-awa ken kasla saanda a magaw-at. Para iti adu a nagkauna a Santo, ti panagkallaysa iti ad-adu ngem maysa ket maysa a kasta a bilin. Maysa a nakaro a pannubok ti pammati para ken ni Joseph Smith, ti asawana a ni Emma, ken ti dumani tunggal maysa a nangawat iti daytoy. Tapno maparmekda daytoy a pannubok, kasapulanda ti ad-adu pay a nasayaat a rikna maipapan iti naipasubli nga ebanghelio; kasapulanda ti pammati iti Dios a napigpigsa pay ngem iti dayta. Saanen a maipakat dayta a bilin itan, ngem ti napudno a pagwadan dagiti tao a nagtungpal iti daytoy ket maar-aramid pay laeng ita. Ket paregtaennatayo daytoy a pagwadan no maidawat kadatayo nga aramidentayo dagiti bukodtayo a “sakripisio iti panagtulnog” (Doktrina ken Katulagan 132:50).

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 130–132

Tarigagayan ti Dios a maitan-ok dagiti annakna.

Adu dagiti banag a ditayo ammo maipapan iti pannakaitan-ok wenno ti biag iti kangatuan a tukad ti celestial a pagarian—ti kita ti biag a pagbiagan ti Dios. Kaaduan ditoy ti mabalin a labes ti agdama a kabaelantayo a maawatan. Ngem impalgak ti Dios ti sumagmamano a napapateg a pamugtuan, ken adu kadagitoy ti masarakan iti Doktrina ken Katulagan 130–32. Mabalinyo a basaen a pampanunotenyo dagiti saludsod kas kadagitoy: Ania ti masursurok maipapan iti Dios? Ania ti masursurok maipapan iti biag kalpasan daytoy a biag? Kasano a mangbendision iti biagko ita daytoy nga impormasion maipapan iti agnanayon a biag?

Kitaen met iti “Our Hearts Rejoiced to Hear Him Speak,” iti Revelations in Context, 277–80.

Doktrina ken Katulagan 130:20–21; 132:5

Bendisionan ti Apo dagiti agtungpal kadagiti bilinna.

Iti bukodyo a balikas, kasano nga isaoyo no ania ti isuro ti Apo iti Doktrina ken Katulagan 130:20–21 ken 132:5? Utobenyo no kasano a naipakitan iti biagyo daytoy a pagbatayan.

No dadduma, uray no natulnogtayo iti Dios, saan a dagus nga umay dagiti bendision a namnamaentayo. Kasano a mapagtalinaedyo ti pammati ken namnamayo no mapasamak daytoy? Sapulenyo dagiti nalawag a pannakaammo ken pannakaawat iti mensahe ni Elder D. Todd Christofferson “Our Relationship with God” (Liahona, Mayo 2022, 78–80).

Kitaen met iti 1 Nephi 17:35; Doktrina ken Katulagan 82:10.

Doktrina ken Katulagan 132:13–21

Inaramid ti Nailangitan nga Ama a posible a makapagdedenna dagiti pamilia iti agnanayon.

Babaen ken ni Propeta Joseph Smith, insubli ti Apo ti kinapudno a ti panagasawa ken relasion ti pamilia ket mabalin nga agnanayon. Bayat ti panangbasayo iti Doktrina ken Katulagan 132:13–21, sapulenyo dagiti ragup ti balikas a makatulong kadakayo a makaawat iti pagdumaan ti no anianto ti “agtalinaed” iti agnanayon ken no anianto ti saan. Ania iti panagkunayo ti kayat a sawen ti relasion iti panagasawa iti “babaen “iti ]Apo]? (bersikulo 14).

Iti mensahena “In Praise of Those Who Save,” pagdumaen ni Presidente Dieter F. Uchtdorf dagiti agnanayon a relasion ti panagasawa kadagiti “maibelleng” a banag (Liahona, Mayo 2016, 77–78). Ania iti isuro kadakayo daytoy a pagdumaan maipapan iti no kasano ti panangtaraken—wenno panagsagana para iti—relasion ti panagasawa? Panunotenyo maipapan kadagiti relasion ti pamiliayo—ita ken iti masakbayan—bayat ti panangbasayo iti mensahe ni Elder Uchtdorf. Ania ti masarakanyo idiay a makaited kadakayo iti namnama ken ni Cristo para kadagiti relasionyo iti pamilia?

Imbinglay ni Presidente Henry B. Eyring daytoy a balakad a naawatna idi nagdanag maipapan iti situasion ti pamiliana: “Agbiagka laeng a maikari iti celestial a pagarian, ket ti pannakaurnos ti pamilia ket ad-adda a nakaskasdaaw ngem iti mabalinyo nga ipagarup” (iti “A Home Where the Spirit of the Lord Dwell,” Liahona, Mayo 2019, 25). Kasano a makatulong kadakayo wenno iti maysa nga am-ammoyo daytoy a balakad?

Kitaen met iti “Families Can Be Together Forever,” Hymns, no. 300; Topics and Questions, “Marriage,” Gospel Library.

Mabalin a mailantip ti panagasawa para iti kinaagnanayon iti balay ti Apo.

Doktrina ken Katulagan 132:1–2, 29–40

Maawat laeng iti Dios ti panagkallaysa iti ad-adu ngem maysa no ibilinna daytoy.

Adu a tattao a nakabasa iti Daan a Tulag ti nasdaaw maipapan kada Abraham, Isaac, Jacob, Moises, ken dadduma pay a nangikallaysa iti ad-adu ngem maysa nga asawa. Nakikamalala kadi dagitoy a katulongan ti Apo? Wenno inanamongan kadi ti Dios dagiti panagasawada? Addaan ni Joseph Smith kadagiti isu met laeng a saludsod. Sapulenyo dagiti sungbat inga inted ti Dios iti Doktrina ken Katulagan 132:1–2, 29–40.

Ti kallaysa iti nagbaetan ti maysa a lalaki ken maysa a babai ket pagrukodan ti Dios iti panagasawa (kitaen ti paulo ti benneg ti Opisial a Palawag 1; Jacob 2:27, 30). Nupay kasta, adda dagidi panawen idi imbilin ti Dios kadagiti annakna nga aramidenda ti panagkallaysa iti ad-adu ngem maysa.

Dagiti immuna a tawen ti naipasubli a Simbaan ti maysa kadagita a panawen ti pannakailaksid. No kayatyo a maammuan ti ad-adu pay maipapan iti panagasawa ti adu kadagiti immuna a Santo, kitaen iti “Mercy Thompson and the Revelation on Marriage” (iti Revelations in Context, 281–93); Saints, 1:290–92, 432–35, 482–92, 502–4; Topics and Questions, “Plural Marriage in The Church of Jesus Christ of Latter-day Saints,” Gospel Library; “Why Was It Necessary for Joseph Smith and Others to Practice Polygamy?” (video), ChurchofJesusChrist.org.

Why was it necessary for Joseph Smith and others to practice polygamy?

A question from the Worldwide Devotional: A Face to Face Event with Elder Cook on September 9, 2018

Dagiti Kapanunotan para iti Panangisuro kadagiti Ubbing

Doktrina ken Katulagan 130:2, 18–19; 132:13, 19

Kayat ti Nailangitan nga Ama nga agpokusak kadagiti agnanayon a banag.

• Ania ti isuro kadatayo ti Doktrina ken Katulagan 132:13 maipapan kadagiti banag iti lubong? Nalabit a mabalinyo ken dagiti annakyo nga ipempen iti maysa a maleta wenno bakpak dagiti banag a mangibagbagi kadagiti banag a, segun iti Doktrina ken Katulagan 130:2, 18–19; 132:19; maitugottayo iti sumaruno a biag.

Doktrina ken Katulagan 130:20–21; 132:5, 21–23

Bendisionannak ti Apo no agtungpalak kadagiti bilinna.

• Nalabit a makaisuro kadagiti annakyo ti simple a panangidilig maipapan iti panagtungpal kadagiti bilin ti Dios. Kas pagarigan, mabalinyo nga idawat kadakuada a mangted kadakayo kadagiti direksion a pagnaan a mapan iti maysa a lugar, kas iti maysa nga eskuela ken pasdek ti Simbaan. Ania ti mapasamak no saantayo a suroten dagiti direksion? Kalpasanna mabalinyo a basaen ti Doktrina ken Katulagan 130:21 ken idilig dagitoy a direksion kadagiti bilin ti Dios nga intedna kadatayo.

• Mabalin a kayatyo pay ti agkansion iti maysa a kanta maipapan iti panagtulnog, kas iti “Keep the Commandments” (Children’s Songbook, 146–47), ken sapulenyo dagiti balikas iti Doktrina ken Katulagan 130:20–21 ken 132:5 a maipada kadagiti adda iti kanta. Kasano a bendisionannatayo ti Dios no ikagumaantayo a tungpalen dagiti bilinna?

Doktrina ken Katulagan 130:22

Addaan iti imortal a pisikal a bagi ti Nailangitan nga Ama ken Jesucristo.

• Kalpasan ti panangbasa iti Doctrine and Covenants 130:22 nga aggigiddan, mabalinyo ken dagiti annakyo ti mangkita iti maysa a ladawan ni Jesucristo ket itudo dagiti matana, ti ngiwatna, ken dadduma pay a paset ti bagina. Mabalin nga itudo dagiti annakyo dagiti kapada met la a paset dagiti bukodda a bagi. Ibagayo kadakuada no apay a napateg a maammuanyo a kaasping dagiti bagitayo ti bagi ti Nailangitan nga Ama ken ni Jesus.

Gapu kadagiti ordinansa iti balay ti Apo, makapagdedenna dagiti pamilia iti agnanayon.

Doktrina ken Katulagan 132:19

Inaramid a posible ti Nailangitan nga Ama a makapagdedenna dagiti pamilia iti agnanayon.

• Tulonganyo dagiti annakyo a mangsapul kadagiti pagarigan dagiti banag a saan nga agpaut iti agnanayon—taraon a mabangles, sabong a malaylay, ken dadduma pay. Kalpasanna aggigiddan a mangkita iti Doktrina ken Katulagan 132:19 ket sapulen dagiti kangrunaan a ragup dagiti balikas a kas iti “agnanayon a katulagan,” “nailantip,” “iti unos ti kinaagnanayon,” ken “agnanayon nga awan inggana.” (Kitaen met iti “Kapitulo 55: Maysa a Paltiing maipapan iti Kallaysa,” iti Dagiti Estoria iti Doktrina ken Katulagan, 198, wenno ti katupagna a video iti Gospel Library.) Mabalinyo pay a kitaen dagiti ladawan ti pamiliayo ket paneknekan nga inaramid ti Apo a posible daytoy, babaen kadagiti ordinansa ken katulagan ti templo, tapno agpaut iti agnanayon dagiti pamilia.

Chapter 55: A Revelation about Marriage: July 1843

Agbalin a managrikna kadagiti kasasaad ti pamilia. “Maammuan mismo dagiti ubbing ita nga addada iti adu a nagduduma ken naririkut a kasasaad ti pamilia. … Nasken a tulongan[tayo] [dagiti] makarikna nga agmaymaysada, napanawan, wenno addada iti ruar ti alad” (Neil L. Andersen, “Whoso Receiveth Them, Receiveth Me,” Liahona, Mayo 2016, 49, 52).

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Maysa a siled a pagilantipan iti Templo iti Paris France