“Manzwi eKudzorerwa: Chita cheRubatsiro,” Huyai, Munditevere—Bhuku reKumba uye kuChechi: Dzidziso neZvibvumirano 2025 (2025)
“Chita cheRubatsiro,” Huyai, Munditevere—Bhuku reKumba uye kuChechi: 2025
Manzwi Ekudzorerwa
Chita cheRubatsiro
Muna 1842, mushure mokunge Chita cheRubatsiro charongwa muNauvoo, Illinois, Muporofita Joseph Smith vakati “Chechi yakanga isina kumborongwa zvakarurama kusvikira madzimai arongwa zvakarurama.” Zvimwechetezvo, kunzverwa kweKudzorerwa kweChechi yaIshe uye nehupirisita Hwavo hakusi kwakazara kusvikira kwasanganisira kunzverwa kweChita cheRubatsiro, icho pachacho chinova “kudzorerwa kwemutoo wechinyakare” wevadzidzi vaJesu Kristu vechikadzi.
Eliza R. Snow akanga ainebasa rakakosha mukudzorerwa ikoko. Akanga aripo apo Chita cheRubatsiro pachakatanga kurongwa uye, sasekiritari wechita, ndiye ainyora manotsi panguva yemisangano. Akaona iye pachake kuti Chita cheRubatsiro chakarongwa “chichitevedza mutoo wehupirisita.” Zviri pazasi izvi mashoko ake, ayo akanyorwa paaiva achishandira seMutungamiri Mukuru weChita cheRubatsiro, kuitira kubatsira masisita ake kunzwisisa basa rehumwari rakapuwa kuvanasikana vechibvumirano vaMwari.
Kuti udzidze zvimwe zvakawanda pamusoro pamarongerwo akaitwa Chita cheRubatsiro, ona Daughters in My Kingdom: The History and Work of Relief Society (2017), 1–25; The First Fifty Years of Relief Society (2016), 3–175.
Painting of the Relief Society organization [Mufananidzo wechirongwa cheChita cheRubatsiro] naPaul Mann
Eliza R. Snow
“Kunyangwe zvazvo zita rokuti [Chita cheRubatsiro] ringava remazuva ano, bato racho rakatanga chinyakare. Takataurirwa [naJoseph Smith], kuti bato rimwechetero raivapo muchechi chinyakare, izvo zvinova zvinotaurwa mune dzimwe dzemwadhi dzakanyorwa muTestamente Itsva, dzichishandisa shoko rokuti ‘mudzimai akasarudzwa’ [ona 2 Johane 1:1; Dzidziso neZvibvumirano 25:3.].
“Iri ibato risingakwanisi kuvapo kana pasina Hupirisita, nokuda kwechokwadi chokuti rinowana mvumo nehurudziro yaro yose kubva kumanyuko iwayo. Apo Hupirisita pahwakatorwa kubva pasi, bato iri pamwepo nechimwe chese chibatanidzwa chehurongwa hwechokwadi hwechechi yaJesu Kristu pasi, zvakaparara. …
“Nokunge ndaivapo pakurongwa ‘kweChita cheRubatsiro cheVanhukadzi cheNauvoo,’ … uyewo nokunge ndakanga ndawana ruzivo rwakawanda musangano iroro, pamwe ndingangotaura mazano mashoma anozobatsira vanasikana veZioni mukupinda mubato iri, iro rakazara nemabasa matsva uye arikuwedzera. Kana vapi zvavo vanasikana navanaamai muIsraeri vachinzwa vasingakwanisi kuva nehurudziro mumamiriro ezvinhu avari, iyezvino vanozowana mikana mikuru yokushandisa matarenda nekwaniso dzavo dzakanaka izvo zvavakaropafadzwa nazvo zvikurusa. …
Chita cheRubatsiro chakarongwa mumupanda wepamusoro weChitoro cheZvidhinha Zvitsvuku.
“Kana ani zvake aibvunza kuti, Chinangwa cheChita cheRubatsiro cheVanhukadzi ndechei? Ndaipindura kuti—kuita zvakanaka—kushandisa kwaniso dzose dzatiinadzo mukuita zvakanaka, kwete chete mukurerutsira varombo asi mukuponesa mweya. Kuedza kwevakabatana kunozobudirira panezvakawanda zvisingaverengeki kupinda zvinokwanisa kubudirirwa nekuedza kwemunhu mumwechete anoshanda zvikurusa …
“Mukupa rubatsiro kuvarombo, Chita cheRubatsiro cheVanhukadzi chine mamwe mabasa ekuita anopfuura kungorerutsa zvidikanwi zvepanyama. Urombo hwepfungwa neurwere hwemwoyo, zvinodawo kutariswa, uye nguva zhinji mutauro unetsitsi—mashoko mashoma erairo, kana kunyangwe kugwinhana neruoko rune hushamwari uye rune rudo kunozoita zvakanyanya kunaka uye zvinotendwa zvakanyanya kupfuura saga regoridhe. …
“Apo Vatendi pavanoungana kubva kune dzimwe nyika, vari vabvakure kumunhu wose, uye vachikwanisa kutsauswa neavo vanotsvaka mikana yokunyengedza vanhu, Chita [cheRubatsiro] chinofanira kukurumidza mukuvataririra, uye nokuvasuma kuchita icho chinozovanatsurudza nokuvasimudzira, uye kupfuura zvose chinozovasimbisa murutendo rweVhangeri, uye mukudaro, chinozova chakakosha zvikuru mukuponesa vakawanda.
“Kunozodikanwa mabhuku akawanda zvikuru umo mokutsanangura mabasa, mikana nemishando izvo zvinouya nebasa reChita. … Itai basa (muri pasi pehutungamiri hwabhishopi wenyu) makadzikama, neushingi, nechido chikuru, makabatana uye nemunamato, uye Mwari vanozoropafadza kuedza kwenyu nebudiriro.”