Us with Them and Them with Us [Isu naIvo uye Ivo neSu], naCaitlin Connolly

“Inzwi reMufaro reVapenyu neVakafa”

Dzidziso neZvibvumirano 125–128

Muna Nyamavhuvhu 1840, Jane Neyman uyo akanga achiri kuchema akateerera Muporofita Joseph achitaura parufu rweshamwari yake Seymour Brunson. Mwanakomana wechidiki waJane ainzi Cyrus akanga afawo munguva pfupi yakanga yapfuura. Chakaita kuti kuchema kwake kuve kwakanyanya chaiva chokuti Cyrus akanga asina kumbobhabhatidzwa, uye Jane ainetsekana kuti izvi zvaizorevei kumweya wake wokusingaperi. Joseph akanga anetsekana nechimwe chimwechetecho pamusoro pemukoma wake aidiwa Alvin, uyo akafawo asati abhabhatidzwa. Saka Muporofita akafunga kugoverana nemunhu wose parufu urwu izvo Ishe zvavakanga vazarura kwaari pamusoro paavo vanofa vasina kugamuchira zvisungo zvevhangeri—uye neizvo zvatinokwanisa kuita kuvabatsira.

Dzidziso yerubhabhatidzo muchinzvimbo chevakafa yakafadza Vatendi zvikurusa; pfungwa dzavo dzakatendeukira pakarepo kunhengo dzemhuri dzakafa. Zvino paiva pava netariro kwavari! Joseph akanzwa mufaro mumwechetewo sewavo, uye mutsamba yaidzidzisa dzidziso iyi, akashandisa mutauro unemufaro uye unechido chikuru kutaura izvo Ishe zvavakamudzidzisa pamusoro peruponeso rwevakafa: “Regai makomo adaidzire nemufaro, uye imi mose nhika daidzirai zvinonzwika; uye imi mose makungwa nenyika dzakaoma taurai zvishamiso zvaMambo venyu Vokusingaperi! (Dzidziso neZvibvumirano 128:23).

Ona Saints, 1:415–27; “Letters on Baptism for the Dead,” muna Revelations in Context, 272–76.

Mazano eKudzidza Kumba uye kuChechi

Dzidziso neZvibvumirano 126

Ishe vanoda kuti ndiriritire mhuri yangu.

Mushure mokudzoka kuhushumiri kuEngland—humwechete hwehushumiri huzhinji hwaakashandira—Brigham Young akagamuchira imwe daidzo yakakosha kubva kuna Ishe. Akakumbirwa kuti “anyatsoriritira mhuri [yake]” (ndima 3), iyo yakanga yatambura paakanga asipo. Apo paunonzvera chikamu ichi, funga pamusoro pokuti sei dzimwe nguva Ishe vachida kuzvipira kwedu mukushandira kwedu. Chii chaungaita kuti uriritire mhuri yako?

Onawo “­Take Special Care of Your Family,” muRevelations in Context, 242–49.

Dzidziso neZvibvumirano 127:2–4

Ndinokwanisa kuvimba pana Ishe munguva dzakaoma.

Kupomerwa mhosva dzenhema uye kutyisidzirwa kuti aizosungwa zvakanga zvamanikidza Joseph Smith zvakare kuti avande muna Nyamavhuvhu 1842. Asi zvakadaro mashoko aakanyorera kuVatendi panguva iyi (ikozvino ava Dzidziso neZvibvumirano 127) azere netariro yakanaka uye nemufaro. Chii chaunodzidziswa nendima 2–4 pamusoro paMwari? pamusoro pokutarisana nekunyombwa kana nerupikiso. Ndedzipi ndevo dzinobva mundima idzi dzingakubatsira apo paunonzwa kutambudzwa? Funga pamusoro pekunyora pasi matsigirirwo auri kuitwa naIshe “mumvura yakadzika” yeupenyu hwako.

Dzidziso neZvibvumirano 127:5-8; 128:1–8

“Chipi nechipi zvacho chamunonyora panyika chichanyorwa kudenga.”

Apo paunoverenga Dzidziso neZvibvumirano 127:5–8; 128:1–8, tsvaga zvikonzero izvo Ishe zvavakapira Joseph Smith mimwe mirairidzo chaiyo yakadaro pamusoro pekunyora pasi rubhabhatidzo rwunoitirwa vakafa. Izvi zvinokudzidzisa chii pamusoro paIshe nebasa Ravo? Unonzwa kuti murairidzo uyu unokwanisa sei kushanda kuzvinyorwa zvemhuri zvako pachako, sezvakaita majonari ako pachako?

Kuita mushando wemutemberi wemadziteteguru edu kunobatanidzira mwoyo yedu kwavari.

Dzidziso neZvibvumirano 128:5–25

Ruponeso rwemadziteteguru angu rwakakosha zvikuru kuruponeso rwangu.

Zvakajeka kubva pane izvo Mwari zvavakazarura kuburikidza naJoseph Smith kuti sei madziteteguru edu ayo asina kubhabhatidzwa muupenyu huno achitida: tinobhabhatidzwa muchinzvimbo chavo kuitira kuti vagokwanisa kusarudza kutambira kana kuramba chisungo ichi. Asi Muporofita akadzidzisawo kuti ruponeso rwamadziteteguru edu “rwunodikanwa uye rwakakosha zvikuru kuruponeso rwedu.” Apo paunoverenga Dzidziso neZvibvumirano 128: 15–18, funga pamusoro pokuti sei zvakadaro.

Ndima 5 inodzidzisa kuti chisungo cherubhabhatidzo rwevakafa “chakagadzirwa hwaro hwenyika husati hwavepo.” Chokwadi ichi chinokudzidzisa chii pamusoro paMwari uye nechirongwa Chavo? Shoko raGosa Dale. G. Renlund “Family History and Temple Work: Sealing and healing” rinowedzera chii kunzwisiso yako? (Liahona, Chivabvu 2018, 46–49).

Joseph Smith akashandisa ndevo sedzinoti “simba rokubatanidza,” “chisungo chinosunganidza zvakasimba,” uye “rubatano rwakarurama” apo paaidzidzisa pamusoro pezvisungo zvehupirisita uye nerubhabhatidzo rwevakafa. Tsvaga ndevo idzi nedzimwe dzakafanana nadzo apo paunoverenga Dzidziso neZvibvumirano 128:5–25. Unokwanisa here kufunga nezve zvinhu zvaunokwanisa kushandisa kuratidza ndevo idzi, sezvakaita sengetani kana tambo? Sei idzi dziri ndevo dzakanaka kutsanangura dzidziso iyi?

Kufunga pamusoro pemibvunzo inotevera kungangobatsirawo kunzvera kwako kwendima idzi:

• Mumaonero ako, sei rubhabhatidzo rwevakafa ruchikwanisa kufungwa “semusoro wenyaya unoshamisa zvikurusa wemimwe yose yevhangeri risingaperi”? (ndima 17). Ndezvipi zviitiko zvakakubatsira kunzwa kudaro?

• Nyika ingatukwa nenzira ipi kana pasina “chisungo chinosunganidza zvakasimba … pakati pamadzibaba nevana”? (ndima 18).

• Chii chinokufadza pamusoro pamashoko aJoseph Smith mundima 19–25? Ndima idzi dzinoshandura sei manzwiro aunoita pamusoro paJesu Kristu? pamusoro pemushando wemutemberi kuitira madziteteguru ako? (onawo “Come, Rejoice,” Hymns, no. 9).

Mushure mokunzvera ndima idzi, ungangonzwa kukurudzirwa kuitira chimwe chinhu madziteteguru ako? Mazano ari pawebhusaiti inoti FamilySearch.org anokwanisa kubatsira.

Mavhidhiyo anonzi “Inspirational Videos” ari mumuunganidzwa “weTemple and Family History” wemuRaibhurari yeVhangeri anokwanisa kukupa rubatsiro, nyaya dzinokurudzira, uye mashoko anobva kuvatungamiri pamusoro penhoroondo yemhuri.

Shandisa zvinyorwa zveChechi zvinoenderana nazvo. Zvinongedzero zviri muzvidzidzo zveHuyai, Munditevere zvinokuendesa zviri nyore kuzvinyorwa zvinobatsira izvo zvinokwanisa kukubatsira kunzwisisa nokushandisa zvokwadi zvevhangeri kana kuita chinhu pafemero dzaunogamuchira. Semuenzaniso, munongedzo kuFamilySearch uri pamusoro unotungamirira kuzviitwa zvakaita sokudhirowa dhaigiramu rinotaridza ukama muzvizvarwa zvemhuri yako, kuwana madziteteguru anoda zvisungo zvemutemberi, kuona uko madziteteguru ako kwaakabva, kana kuisa nyaya yemhuri.

Onawo Kevin R. Duncan, “­A Voice of Gladness!,” Liahona, Chivabvu 2023, 95–97.

“Chipo Chakanakisisa uye Chinoshamisa.”

Mutungamiri Gordon B. Hinckley vakati:

“Rudzikinuro rwaJesu muchinzvimbo chavose rwunomiririra kuzvipira muchinzvimbo chemumwe kukuru. Akamisa mutoo uyo pasi pawo Akava mumiririri wavanhu vose. Mutoo uyu uyo pasi pawo mumwe munhu anokwanisa kuita zvinhu muchinzvimbo chemumwe unoendeswa mberi muzvisungo zveimba yaIshe. Imomo tinoshandira muchinzvimbo cheavo vakafa vasina ruzivo rwevhangeri. Chikamu chavo isarudzo yokutambira kana kuramba chisungo icho chinenge chaitwa. Vanoiswa panhanho yakaenzana neavo vanofamba panyika. Vakafa vanopuwa mukana mumwechetewo sevanorarama. Zvakare, chipo chakanakisisa uye chinoshamisa zvakadii icho Samasimba chavakaita kuburikidza nezvakazarurwa Zvavo kuMuporofita Wavo” (“The Great Things Which God Has Revealed,” Liahona, Chivabvu 2005, 82–83).

Mazano eKudzidzisa Vana

Dzidziso neZvibvumirano 126:3

Ndinokwanisa kubatsira kuriritira mhuri yangu.

• Kuitira kubatsira vana vako kudzidza kushandira nhengo dzemhuri yavo, funga pamusoro pokugovera ruzivo pamusoro paBrigham Young “muChapter 50: The Saints in Nauvoo,” muDoctrine and Covenants Stories, 184, kana vhidhiyo inoenderana nazvo muGospel Library) kana kupfupisa Dzidziso neZvibvumirano 126 mumashoko ako pachako. Ungangosimbisisa ndevo inoti “nyatsoriritira mhuri yako” (ndima 3) uye wotaura nevana vako pamusoro peizvo zvazvinoreva kunyatsoriritira mhuri dzedu.

  Chapter 50: The Saints in Nauvoo: January–July 1841

• Zvingangova zvinonakidza kwauri nevana vako kutarisa pamifananidzo yemhuri (kana kudhirowa mifananidzo) apo pamunotaura pamwechete pamusoro penzira dzatinokwanisa kubatsira nadzo “kuriritira” nhengo dzemhuri. Munokwanisawo kuimba rumbo rwakaita sorwunoti “Home Can Be a heaven on Earth,” (Hymns, nhamba 298).

Dzidziso neZvibvumirano 128:5, 12

Vana vaMwari vose vanoda mukana wekubhabhatidzwa.

• Koka vana vako kuti vawane kubva muDzidziso neZvibvumirano 128:1 musoro wenyaya waiva mupfungwa dzaJoseph Smith. Vanokwanisa kutsvagurudza mundima 17 kuti vawane musoro wenyaya uyo waaifunga “sewakanakisisa kupfura yose.” Ita kuti vagovere izvo zvavanowana uye motaura pamusoro pokuti sei musoro wenyaya uyu uchifadza kudaro.

• Pamusoro pokubatsira vana vako kugadzirira (uye kurarama) zvibvumirano zverubhabhatidzo zvavo pachavo, unokwanisa kuvabatsirawo kuziva mabatsiriro okuita vanhu vasina kuita zvibvumirano izvi munguva yeupenyu hwavo. Funga pamusoro pokutaurira vana vako pamusoro pemumwe munhu waunoziva akafa asina kubhabhatidzwa. Zvino munokwanisa kuverenga pamwechete Dzidziso neZvibvumirano 128:5 uye motarisa pamufananidzo wechidziva cherubhabhatidzo chemutemberi (seicho chiri kumagumo kwechidzidzo chino). Taurira vana vako manzwiro aunoita pamusoro pokubhabhatidzwa mutemberi muchinzvimbo chavanhu vakafa kuitira kuti munhu wose ave nemukana wokuita zvibvumirano naBaba Vokudenga.

Dzidziso neZvibvumirano 128:18

Baba Vokudenga vanoda kuti ndidzidze pamusoro penhoroondo yemhuri yangu.

• Zvingangova zvinokunakidza iwe nevana vako kuita cheni yebepa ine mazita avabereki, vanasekuru naanambuya, vaberiki vanasekuru naanambuya, uye zvichingodaro (ona peji yechiitwa yevhiki rino). Zvino munokwanisa kugoverana izvo zvamunoziva pamusoro pamadziteteguru aya. Verengai pamwechete Dzidziso neZvibvumirano 128:18 kuti muwane kuti “chisungo chinobatanidza zvakasimba” chii icho chinoita kuti nhoroondo yemhuri yedu ive “yakazara uye yakakwana.” Munokwanisawo kuona vhidhiyo inonzi “Courage: I Think I Get It from Him” (Gospel Library).

  Courage: I Think I Get It From Him

  Learn about your ancestors strengths to discover your own strengths.

• Zvimwe zviitwa zvokubatsira vana vako kutora chinhanho munhoroondo yemhuri zvinokwanisa kuwanikwa muchinyorwa chinoti “Temberi neChirongwa cheMufaro” muchiwedzerwa B kana pawebhusaiti FamilySearch.org.

Zvisungo zvemutemberi zvinotibatsira kubatanidza mhuri sezvisungo zviri mucheni.

­­

chidziva cherubhabhatidzo muTemberi yeOgden Utah.