Sangapulo a Babbalasang, ni Jorge Cocco

Nobiembre 17–23: “Agsaganakayo iti Yaay ti Nobio”

Doktrina ken Katulagan 133–134

Idi 1833, rinaut dagiti bunggoy ken dinadael ti pagimprentaan ti Simbaan. Mairaman kadagiti trabaho maipremprenta iti dayta a panawen ket ti Libro dagiti Bilin—ti umuna a panangpadas ti Simbaan a mangtipon kadagiti paltiing ti Dios iti ud-udina nga aldaw iti maysa a tomo. Inwarawara dagiti bunggoy a mangriribuk dagiti saan pay nagalutan a pinanid, ket nupay nataginayon dagiti natutured a Santo ti sumagmamano kadagitoy, sumagmamano laeng dagiti saan a kumpleto a kopia ti Libro dagiti Bilin ti naammuan a nakalasat.

No ania ita ti ammotayo a benneg 133 iti Doktrina ken Katulagan ket nairanta a nayon (appendix) iti Libro dagiti Bilin, a kasla exclamation point iti gibus dagiti naipablaak a paltiing ti Apo. Ipakdaarna ti umay nga aldaw ti panangukom ken ulitenna ti awag a masarakan iti intero a moderno a paltiing: Agtalawkayo iti kinailubongan, kas insimbolo ti Babilonia. Bangonenyo ti Zion. Agsagana para iti Maikadua a Yaay. Ket isaknapyo daytoy a mensahe “iti tunggal pagilian, ken kakabsat, ken pagsasao, ken tattao” (bersikulo 37). Saan a natungpal dagiti orihinal a plano ti Libro dagiti Bilin, ngem daytoy a paltiing ti maysa a palagip ken saksi nga agtultuloyto ti aramid ti Apo, “ta ipakitananto ti nasantuan a takiagna …, ken amin a suli ti daga makitadanto ti panangisalakan ti Diosda” (bersikulo 3).

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 133:4–14

Awagannak ni Jesucristo a mangilaksid iti Babilonia ken umay iti Zion.

Ti naespirituan a kasungani ti Zion ket ti Babilonia —maysa a nagkauna a siudad nga iti intero a nasantuan kasuratan insimbolona ti kinadakes ken naespirituan a pannakaadipen. Bayat ti panangbasayo iti Doktrina ken Katulagan 133:4–14, utobenyo no kasano nga awagannakayo ti Mangisalakan nga, “inkayo … rummuarkayo iti Babilonia” (bersikulo 5) ken “inkayo … iti … Zion” (bersikulo 9). Kasano ti isusungbatyo iti awagna? Ania pay ti masursuroyo maipapan iti Zion manipud iti mensahe ni Elder D. Todd Christofferson a“Come to Zion”? (Liahona, Nob. 2018, 37–40).

(Doktrina ken Katulagan 133:1–19, 37–39

Makapagsaganaak itan para iti Maikadua a Yaay ti Mangisalakan.

Agpada a benneg 1, ti pakauna ti Apo iti Doktrina ken Katulagan, ken ti benneg 133, ti orihinal nga apendix iti Libro dagiti Bilin, mangrugi iti isu met la a pakaasi manipud iti Apo: “Imdenganyo, O dakayo a tattao ti simbaanko” (Doktrina ken Katulagan 1:1; 133:1). Nalabit a mabalinyo nga adalen ti Doktrina ken Katulagan 133:1–19, 37–39 ken ilistayo dagiti mensahe a pangawisan kadakayo ti Apo tapno “imdenganyo” a (dumngeg ken agtulnog) bayat ti panagsaganayo para iti Maikadua a Yaayna. Nangnangruna, mabalinyo nga ilista dagiti banag a kayatna nga aramidenyo a (1) mangisagana iti bagiyo ken (2) tumulong a mangisagana iti lubong para iti panagsublina. Ania ti masursuroyo manipud kadagitoy a listaan?

Imbinglay ni Presidente Russell M. Nelson dagiti napapateg a kinapudno maipapan iti no anianto ti langa ti lubong intono agsubli ti Mangisalakan—ken kasano ti agsagana. Sapulenyo dagitoy a kinapudno iti mensahena a “The Future of the Church: Preparing the World for the Savior’s Second Coming” (Liahona, Abr. 2020, 6–11). Ania ti mariknayo a makaparegta nga aramiden—wenno itultuloy nga aramiden—tapno “maisagana ti lubong para iti panagsubli ti Mangisalakan”? (“Aaronic Priesthood Quorum Theme,” Gospel Library).

Kitaen met iti Mateo 25:1–13; Russell M. Nelson, “Embrace the Future with Faith,” Liahona, Nob. 2020, 73–76; “Come, Ye Children of the Lord,” Hymns, no. 58; Topics and Questions, “Second Coming of Jesus Christ,” Gospel Library.

Doktrina ken Katulagan 133:19–56

Naragsakto para kadagiti nalinteg ti Maikadua a Yaay ni Jesucristo.

Bayat ti panangbasayo iti pannakailadawan ti panagsubli ti Mangisalakan kadagiti bersikulo 19–56, ania ti masarakanyo a padpadaananyo? Ania dagiti balikas wenno ragup ti balikas a pangiladawan iti ayat ti Apo para kadagiti taona? Ibilangyo ti panangisurat kadagiti bukodyo a padas nga addaan “iti managayat a kinaasi ti Apo[yo], ken ti amin nga insagutna [kadakayo] a maibatay iti kinaimbagna” (bersikulo 52).

Detalye manipud iti Mangngagas, da Kelsy ken Jesse Lightweave

Doktrina ken Katulagan 134

“Impasdek ti Dios dagiti gobierno para iti pagimbagan ti tao.”

Kumplikado ti pannakinaig dagiti nagkauna a Santo iti gobierno. Idi napilitan a napapanaw dagiti Santo iti Jackson County, Missouri, idi 1833, nagkiddawda iti tulong manipud iti gobierno a lokal ken nasional ket awan ti naawatda. Iti dayta met la a gundaway, sumagmamano a tao iti ruar ti Simbaan ti nangipatarus kadagiti pannursuro maipapan iti Zion a ti kayatna a sawen a pinagkedkedan dagiti Santo ti turay dagiti gobierno iti daga. Ti Doktrina ken Katulagan 134 ket naisurat, iti sangkapaset, a mangilawlawag ti sasaaden ti Simbaan iti gobierno. Ania ti isingasing daytoy a benneg maipapan iti no kasano koma ti rikna dagiti Santo ti Apo maipapan iti gobierno?

Bayat ti panagadalyo iti benneg 134, ibilangyo ti panangsapul kadagiti pagbatayan ti gobierno ken dagiti pagrebbengan dagiti makipagili. Kasano a nakatulong dagitoy a kapanunotan kadagiti nagkauna a Santo? Kasano a mayaplikarda iti no sadino ti pagnanaedam?

Kitaen met iti Pagannurotan ti Pammati 1:11–12; Topics and Questions, “Religious Freedom,” Gospel Library.

Dagiti Kapanunotan para iti Panangisuro kadagiti Ubbing

Doktrina ken Katulagan 133:4–5, 14

Kayat ti Apo nga umadayoak iti dakes iti lubong.

• Mabalinyo ken dagiti annakyo nga ilista ti sumagmamano a lugar ken kasasaad a kayat ti Apo nga adaywantayo. Kalpasanna mabalinyo nga idilig dagita a lugar ken kasasaad iti depinision ti “Babel, Babylon” iti Pangiwanwan iti Nasantuan a Kasuratan (Gospel Library). Kalpasanna mabalinto a basaen ti Doktrina ken Katulagan 133:4–5, 14. Ania ti kayat a sawen ti “rummuarkayo iti Babilonia”? (bersikulo 5). Mabalinyo pay ti agaramid iti maipada a listaan dagiti lugar ken situasion a pangawisan ti Apo kadatayo ken idiligyo dayta a listaan iti depinision ti “Zion” iti Pangiwanwan iti Nasantuan a Kasuratan.

Doktrina ken Katulagan 133:19–21, 25

Umayto manen ni Jesucristo.

• Mabalin a magustuan dagiti annakyo ti mangyakem iti no ania ti langa ti agsagana para iti maysa a banag, kas iti maysa a tornament ti isports, maysa a napateg a bisita, wenno maysa a paborito a piesta opisial. Apay a napateg ti panagsagana? Kalpasanna aggigiddan a basaenyo ti Doktrina ken Katulagan 133:17–19, 21 ket awisenyo dagiti annakyo a mangsapul iti no ania ti pangawisan kadatayo ti Apo nga isaganaantayo. Mabalinyo nga ipakita kadakuada ti ladawan manipud iti balabala itoy a lawas ket saludsodenyo kadagiti annakyo no ania ti ammoda maipapan iti Maikadua a Yaay ni Jesucristo. Ania pay ti masursurotayo manipud kadagiti bersikulo 19–25, 46–52? Ania ti maaramidtayo tapno makapagsaganatayo para iti daytoy naragsak a pagteng?

• Mabalinyo ti mangilemmeng iti nadumaduma a ladawan wenno banag a mangiladladawan kadagiti banag a maaramidtayo tapno makapagsagana iti Maikadua a Yaay ni Jesucristo (kas iti panagbasa kadagiti nasantuan a kasuratan, panangibinglay ti ebanghelio, wenno panagserbi kadagiti pamiliatayo). Ipasapul kadagiti ubbing dagiti ladawan wenno banag ken pagsasaritaan no kasano a makatulong kadatayo dagitoy a banag nga agsagana a mangsabat iti Mangisalakan intono agsubli.

• Mabalinyo pay ti aggigiddan a mangkansion iti kanta maipapan iti Maikadua a Yaay, kas iti “When He Comes Again” (Children’s Songbook, 82–83). Ibinglay iti tunggal maysa ti ayatyo para iti Mangisalakan ken iti riknayo maipapan ti panagsublina.

Doktrina ken Katulagan 133:52–53

Managayat ken manangngaasi ni Jesucristo.

• Mabalinyo ken dagiti annakyo a kumita kadagiti ladawan a mangipakita a managayat ken manangngaasi ni Jesus. (Kas pagarigan, kitaen iti Libro ti Arte ti Ebanghelio, dagiti num. 42, 47.) Ania pay dagiti inaramid ni Jesus a mangipakita ti ayat ken panangngaasina? Aggigiddan a basaenyo ti Doktrina ken Katulagan 133:52, ken tulonganyo dagiti annakyo a mangpanunot kadagiti wagas a mabalinda nga “agapaden ti manangipateg a kinaimbag ti Apoda” kadagiti dadduma.

  

Detalye manipud iti Iti Silawna, ni Greg Olsen

Isuro ti nalawag ken simple a doktrina. Iladawan ti Apo ti ebangheliona a “silalawag” ken “nalaka a maawatan” (Doktrina ken Katulagan 133:57). Ania ti isingasing dagitoy a balikas kadakayo maipapan iti panangisuro iti ebanghelio iti pamiliayo wenno klaseyo?

Doktrina ken Katulagan 134: 1–2

Kayat ti Apo nga agtungpalak iti paglintegan.

• Mabalin dagiti annakyo ti mangilista kadagiti pagannurotan ken paglintegan a tungpalenda. Ania ngata ti klase ti biag no awan ti agtungpal kadagitoy a paglintegan? Kalpasanna mabalinyo a basaen ti Doktrina ken Katulagan 134:1–2 a kaduayo ida, a tultulonganyo ida a makaawat kadagiti balikas wenno ragup ti balikas a mabalin a saanda a maawatan. Apay a kayat ti Apo a tungpalentayo ti paglintegan? (kitaen met iti Pagannurotan ti Pammati 1:12).

Para iti ad-adu pay a kapanunotan, kitaen iti isyu ti Friend a magasin iti daytoy a bulan.

Ni Cristo a Nagkawes iti Nalabaga a Roba, ni Minerva Teichert