Ten Virgins [Vasikana vane Gumi], naJorge Cocco

Mbudzi 17–23: “Gadzirirai Imi Kuuya kweChikomba”

Dzidziso neZvibvumirano 133–134

Muna 1833, mhomho dzakapwanya dzikaparadza muchina wekudhindisa weChechi. Pakati pemabasa aiva ari kudhindwa panguva iyoyo paiva neBhuku reMirairo—kuedza kwekutanga kweChechi kuunganidza zvakazarurwa zvamazuva ekupedzisira zvaMwari kuzviita bhuku rimwechete. Mhomho yakarashira kwose kwose mapeji akanga asati anamatidzwa pamwechete kuita mabhuku, uye kunyangwe zvazvo Vatendi vaiva neushingi vakachengetedza mamwe emapeji acho, makopi mashomanana chete eBhuku reMirairo ndiwo anozivikanwa kuti akachengetedzeka.

Icho chatinoziva sechikamu 133 cheDzidziso neZvibvumirano chaifanira kuva chiwedzerwa kuBhuku reMirairo, sesimbiso kumagumo kwezvakazarurwa zvakashambadzwa zvaIshe. Chinoyambira nezve zuva ririkuuya remutongo uye chinodzokorora kurudziro inowanikwa nemuzvakazarurwa zvose zvemazuva ano: Tizai zvenyika, sokumiririrwa kwazvinoitwa neBabironi. Vakai Zioni Gadzirirai Kuuya Kwechipiri Uye paradzirai shoko iri “kune dzose ndudzi, nehama, nendimi, uye nevanhu vose” (verse 37). Zvirongwa zvokutanga zveBhuku reMirairo hazvina kuzadzikiswa, asi zvakazarurwa izvi iyeuchidzo uye umboo hwokuti basa raIshe rinozoenderera mberi, “nokuti vachafugura ruoko rwavo rwutsvene … , uye miganhu yose yepanyika ichaona ruponeso rwaMwari wavo.” (ndima 3).

Mazano eKudzidza Kumba uye kuChechi

Dzidziso neZvibvumirano 133:4–14

Jesu Kristu anondikurudzira kuramba Babironi uye kuuya kuZioni.

Pesano yezvepamweya yeZioni iBabironi—guta rechinyakare iro nemumagwaro matsvene mose anomiririra hunyangadzi neutapwa hwepamweya. Apo paunoveranga Dzidziso neZvibvumirano 133:4–14, fungisisa madaidzirwo auri kuitwa neMuponesi kuti, “endai … mubude kubva muBabironi” (ndima 5) uye “endai … mberi … kuZioni” (ndima 9). Uri kudavira sei kudaidzo Yavo? Chii chimwezve chaunodzidza pamusoro peZioni kubva kushoko raGosa D. Todd Christofferson “Come to Zion”? (­Liahona, Mbudzi 2008, 37–40).

Dzidziso neZvibvumirano 133:1–19, 37–39

Ndinokwanisa kugadzirira iyezvino kuKuuya kweChipiri kweMuponesi.

Zvose chikamu 1, chisumo chaIshe kuDzidziso neZvibvumirano, uye chikamu 133, chiwedzerwa chokutanga kuBhuku reMirairo, zvinotanga neteterero imwecheteyo kubva kuna Ishe “Tererai, imi vanhu vechechi yangu” (Dzidziso neZvibvumirano 1:1; 133:1). Pamwe unokwanisa kunzvera Dzidziso neZvibvumirano 133:1–19, 37–39 uye wodorongodza mashoko ayo Ishe avanokukoka kuti “uterere” kwaari (kuteerera kwaari uye nokuatevedzera) apo paunogadzirira Kuuya kweChipiri Kwavo. Kunyanya, ungangodorongodza zvinhu izvo zvaVanoda kuti uite (1) kuzvigadzirira uye (2) kubatsira kugadzirira nyika kukudzoka Kwavo. Chii chaunodzidza kubva pamidorongodzwa iyi?

Mutungamiri Russell M. Nelson vakagovera zvokwadi zvakakosha pamusoro peizvo nyika zvainozova yakaita apo Muponesi paanodzoka—uye magadziriro okuita. Tsvaka zvokwadi izvi mushoko ravo rinoti “Ramangwana reChechi: Kugadzirira Nyika Kuuya kweChipiri kweMuponesi” (Liahona, Kubvumbi 2020, 6–11). Chii chaunonzwa kukurudzirwa kuita—kana kuramba tichiita—kuitira “kugadzirira nyika kudzoka kweMuponesi”? (“Aaronic Priesthood Quorum Theme,” Gospel Library

Onawo Mateo 25:1–13; Russell M. Nelson, “Embrace the Future with Faith,” Liahona, Mbudzi 2020, 73–76; “Come, Ye Children of the Lord,” Hymns, no. 58; Topics and Questions, “Second Coming of Jesus Christ,” Gospel Library.

Dzidziso neZvibvumirano 133:19–56

Kuuya kweChipiri kwaJesu Kristu kunozova chinhu chinofadza kune vakarurama.

Apo paunoverenga tsananguro dzekudzoka kweMuponesi mundima 19–56, chii chaunowana icho chaunotarisira kwachiri? Ndeapi mashoko kana ndevo dzinotsanangura rudo rwaIshe kuvanhu Vavo? Funga pamusoro pokunyora pasi zviitiko zvako pachako “netsitsi dzerudo dzaIshe [vako], uye neizvo zvose zvavakapa [kwauri] maererano norunako rwavo” (ndima 52).

Chikamu chakabva kuHealer [Muporesi], naKesley naJesse Lighweave

Dzidziso neZvibvumirano 134

“Hurumende dzakamiswa naMwari kuitira rupundutso rwevanhu.”

Hukama hweVatendi vokutanga nehurumende hwakanga hwakaoma. Apo Vatendi pavakamanikidzwa kubuda muDunhu reJackson, Missouri, muna 1833, vakakumbira rubatsiro kubva kuhurumende yemunharaunda uye kuhurumende yenyika yose uye hapana rubatsiro rwavakagamuchira. Panguva imwecheteyo, vamwe vanhu kunze kweChechi vakaona dzidziso pamusoro peZioni seinoreva kuti Vatendi vairamba hutungamiri hwehurumende dzepasi. Dzidziso neZvibvumirano 134 chakanyorwa, muchikamu, kujekesa chinzvimbo cheChechi pahurumende. Chikamu ichi chinotaura chii pamusoro pamanzwiro anofanira kuita Vatendi vaIshe pamusoro pehurumende?­

Apo paunonzvera chikamu 134, funga kutsvaka misimboti yehurumende uye mabasa evagari vemunyika. Mazano aya angadai akava anobatsira sei kuVatendi vokutanga? Anoshanda sei kwaunogara?

Onawo Misimboti yeChitendero 1:11–12; Topics and Questions, “Religious Freedom,” Gospel Library.

Mazano eKudzidzisa Vana

Dzidziso neZvibvumirano 133:4–5, 14

Ishe vanoda kuti ndigare kure nehuipi hwuri munyika.

• Iwe nevana vako munokwanisa kudorongodza nzvimbo nemamiriro ezvinhu Ishe zvavanoda kuti tigare kure nazvo. Zvino munokwanisa kuenzanisa nzvimbo idzodzo uye mamiriro ezvinhu iwayo kutsananguro “yeBaberi, Babironi” muNhungamiro kuMagwaro Matsvene (Raibhurari yeVhangeri). Vanokwanisa zvino kuverenga Dzidziso neZvibvumirano 130:4–5, 14. Zvinorevei “ kubuda… kubva muBabironi”? (ndima 5). Munokwanisawo kuita mudorongodzwa wakafanana wenzvimbo nemamiriro ezvinhu Ishe avanotikoka kwaari uye moenzanisa mudorongodzwa iwoyo kutsananguro “yeZioni” muNhungamiro kuMagwaro Matsvene.

Dzidziso neZvibvumirano 133:19–21, 25

Jesu Kristu anozouya zvakare.

• Vana vako vangangonakidzwa nokuita mutambo unotaridza zvazvakata kugadzirira chimwe chinhu, sezvakaita makwikwi emitambo, muenzi akakosha, kana zororo rinonyanya kudiwa. Sei gadziriro yakakosha? Munokwanisa zvino kuverenga pamwechete Dzidziso neZvibvumirano 133:17–19, 21 uye wokumbira vana vako kuti vatsvake izvo Ishe zvavanotikoka kugadzirira. Unokwanisa kuvataridza mufananidzo kubva muchidzidzo chevhiki rino uye wobvunza vana vako izvo zvavanoziva pamusoro poKuuya kweChipiri kwaJesu Kristu. Chii chimwezve chatinodzidza kubva mundima 19–25, 46–52? Chii chatinokwanisa kuita kugadzirira chiitiko chinemufaro ichi?

• Unokwanisa kuviga mifananidzo yakasiyana siyana kana zvinhu zvinobatwa zvinoratidza zvinhu zvatinokwanisa kuita kugadzirira Kuuya kweChipiri kwaJesu Kristu (sezvakaita kuverenga magwaro matsvene, kugovera vhangeri, kana kushandira mhuri dzedu). Ita kuti vana vako vawane mifananidzo kana zvinhu zvinobatwa uye motaura pamusoro pokuti kuita zvinhu izvi kunotibatsira sei kugadzirira kusangana neMuponesi apo paAnodzoka.

• Munokwanisawo kuimba pamwechete rumbo pamusoro poKuuya kweChipiri, sezvakaita “­When He Comes Again” (Children’s Songbook, 82–83). Goveranai rudo rwenyu kuMuponesi uye manzwiro enyu pamusoro pokudzoka Kwake.

Dzidziso neZvibvumirano 133:52–53

Jesu Kristu anerudo uye anetsitsi.

• Iwe nevana vako munokwanisa kutarisa pamifananidzo iyo inotaridza kuti Jesu anerudo uye anetsitsi. (Semuenzaniso, ona Bhuku reMifananidzo yeVhangeri, nhamba 42, 47.) Chii chimwe icho Jesu chaakaita kutaridza rudo Rwake netsitsi Dzake? Verengai pamwechete Dzidziso neZvibvumirano 133:52, uye batsira vana vako kufunga nzira dzavanokwanisa “kutaura tsitsi dzine rudo dzaIshe wavo” kuna vamwe.

  

Chikamu chakabva kuIn His Light [Muchiedza Chake], naGreg Olsen

Dzidzisa dzidziso dzakajeka uye dzakareruka. Ishe vanodzidzisa vhangeri Ravo “zviri pachena uye zvakareruka” (Dzidziso neZvibvumirano 133:57). Mashoko aya anotaurei kwauri pamusoro pekudzidzisa vhangeri kumhuri kana kukirasi yako?

Dzidziso neZvibvumirano 134:1–2

Ishe vanoda kuti nditeerere mutemo.

• Vana vako vanokwanisa kudorongodza mirau kana mitemo yavanoteerera. Upenyu hwaizova hwakaita sei dai pasina munhu anoteerera kumitemo iyi? Zvino unokwanisa kuverenga Dzidziso neZvibvumirano 134:1–2 navo, uchivabatsira kunzwisisa mashoko kana ndevo dzipi zvadzo dzavangange vasinganzwisisi. Sei Ishe vachida kuti titeerere mutemo? (onawo Misimboti yeChitendero 1:12).

­­

Christ in His Red Robe, [Kristu Akapfeka Nguwo Tsvuku], naMinerva Teichert