« ថ្ងៃទី ២០–២៦ ខែ កក្កដា ។ អាលម៉ា ៣៦–៣៨ ៖ ‹ មើលទៅព្រះ ហើយរស់នៅ › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )
« ថ្ងៃទី ២០–២៦ ខែ កក្កដា ។ អាលម៉ា ៣៦–៣៨ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២០
រចនារូបភាពដោយ យ៉ូស្វេ ដេននីស
ថ្ងៃទី ២០–២៦ ខែ កក្កដា
អាលម៉ា ៣៦:៣៨
« មើលទៅព្រះ ហើយរស់នៅ »
« នៅពេលអ្នកដឹងអំពីអំណរដែលកើតមានមកពីការយល់ដឹងដំណឹងល្អ នោះអ្នកនឹងចង់អនុវត្តនូវអ្វីដែលអ្នកបានរៀននោះ » ( ប្រកាសដំណឹងល្អទ្រង់ [ ឆ្នាំ ២០០៤ ] ទំព័រ ១៩) ។ សូមកត់ត្រាគំនិត និងចំណាប់អារម្មណ៍របស់អ្នកអំពីរបៀបដើម្បីអនុវត្តសេចក្ដីពិតដែលបងប្អូនកំពុងរៀន ។
កត់ត្រាចំណាប់អារម្មណ៍របស់បងប្អូន
នៅពេលអាលម៉ាមើលឃើញសេចក្ដីទុច្ចរិតមាននៅជុំវិញលោក លោកមានអារម្មណ៍ « សោកសៅ » « សេចក្ដីវេទនា » « សេចក្ដីគ្រាំគ្រាក្នុងចិត្ត » យ៉ាងខ្លាំង ( អាលម៉ា ៨:១៤ ) ។ លោកមានប្រសាសន៍អំពីពួកសាសន៍សូរាំថា « អំពើទុច្ចរិតបែបនេះដែលនៅក្នុងចំណោមប្រជាជននេះ » « ធ្វើឲ្យឈឺចាប់ក្នុងព្រលឹងរបស់ទូលបង្គំ » ( អាលម៉ា ៣១:៣០ ) ។ លោកមានអារម្មណ៍ស្រដៀងគ្នានេះបន្ទាប់ពីត្រឡប់មកពីបេសកកម្មរបស់លោកទៅពួកសាសន៍សូរាំវិញ—លោកបានសង្កេតឃើញថា « ចិត្តរបស់ប្រជាជនបានចាប់ផ្ដើមរឹងរូស ហើយថា ពួកគេបានចាប់ផ្ដើមអាក់អន់ចិត្ត ដោយព្រោះភាពតឹងរឹងនៃព្រះបន្ទូល » ហើយរឿងនេះធ្វើឲ្យដួងចិត្តរបស់លោក « មានការសោកសៅជាខ្លាំង » ( អាលម៉ា ៣៥:១៥ ) ។ តើអាលម៉ាបានធ្វើអ្វីខ្លះ អំពីអ្វីដែលលោកបានឃើញ និងទទួលអារម្មណ៍ ? លោកពុំគ្រាន់តែមានការបាក់ទឹកចិត្ត ឬ ចំអកអំពីស្ថានភាពនៃពិភពលោកនោះទេ ។ តែ « លោកបានចាត់ឲ្យកូនប្រុសៗរបស់លោកមកប្រជុំគ្នា » ហើយបានបង្រៀនពួកគេនូវ « ការណ៍ទាំងឡាយដែលទាក់ទងនឹងសេចក្ដីសុចរិត » ( អាលម៉ា ៣៥:១៦ ) ។ ដូចអាលម៉ាបានថ្លែងទីបន្ទាល់ថា « គ្មានផ្លូវ ឬមធ្យោបាយឯណាផ្សេងទៀតទេ ដែលនាំឲ្យមនុស្សបានសង្គ្រោះ មានតែដោយ និងតាមរយៈព្រះគ្រីស្ទមួយប៉ុណ្ណោះ ។… មើលចុះ ទ្រង់គឺជាព្រះបន្ទូលនៃសេចក្ដីពិត និងសេចក្ដីសុចរិត » ( អាលម៉ា ៣៨:៩ ) ។
គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន
ខ្ញុំអាចកើតមកពីព្រះ នៅពេលខ្ញុំបន្ទាបខ្លួន ហើយប្រែចិត្ត ។
មនុស្សមួយចំនួនតូច នឹងជួបបទពិសោធន៍ដ៏សោកនាដកម្មដូចជាការផ្លាស់ប្រែចិត្តជឿរបស់អាលម៉ាផងដែរ ។ ប៉ុន្តែមានគោលការណ៍ជាច្រើននៅក្នុងបទពិសោធន៍របស់លោក ដែលយើងទាំងអស់គ្នាអាចរៀន និងអនុវត្ត ដោយសារមនុស្សគ្រប់រូបត្រូវតែ « កើតមកពីព្រះ » ( អាលម៉ា ៣៦:២៣ ) ។ នៅពេលបងប្អូនអាន អាលម៉ា ៣៦ សូមរកមើលគោលការណ៍ ដែលបងប្អូនអាចអនុវត្ត ។ ឧទាហរណ៍ តើមនុស្សម្នាក់ដែលបានកើតមកពីព្រះមានអារម្មណ៍យ៉ាងណាអំពីអំពើបាប ? អំពីព្រះយេស៊ូវគ្រីស្ទ ? បងប្អូនក៏អាចរកមើលការផ្លាស់ប្ដូរនានាដែលបងប្អូនអាចនឹងរំពឹងទុក ដើម្បីមើលឃើញពីសេចក្ដីជំនឿ និងសកម្មភាពរបស់មនុស្ស ដែលបានកើតមកពីព្រះ ។
សូមមើលផងដែរ ម៉ូសាយ ៥:៧; ២៧:២៥–២៦; អាលម៉ា ៥:១៤; ២២:១៥; ហេលេមិន ៣:៣៥; « Conversion » ប្រធានបទដំណឹងល្អ (Gospel Topics) គេហទំព័រ topics.ChurchofJesusChrist.org ។
ព្រះយេស៊ូវគ្រីស្ទបានធ្វើដង្វាយធួនសម្រាប់អំពើបាបនៃពិភពលោក ។
បងប្អូនអាចកត់សម្គាល់ឃើញនូវដំណើររឿងដដែលៗមួយចំនួនរបស់អាលម៉ាអំពីការផ្លាស់ប្រែចិត្តជឿរបស់លោកនៅក្នុងជំពូកនេះ ។ រឿងនោះ គឺដោយសារតែ អាលម៉ា ៣៦ គឺជាគំរូដ៏អស្ចារ្យមួយនៃទម្រង់កំណាព្យហេព្រើរ ដែលហៅថា chiasmus ដែលពាក្យសម្ដី ឬគំនិត ត្រូវបានបង្ហាញតាមលំដាប់ជាក់លាក់មួយ ដែលដឹកនាំទៅរកគំនិតសំខាន់មួយ បន្ទាប់មកថ្លែងដដែលតាមលំដាប់បញ្ច្រាស់ ។ នៅក្នុង អាលម៉ា ៣៦ គំនិតនៅក្នុង ខ ៣ ត្រូវបានថ្លែងដដែលនៅក្នុង ខ ២៧ គំនិតនៅក្នុង ខ ៥ ត្រូវបានថ្លែងដដែលនៅក្នុង ខ ២៦ ជាដើម ។ គំនិតសំខាន់គឺជាសារលិខិតសំខាន់បំផុតនៃ chiasmus ។ ចាំមើល បើសិនជាបងប្អូនរកឃើញគំនិតសំខាន់នៅក្នុង ខ ១៧–១៨ ។ សូមកត់សម្គាល់អំពីរបៀបដែល « ការតោងជាប់នូវគំនិតនេះ » បានជះឥទ្ធិពលដល់អាលម៉ា ហើយផ្លាស់ប្រែជីវិតរបស់លោក ។ តើសេចក្ដីពិតនេះបានជះឥទ្ធិពលលើបងប្អូនយ៉ាងដូចម្ដេច ? តើគំនិតដដែលៗផ្សេងទៀត ដែលបងប្អូនរកឃើញនៅក្នុងវគ្គបទគម្ពីរនេះមានអ្វីខ្លះ ?
តើដំណើររឿងអំពីការប្រែចិត្ត និងការអភ័យទោសនេះ បំផុសគំនិតបងប្អូនឲ្យធ្វើតាមគំរូរបស់អាលម៉ា ហើយងាកទៅរកព្រះអម្ចាស់យ៉ាងដូចម្ដេច ?
សម្រាប់ព័ត៌មានបន្ថែមអំពី chiasmus សូមមើល សៀវភៅសិក្សាអំពីព្រះគម្ពីរមរមន សម្រាប់សិស្ស ( សៀវភៅសិក្សាប្រព័ន្ធអប់រំសាសនាចក្រ [ ឆ្នាំ ២០០៩ ] ទំព័រ ២៣២–៣៣ ) ។
បទគម្ពីរទាំងឡាយត្រូវបានរក្សាទុក « សម្រាប់គោលបំណងដ៏ឆ្លាតវៃ » ។
តើបងប្អូនធ្លាប់គិតអំពីអព្ភូតហេតុ និងពរជ័យមួយ កើតមានដោយសារតែមានបទគម្ពីរនាសព្វថ្ងៃនេះឬទេ ? ព្រះបាន « ទុកដាក់លើ [ យើង ] នូវវត្ថុទាំងនេះ ដែលពិសិដ្ឋ » ( អាលម៉ា ៣៧:១៤ ) ។ នៅពេលបងប្អូនអាន អាលម៉ា ៣៧ សូមស្វែងរកពរជ័យដែលកើតមានមកពីការមានបទគម្ពីរ ។ តើបងប្អូនធ្លាប់មានបទពិសោធន៍ពីពរជ័យទាំងនេះតាមរបៀបណា ? តើយើងអាចប្រើបទគម្ពីរដើម្បីជួយ « បង្ហាញព្រះចេស្ដាររបស់ [ ព្រះ ] ដល់ពួកជំនាន់ក្រោយ » តាមរបៀបណា ?? (អាលម៉ា ៣៧:១៨ ) ។
នៅក្នុង អាលម៉ា ៣៧:៣៨–៤៧ អាលម៉ា ប្រៀបធៀប « ព្រះបន្ទូលនៃព្រះគ្រីស្ទ » ទៅនឹងលីអាហូណា ។ នៅពេលបងប្អូនពិចារណាអំពីការប្រៀបធៀបនេះ សូមនឹកគិតអំពីរបៀបដែលបងប្អូនមានបទពិសោធន៍អំពីអព្ភូតហេតុ និងព្រះចេស្ដានៃការបង្រៀនរបស់ព្រះគ្រីស្ទ « ពីមួយថ្ងៃទៅមួយថ្ងៃ » ( អាលម៉ា ៣៧:៤០ ) ។
សូមមើលផងដែរ ឌី ថត គ្រីស្តូហ្វឺសិន « The Blessing of Scripture » Ensign ឬ Liahona ខែ ឧសភា ឆ្នាំ ២០១០ ទំព័រ ៣២–៣៥ ។
ព្រះគម្ពីរបង្រៀនយើងពីរបៀបធ្វើតាមព្រះ ។
« តាមរយៈកិច្ចការតូចតាច និងងាយទើបនាំឲ្យកើតកិច្ចការដ៏ធំៗបាន » ។
ពេលខ្លះយើងអាចមានអារម្មណ៍ដូចជាបញ្ហារបស់យើងគឺធំធេងខ្លាំងណាស់ ហើយស្មុគស្មាញ ដែលដំណោះស្រាយត្រូវតែធំធេង និងស្មុគស្មាញដូចគ្នាផងដែរ ។ ប៉ុន្តែពីមួយគ្រាទៅមួយគ្រា ព្រះអម្ចាស់បានជ្រើសរើសប្រើ « កិច្ចការតូចតាច ហើយងាយ » ( អាលម៉ា ៣៧:៦ ) ដើម្បីសម្រេចកិច្ចការរបស់ទ្រង់ ហើយប្រទានពរដល់ជីវិតកូនចៅរបស់ទ្រង់ ។ នៅពេលបងប្អូនអាន អាលម៉ា ៣៧:៦–៧ សូមពិចារណា ហើយកត់ត្រាអំពីរបៀបដែលបងប្អូនបានឃើញគោលការណ៍នេះមាននៅក្នុងជីវិតរបស់បងប្អូន ។ តើកិច្ចការតូច ហើយងាយមួយចំនួនណាខ្លះ ដែលព្រះអម្ចាស់បានប្រើដើម្បីប្រទានពរ និងសម្រេចកិច្ចការរបស់ទ្រង់ ?
សូមមើលផងដែរ អាលម៉ា ៣៧:៤១–៤៦ ដាល្លិន អេក អូក « Small and Simple Things » Ensign ឬ Liahona ខែ ឧសភា ឆ្នាំ ២០១៨, ទំព័រ ៨៩–៩២ ។
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ
នៅពេលបងប្អូនអានគម្ពីរជាមួយនឹងគ្រួសាររបស់បងប្អូន នោះព្រះវិញ្ញាណអាចជួយបងប្អូនឲ្យស្គាល់ថាគោលការណ៍អ្វីដែលត្រូវគូសបញ្ជាក់ និងពិភាក្សាដើម្បីបំពេញតាមតម្រូវការរបស់គ្រួសារបងប្អូន ។ ទាំងនេះគឺជាគំនិតយោបល់មួយចំនួន ។
អាលម៉ា ៣៦:៥–២៦
ទោះជាបទពិសោធន៍របស់អាលម៉ាមានភាពអស្ចារ្យក្ដី ក៏ការផ្លាស់ប្រែចិត្តជឿរបស់លោកបង្ហាញអំពីគោលការណ៍ជាច្រើនដែលអនុវត្តនៅក្នុងជីវិតរបស់យើងទាំងអស់គ្នាផងដែរ ។ សូមអញ្ជើញសមាជិកគ្រួសារម្នាក់ៗឲ្យជ្រើសរើសខមួយមកពី អាលម៉ា ៣៦:៥–២៦ ដែលបង្រៀនអំពីការ « កើតមកអំពីព្រះ » ។ តើយើងអាចរៀនអ្វីខ្លះមកពីខគម្ពីរទាំងនេះ ? ប្រហែលជាមានសមាជិកគ្រួសារអាចចែកចាយអំពីរបៀបដែលពួកគេបានអនុវត្តគោលការណ៍ទាំងឡាយដែលអាលម៉ាបានពិពណ៌នា ។
អាលម៉ា ៣៦:១៨–២១, ២៤
តើយើងអាចប្រើប្រាស់ខគម្ពីរទាំងនេះដើម្បីជួយនរណាម្នាក់ដើម្បីមើលឃើញថា ការប្រែចិត្តគឺជាបទពិសោធន៍ដ៏មានអំណរមួយ ពុំមែនគួរឲ្យខ្លាចយ៉ាងដូចម្ដេចដែរ ? តើការប្រែចិត្តអាចបំផុសគំនិតយើងឲ្យចែកចាយដំណឹងល្អជាមួយអ្នកដទៃតាមរបៀបណា ?
អាលម៉ា ៣៧:៦–៧, ៣៨–៤៦
តើ « កិច្ចការតូចតាច ហើយងាយ » ( អាលម៉ា ៣៧:៦ ) នាំឲ្យកើតមានកិច្ចការធំៗនៅក្នុងជីវិតរបស់យើងយ៉ាងណាខ្លះ ? តើព្រះបន្ទូលនៃព្រះប្រៀបដូចជាលីអាហូណាតាមរបៀបណា ? តើយើងអាចជួយគ្នាទៅវិញទៅមកសិក្សាព្រះគម្ពីរកាន់តែដោយឧស្សាហ៍ព្យាយាមដោយរបៀបណា ?
អាលម៉ា ៣៧:៣៥
តើហេតុអ្វីបានជាវាគឺជារឿងឆ្លាតវៃដើម្បីរៀនរក្សាបទបញ្ញត្តិទាំងឡាយខណៈដែល « យើងនៅជាយុវវ័យ » ?
អាលម៉ា ៣៨:១២
តើគ្រួសាររបស់អ្នកស្គាល់ថាទប់ [ បង្ហៀរ ] ជាអ្វីទេ ? ប្រហែលជាបងប្អូនអាចបង្ហាញរូបភាពអំពីបង្ហៀរសេះ ហើយនិយាយអំពីរបៀបដែលវាប្រើមកគ្រប់គ្រងសត្វពានៈ ។ តើការ « ទប់អស់ទាំងតណ្ហា [ របស់យើង ] » មានន័យយ៉ាងណា ? តើការទប់អស់ទាំងតណ្ហារបស់យើងជួយយើងឲ្យ « បានពោរពេញទៅដោយសេចក្ដីស្រឡាញ់ » ដោយរបៀបណា ?
សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់ថ្នាក់បឋមសិក្សា ។
ការកែលម្អដល់ការសិក្សាផ្ទាល់ខ្លួន
សូមកត់ត្រាចំណាប់អារម្មណ៍នានា ។ នៅពេលអ្នកកត់ត្រាចំណាប់អារម្មណ៍ខាងវិញ្ញាណ នោះអ្នកបង្ហាញព្រះអម្ចាស់ថាអ្នកឲ្យតម្លៃទៅលើការដឹកនាំរបស់ទ្រង់ ហើយទ្រង់នឹងប្រទានពរអ្នកនូវវិវរណៈកាន់តែញឹកញាប់ ។ នៅពេលបងប្អូនសិក្សា សូមកត់ត្រាគំនិតរបស់អ្នកទុក ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ១២, ៣០ ) ។
ទេវតាលេចមកឯអាលម៉ា និង ពួកបុត្រារបស់ម៉ូសាយ ដោយ ក្លាក ខេលី ប្រាយ