L ap kondui ou pa lamen, tablo Sandra Rast

24 Fevriye–1 Mas

2 Nefi 26–30

“Yon travay mèveye ak yon pwodij”

Senyè a te di: “M kòmande tout moun … pou yo ekri pawòl m pale ba yo” (2 Nefi 29:11). Pa lentèmedyè Lespri a, Senyè a ap pale avèk ou pandan w ap etidye pawòl li yo. Ekri sa w resevwa yo.

Ekri enpresyon ou

Nefi te ekri: “M ap pwofetize pou nou konsènan dènye jou yo” (2 Nefi 26:14). Otremandi, li t ap ekri konsènan epòk pa nou an. Epi, li te gen rezon pou l te enkyè pou sa l te wè: moun ki ap nye pouvwa ak mirak Bondye yo, lanvi ak lit k ap jeneralize, dyab la k ap mare moun yo anba gwo kòd. Men, akote “zèv tenèb” dènye jou sa yo (2 Nefi 26:10, 22) ki dirije pa advèsè a, Nefi te pale de “yon travay mèveye ak yon pwodij” ki dirije pa Senyè a limenm (2 Nefi 27:26). Epi, nan mitan travay sa a, t ap gen yon liv—yon liv pawòl li soti nan pousyè a, ki ekspoze mansonj Satan yo epi ki rasanble jis yo tankou yon etanda. Liv sa a se Liv Mòmon an, travay mèveye a se travay Legliz Senyè a ap fè nan dènye jou yo, epi pwodij la sèke l envite nou tout, malgre feblès nou, pou n vin patisipe ladan l.

Ide pou etid ekriti pèsonèl

2 Nefi 26:20–33

Jezikri envite tout moun pou vin jwenn ni.

Pwofèt Joseph Smith te anseye ke Pè Selès la pi “enfini nan mizèrikòd li ak benediksyon l, pase nou pare pou n kwè oubyen pou n resevwa yo” (The Joseph Smith Papers, “History, 1838–1856, volume D-1,” p. 4 [addenda], josephsmithpapers.org). Li sa Nefi te predi yo nan 2 Nefi 26:20–22 ak sa l te anseye sou Sovè a nan vèsè 23–33 yo, epi konpare sa avèk deklarasyon Joseph Smith la. Kisa w aprann sou mizèrikòd enfini Senyè a? Kisa w ka fè kòm manm Legliz Jezikri a pou w ka vin pi kretyen nan fason w ap trete pitit Bondye yo?

Gade 3 Nefi 18:30–32 tou.

2 Nefi 26–27

Kisa Liv Mòmon an mansyone nan chapit sa yo?

Pwofesi Nefi a nan 2 Nefi 26–27 la, ki grandman enspire pa yon ansyen pwofesi Ezayi (gade Ezayi 29), predi parisyon Liv Mòmon an. Pwofesi sa a dekri bagay sa a:

• Pawòl posterite Leyi yo (desandan l yo) ap soti “tou ba nan pousyè tè a” avèk yon “espri familye” epi yo pral “sele nan yon liv” (2 Nefi 26:14–17; gade Ezayi 29:4) tou.

• Y ap pote yon pati nan liv la bay yon mesye save k ap di: “M pa ka li l” (2 Nefi 27:15–20; Joseph Smith—Istwa 1:64–65; gade Ezayi 29:11) tou.

Anplis Ezayi, gen lòt pwofèt nan Bib la ki fè alizyon a Liv Mòmon an tou, malgre yo pa mansyone l pa non li. Paregzanp, Ezekyèl 37:15–20 pale de yon “bwa Joseph,” ki ka petèt fè alizyon a rejis Nefit yo, ki sete desandan Joseph. Rejis sa a t ap vin mete avèk “bwa Jida” a, ki vle di Bib la.

Gen lòt egzanp nou ka jwenn nan Gid Ekriti yo, “Liv Mòmon” (scriptures.ChurchofJesusChrist.org).

2 Nefi 28

Satan ap eseye twonpe nou.

Yo ekspoze anpil nan mansonj ak taktik Satan yo nan deskripsyon Nefi fè konsènan dènye jou yo nan 2 Nefi 28. Gade si w ka jwenn yo (paregzanp, gade vèsè 6, 8, 21–23, 29). Poukisa nou dwe konn mansonj Satan yo? Kisa w ap fè lè advèsè a ap eseye twonpe w?

2 Nefi 28:27–31; 29

Bondye kontinye bay revelasyon pou gide pitit li yo.

Antanke Sen Dènye Jou, nou gen benediksyon pou n gen pawòl Bondye a an abondans, konsa, avètisman Nefi a ka aplike pou nou tou: nou pa dwe janm santi ke “nou gen ase!” Pandan w ap li avètisman yo nan 2 Nefi 28 ak 29, medite sou kesyon tankou sa yo:

• Kisa Senyè a vle m santi osijè pawòl li a e ki fason l vle m reyaji?

• Poukisa moun yo konn pafwa “fache” poutèt y ap resevwa plis verite nan men Bondye? (2 Nefi 28:28). Èske m konn janm santi m fason sa a? Si wi, kijan m ka vin pi reseptif pou verite a?

• Kisa sa vle di resevwa pawòl Bondye a? Kijan m ka montre l ke m vle resevwa plis nan pawòl li yo?

Gade Alma 12:10–11; 3 Nefi 26:6–10.

2 Nefi 29–30

Bondye te prepare Liv Mòmon an pou epòk pa nou an?

Anvan menm Liv Mòmon an te ekri, Nefi te konnen pa revelasyon ke, yon jou t ap rive kote l ta pral “gen anpil valè pou pitit lèzòm” (2 Nefi 28:2). Poukisa Liv Mòmon an gen gwo valè pou ou? Panse sou kesyon sa a pandan w ap li 2 Nefi 29–30. Ki kèk bagay “mèveye” Bondye akonpli nan mond lan ak nan lavi ou pa mwayen Liv Mòmon an?

Ide pou etid ekriti familyal ak sware familyal

Pandan w ap li ekriti yo avèk fanmi ou, Lespri a ka ede w konn ki prensip pou w souliyen ak diskite pou ka reponn bezwen manm fanmi w yo. Men kèk ide.

2 Nefi 26:12–13

Nefi te anseye ke Jezikri t ap manifeste tèt li atravè Sentespri a. Ki eksperyans manm fanmi w ta pataje youn ak lòt sou moman kote temwayaj yo konsènan Sovè a te fòtifye pa Sentespri a?

2 Nefi 26:22; 28:19–22

Petèt fanmi w ta ka renmen yon leson objè ki ilistre sa 2 Nefi 26:22 a anseye osijè dyab la. Pandan w ap li taktik Satan yo nan 2 Nefi 28:19–22 la, ou ka mare yon fil nan ponyèt yon moun pou reprezante “yon kòd len fen.” Kijan yon kòd len fen ka konpare avèk tantasyon Satan yo? Kijan l ka vin tounen yon kòd solid? Kijan nou ka detekte mansonj Satan yo?

Nefi te konpare tantaton dyab la avèk “yon kòd len fen.”

2 Nefi 27:20–21

Kisa Senyè a siman te anvi di nou lè l te deklare: “M kapab fè travay mwen” an? Kijan verite sa a enfliyanse fason nou sèvi nan Legliz li a?

2 Nefi 28:30–31

Èske fanmi w ka panse ak yon bagay ki, tankou revelasyon nan men Bondye, pi bon lè nou resevwa l ti kal pa ti kal? Poukisa Bondye revele nou verite “liy sou liy, presèp apre presèp, yon ti kras isit, yon ti kras lòtbò” olye revele l yon sèl kou?

2 Nefi 29:7–9

Kisa Senyè a gen entansyon pou l pwouve oubyen montre pa mwayen Liv Mòmon an?

Pou plis ide pou anseye timoun yo, gade plan leson semèn sa a nan Vini, Suiv Mwen—Pou Primè a.

Amelyore etid pèsonèl nou

Pataje ide. Pale avèk lòt moun sou fason sa w aprann yo ka fòtifye konpreyansyon ou. Lè w fin li 2 Nefi 29:6–14, ou gen dwa santi w pouse pou w eksplike yon zanmi rezon k fè nou bezwen Liv Mòmon an.

Ekri Nefi yo te predi “yon travay mèveye ak yon pwodij” ki t apral fèt nan dènye jou yo (2 Nefi 27:26).