« ថ្ងៃទី ២៦ ខែ មេសា–ថ្ងៃទី ២ ខែ ឧសភា ។ គោលលទ្ធិ និង សេចក្ដីសញ្ញា ៤៥៖ ‹ សេចក្ដីសន្យាទាំងប៉ុន្មាន … នឹងត្រូវបានសម្រេច › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរគោលលទ្ធិ និង សេចក្ដីសញ្ញា ឆ្នាំ ២០២១ ( ឆ្នាំ ២០២០ )

« ថ្ងៃទី ២៦ ខែ មេសា–ថ្ងៃទី ២ ខែ ឧសភា ។ គោលលទ្ធិ និង សេចក្ដីសញ្ញា ៤៥ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២១

រូបភាព

យុវវ័យនៅក្រៅព្រះវិហារបរិសុទ្ធ

ថ្ងៃទី ២៦ ខែ មេសា–ថ្ងៃទី ២ ខែ ឧសភា

គោលលទ្ធិ និង សេចក្តីសញ្ញា ៤៥

« សេចក្ដីសន្យាទាំងប៉ុន្មាន … នឹងត្រូវបានសម្រេច »

ប្រធាន រ័សុល អិម ណិលសុន បានបង្រៀន ៖ « សូមសរសេរគំនិតដែលកើតមានក្នុងគំនិតរបស់បងប្អូន ។ សូមកត់ត្រាអារម្មណ៍របស់បងប្អូន ហើយធ្វើសកម្មភាពតាមអ្វីដែលបងប្អូនត្រូវបានបំផុសគំនិតឲ្យធ្វើ » ( « វិវរណៈសម្រាប់សាសនាចក្រ វិវរណៈសម្រាប់ជីវិតរបស់យើង » Ensign ឬ Liahona ខែ ឧសភា ឆ្នាំ ២០១៨ ទំព័រ ៩៥ ) ។

កត់ត្រាចំណាប់អារម្មណ៍របស់បងប្អូន

យើងរស់នៅក្នុងជំនាន់ប្រកបដោយគ្រោះថ្នាក់ ហើយការណ៍នោះអាចបង្កជាបញ្ហា ។ សូម្បីតែសិស្សរបស់ព្រះយេស៊ូវក៏ « មានចិត្តថប់បារម្ភ » ដែរ នៅពេលពួកគេបានឮទ្រង់ព្យាករអំពីចលាចល ដែលនឹងកើតឡើងនៅជំនាន់យើង ( គោលលទ្ធិ និង សេចក្ដីសញ្ញា ៤៥:៣៤ ) ។ ពួកបរិសុទ្ធជំនាន់ដើមនៅទីក្រុងខឺតឡង់ រដ្ឋអូហៃអូ ក៏ជួបបញ្ហាក្នុងជំនាន់គ្រោះថ្នាក់ កាលពួកគេបានរស់នៅដែរ ។ ក្នុងចំណោមរឿងផ្សេងទៀត មាន « សេចក្ដីរាយការណ៍ក្លែងក្លាយ … និងរឿងរ៉ាវឥតប្រយោជន៍ជាច្រើន » ដែលធ្វើឲ្យសារលិខិតដំណឹងល្អអន្ដរាយ ( គោលលទ្ធិ និង សេចក្តីសញ្ញា ៤៥ ក្បាលកណ្ឌ ) ។ ប៉ុន្ដែចម្លើយរបស់ព្រះអម្ចាស់ នាពេលនោះ និងពេលនេះគឺថា « ចូរកុំឲ្យមានចិត្តថប់បារម្ភឡើយ » ( ខទី ៣៥ ) ។ មែនហើយ មានអំពើទុច្ចរិត ប៉ុន្ដែវាក៏មានភស្តុតាងបញ្ជាក់ថា ព្រះកំពុងពន្លឿនកិច្ចការរបស់ទ្រង់ដែរ ។ មែនហើយ មានគ្រោះថ្នាក់ដែលបានព្យាករថានឹងកើតឡើងពីមុនការយាងមកជាលើកទីពីរ ហើយយើងគួរតែដឹងពីការព្យាករនោះ ។ ប៉ុន្ដែវាពុំមែនគ្រាន់តែជាការព្រមានអំពីគ្រោះថ្នាក់ប៉ុណ្ណោះទេ វាក៏ជាទីសម្គាល់ថា សេចក្ដីសន្យាទាំងប៉ុន្មានរបស់ព្រះហៀបនឹងត្រូវបានសម្រេចហើយដែរ ។ ប្រហែលនេះហើយគឺជាមូលហេតុដែល គោលលទ្ធិ និង សេចក្ដីសញ្ញា ៤៥—វិវរណៈដែលពិពណ៌នាពីទីសម្គាល់ទាំងនេះជាច្រើនយ៉ាងលម្អិត—ត្រូវបានទទួលទុក « ជាសេចក្ដីអំណរដល់ពួកបរិសុទ្ធ » ( ក្បាលកណ្ឌ ) ។

រូបភាព

រូបសញ្ញាការសិក្សាផ្ទាល់ខ្លួន

គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន

គោលលទ្ធិ និង សេចក្ដីសញ្ញា ៤៥:១–៥

ព្រះយេស៊ូវគ្រីស្ទគឺជាអ្នកគាំទ្ររបស់យើងជាមួយព្រះវរបិតា ។

តើបងប្អូនធ្លាប់មានអារម្មណ៍ថាមិនគ្រប់គ្រាន់ ឬមិនស័ក្ដិសមនៅចំពោះព្រះដែរឬទេ ? បងប្អូនអាចរកឃើញការធានាអះអាងជាថ្មីនៅក្នុង គោលលទ្ធិ និង សេចក្តីសញ្ញា ៤៥:១–៥ ។ តើពាក្យដូចជា « អ្នកគាំទ្រ » និង « អង្វរ » មានន័យយ៉ាងណាចំពោះបងប្អូន ? តើព្រះអង្គសង្គ្រោះគាំទ្របងប្អូន ឬអង្វរជំនួសបងប្អូនតាមរបៀបណា ? តើវាមានន័យយ៉ាងណាចំពោះបងប្អូន ពេលដឹងថា ព្រះគ្រីស្ទគឺជាអ្នកគាំទ្ររបស់បងប្អូន ?

ពាក្យសម្ដីដូចតទៅនេះដែលមកពីប្រធាន យ៉ូសែប ស្ម៊ីធ អាចជួយបងប្អូនឲ្យសញ្ជឹងគិតពីខគម្ពីរទាំងនេះ ៖ « ព្រះយេស៊ូវ [ គឺជា ] អ្នកគាំទ្រយើង ដែលបានអង្វរជំនួសយើង ធ្វើជាអ្នកសង្រួបសង្រួមរបស់យើងពេញទាំងការងារបម្រើ និងកិច្ចការរបស់ទ្រង់ដើម្បីផ្សះផ្សារយើង នាំយើងឲ្យចុះចូលនឹងព្រះ » ( នៅក្នុង របាយការណ៍សន្និសីទ ខែ តុលា ឆ្នាំ ១៩៥៣ ទំព័រ ៥៨ ) ។

សូមមើលផងដែរ នីហ្វៃទី២ ២:៨–៩; ម៉ូសាយ ១៥:៧–៩; មរ៉ូណៃ ៧:២៧–២៨; គោលលទ្ធិ និង សេចក្ដីសញ្ញា ២៩:៥; ៦២:១ ។

គោលលទ្ធិ និង សេចក្ដីសញ្ញា ៤៥:៩–១០

ដំណឹងល្អគឺជាបទដ្ឋានមួយចំពោះជាតិសាសន៍ទាំងឡាយ ។

កាលពីបុរាណ បទដ្ឋានគឺជាស្លាក ឬទង់ដែលគេយកទៅពេលធ្វើចម្បាំង ។ វាប្រមូល និងបង្រួបបង្រួមទាហាន ហើយជួយពួកគេឲ្យដឹងពីកន្លែងដែលត្រូវប្រជុំគ្នា និងអ្វីដែលត្រូវធ្វើ ។ បទដ្ឋានក៏ជាឧទាហរណ៍ ឬច្បាប់មួយដែលអាចវាស់ស្ទង់អ្វីផ្សេងទៀតផងដែរ ។ នៅពេលបងប្អូនអាន គោលលទ្ធិ និង សេចក្តីសញ្ញា ៤៥:៩–១០ សូមពិចារណាពីរបៀបដែលសេចក្ដីសញ្ញានៃដំណឹងល្អគឺជាបទដ្ឋានសម្រាប់បងប្អូន ។ តើជីវិតរបស់បងប្អូននឹងខុសប្លែកយ៉ាងដូចម្ដេច បើបងប្អូនមិនមានសេចក្ដីសញ្ញាទាំងនេះទេនោះ ?

សូមមើលផងដែរ អេសាយ ៥:២៦; ១១:១០–១២; គោលលទ្ធិ និង សេចក្ដីសញ្ញា ១១៥:៥–៦ ។

គោលលទ្ធិ និង សេចក្ដីសញ្ញា ៤៥:១១–៧៥

សេចក្ដីសន្យារបស់ព្រះអម្ចាស់នឹងត្រូវបានសម្រេច ។

សង្គ្រាម អំពើទុច្ចរិត និងការបំផ្លាញនឹងកើតមានពីមុនការយាងមកជាលើកទីពីររបស់ព្រះអង្គសង្គ្រោះ ។ ប៉ុន្ដែព្រះអម្ចាស់បានមានបន្ទូលថា « ចូរកុំឲ្យមានចិត្តថប់បារម្ភឡើយ ដ្បិតកាលណាការណ៍ទាំងនេះនឹងកើតឡើង នោះអ្នករាល់គ្នានឹងបានដឹងថា សេចក្ដីសន្យាទាំងប៉ុន្មាន ដែលបានធ្វើដល់អ្នក នោះនឹងត្រូវបានសម្រេចហើយ » ( គោលលទ្ធិ និង សេចក្ដីសញ្ញា ៤៥:៣៥ ) ។

នៅពេលបងប្អូនសិក្សា គោលលទ្ធិ និង សេចក្ដីសញ្ញា ៤៥:១១–៧៥ សូមកុំផ្ដោតតែលើព្រឹត្តិការណ៍អំពល់ ដែលបានព្យាករទុកឡើយ ប៉ុន្ដែក៏ត្រូវផ្ដោតលើពរជ័យទាំងឡាយ ដែលព្រះអម្ចាស់សន្យា ( ឧទាហរណ៍ សេចក្ដីសន្យានៅក្នុង ខទី ៥៤–៥៩ អំពីការសោយរាជ្យមួយពាន់ឆ្នាំរបស់ព្រះអង្គសង្គ្រោះ ) ។ បងប្អូនអាចធ្វើការណ៍នេះបាន តាមរយៈការបង្កើតបញ្ជី ឬដោយការសរសេរ ឬគូសចំណាំខគម្ពីរទាំងនេះ ។ តើបងប្អូនរកឃើញអ្វីខ្លះ ដែលជួយបងប្អូន « កុំឲ្យមានចិត្តថប់បារម្ភ » អំពីថ្ងៃចុងក្រោយ ?

គោលលទ្ធិ និង សេចក្ដីសញ្ញា ៤៥:៣១–៣២, ៥៦–៥៧

« ឈរនៅក្នុងទីបរិសុទ្ធទាំងឡាយ » ហើយនឹងពុំរើឡើយ ។

មូលហេតុមួយដែលព្រះអង្គសង្គ្រោះ និងព្យាការីរបស់ទ្រង់បង្រៀនយើងអំពីទីសម្គាល់នៃការយាងមកលើកទីពីរ គឺដើម្បីជួយយើងឲ្យរៀបចំខ្លួន ។ តើបងប្អូនរៀនបានអ្វីខ្លះមកពី គោលលទ្ធិ និង សេចក្ដីសញ្ញា ៤៥:៣១–៣២, ៥៦–៥៧ អំពីការរៀបចំខ្លួនសម្រាប់ការយាងមកលើកទីពីររបស់ព្រះអម្ចាស់ ? វាអាចមានប្រយោជន៍ ដើម្បីរំឭករឿងប្រៀបប្រដូចក្រមុំព្រហ្មចារីយទាំងដប់នាក់ ដែលមាននៅក្នុង ម៉ាថាយ ២៥:១–១៣ ។ ព្រះអង្គសង្គ្រោះបានប្រៀបធៀបប្រេងនៅក្នុងរឿងប្រៀបប្រដូចនេះទៅនឹងសេចក្ដីពិត ហើយទៅនឹងព្រះវិញ្ញាណបរិសុទ្ធ ( សូមមើល គោលលទ្ធិ និង សេចក្ដីសញ្ញា ៤៥:៥៧ ) ។ តើបងប្អូនទទួលបានការយល់ដឹងអ្វីខ្លះ នៅពេលបងប្អូនអានរឿងប្រៀបប្រដូចនេះតាមរបៀបដូច្នេះ ?

រឿងប្រៀបប្រដូចពីស្ត្រីព្រហ្មចារីយដប់នាក់ ដោយ ដេន ប័រ

គោលលទ្ធិ និង សេចក្ដីសញ្ញា ៤៥:១១–១៥, ៦៦–៧១

ស៊ីយ៉ូនគឺជាកន្លែងដែលមានសុវត្ថិភាពសម្រាប់ពួកបរិសុទ្ធរបស់ព្រះ ។

ពួកបរិសុទ្ធនៅជំនាន់របស់យ៉ូសែប ស្ម៊ីធ បានអន្ទះសាចង់កសាងក្រុងស៊ីយ៉ូន ក្រុងយេរូសាឡិមថ្មី ដូចបានពិពណ៌នានៅក្នុងព្រះគម្ពីរមរមន ( សូមមើល អេធើរ ១៣:២–៩ ) និងនៅក្នុងកំណែព្រះគម្ពីរប៊ីបដែលបានបំផុសគំនិតដល់យ៉ូសែប ស្ម៊ីធ ( សូមមើល ម៉ូសេ ៧:៦២–៦៤ ) ។ តើបងប្អូនរៀនអ្វីខ្លះអំពីស៊ីយ៉ូន—ទាំងទីក្រុងបុរាណនៅជំនាន់អេណុស និងទីក្រុងនៅថ្ងៃចុងក្រោយ—មកពី គោលលទ្ធិ និង សេចក្តីសញ្ញា ៤៥:១១–១៥, ៦៦–៧១ ?

សព្វថ្ងៃនេះ បទបញ្ជាឲ្យស្ថាបនាស៊ីយ៉ូនសំដៅលើការស្ថាបនានគររបស់ព្រះ នៅកន្លែងណាដែលយើងរស់នៅ—កន្លែងណាដែលបុត្ររបស់ព្រះប្រជុំគ្នាមកទីមានសុវត្ថិភាពនៃ « សេចក្ដីសញ្ញាដ៏នៅអស់កល្បអស់កាលជានិច្ច » របស់ទ្រង់ ( ខទី ៩ ) ។ តើបងប្អូនអាចធ្វើអ្វីខ្លះដើម្បីជួយកសាងស៊ីយ៉ូន នៅកន្លែងដែលបងប្អូនរស់នៅ ?

សូមមើលផងដែរ Topical Guide « Zion » នៅលើគេហទំព័រ topics.ChurchofJesusChrist.org ។

រូបភាព

រូបសញ្ញាការសិក្សាជាគ្រួសារ

គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ

គោលលទ្ធិ និង សេចក្ដីសញ្ញា ៤៥:៣–៥ ។តើអ្នកគាំទ្រធ្វើអ្វីខ្លះសម្រាប់យើង ? បងប្អូនអាចមើលវីដេអូ « The Mediator » ( នៅលើគេហទំព័រ ChurchofJesusChrist.org ) និងសុន្ទរកថាអំពីមូលហេតុដែលព្រះអង្គសង្គ្រោះ ត្រូវបានហៅថាជាអ្នកគាំទ្ររបស់យើង ។

គោលលទ្ធិ និង សេចក្ដីសញ្ញា ៤៥:៩–១០ ។ប្រសិនបើគ្រួសាររបស់បងប្អូនមាន « បទដ្ឋាន » ឬទង់មួយដើម្បីតំណាងឲ្យការតាំងចិត្តរបស់បងប្អូនចំពោះដំណឹងល្អ តើវាជាអ្វីទៅ ? វាអាចរីករាយដើម្បីធ្វើទង់គ្រួសារមួយរួមគ្នា ហើយពិភាក្សាពីរបៀបដែលបងប្អូនអាចជួយមនុស្សដទៃឲ្យធ្វើតាមបទដ្ឋានដំណឹងល្អ ។

គោលលទ្ធិ និង សេចក្ដីសញ្ញា ៤៥:៣២តើ « ទីបរិសុទ្ធ » របស់យើងនៅកន្លែងណាខ្លះ ? តើ « ពុំរើឡើយ » មានន័យដូចម្ដេច ? តើយើងអាចធ្វើឲ្យគេហដ្ឋានរបស់យើងជាទីបរិសុទ្ធមួយដោយរបៀបណា ?

គោលលទ្ធិ និង សេចក្ដីសញ្ញា ៤៥:៣៩–៤៤ ។តើបងប្អូនអាចជួយសមាជិកគ្រួសារឲ្យយល់ពីអត្ថន័យ ក្នុងការទន្ទឹងចាំមើលការយាងមកលើកទីពីររបស់ព្រះអង្គសង្គ្រោះតាមរបៀបណា ? ប្រហែលបងប្អូនអាចគិតអំពីព្រឹត្តិការណ៍មួយ ដែលបងប្អូនរំពឹងទុក ហើយចែកចាយពីរបៀបដែលបងប្អូន « ទន្ទឹងចាំមើល » ព្រឹត្តិការណ៍នោះ ។ ឬ បងប្អូនអាចដុតនំអ្វីមួយរួមគ្នា ហើយរកមើលទីសម្គាល់ដែលវាបញ្ជាក់ថា យើងអាចបរិភោគវាបាន ។ តើយើងកំពុងធ្វើអ្វីខ្លះដើម្បីទន្ទឹងចាំមើលការយាងមកលើកទីពីររបស់ព្រះអង្គសង្គ្រោះ ?

គោលលទ្ធិ និង សេចក្ដីសញ្ញា ៤៥:៥៥ ។ការអាន នីហ្វៃទី១ ២២:២៦ និង វិវរណៈ ២០:១–៣ អាចជួយគ្រួសាររបស់បងប្អូនឲ្យយល់ពីរបៀបដែលសាតាំងត្រូវបាន « ចងទុក » អំឡុងពេលសហសវត្សរ៍ ។ តើយើងអាចចងទុកសាតាំងនៅក្នុងជីវិតរបស់យើងយ៉ាងដូចម្តេច ?

សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់ថ្នាក់បឋមសិក្សា ។

ចម្រៀងស្នើ ៖ « ពេលទ្រង់យាងមកម្ដងទៀត » សៀវភៅចម្រៀងកុមារ ល.រ ៤៦; សូមមើលផងដែរ « យោបល់ដើម្បីកែលម្អការសិក្សាព្រះគម្ពីរជាគ្រួសាររបស់អ្នក » ។

ការកែលម្អដល់ការសិក្សាផ្ទាល់ខ្លួន

សូមប្រើជំនួយការសិក្សា ។ សូមប្រើលេខយោង Topical Guide Bible Dictionary និង សេចក្ដីណែនាំដល់បទគម្ពីរទាំងឡាយ ដើម្បីទទួលបានការយល់ដឹងអំពីបទគម្ពីរ ។