“ພາກຫ້ອຍທ້າຍ ກ: ສຳລັບພໍ່ແມ່—ການກະກຽມລູກໆຂອງທ່ານໃຫ້ຢູ່ໃນເສັ້ນທາງຂອງພຣະເຈົ້າໄປຕະຫລອດຊີວິດ,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ພາກຫ້ອຍທ້າຍ ກ,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ພາກຫ້ອຍທ້າຍ ກ

ສຳລັບພໍ່ແມ່—ການກະກຽມລູກໆຂອງທ່ານໃຫ້ຢູ່ໃນເສັ້ນທາງແຫ່ງພັນທະສັນຍາຂອງພຣະເຈົ້າໄປຕະຫລອດຊີວິດ

ຍ້ອນວ່າພຣະອົງຮັກທ່ານ, ໄວ້ວາງພຣະໄທໃນຕົວທ່ານ, ແລະ ຮູ້ເຖິງສັກກະຍະພາບຂອງທ່ານ, ພຣະບິດາເທິງສະຫວັນຈຶ່ງໄດ້ມອບໂອກາດໃຫ້ທ່ານເພື່ອຊ່ວຍລູກໆຂອງທ່ານໃຫ້ເຂົ້າໄປ ແລະ ກ້າວໜ້າໃນເສັ້ນທາງແຫ່ງພັນທະສັນຍາຂອງພຣະອົງ, ໃນເສັ້ນທາງທີ່ນຳໄປສູ່ຊີວິດນິລັນດອນ (ເບິ່ງ ຄຳສອນ ແລະ ພັນທະສັນຍາ 68:25–28). ສິ່ງນີ້ແມ່ນລວມທັງການຊ່ວຍພວກເຂົາໃຫ້ກະກຽມທີ່ຈະເຮັດ ແລະ ຮັກສາພັນທະສັນຍາສັກສິດ, ດັ່ງເຊັ່ນພັນທະສັນຍາແຫ່ງການບັບຕິສະມາ ແລະ ພັນທະສັນຍາທີ່ໄດ້ເຮັດໃນພຣະວິຫານ. ຜ່ານທາງພັນທະສັນຍາເຫລົ່ານີ້, ລູກໆຂອງທ່ານຈະສາມາດຜູກມັດຕົວເອງເຂົ້າກັບພຣະຜູ້ຊ່ວຍໃຫ້ລອດ, ພຣະເຢຊູຄຣິດດ້ວຍຄວາມຊື່ນຊົມ.

ມັນມີຫລາຍວິທີທາງໃນການກະກຽມລູກໆຂອງທ່ານສຳລັບການເດີນທາງໃນເສັ້ນທາງແຫ່ງພັນທະສັນຍາ, ແລະ ພຣະບິດາເທິງສະຫວັນຈະຊ່ວຍທ່ານຄົ້ນພົບວິທີທີ່ດີທີ່ສຸດເພື່ອຊ່ວຍພວກເຂົາ. ຂະນະທີ່ທ່ານສະແຫວງຫາການດົນໃຈ, ຈົ່ງຈື່ຈຳວ່າ ການຮຽນຮູ້ທັງໝົດບໍ່ໄດ້ເກີດຂຶ້ນລະຫວ່າງບົດຮຽນຕາມທີ່ວາງແຜນ. ຕາມຄວາມຈິງແລ້ວ, ພາກສ່ວນໜຶ່ງທີ່ເຮັດໃຫ້ການຮຽນຮູ້ຢູ່ທີ່ບ້ານມີພະລັງຫລາຍ ຄືໂອກາດທີ່ຈະຮຽນຮູ້ ໂດຍຕົວຢ່າງ ແລະ ຜ່ານທາງຊ່ວງເວລາສິດສອນອັນເລັກນ້ອຍ ແລະ ລຽບງ່າຍ—ອັນທີ່ເກີດຂຶ້ນແບບທຳມະຊາດ ແລະ ເຂົ້າກັບການດຳລົງຊີວິດປະຈຳວັນ. ເໝືອນດັ່ງການເດີນໄປໃນເສັ້ນທາງແຫ່ງພັນທະສັນຍາຈຳເປັນຕ້ອງສະໝ່ຳສະເໝີຕະຫລອດຊີວິດ, ການຮຽນຮູ້ກ່ຽວກັບເສັ້ນທາງແຫ່ງພັນທະສັນຍາກໍຕ້ອງສະໝ່ຳສະເໝີເຊັ່ນກັນ. (ເບິ່ງ “ບ້ານເຮືອນ ແລະ ຄອບຄົວ,” ການສິດສອນໃນວິທີຂອງພຣະຜູ້ຊ່ວຍໃຫ້ລອດ [2022], 30–31.)

ຂ້າງລຸ່ມນີ້ແມ່ນແນວຄິດບາງຢ່າງທີ່ສາມາດນຳພາໄປສູ່ການດົນໃຈຫລາຍຍິ່ງຂຶ້ນ. ທ່ານສາມາດພົບເຫັນແນວຄິດເພີ່ມເຕີມສຳລັບການສິດສອນເດັກຊັ້ນປະຖົມໄວໄດ້ໃນ “ພາກຫ້ອຍທ້າຍ ຂ: ສຳລັບປະຖົມໄວ—ການກະກຽມເດັກນ້ອຍໃຫ້ຢູ່ໃນເສັ້ນທາງແຫ່ງພັນທະສັນຍາຂອງພຣະເຈົ້າໄປຕະຫລອດຊີວິດ.”

ການບັບຕິສະມາ ແລະ ການຢືນຢັນ

ນີໄຟໄດ້ສິດສອນວ່າ “ປະຕູ ຊຶ່ງໂດຍທາງນັ້ນ [ເຮົາ] ຄວນເຂົ້າໄປ” ເສັ້ນທາງແຫ່ງພັນທະສັນຍາ “ຄືການກັບໃຈ ແລະ ຮັບການບັບຕິສະມາດ້ວຍນ້ຳ” (2 ນີໄຟ 31:17). ຄວາມພະຍາຍາມຂອງທ່ານໃນການຊ່ວຍລູກໆຂອງທ່ານໃຫ້ກະກຽມສຳລັບການບັບຕິສະມາ ແລະ ການຢືນຢັນ ສາມາດວາງຕີນຂອງພວກເຂົາລົງໃນເສັ້ນທາງນັ້ນຢ່າງໝັ້ນຄົງໄດ້. ຄວາມພະຍາຍາມເຫລົ່ານີ້ເລີ່ມຕົ້ນດ້ວຍການສິດສອນກ່ຽວກັບສັດທາໃນພຣະເຢຊູຄຣິດ ແລະ ການກັບໃຈ. ມັນຍັງລວມທັງການສິດສອນກ່ຽວກັບວິທີທີ່ເຮົາຕໍ່ພັນທະສັນຍາແຫ່ງການບັບຕິສະມາຂອງເຮົາ ໂດຍການຮັບສ່ວນສິນລະລຶກໃນແຕ່ລະອາທິດນຳອີກ.

ຕໍ່ໄປນີ້ແມ່ນແຫລ່ງຊ່ວຍເຫລືອບາງຢ່າງທີ່ສາມາດຊ່ວຍທ່ານໄດ້: 2 ນີໄຟ 31; ສະບັບພິເສດ Friend ກ່ຽວກັບການບັບຕິສະມາ; Topics and Questions, “Baptism,” ຫ້ອງສະໝຸດພຣະກິດຕິຄຸນ.

ເມື່ອໃດກໍຕາມທີ່ທ່ານມີປະສົບການທີ່ສ້າງສັດທາຂອງທ່ານໃນພຣະບິດາເທິງສະຫວັນ ແລະ ພຣະເຢຊູຄຣິດ, ໃຫ້ແບ່ງປັນມັນກັບລູກຂອງທ່ານ. ຊ່ວຍພວກເຂົາໃຫ້ເຂົ້າໃຈວ່າ ສັດທາແມ່ນບາງສິ່ງທີ່ສາມາດເຕີບໂຕເຂັ້ມແຂງຂຶ້ນເລື້ອຍໆ ຕະຫລອດຊີວິດ. ມີສິ່ງໃດແດ່ທີ່ລູກຂອງທ່ານສາມາດເຮັດ ໃນການພັດທະນາສັດທາໃຫ້ເຂັ້ມແຂງໃນພຣະຄຣິດ ກ່ອນພວກເຂົາຮັບບັບຕິສະມາ?
ເມື່ອລູກຂອງທ່ານເລືອກຜິດ, ໃຫ້ເວົ້າຢ່າງຊື່ນຊົມກ່ຽວກັບຂອງປະທານແຫ່ງການກັບໃຈ. ແລະ ເມື່ອທ່ານເລືອກຜິດ, ໃຫ້ບອກເຖິງຄວາມຊື່ນຊົມທີ່ຮູ້ສຶກເມື່ອທ່ານກັບໃຈ. ເປັນພະຍານວ່າ ເພາະພຣະເຢຊູຄຣິດໄດ້ຮັບທຸກທໍລະມານ ແລະ ໄດ້ສິ້ນພຣະຊົນແທນຄວາມຜິດບາບຂອງເຮົາ, ເຮົາຈຶ່ງສາມາດກັບໃຈໃນມື້ນີ້, ໄດ້ຮັບການໃຫ້ອະໄພ, ແລະ ຮັບພະລັງເພື່ອປ່ຽນແປງ. ເມື່ອລູກຂອງທ່ານສະແຫວງຫາການໃຫ້ອະໄພ, ຈົ່ງໃຫ້ອະໄພຢ່າງເຕັມໃຈ ແລະ ດ້ວຍຄວາມຊື່ນຊົມ.
ບອກລູກຂອງທ່ານກ່ຽວກັບການບັບຕິສະມາຂອງທ່ານ. ສະແດງຮູບຖ່າຍ ແລະ ແບ່ງປັນຄວາມຊົງຈຳ. ເວົ້າລົມກ່ຽວກັບຄວາມຮູ້ສຶກຂອງທ່ານ, ວ່າການຮັກສາພັນທະສັນຍາແຫ່ງການບັບຕິສະມາຂອງທ່ານໄດ້ຊ່ວຍທ່ານໃຫ້ມາຮູ້ຈັກພຣະເຢຊູຄຣິດດີຂຶ້ນແນວໃດ, ແລະ ພັນທະສັນຍາຂອງທ່ານສືບຕໍ່ເປັນພອນໃຫ້ແກ່ຊີວິດຂອງທ່ານແນວໃດ. ຊຸກຍູ້ລູກຂອງທ່ານໃຫ້ຖາມຄຳຖາມ.
ເມື່ອມີການບັບຕິສະມາໃນຄອບຄົວຍາດພີ່ນ້ອງຂອງທ່ານ ຫລື ໃນຫວອດຂອງທ່ານ, ໃຫ້ພາລູກຂອງທ່ານໄປເບິ່ງ. ເວົ້າລົມນຳກັນກ່ຽວກັບສິ່ງທີ່ທ່ານ ແລະ ລູກຂອງທ່ານໄດ້ເຫັນ ແລະ ຮູ້ສຶກ. ຖ້າເປັນໄປໄດ້, ໃຫ້ເວົ້າລົມກັບຜູ້ຮັບບັບຕິສະມາ ແລະ ຖາມຄຳຖາມເຊັ່ນດັ່ງຕໍ່ໄປນີ້: “ເປັນຫຍັງເຈົ້າຈຶ່ງຕັດສິນໃຈຮັບບັບຕິສະມາ? ເຈົ້າກະກຽມແບບໃດ?”
ເມື່ອໃດກໍຕາມທີ່ທ່ານສັງເກດເຫັນລູກຂອງທ່ານເຮັດບາງສິ່ງທີ່ພວກເຂົາສັນຍາວ່າຈະເຮັດ, ໃຫ້ຍ້ອງຍໍພວກເຂົາດ້ວຍຄວາມຈິງໃຈ. ຊີ້ບອກວ່າ ການຮັກສາຄຳໝັ້ນສັນຍາຊ່ວຍເຮົາໃຫ້ກະກຽມທີ່ຈະຮັກສາພັນທະສັນຍາ ທີ່ເຮົາໄດ້ເຮັດເມື່ອເຮົາຮັບບັບຕິສະມາ. ເຮົາສັນຍາຫຍັງກັບພຣະເຈົ້າເມື່ອເຮົາຮັບບັບຕິສະມາ? ພຣະອົງສັນຍາຫຍັງແດ່ກັບເຮົາ? (ເບິ່ງ ໂມໄຊຢາ 18:8–10, 13.)
ເວົ້າລົມກ່ຽວກັບວ່າການຢືນຢັນ ແລະ ການກາຍເປັນສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍໄດ້ເປັນພອນໃຫ້ແກ່ທ່ານແນວໃດ. ຍົກຕົວຢ່າງ, ທ່ານໄດ້ເຂົ້າໃກ້ພຣະບິດາເທິງສະຫວັນ ແລະ ພຣະເຢຊູຄຣິດຫລາຍຂຶ້ນແນວໃດ ເມື່ອທ່ານໄດ້ຮັບໃຊ້ຄົນອື່ນ ແລະ ເມື່ອຄົນອື່ນໄດ້ຮັບໃຊ້ທ່ານ? ຊ່ວຍລູກຂອງທ່ານໃຫ້ຄິດເຖິງວິທີທີ່ຈະຮັບໃຊ້ ແລະ ເພີ່ມຄວາມເຂັ້ມແຂງໃຫ້ກັບຄົນອື່ນ ໃນຖານະສະມາຊິກຂອງສາດສະໜາຈັກ. ພ້ອມນີ້ໃຫ້ຊ່ວຍພວກເຂົາມີປະສົບການ ແລະ ຮັບຮູ້ຄວາມຊື່ນຊົມທີ່ມາຈາກການຮັບໃຊ້ນຳອີກ.
ເມື່ອທ່ານ ແລະ ລູກຂອງທ່ານມີປະສົບການທີ່ສັກສິດນຳກັນ (ດັ່ງເຊັ່ນເວລາຢູ່ໂບດ, ຂະນະທີ່ອ່ານພຣະຄຳພີ, ຫລື ຂະນະທີ່ຮັບໃຊ້ບາງຄົນ), ໃຫ້ບອກພວກເຂົາກ່ຽວກັບຄວາມຮູ້ສຶກທາງວິນຍານ ຫລື ຄວາມປະທັບໃຈທີ່ທ່ານມີ. ເຊື້ອເຊີນລູກຂອງທ່ານໃຫ້ແບ່ງປັນວິທີທີ່ພວກເຂົາຮູ້ສຶກ. ສັງເກດເບິ່ງຫລາຍວິທີທີ່ພຣະວິນຍານສາມາດກ່າວກັບຜູ້ຄົນ, ລວມທັງວິທີທີ່ພຣະອົງກ່າວກັບທ່ານເປັນສ່ວນຕົວ. ຊ່ວຍລູກຂອງທ່ານໃຫ້ຮັບຮູ້ ແລະ ແບ່ງປັນກັບທ່ານເຖິງຊ່ວງເວລາເມື່ອພວກເຂົາປະສົບກັບອິດທິພົນຂອງພຣະວິນຍານບໍລິສຸດ.
ເບິ່ງວິດີໂອສອງສາມຕອນນຳກັນ ຈາກຫ້ອງສະໝຸດພຣະກິດຕິຄຸນ ໃນບ່ອນເກັບກຳທີ່ເອີ້ນວ່າ “Hear Him!” ເວົ້າລົມນຳກັນກ່ຽວກັບວິທີຕ່າງໆທີ່ຜູ້ຮັບໃຊ້ຂອງພຣະຜູ້ເປັນເຈົ້າໄດ້ຍິນສຸລະສຽງຂອງພຣະອົງ. ເຊື້ອເຊີນລູກຂອງທ່ານໃຫ້ແຕ້ມຮູບ ຫລື ສ້າງວິດີໂອກ່ຽວກັບວິທີທີ່ພວກເຂົາໄດ້ຍິນສຸລະສຽງຂອງພຣະຜູ້ຊ່ວຍໃຫ້ລອດແນວໃດ.
ເຮັດໃຫ້ສິນລະລຶກເປັນເຫດການທີ່ສັກສິດ ແລະ ຊື່ນຊົມໃນຄອບຄົວຂອງທ່ານ. ແບ່ງປັນກັບລູກຂອງທ່ານວິທີທີ່ຈະສຸມໃຈໃສ່ພຣະເຢຊູຄຣິດລະຫວ່າງສິນລະລຶກ. ຊ່ວຍລູກຂອງທ່ານວາງແຜນເພື່ອສະແດງວ່າສິນລະລຶກມີຄວາມສັກສິດຕໍ່ພວກເຂົາ. ຍົກຕົວຢ່າງ, ຟັງຄຳອະທິຖານສຳລັບສິນລະລຶກສາມາດເຕືອນໃຈເຮົາເຖິງພັນທະສັນຍາແຫ່ງການບັບຕິສະມາໄດ້.
ວາລະສານ Friend ຫລາຍສະບັບ ແມ່ນລວມດ້ວຍບົດຄວາມສັ້ນ, ເລື່ອງລາວ, ແລະ ກິດຈະກຳຕ່າງໆ ເພື່ອຊ່ວຍເດັກນ້ອຍກະກຽມສຳລັບການບັບຕິສະມາ ແລະ ການຢືນຢັນ. ໃຫ້ລູກຂອງທ່ານເລືອກເອົາບາງສິ່ງເພື່ອອ່ານ ແລະ ຊື່ນຊົມກັບທ່ານ. (ເບິ່ງ ບ່ອນເກັບກຳ “Preparing for Baptism” ໃນພາກຫ້ອງສະໝຸດພຣະກິດຕິຄຸນຂອງເດັກນ້ອຍນຳອີກ.)

ອຳນາດ, ສິດອຳນາດ, ແລະ ຂໍກະແຈຂອງຖານະປະໂລຫິດ

ຖານະປະໂລຫິດແມ່ນສິດອຳນາດ ແລະ ອຳນາດຂອງພຣະເຈົ້າ ຊຶ່ງໂດຍທາງນັ້ນພຣະອົງໄດ້ໃຫ້ພອນແກ່ລູກໆຂອງພຣະອົງ. ຖານະປະໂລຫິດຂອງພຣະເຈົ້າແມ່ນຢູ່ເທິງໂລກໃນທຸກວັນນີ້ ໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. “ສະມາຊິກຂອງສາດສະໜາຈັກທຸກຄົນຜູ້ຮັກສາພັນທະສັນຍາຂອງຕົນ—ຊາຍ, ຍິງ, ແລະ ເດັກນ້ອຍ—ໄດ້ຮັບພອນດ້ວຍອຳນາດຂອງຖານະປະໂລຫິດຂອງພຣະເຈົ້າ ໃນບ້ານເຮືອນຂອງເຂົາເຈົ້າ ເພື່ອເພີ່ມຄວາມເຂັ້ມແຂງໃຫ້ແກ່ຕົນເອງ ແລະ ຄອບຄົວຂອງເຂົາເຈົ້າ” (ຄູ່ມືທົ່ວໄປ: ການຮັບໃຊ້ໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, 3.6, ຫ້ອງສະໝຸດພຣະກິດຕິຄຸນ). ອຳນາດນີ້ຈະຊ່ວຍສະມາຊິກໃນການເຮັດວຽກງານແຫ່ງຄວາມລອດ ແລະ ຄວາມສູງສົ່ງຂອງພຣະເຈົ້າ ໃນຊີວິດສ່ວນຕົວ ແລະ ໃນຄອບຄົວຂອງເຂົາເຈົ້າ (ເບິ່ງ ຄູ່ມືທົ່ວໄປ, 2.2).

ເມື່ອຜູ້ຊາຍ ແລະ ຜູ້ຍິງຮັບໃຊ້ໃນການເອີ້ນຂອງສາດສະໜາຈັກ, ເຂົາເຈົ້າເຮັດດ້ວຍສິດອຳນາດຖານະປະໂລຫິດ, ພາຍໃຕ້ການຊີ້ນຳຂອງຜູ້ທີ່ດຳລົງຂໍກະແຈຖານະປະໂລຫິດ. ລູກໆຂອງພຣະບິດາເທິງສະຫວັນທຸກຄົນ—ບຸດ ແລະ ທິດາຂອງພຣະອົງ—ຈະໄດ້ຮັບພອນເມື່ອເຂົາເຈົ້າເຂົ້າໃຈຖານະປະໂລຫິດຫລາຍຂຶ້ນ.

ເຮົາໄດ້ຮັບພິທີການໂດຍສິດອຳນາດຂອງຖານະປະໂລຫິດ. “ສະມາຊິກຜູ້ຊາຍທີ່ມີຄ່າຄວນຂອງສາດສະໜາຈັກຮັບສິດອຳນາດຖານະປະໂລຫິດຜ່ານທາງການມອບຖານະປະໂລຫິດ ແລະ ການແຕ່ງຕັ້ງສູ່ຕຳແໜ່ງຖານະປະໂລຫິດ” (ຄູ່ມືທົ່ວໄປ, 3.4). ຜູ້ທີ່ດຳລົງຕຳແໜ່ງຖານະປະໂລຫິດສາມາດໄດ້ຮັບສິດອຳນາດໂດຍຄົນໃດຄົນໜຶ່ງທີ່ດຳລົງຂໍກະແຈຂອງຖານະປະໂລຫິດ ເພື່ອປະຕິບັດພິທີການຂອງຖານະປະໂລຫິດ.

ເພື່ອຮຽນຮູ້ເພີ່ມເຕີມກ່ຽວກັບຖານະປະໂລຫິດ, ໃຫ້ເບິ່ງ Russell M. Nelson, “Spiritual Treasures,” Liahona, Nov. 2019, 76–79; Russell M. Nelson, “The Price of Priesthood Power,” Liahona, May 2016, 66–69; “ຫລັກທຳຖານະປະໂລຫິດ,” ບົດທີ 3 ໃນ ຄູ່ມືທົ່ວໄປ.

ເຮັດໃຫ້ພິທີການຖານະປະໂລຫິດເປັນພາກສ່ວນທີ່ສະໝ່ຳສະເໝີໃນຊີວິດຄອບຄົວຂອງທ່ານ. ຍົກຕົວຢ່າງ, ຊ່ວຍລູກຂອງທ່ານໃຫ້ກະກຽມທາງວິນຍານສຳລັບສິນລະລຶກທຸກອາທິດ. ຊຸກຍູ້ລູກຂອງທ່ານໃຫ້ສະແຫວງຫາພອນຂອງຖານະປະໂລຫິດ ເມື່ອພວກເຂົາເຈັບປ່ວຍ ຫລື ຕ້ອງການ ການປອບໂຍນ ຫລື ການຊີ້ນຳ. ເຮັດເປັນນິໄສເພື່ອຊີ້ບອກວິທີທີ່ພຣະຜູ້ເປັນເຈົ້າໃຫ້ພອນແກ່ຄອບຄົວຂອງທ່ານ ຜ່ານທາງອຳນາດຖານະປະໂລຫິດ.
ຂະນະທີ່ພວກທ່ານອ່ານພຣະຄຳພີນຳກັນ, ໃຫ້ຫາໂອກາດເພື່ອສົນທະນາວິທີທີ່ພຣະເຈົ້າໃຫ້ພອນແກ່ຜູ້ຄົນຜ່ານທາງອຳນາດຂອງພຣະອົງແນວໃດ. ແບ່ງປັນປະສົບການສ່ວນຕົວຂອງທ່ານ ຕອນທີ່ພຣະເຈົ້າໄດ້ໃຫ້ພອນແກ່ທ່ານຜ່ານທາງຖານະປະໂລຫິດຂອງພຣະອົງ. ສຳລັບຕົວຢ່າງກ່ຽວກັບພອນທີ່ເຮົາໄດ້ຮັບຈາກພຣະເຈົ້າຜ່ານທາງຖານະປະໂລຫິດ, ໃຫ້ເບິ່ງ ຄູ່ມືທົ່ວໄປ, 3.2, 3.5.
ສິດສອນລູກຂອງທ່ານວ່າ ຫລັງຈາກບັບຕິສະມາ, ພວກເຂົາສາມາດໄດ້ຮັບອຳນາດຖານະປະໂລຫິດ ໂດຍການຮັກສາພັນທະສັນຍາແຫ່ງການບັບຕິສະມາ. ທົບທວນຂ່າວສານຂອງປະທານຣະໂຊ ເອັມ ແນວສັນ “Spiritual Treasures” (Liahona, Nov. 2019, 76–79) ນຳກັນ. ບອກລູກຂອງທ່ານເຖິງວິທີທີ່ພິທີການຖານະປະໂລຫິດໄດ້ນຳອຳນາດຂອງພຣະເຈົ້າມາສູ່ຊີວິດຂອງທ່ານແນວໃດ. ສຳລັບວິທີຕ່າງໆທີ່ເຮົາໄດ້ຮັບພອນໂດຍອຳນາດຖານະປະໂລຫິດ, ໃຫ້ເບິ່ງ ຄູ່ມືທົ່ວໄປ, 3.5.
ສົນທະນາຄຳຖາມນີ້ “ຜູ້ຮັບໃຊ້ຂອງພຣະຜູ້ເປັນເຈົ້າເປັນແບບໃດ?” ອ່ານ ຄຳສອນ ແລະ ພັນທະສັນຍາ 121:36–42, ນຳກັນ, ແລະ ຊອກຫາຄຳຕອບ. ເມື່ອໃດກໍຕາມທີ່ທ່ານສັງເກດເຫັນລູກຂອງທ່ານ (ຫລື ຄົນອື່ນ) ນຳໃຊ້ຫລັກທຳໜຶ່ງ ຫລື ຄຸນສົມບັດໜຶ່ງໃນຂໍ້ເຫລົ່ານີ້, ໃຫ້ຊີ້ບອກ.
ເມື່ອທ່ານ ຫລື ລູກຂອງທ່ານໃຊ້ກະແຈເພື່ອເປີດປະຕູ ຫລື ສະຕາດລົດ, ໃຫ້ໃຊ້ຊ່ວງເວລານັ້ນເພື່ອປຽບທຽບກະແຈເຫລົ່ານີ້ກັບຂໍກະແຈທີ່ຜູ້ນຳຖານະປະໂລຫິດດຳລົງຢູ່. (ສຳລັບຄຳນິຍາມຂອງຂໍກະແຈຖານະປະໂລຫິດ, ໃຫ້ເບິ່ງ ຄູ່ມືທົ່ວໄປ, 3.4.1). ຂໍກະແຈຖານະປະໂລຫິດ “ເປີດ” ຫລື “ສະຕາດ” ຫຍັງແດ່ສຳລັບເຮົາ? ເບິ່ງ Gary E. Stevenson, “Where Are the Keys and Authority of the Priesthood?,” Liahona, May 2016, 29–32; “Where Are the Keys?” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

2:51
Where Are the Keys?
Priesthood authority and keys start the engine, open the gates of heaven, facilitate heavenly power, and pave the covenant pathway back to our Heavenly Father.
ເມື່ອທ່ານໄດ້ຖືກແຕ່ງຕັ້ງເປັນທາງການສຳລັບການເອີ້ນ, ໃຫ້ເຊື້ອເຊີນລູກຂອງທ່ານໄປຮ່ວມນຳ, ຖ້າເປັນໄປໄດ້. ໃຫ້ລູກຂອງທ່ານເຫັນທ່ານບັນລຸການເອີ້ນຂອງທ່ານ. ທ່ານອາດຊອກຫາວິທີທີ່ເໝາະສົມ ເພື່ອໃຫ້ພວກເຂົາຊ່ວຍທ່ານ. ບັນຍາຍຄວາມຮູ້ສຶກຂອງທ່ານວ່າ ອຳນາດຂອງພຣະຜູ້ເປັນເຈົ້າມີຢູ່ໃນການເອີ້ນຂອງທ່ານແນວໃດ.

ການຮັບບັບຕິສະມາ ແລະ ການຢືນຢັນແທນບັນພະບຸລຸດ

ພຣະວິຫານແມ່ນພາກສ່ວນໜຶ່ງໃນແຜນຂອງພຣະບິດາເທິງສະຫວັນສຳລັບລູກໆຂອງພຣະອົງ. ໃນບ້ານຂອງພຣະຜູ້ເປັນເຈົ້າ, ເຮົາເຮັດພັນທະສັນຍາສັກສິດກັບພຣະບິດາເທິງສະຫວັນ ຂະນະທີ່ເຮົາມີສ່ວນຮ່ວມໃນພິທີການສັກສິດ, ຊຶ່ງທັງໝົດຊີ້ໄປຫາພຣະເຢຊູຄຣິດ. ພຣະບິດາເທິງສະຫວັນໄດ້ຈັດຫາວິທີໃຫ້ລູກໆທຸກຄົນຂອງພຣະອົງ ເພື່ອເຮັດພັນທະສັນຍາ ແລະ ມີສ່ວນຮ່ວມໃນພິທີການ, ລວມທັງຜູ້ຄົນທີ່ບໍ່ໄດ້ຮັບມັນໃນຊີວິດນີ້. ໃນຕົ້ນປີທີ່ລູກຂອງທ່ານເຖິງອາຍຸ 12 ປີ, ພວກເຂົາໃຫຍ່ພໍທີ່ຈະຮັບບັບຕິສະມາ ແລະ ຮັບການຢືນຢັນໃນພຣະວິຫານແທນບັນພະບຸລຸດທີ່ລ່ວງລັບໄປແລ້ວ (ເບິ່ງ 1 ໂກຣິນໂທ 15:29 ນຳອີກ).

ໄປບ້ານຂອງພຣະຜູ້ເປັນເຈົ້າເລື້ອຍໆເທົ່າທີ່ສະຖານະການຈະເອື້ອອຳນວຍ. ເວົ້າລົມກັບລູກຂອງທ່ານກ່ຽວກັບວ່າ ເປັນຫຍັງທ່ານຈຶ່ງໄປ ແລະ ວ່າພຣະວິຫານຊ່ວຍທ່ານໃຫ້ຮູ້ສຶກໃກ້ຊິດກັບພຣະບິດາເທິງສະຫວັນ ແລະ ພຣະເຢຊູຄຣິດຫລາຍຂຶ້ນແນວໃດ.
ທົບທວນ ແລະ ສົນທະນາຄຳຖາມສຳລັບໃບຮັບຮອງເຂົ້າພຣະວິຫານນຳກັນ. ທ່ານສາມາດພົບເຫັນມັນຢູ່ໃນ ໜ້າທີ 36–37 ຂອງປຶ້ມ ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ (2022). ເວົ້າລົມກັບລູກຂອງທ່ານກ່ຽວກັບສິ່ງທີ່ເກີດຂຶ້ນໃນການສຳພາດສຳລັບໃບຮັບຮອງເຂົ້າພຣະວິຫານ. ແບ່ງປັນວ່າ ເປັນຫຍັງການມີໃບຮັບຮອງເຂົ້າພຣະວິຫານຈຶ່ງສຳຄັນຕໍ່ທ່ານ.
ອ່ານ ມາລາກີ 4:6 ນຳກັນ. ເວົ້າລົມກ່ຽວກັບວ່າໃຈຂອງພວກທ່ານສາມາດຫັນໄປຫາບັນພະບຸລຸດຂອງພວກທ່ານແນວໃດ. ຮຽນຮູ້ເພີ່ມເຕີມກ່ຽວກັບບັນພະບຸລຸດຂອງພວກທ່ານ ໂດຍການຄົ້ນຄວ້າປະຫວັດຄອບຄົວຂອງພວກທ່ານນຳກັນ ທີ່ FamilySearch.org. ຊອກຫາບັນພະບຸລຸດຜູ້ທີ່ຕ້ອງໄດ້ຮັບບັບຕິສະມາ ແລະ ຮັບການຢືນຢັນ. ຜູ້ໃຫ້ຄຳປຶກສາຝ່າຍພຣະວິຫານ ແລະ ວຽກງານສືບປະຫວັດຄອບຄົວປະຈຳຫວອດສາມາດຊ່ວຍທ່ານໄດ້.
ທົບທວນແຫລ່ງຂໍ້ມູນຕ່າງໆນຳກັນ ໃນບ່ອນເກັບກຳທີ່ເອີ້ນວ່າ “Temple” ໃນພາກຫ້ອງສະໝຸດພຣະກິດຕິຄຸນຂອງເດັກນ້ອຍ. (ເບິ່ງ “Preparing Your Child for Temple Baptisms and Confirmations” ທີ່ ChurchofJesusChrist.org ນຳອີກ.)

ການຮັບເອົາປິຕຸພອນ

ປິຕຸພອນສາມາດເປັນແຫລ່ງນຳພາ, ປອບໂຍນ, ແລະ ດົນໃຈໄດ້. ມັນບັນຈຸຄຳແນະນຳສ່ວນຕົວຕໍ່ເຮົາຈາກພຣະບິດາເທິງສະຫວັນ ແລະ ຊ່ວຍເຮົາໃຫ້ເຂົ້າໃຈເອກະລັກນິລັນດອນ ແລະ ຈຸດປະສົງຂອງເຮົາ. ຊ່ວຍລູກຂອງທ່ານກະກຽມເພື່ອຮັບເອົາປິຕຸພອນ ໂດຍການສິດສອນພວກເຂົາເຖິງຄວາມໝາຍສຳຄັນ ແລະ ສັກສິດຂອງປິຕຸພອນ.

ເພື່ອຮຽນຮູ້ເພີ່ມເຕີມ, ໃຫ້ເບິ່ງ Topics and Questions, “Patriarchal Blessings,” ຫ້ອງສະໝຸດພຣະກິດຕິຄຸນ; Julie B. Beck, “You Have a Noble Birthright,” Liahona, May 2006, 106–8.

ແບ່ງປັນປະສົບການກ່ຽວກັບການຮັບປິຕຸພອນຂອງທ່ານກັບລູກຂອງທ່ານ. ທ່ານສາມາດແບ່ງປັນເຊັ່ນ ວິທີທີ່ທ່ານກະກຽມເພື່ອຮັບເອົາປິຕຸພອນ, ວ່າມັນຊ່ວຍທ່ານໃຫ້ເຂົ້າໃກ້ພຣະເຈົ້າຫລາຍຂຶ້ນແນວໃດ, ແລະ ພຣະອົງສືບຕໍ່ນຳພາທ່ານຜ່ານທາງພອນນີ້ຕໍ່ໄປ. ທ່ານສາມາດເຊື້ອເຊີນລູກຂອງທ່ານໃຫ້ເວົ້າກັບຄົນອື່ນໃນຄອບຄົວ ຜູ້ທີ່ໄດ້ຮັບປິຕຸພອນຂອງເຂົາເຈົ້າແລ້ວ.
ທົບທວນຂ່າວສານຂອງແອວເດີ ແຣນໂດ ເຄ ເບັນເນັດ “Your Patriarchal Blessing—Inspired Direction from Heavenly Father” ແລະ ຂ່າວສານຂອງແອວເດີ ຄາຊູຮິໂກະ ຢາມາຊີຕະ “When to Receive Your Patriarchal Blessing” (Liahona, May 2023, 42–43, 88–90). ແບ່ງປັນສິ່ງທີ່ທ່ານຮຽນຮູ້ຈາກຂ່າວສານເຫລົ່ານີ້ໃຫ້ກັນກ່ຽວກັບສາເຫດທີ່ພຣະບິດາເທິງສະຫວັນປະສົງໃຫ້ເຮົາໄດ້ຮັບປິຕຸພອນ. ເພື່ອຮຽນຮູ້ກ່ຽວກັບຂັ້ນຕອນການຮັບປິຕຸພອນ, ໃຫ້ເບິ່ງ ຄູ່ມືທົ່ວໄປ, 18.17.
ຖ້າຫາກທ່ານມີບັນພະບຸລຸດທີ່ໄດ້ຮັບປິຕຸພອນແລ້ວ, ມັນອາດເປັນການດົນໃຈທີ່ຈະອ່ານປິຕຸພອນໃດໜຶ່ງກັບລູກຂອງທ່ານ. ໃນການຂໍເອົາໃບປິຕຸພອນຂອງບັນພະບຸລຸດຜູ້ທີ່ເສຍຊີວິດແລ້ວ, ໃຫ້ເຊັນເຂົ້າທີ່ ChurchofJesusChrist.org, ກົດ Tools ທີ່ສົ້ນເທິງເບື້ອງຂວາຂອງຈໍ, ແລະ ເລືອກ Patriarchal Blessing.
ຫລັງຈາກລູກຂອງທ່ານໄດ້ຮັບປິຕຸພອນແລ້ວ, ໃຫ້ເຊື້ອເຊີນຄົນໃດກໍໄດ້ໃນຄອບຄົວຜູ້ມີໜ້າຢູ່ນຳ ໃຫ້ບັນທຶກຄວາມຮູ້ສຶກຂອງເຂົາ ແລະ ແບ່ງປັນຄວາມຮູ້ສຶກນັ້ນກັບລູກຂອງທ່ານ.

ທົບທວນຂອງປະທານສັກສິດ

ພຣະເຈົ້າຢາກມອບຂອງປະທານສັກສິດ, ຫລື ຢາກໃຫ້ພອນ, ແກ່ລູກໆທຸກຄົນຂອງພຣະອົງ ດ້ວຍ “ອຳນາດຈາກເບື້ອງບົນ” (ຄຳສອນ ແລະ ພັນທະສັນຍາ 95:8). ເຮົາໄປພຣະວິຫານເພື່ອຮັບເອົາຂອງປະທານສັກສິດໃຫ້ກັບຕົວເອງພຽງຄັ້ງດຽວເທົ່ານັ້ນ, ແຕ່ພັນທະສັນຍາທີ່ເຮົາເຮັດໄວ້ກັບພຣະເຈົ້າ ແລະ ອຳນາດທາງວິນຍານທີ່ພຣະອົງປະທານໃຫ້ເຮົາ ຊຶ່ງເປັນພາກສ່ວນໜຶ່ງໃນຂອງປະທານສັກສິດ ສາມາດເປັນພອນໃຫ້ແກ່ເຮົາທຸກວັນໃນຊີວິດຂອງເຮົາໄດ້.

ສະແດງຮູບພຣະວິຫານໃນບ້ານເຮືອນຂອງທ່ານ. ບອກລູກຂອງທ່ານກ່ຽວກັບຄວາມຮູ້ສຶກທີ່ທ່ານມີໃນບ້ານຂອງພຣະຜູ້ເປັນເຈົ້າ. ເວົ້າເລື້ອຍໆກ່ຽວກັບຄວາມຮັກທີ່ທ່ານມີຕໍ່ພຣະຜູ້ເປັນເຈົ້າ ແລະ ບ້ານຂອງພຣະອົງ ແລະ ພັນທະສັນຍາທີ່ທ່ານໄດ້ເຮັດໃນທີ່ນັ້ນ. ຊອກຫາໂອກາດໄປພຣະວິຫານກັບລູກຂອງທ່ານ ເພື່ອປະຕິບັດການບັບຕິສະມາ ແລະ ການຢືນຢັນແທນບັນພະບຸລຸດຂອງພວກເຂົາ.
ຄົ້ນຄວ້າ temples.ChurchofJesusChrist.org ນຳກັນ. ອ່ານບົດຄວາມສັ້ນເຊັ່ນ “About the Temple Endowment” ແລະ “Prepare for the House of the Lord” ນຳກັນ. ປ່ອຍໃຫ້ລູກຂອງທ່ານຖາມຄຳຖາມທີ່ພວກເຂົາມີກ່ຽວກັບພຣະວິຫານ. ສຳລັບຄຳແນະນຳກ່ຽວກັບສິ່ງທີ່ທ່ານສາມາດເວົ້າລົມຢູ່ນອກພຣະວິຫານ, ໃຫ້ເບິ່ງຂ່າວສານຂອງແອວເດີ ເດວິດ ເອ ແບ໊ດນາ “Prepared to Obtain Every Needful Thing” (Liahona, May 2019, 101–4; ໃຫ້ເບິ່ງໂດຍສະເພາະພາກທີ່ເອີ້ນວ່າ “Home-Centered and Church-Supported Learning and Temple Preparation”).
ຂະນະທີ່ທ່ານ ແລະ ລູກຂອງທ່ານມີສ່ວນຮ່ວມ ຫລື ເປັນພະຍານໃນພິທີການອື່ນໆ (ເຊັ່ນ ສິນລະລຶກ ຫລື ພອນແຫ່ງການປິ່ນປົວ), ໃຫ້ໃຊ້ເວລາຈັກບຶດໜຶ່ງເພື່ອສົນທະນາສັນຍາລັກທີ່ກ່ຽວຂ້ອງກັບພິທີການນັ້ນ. ສັນຍາລັກເປັນຕົວແທນໃຫ້ສິ່ງໃດ? ມັນເປັນພະຍານເຖິງພຣະເຢຊູຄຣິດແນວໃດ? ສິ່ງນີ້ສາມາດຊ່ວຍລູກຂອງທ່ານໃຫ້ກຽມໄຕ່ຕອງກ່ຽວກັບຄວາມໝາຍຂອງສັນຍາລັກພິທີການພຣະວິຫານ, ຊຶ່ງເປັນພະຍານເຖິງພຣະເຢຊູຄຣິດເຊັ່ນກັນ.
ຊ່ວຍລູກຂອງທ່ານໃຫ້ສັງເກດເບິ່ງວ່າ ພວກເຂົາຮັກສາພັນທະສັນຍາແຫ່ງການບັບຕິສະມາ ທີ່ບັນຍາຍຢູ່ໃນ ໂມໄຊຢາ 18:8–10, 13 ແນວໃດ. ພ້ອມນີ້ຈົ່ງຊ່ວຍລູກຂອງທ່ານໃຫ້ສັງເກດເບິ່ງວ່າ ພຣະຜູ້ເປັນເຈົ້າໃຫ້ພອນແກ່ພວກເຂົາແນວໃດ. ສ້າງຄວາມໝັ້ນໃຈໃຫ້ກັບລູກຂອງທ່ານ ໃນຄວາມສາມາດຂອງພວກເຂົາທີ່ຈະຮັກສາພັນທະສັນຍາ.
ເວົ້າລົມແບບເປີດໃຈ ແລະ ເປັນປະຈຳກ່ຽວກັບວ່າ ພັນທະສັນຍາພຣະວິຫານຂອງທ່ານໄດ້ນຳພາການເລືອກຂອງທ່ານ ແລະ ຊ່ວຍທ່ານໃຫ້ຫຍັບເຂົ້າໃກ້ພຣະເຢຊູຄຣິດຫລາຍຂຶ້ນແນວໃດ. ທ່ານສາມາດໃຊ້ ຄູ່ມືທົ່ວໄປ, 27.2, ເພື່ອທົບທວນພັນທະສັນຍາ ທີ່ທ່ານໄດ້ເຮັດໃນພຣະວິຫານ. ຖ້າຫາກທ່ານໄດ້ຮັບຂອງປະທານສັກສິດແລ້ວ, ໃຫ້ບອກລູກໆຂອງທ່ານວ່າ ເສື້ອຜ້າສັກສິດພຣະວິຫານຊ່ວຍໃຫ້ທ່ານຈື່ຈຳພັນທະສັນຍາຂອງທ່ານກັບພຣະເຢຊູຄຣິດໄດ້ແນວໃດ (ເບິ່ງ “Sacred Temple Clothing” [ວິດີໂອ], ຫ້ອງສະໝຸດພຣະກິດຕິຄຸນ).

Sacred Temple Clothing
From ancient times, men and women have embraced sacred music, different forms of prayer, religious vestments full of symbolism, gestures and rituals to express their innermost feelings of devotion to God.

ການຮັບໃຊ້ເຜີຍແຜ່

ແອວເດີ ເດວິດ ເອ ແບ໊ດນາ ໄດ້ສິດສອນວ່າ: “ສິ່ງສຳຄັນທີ່ສຸດຢ່າງດຽວທີ່ທ່ານສາມາດເຮັດໄດ້ ໃນການກະກຽມສຳລັບການເອີ້ນໃຫ້ຮັບໃຊ້ແມ່ນການກາຍເປັນຜູ້ສອນສາດສະໜາດົນນານກ່ອນແລ້ວ ກ່ອນທີ່ທ່ານຈະໄປເຜີຍແຜ່. … ຈຸດສຳຄັນບໍ່ແມ່ນການໄປເຜີຍແຜ່; ແຕ່, ຈຸດສຳຄັນແມ່ນການກາຍເປັນຜູ້ສອນສາດສະໜາ ແລະ ການຮັບໃຊ້ຕະຫລອດຊີວິດຂອງເຮົາ ດ້ວຍສຸດໃຈ, ພະລັງ, ຄວາມຄິດ, ແລະ ກຳລັງຂອງເຮົາ. … ທ່ານຕ້ອງກຽມພ້ອມຕະຫລອດຊີວິດສຳລັບວຽກງານເຜີຍແຜ່” (“Becoming a Missionary,” Liahona, Nov. 2005, 45–46). ປະສົບການທີ່ລູກຂອງທ່ານມີໃນການກາຍເປັນຜູ້ສອນສາດສະໜາ ຈະເປັນພອນໃຫ້ແກ່ພວກເຂົາຊົ່ວນິລັນດອນ, ບໍ່ພຽງແຕ່ໃນຊ່ວງໄລຍະທີ່ພວກເຂົາຮັບໃຊ້ເປັນຜູ້ສອນສາດສະໜາເທົ່ານັ້ນ.

ເພື່ອຮຽນຮູ້ເພີ່ມເຕີມ, ໃຫ້ເບິ່ງ Russell M. Nelson, “Preaching the Gospel of Peace,” Liahona, May 2022, 6–7; M. Russell Ballard, “Missionary Service Blessed My Life Forever,” Liahona, May 2022, 8–10; “Missionary Preparation: Adjusting to Missionary Life,” ຫ້ອງສະໝຸດພຣະກິດຕິຄຸນ.

ສະແດງແບບຢ່າງວິທີການແບ່ງປັນພຣະກິດຕິຄຸນໃນແບບທຳມະຊາດ. ກຽມພ້ອມສະເໝີກັບໂອກາດທີ່ຈະແບ່ງປັນຄວາມຮູ້ສຶກຂອງທ່ານກັບຄົນອື່ນ ກ່ຽວກັບພຣະບິດາເທິງສະຫວັນ ແລະ ພຣະຜູ້ຊ່ວຍໃຫ້ລອດ ແລະ ພອນທີ່ທ່ານໄດ້ຮັບຈາກພຣະກິດຕິຄຸນທີ່ຖືກຟື້ນຟູຂອງພຣະຜູ້ຊ່ວຍໃຫ້ລອດ ແລະ ໃນຖານະສະມາຊິກຂອງສາດສະໜາຈັກ. ເຊື້ອເຊີນຄົນອື່ນໃຫ້ໄປຮ່ວມກັບຄອບຄົວຂອງທ່ານ ໃນກິດຈະກຳທີ່ກ່ຽວຂ້ອງກັບສາດສະໜາຈັກ ແລະ ຄອບຄົວ.
ຊອກຫາໂອກາດໃຫ້ຄອບຄົວຂອງທ່ານໄດ້ປະຕິສຳພັນກັບຜູ້ສອນສາດສະໜາ. ເຊື້ອເຊີນເຂົາເຈົ້າໃຫ້ສິດສອນໝູ່ເພື່ອນຂອງທ່ານ, ຫລື ສະເໜີໃຫ້ເຂົາເຈົ້າສິດສອນຜູ້ຄົນໃນບ້ານຂອງທ່ານ. ຖາມຜູ້ສອນສາດສະໜາກ່ຽວກັບປະສົບການທີ່ເຂົາເຈົ້າມີ ແລະ ວ່າການຮັບໃຊ້ເຜີຍແຜ່ຊ່ວຍເຂົາເຈົ້າຫຍັບເຂົ້າໃກ້ພຣະເຢຊູຄຣິດຫລາຍຂຶ້ນແນວໃດ. ພ້ອມນີ້ໃຫ້ຖາມເຖິງສິ່ງທີ່ເຂົາເຈົ້າໄດ້ເຮັດ (ຫລື ສິ່ງທີ່ເຂົາເຈົ້າເສຍດາຍທີ່ບໍ່ໄດ້ເຮັດ) ເພື່ອກະກຽມເປັນຜູ້ສອນສາດສະໜາ.
ຖ້າທ່ານໄດ້ຮັບໃຊ້ເຜີຍແຜ່, ໃຫ້ເວົ້າລົມຢ່າງເປີດໃຈ ແລະ ເວົ້າເລື້ອຍໆກ່ຽວກັບປະສົບການຂອງທ່ານ. ຫລື ເຊື້ອເຊີນໝູ່ເພື່ອນ ຫລື ສະມາຊິກໃນຄອບຄົວຜູ້ເຄີຍຮັບໃຊ້ເຜີຍແຜ່ໃຫ້ເວົ້າລົມກ່ຽວກັບປະສົບການຂອງເຂົາເຈົ້າ. ທ່ານກໍສາມາດເວົ້າລົມກ່ຽວກັບວິທີທີ່ທ່ານໄດ້ແບ່ງປັນພຣະກິດຕິຄຸນກັບຄົນອື່ນຕະຫລອດຊີວິດຂອງທ່ານແນວໃດ. ຊ່ວຍລູກຂອງທ່ານໃຫ້ຄິດຫາວິທີທີ່ພວກເຂົາສາມາດແບ່ງປັນພຣະກິດຕິຄຸນ.
ໃຫ້ໂອກາດລູກຂອງທ່ານເພື່ອສິດສອນຫລັກທຳພຣະກິດຕິຄຸນໃຫ້ກັບຄອບຄົວຂອງທ່ານ. ລູກຂອງທ່ານກໍສາມາດຝຶກການແບ່ງປັນຄວາມເຊື່ອຂອງພວກເຂົາກັບຄົນອື່ນເຊັ່ນກັນ. ຍົກຕົວຢ່າງ, ທ່ານສາມາດສົນທະນາຄຳຖາມເຊັ່ນ “ເຮົາຈະແນະນຳພຣະຄຳພີມໍມອນໃຫ້ກັບບາງຄົນທີ່ບໍ່ເຄີຍໄດ້ຍິນກ່ຽວກັບມັນໄດ້ແນວໃດ?” ຫລື “ເຮົາຈະບັນຍາຍຄວາມຈຳເປັນທີ່ຈະຕ້ອງມີພຣະຜູ້ຊ່ວຍໃຫ້ລອດ ກັບບາງຄົນທີ່ບໍ່ໄດ້ເປັນຊາວຄຣິດແນວໃດ?”
ຊ່ວຍລູກຂອງທ່ານໃຫ້ຮູ້ສຶກສະບາຍໃຈເມື່ອເວົ້າລົມກັບຜູ້ຄົນ. ມີວິທີທີ່ດີຢ່າງໃດແດ່ໃນການເລີ່ມຕົ້ນສົນທະນາ? ຊຸກຍູ້ລູກຂອງທ່ານໃຫ້ຮຽນຮູ້ວິທີຮັບຟັງສິ່ງທີ່ຄົນອື່ນເວົ້າ, ເຂົ້າໃຈສິ່ງທີ່ຢູ່ໃນໃຈຂອງເຂົາເຈົ້າ, ແລະ ແບ່ງປັນຄວາມຈິງຂອງພຣະກິດຕິຄຸນ ທີ່ສາມາດເປັນພອນໃຫ້ແກ່ຊີວິດຂອງເຂົາເຈົ້າ.
ຊອກຫາໂອກາດໃຫ້ລູກຂອງທ່ານໄດ້ຮຽນຮູ້ກ່ຽວກັບວັດທະນະທຳ ແລະ ຄວາມເຊື່ອຂອງຄົນອື່ນ. ຊ່ວຍພວກເຂົາໃຫ້ຮັບຮູ້ ແລະ ນັບຖືຫລັກທຳທີ່ດີ ແລະ ຄວາມຈິງ ໃນຄວາມເຊື່ອຂອງຄົນອື່ນ.

ການຮັບເອົາພິທີການຜະນຶກ

ໃນພຣະວິຫານ, ສາມີ ແລະ ພັນລະຍາສາມາດແຕ່ງງານຊົ່ວນິລັນດອນ. ສິ່ງນີ້ເກີດຂຶ້ນໃນພິທີການທີ່ເອີ້ນວ່າ “ການຜະນຶກ.” ເຖິງແມ່ນວ່າພິທີການນີ້ອາດຈະບໍ່ເກີດຂຶ້ນເປັນເວລາຫລາຍປີສຳລັບລູກສາວ ຫລື ລູກຊາຍຂອງທ່ານ, ແຕ່ສິ່ງເລັກນ້ອຍ, ລຽບງ່າຍ, ແລະ ສະໝ່ຳສະເໝີ ທີ່ພວກທ່ານເຮັດນຳກັນລະຫວ່າງຫລາຍປີເຫລົ່ານັ້ນ ສາມາດຊ່ວຍພວກເຂົາໃຫ້ກະກຽມສຳລັບພອນທີ່ປະເສີດນີ້.

ອ່ານ “ຄອບຄົວ: ການປະກາດຕໍ່ໂລກ” (ຫ້ອງສະໝຸດພຣະກິດຕິຄຸນ) ນຳກັນ. ການປະກາດນີ້ສິດສອນຫຍັງແດ່ກ່ຽວກັບຄວາມສຸກໃນຊີວິດຄອບຄົວ ແລະ ກ່ຽວກັບການແຕ່ງງານທີ່ປະສົບຜົນສຳເລັດ? ພ້ອມກັບລູກ, ໃຫ້ເລືອກຫລັກທຳຂໍ້ໜຶ່ງຢູ່ໃນການປະກາດເພື່ອສຶກສາ. ພວກທ່ານສາມາດເປີດເບິ່ງຂໍ້ພຣະຄຳພີທີ່ກ່ຽວຂ້ອງກັບຫລັກທຳຂໍ້ນັ້ນ ຢູ່ໃນ ຄູ່ມືພຣະຄຳພີ. ພວກທ່ານກໍສາມາດຕັ້ງເປົ້າໝາຍເພື່ອນຳໃຊ້ຫລັກທຳຂໍ້ນັ້ນໃຫ້ເຕັມທີ່ຫລາຍຂຶ້ນໃນຄອບຄົວຂອງພວກທ່ານນຳອີກ. ຂະນະທີ່ພວກທ່ານພະຍາຍາມບັນລຸເປົ້າໝາຍຂອງພວກທ່ານ, ໃຫ້ສົນທະນານຳກັນວ່າ ຫລັກທຳຂໍ້ນັ້ນມີຜົນກະທົບຕໍ່ຊີວິດຄອບຄົວແນວໃດ.
ພ້ອມກັບລູກ, ໃຫ້ອ່ານຂ່າວສານຂອງປະທານ ດີເດີ ແອັຟ ອຸກດອບ “In Praise of Those Who Save” (Liahona, May 2016, 77–80). ເມື່ອພວກທ່ານອ່ານເຖິງພາກທີ່ມີຊື່ວ່າ “A Society of Disposables,” ພວກທ່ານອາດຊອກຫາບາງສິ່ງທີ່ສາມາດຖິ້ມໄປຫລັງຈາກໃຊ້ແລ້ວ ແລະ ບາງສິ່ງທີ່ບໍ່ສາມາດຖິ້ມ. ເວົ້າລົມກ່ຽວກັບວິທີທີ່ພວກທ່ານເຮັດກັບສິ່ງຂອງໃນທາງທີ່ແຕກຕ່າງກັນແນວໃດ ເມື່ອພວກທ່ານຢາກໃຫ້ມັນຍືນຍົງເປັນເວລາດົນນານ. ສິ່ງນີ້ແນະນຳຫຍັງແດ່ກ່ຽວກັບວິທີທີ່ເຮົາຄວນປະຕິບັດຕໍ່ຄວາມສຳພັນຂອງການແຕ່ງງານ ແລະ ຄອບຄົວ? ມີສິ່ງໃດແດ່ທີ່ເຮົາຮຽນຮູ້ຈາກຂ່າວສານຂອງປະທານອຸກດອບກ່ຽວກັບວິທີທີ່ພຣະຜູ້ຊ່ວຍໃຫ້ລອດສາມາດຊ່ວຍເຮົາໃຫ້ສ້າງການແຕ່ງງານ ແລະ ຄອບຄົວທີ່ເຂັ້ມແຂງ?
ເປີດໃຈກັບລູກຂອງທ່ານກ່ຽວກັບສິ່ງທີ່ທ່ານ ແລະ ຄູ່ຄອງຂອງທ່ານກຳລັງຮຽນຮູ້ກ່ຽວກັບການມີການແຕ່ງງານນິລັນດອນທີ່ມີພຣະຄຣິດເປັນສູນກາງ ແລະ ວິທີທີ່ທ່ານພະຍາຍາມປັບປຸງ. ຖ້າຫາກທ່ານກັບຄູ່ຄອງຂອງທ່ານໄດ້ຜະນຶກເຂົ້າກັນແລ້ວໃນພຣະວິຫານ, ຈົ່ງສະແດງໃຫ້ລູກຂອງພວກທ່ານເຫັນໂດຍຕົວຢ່າງຂອງການຮັກສາພັນທະສັນຍາຂອງພວກທ່ານ ແລະ ກັບພຣະຜູ້ເປັນເຈົ້າ. ບອກລູກຂອງພວກທ່ານເຖິງວິທີທີ່ພວກທ່ານພະຍາຍາມເຮັດໃຫ້ພຣະບິດາເທິງສະຫວັນ ແລະ ພຣະຜູ້ຊ່ວຍໃຫ້ລອດເປັນສູນກາງໃນຄວາມສຳພັນຂອງພວກທ່ານ ແລະ ເຖິງວິທີທີ່ພວກພຣະອົງຊ່ວຍທ່ານແນວໃດ (ເບິ່ງ Ulisses Soares, “In Partnership with the Lord,” Liahona, Nov. 2022, 42–45 ນຳອີກ).
ເມື່ອຄອບຄົວຕ້ອງໄດ້ຕັດສິນໃຈ, ໃຫ້ຈັດການປະຊຸມສະພາຄອບຄົວຂຶ້ນ ແລະ ສົນທະນາ. ໃຫ້ແນ່ໃຈວ່າ ຄວາມຄິດເຫັນຂອງສະມາຊິກໃນຄອບຄົວທຸກຄົນໄດ້ຖືກຮັບຟັງ ແລະ ຖືວ່າສຳຄັນ. ໃຊ້ການສົນທະນາເຫລົ່ານີ້ໃຫ້ເປັນໂອກາດເພື່ອສ້າງແບບແຜນການສື່ສານໃນທາງທີ່ດີ ແລະ ມີເມດຕາໃນຄວາມສຳພັນຂອງຄອບຄົວ, ແມ່ນແຕ່ໃນເວລາທີ່ທຸກຄົນບໍ່ເຫັນພ້ອມໃນທາງດຽວກັນ. (ເບິ່ງ M. Russell Ballard, “Family Councils,” Liahona, May 2016, 63–65.)
ເມື່ອມີການບໍ່ເຫັນດ້ວຍ ຫລື ການຂັດແຍ້ງໃນຄອບຄົວ, ໃຫ້ສະແດງຄວາມອົດທົນ ແລະ ຄວາມເຫັນອົກເຫັນໃຈ. ຊ່ວຍລູກຂອງທ່ານໃຫ້ເຫັນວ່າວິທີຈັດການກັບການຂັດແຍ້ງໃນທາງຂອງການເປັນເໝືອນດັ່ງພຣະຄຣິດ ສາມາດຊ່ວຍພວກເຂົາໃຫ້ກະກຽມສຳລັບການແຕ່ງງານທີ່ມີຄວາມສຸກໄດ້. ອ່ານ ຄຳສອນ ແລະ ພັນທະສັນຍາ 121:41–42, ນຳກັນ ແລະ ເວົ້າລົມກ່ຽວກັບວ່າ ຫລັກທຳໃນຂໍ້ເຫລົ່ານີ້ສາມາດເອົາໄປນຳໃຊ້ໃນການແຕ່ງງານແນວໃດ.