Datayo a Kaduatayo Ida ken Isuda a Kaduadatayo ,, ni Caitlin Connolly

Nobiembre 3–9: “Naragsak a Timek para kadagiti Sibibiag ken kadagiti Natay”

Doktrina ken Katulagan 125–128

Iti Agosto 1840, dimngeg ti agladladingit a ni Jane Neyman ken ni Propeta Joseph a nagsarita iti pamunpon ti gayyemna a ni Seymour Brunson. Pimmusay met itay nabiit ti agtutubo nga anak ni Jane a ni Cyrus. Ti mangpakaro iti panagladingitna ket ti kinapudno a di pay nakapagbuniag ni Cyrus, ket nagdanag ni Jane no ania ti kaipapanan daytoy para iti agnanayon a kararuana. Napanunot met ni Joseph ti isu met laeng a banag maipapan iti patpatgenna a kabsatna a ni Alvin, a natay met sakbay ti pannakabuniagna. Isu nga inkeddeng ti Propeta nga ibinglay iti tunggal maysa iti pamunpon no ania ti impaltiing ti Apo kenkuana maipapan kadagiti tao a matay a saan a nakaawat kadagiti ordinansa ti ebanghelio—ken no ania ti maaramidtayo a makatulong kadakuada.

Ti doktrina ti panagbuniag para kadagiti natay ti nangparegta ken nangpagagar kadagiti Santo; naiturong a dagus dagiti kapanunotanda kadagiti pimmusayen a miembro ti pamilia. Ita addan namnama para kadakuada! Nakipagrag-o ni Joseph kadakuada, ken iti maysa a surat a mangisursuro iti daytoy a doktrina, inusarna ti narag-o, makaparegta a pagsasao a mangyebkas no ania ti insuro ti Apo kenkuana maipapan iti pannakaisalakan dagiti natay: “Ipukkaw koma dagiti bantay ti rag-o, ket umkiskayo koma amin a tanap; ket dakayo amin a baybay ken natikag a dagdaga ibagayo ti kinadatdatlag ti Agnanayon nga Ariyo! (Doktrina ken Katulagan 128:23).

Kitaen iti Saints, 1:415–27; “Letters on Baptism for the Dead,” iti Revelations in Context, 272–76.

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 126

Kayat ti Apo a taripatuek ti pamiliak.

Kalpasan ti panagsublina manipud iti mision idiay England—maysa kadagiti adu a mision a nagserbianna—naawat ni Brigham Young ti sabali pay a napateg nga awag manipud iti Apo. Nakiddaw kenkuna a “taripatuenna a naimbag ti kaamaan[na]” (bersikulo 3), a nagsagaba iti kaawanna. Bayat ti panagadalyo iti daytoy a benneg, ibilangyo no apay a kalikaguman ti Apo no dadduma ti panagsakripisio iti panagserbitayo. Ania ti mabalin nga aramidenyo a mangaywan iti pamiliayo?

Kitaen met iti “Take Special Care of Your Family,” iti Revelations in Context, 242–49.

Doktrina ken Katulagan 127:2–4

Makapagpannurayak iti Apo kabayatan dagiti narigat a panawen.

Ulbod a pammabasol ken pammutbuteng iti pannakatiliw manen ti nangpilit ken ni Joseph Smith a naglemlemmeng idi Agosto 1842. Ngem dagiti balikas nga insuratna kadagiti Santo bayat daytoy a panawen (itan ti Doktrina ken Katulagan 127) ket napnuan iti panangnamnama iti nasayaat ken rag-o. Ania ti isuro kadakayo dagiti bersikulo 2–4 maipapan iti Dios? maipapan iti no kasano ti panangsango iti pananglais ken panangsuppiat? Ania dagiti ragup ti balikas manipud kadagitoy a bersikulo a mangtulong kadakayo no mariknayo a maidadaneskayo? Ibilangyo ti panangisurat no kasano a tultulongannakayo ti Apo iti “adalem a danum” iti panagbiagyo.

Doktrina ken Katulagan 127:5–8; 128:1–8

“Ania man nga isuratyo iti daga, maisuratto iti langit.”

Bayat ti panangbasayo iti Doktrina ken Katulagan 127:5–8; 128:1–8, sapulenyo dagiti gapu no apay nga inikkan ti Apo ni Joseph Smith kadagiti kasta a masinunuo nga instruksion maipapan iti panagisurat kadagiti panagbuniag para kadagiti natay. Ania iti isuro kadakayo daytoy maipapan iti Apo ken ti aramidna? Kasano ti panagriknayo a mabalin a mayaplikar daytoy nga instruksion kadagiti bukodyo a pakasaritaan ti pamilia, kas kadagiti bukod a journal?

Ti panagserbi iti templo para kadagiti kapuonantayo ti mamagbegkes iti puspusotayo kadakuada.

Doktrina ken Katulagan 128:5–25

Ti pannakaisalakan dagiti kapuonak ket kasapulan unay iti pannakaisalakanko.

Nalawag no ania ti impalgak ti Dios babaen ken ni Joseph Smith no apay a dagiti kapuonantayo a saan a nabuniagan iti daytoy a biag ket kasapulandatayo: mabuniagantayo iti agpaay kadakuada tapno makapagpilida nga awaten wenno saan nga awaten daytoy nga ordinansa. Ngem insuro pay ti Propeta a ti pannakaisalakan dagiti kapuonantayo ket “kasapulan ken nasken iti pannakaisalakantayo .” Bayat ti panangbasayo iti Doktrina ken Katulagan 128: 15-18, panunotenyo no apay a kasta dayta.

Isuro tibersikulo 5 a ti ordinansa ti panagbuniag para kadagiti natay ket “insagana ti Apo sakbay ti pannakabukel ti lubong.” Ania iti isuro kadakayo daytoy a kinapudno maipapan iti Dios ken iti planona? Ania ti inayon ti mensahe ni Elder Dale G. Renlund “Family History and Temple Work: Sealing and Healing” iti pannakaawatyo? (Liahona, Mayo 2018, 46–49).

Inusar ni Joseph Smith dagiti ragup ti balikas a kas “mamagbegkes a bileg,” “mamagtugmok a silpo,” ken “naan-anay a panagtipon” idi nangisursuro maipapan kadagiti ordinansa ti priesthood ken panagbuniag para kadagiti natay. Sapulenyo dagitoy ken dagiti kapada a ragup ti balikas bayat ti panangbasayo iti Doktrina ken Katulagan 128:5–25. Mapanunotyo kadi dagiti banag a mabalinyo nga usaren a mangiladawan kadagitoy a ragup ti balikas, kas iti kawar wenno tali? Apay a dagitoy a nasayaat a ragup ti balikas ti mangiladawan iti daytoy a doktrina?

Ti panangibilang kadagiti sumaganad a saludsod ket mabalin pay a makatulong iti panagadalyo kadagitoy a bersikulo:

• Iti kapanunotanyo, apay a ti panangbuniag para kadagiti natay ket maibilang a “kadayagan kadagiti amin a topiko iti agnanayon nga ebanghelio”? (bersikulo 17). Ania dagiti padas a nakatulong kadakayo a makarikna iti kastoy?

• Iti ania a kaipapanan a mabalin a mailunod ti daga no awan ti “mamagtugmok … iti nagbaetan dagiti amma ken dagiti annak”? (bersikulo 18).

• Ania ti nakaawisan ti riknayo maipanggep kadagiti balikas ni Joseph Smith kadagiti bersikulo 19–25? Kasano nga apektuan dagitoy a bersikulo ti wagas a pakariknaanyo maipapan ken ni Jesucristo? maipapan iti serbisio iti temple para kadagiti kapuonanyo? (kitaen met iti “Come, Rejoice,” Hymns, no. 9).

Kalpasan ti panangadalyo kadagitoy a bersikulo, mabalin a mariknayo a maparegtakayo nga agaramid iti maysa a banag para kadagiti kapuonanyo. Makatulong dagiti kapanunotan iti FamilySearch.org .

Ti “Inspirational Videos” iti “Temple and Family History” a koleksion ti Gospel Library ket makaited kadakayo iti maaramat a tulong, makaparegta nga estoria, ken mensahe manipud kadagiti lider maipapan iti pakasaritaan ti pamilia wenno family history.

Agusar kadagiti mainaig a resources iti Simbaan. Dagiti link kadagiti balabala iti Umaykayo, Sumurot Kaniak ket mangipaay iti nalaka a pannakagun-od kadagiti makatulong a resources a makatulong kadakayo a makaawat ken mangyaplikar kadagiti kinapudno ti ebanghelio wenno agtignay segun kadagiti impresion a maawatyo. Kas pagarigan, ti FamilySearch link iti ngato ket mangiturong kadagiti aktibidad a kas iti panangbangon iti bukodyo a family tree, panangbirok kadagiti kapuonan a makasapul kadagiti ordinansa ti templo, panangkita no sadino ti naggapuan dagiti kapuonanyo, wenno panangi-upload iti estoria ti pamilia.

Kitaen met iti Kevin R. Duncan, “A Voice of Gladness!,” Liahona, Mayo 2023, 95–97.

“A Glorious and Wonderful Provision.”

Kinuna ni Presidente Gordon B. Hinckley:

“Ti Pannubbot ni Jesus a maipaay iti amin ket mangibagi iti naindaklan a sakripisio nga inaramid para iti sabali. Intudingna ti pagtuladan nga iti babaenna nagbalin Isuna a mangisaup [proxy] para iti amin a sangkataw-an. Daytoy a pagtuladan nga iti babaen ti panagtignay ti maysa a tao a maipaay iti sabali ket maisangbay nga agtultuloy kadagiti ordinansa iti balay ti Apo. Ditoy agserbitayo a maipaay kadagiti pimmusayen nga awanan iti pannakaammo iti ebanghelio. Adda pagpilianda nga awaten wenno dida awaten ti ordinansa a maannong. Mapalugodanda iti agpada a gundaway kas kadagiti nagnan iti daga. Maikkan dagiti natay iti isu met la a gundaway kas kadagiti sibibiag. Manen, anian a nagloriaan ken napintas a probision nga inaramid ti Mannakabalin babaen ti paltiingna iti Propetana” (“The Great Things Which God Has Revealed,” Liahona, Mayo 2005, 82–83).

Dagiti Kapanunotan para iti Panangisuro kadagiti Ubbing

Doktrina ken Katulagan 126:3

Makatulongak a mangaywan iti pamiliak.

• Tapno matulongan dagiti annakyo a mangsursuro nga agserbi kadagiti miembro ti pamilia, ibilang ti panangibinglay iti impormasion maipapan ken ni Brigham Young iti “Kapitulo 50: Dagiti Santo iti Nauvoo” (iti Dagiti Estoria iti Doktrina ken Katulagan, 184), wenno ti katupagna a video iti Gospel Library) wenno gupgopen ti Doktrina ken Katulagan 126 iti bukodyo a balikas. Mabalinyo a yunay-unay ti ragup ti balikas a “taripatuem a naimbag ti kaamaam” (bersikulo 3) ken kasaoyo dagiti annakyo maipapan iti kaipapanan ti naisangsangayan a panangaywan kadagiti pamiliatayo.

  Chapter 50: The Saints in Nauvoo: January–July 1841

• Mabalin a makaparagsak kadakayo ken kadagiti annakyo ti mangkita kadagiti ladawan ti pamilia (wenno agdrowing kadagiti ladawan) bayat ti panagsasaritayo a sangkamaysa maipapan kadagiti wagas a pakatulongantayo a “mangtaripato” kadagiti miembro ti pamilia. Mabalinyo ti agkansion iti maysa a kanta kas iti: “Home Can Be a Heaven on Earth” (Hymns, no. 298).

Doktrina ken Katulagan 128:5, 12

Masapul ti amin nga annak ti Dios ti gundaway a mabuniagan.

• Awisenyo dagiti annakyo a mangammo manipud iti Doktrina ken Katulagan 128:1 no ania a banag ti adda iti panunot ni Joseph Smith. Mabalinda pay a sukisoken ti bersikulo 17 tapno ammuen no ania a banag ti imbilangna a “kadayagan.” Paibinglayyo kadakuada no ania ti naammuanda ken pagsasaritaan no apay a daytoy a banag ti makapagagar unay.

• Mainayon iti panangtulong kadagiti annakyo nga agsagana (ken agtungpal) kadagiti bukodda a katulagan iti panagbuniag, mabalinyo a tulongan ida a mangammo no kasano ti mangtulong kadagiti tao a saan a nangaramid kadagitoy a katulagan bayat ti panagbiagda. Ibilang ti panangibagayo kadagiti annakyo maipapan iti maysa a tao nga am-ammoyo (kas iti maysa a kapuonan) a natay a saan a nabuniagan. Kalpasanna mabalinyo nga aggigiddan a basaen ti Doktrina ken katulagan 128:5 ket kitaen ti ladawan ti puente a pagbuniagan iti templo (kas iti adda iti ungto daytoy a balabala). Ibagayo kadagiti annakyo no kasano ti riknayo maipapan iti pannakabuniag kadagiti templo nga agpaay kadagiti tao a natayen tapno adda gundaway ti tunggal maysa a makitulag iti Nailangitan nga Ama.

Doktrina ken Katulagan 128:18

Kayat ti Nailangitan nga Ama nga agsursuroak maipapan iti pakasaritaan ti pamiliak.

• Mabalin a makaparagsakkayo ken dagiti annakyo ti agaramid iti kadena a papel nga addaan iti nagan dagiti nagannak, lelong ken lelang, lelong ken lelang iti tumeng, ken dadduma pay (kitaen iti panid ti aktibidaditi daytoy a lawas). Kalpasanna mabalinyo nga ibinglay iti tunggal maysa no ania ti ammoyo maipapan kadagitoy a kapuonan. Aggigiddan a basaen ti Dokrina ken Katulagan 128:18 tapno maammuan no ania ti “mamagtugmok (welding link)” a mamagbalin a “sibubukel ken naan-anay” ti pakasaritaan ti pamiliatayo. Mabalinyo pay a buyaen ti video “Courage: I Think I Get It from Him” (Gospel Library).

  Courage: I Think I Get It From Him

  Learn about your ancestors strengths to discover your own strengths.

• Masarakan ti nayon nga aktibidad a tumulong kadagiti annakyo a makiraman iti family history iti “The Temple and the Plan of Happiness” iti apendix B wenno iti FamilySearch.org.

Tulongannatayo dagiti ordinansa iti templo a mamagkaykaysa kadagiti pamilia a kas kadagiti silpo iti kawar.

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Ti puente a pagbuniagan iti Templo ti Ogden Utah.