« ថ្ងៃទី ១៩–២៥ ខែ កក្កដា ។ គោលលទ្ធិ និង សេចក្ដីសញ្ញា ៨១–៨៣ ៖ កន្លែងណា ‹ ត្រូវបានប្រទានឲ្យច្រើន នោះក៏មានតម្រូវការជាច្រើនវិញ › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរគោលលទ្ធិ និង សេចក្ដីសញ្ញា ឆ្នាំ ២០២១ ( ឆ្នាំ ២០២០ )

« ថ្ងៃទី ១៩–២៥ ខែ កក្កដា ។ គោលលទ្ធិ និង សេចក្ដីសញ្ញា ៨១–៨៣ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២១

ព្រះគ្រីស្ទ និងកម្លោះអ្នកមាន ដោយហែនរិច ហូហ្វម៉ាន់

ថ្ងៃទី ១៩–២៥ ខែ កក្កដា

គោលលទ្ធិ និងសេចក្តីសញ្ញា ៨១–៨៣

កន្លែងណា « ត្រូវបានប្រទានឲ្យច្រើន នោះក៏មានតម្រូវការជាច្រើនវិញ »

នៅពេលបងប្អូនសិក្សា គោលលទ្ធិ និង សេចក្ដីសញ្ញា ៨១–៨៣ សូមកត់ត្រាគោលការណ៍ ដែលអាចជួយបងប្អូនឲ្យធ្វើល្អក្នុងចំណោមគ្រួសារ មិត្តភក្ដិរបស់បងប្អូន និងមនុស្សដទៃ។

កត់ត្រាចំណាប់អារម្មណ៍របស់បងប្អូន

នៅខែ មីនា ឆ្នាំ ១៨៣២ ព្រះអម្ចាស់បានហៅអ៊ីសាយ កស ឲ្យធ្វើជាទីប្រឹក្សាម្នាក់ដល់យ៉ូសែប ស្ម៊ីធ នៅក្នុងគណៈប្រធាននៃបព្វជិតភាពជាន់ខ្ពស់ ( ឥឡូវនេះហៅថា គណៈប្រធានទីមួយ ) ។ គោលលទ្ធិ និង សេចក្ដីសញ្ញា ៨១ គឺជាវិវរណៈមួយដល់បងប្រុសកស ដែលណែនាំគាត់ក្នុងការហៅថ្មីរបស់គាត់ និងសន្យាគាត់នូវពរជ័យក្នុងការបម្រើដោយស្មោះត្រង់ ។ ប៉ុន្ដែអ៊ីសាយ កស មិនបានបម្រើដោយស្មោះត្រង់នោះទេ ។ ដូច្នេះ ហ្វ្រែឌើរិក ជី វិលលាម្ស ត្រូវបានហៅឲ្យជំនួសគាត់ ហើយឈ្មោះបងប្រុសកសត្រូវបានជំនួសដោយឈ្មោះរបស់បងប្រុសវិលលាម្សនៅក្នុងវិវរណៈនេះ ។

ការណ៍នោះមើលទៅហាក់ដូចជាសេចក្ដីលម្អិតតូចមួយ ប៉ុន្ដែវាបង្កប់នូវសេចក្ដីពិតដ៏សំខាន់មួយ ៖ វិវរណៈភាគច្រើននៅក្នុងគម្ពីរគោលលទ្ធិ និងសេចក្តីសញ្ញាត្រូវបានថ្លែងទៅកាន់មនុស្សជាក់លាក់ ប៉ុន្ដែយើងតែងអាចស្វែងរករបៀបដើម្បីអនុវត្តវាចំពោះខ្លួនយើងជានិច្ច ( សូមមើល នីហ្វៃទី១ ១៩:២៣ ) ។ ការប្រឹក្សារបស់ព្រះអម្ចាស់ទៅដល់ហ្វ្រែឌើរិក ជី វិលលាម្សឲ្យ « ចម្រើនកម្លាំងដល់ក្បាលជង្គង់ដែលញ័រ » អាចបង្វែរគំនិតរបស់យើងទៅកាន់មនុស្ស ដែលយើងអាចពង្រឹង ( គោលលទ្ធិ និង សេចក្ដីសញ្ញា ៨១:៥ ) ។ ការប្រឹក្សារបស់ព្រះអម្ចាស់សម្រាប់សមាជិកនៃសហក្រុមឲ្យ « ភ្ជាប់ខ្លួនដោយនូវសេចក្ដីសញ្ញានេះ » ដើម្បីបំពេញតាមតម្រូវការខាងសាច់ឈាមរបស់សាសនាចក្រ អាចបង្វែរគំនិតយើងទៅកាន់សេចក្ដីសញ្ញាផ្ទាល់ខ្លួនរបស់យើង ។ ហើយសេចក្ដីសន្យារបស់ព្រះអម្ចាស់ថា ទ្រង់នឹង « ជាប់សន្យា កាលណាអ្នករាល់គ្នាប្រព្រឹត្តតាមអ្វី ដែលយើងមានព្រះបន្ទូល » អាចរំឭកយើងពីការសន្យារបស់ទ្រង់ដល់យើង នៅពេលយើងគោរពតាម ( គោលលទ្ធិ និង សេចក្ដីសញ្ញា ៨២:១០, ១៥ ) ។ ការណ៍នោះគឺដូចជាអ្វីដែលគួរកើតមាន ដោយសារព្រះអម្ចាស់ក៏បានប្រកាសដែរថា « អ្វីក៏ដោយដែលយើងមានព្រះបន្ទូលដល់មនុស្សម្នាក់ នោះយើងមានព្រះបន្ទូលដល់មនុស្សទាំងអស់ » ( ខទី ៥ ) ។

សូមមើល « Newel K. Whitney and the United Firm » « Jesse Gause: Counselor to the Prophet » Revelations in Context ទំព័រ ១៤២–៤៧, ១៥៥–៥៧ ។

គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន

គោលលទ្ធិ និង សេចក្តីសញ្ញា ៨១

ខ្ញុំអាចស្មោះត្រង់ក្នុងការធ្វើអ្វីដែលព្រះអម្ចាស់សុំឲ្យខ្ញុំធ្វើ ។

តើពេលខ្លះបងប្អូនមានឆ្ងល់ពីរបៀបដែលបងប្អូនអាចបំពេញតាមទំនួលខុសត្រូវដ៏សំខាន់ក្នុងជីវិតរបស់បងប្អូនដែរឬទេ ? ក្នុងនាមជាទីប្រឹក្សាមួយរូបរបស់ព្យាការី យ៉ូសែប ស៊្មីធ ហ្វ្រែឌើរិក ជី វិលលាម្ស បានមានការទទួលខុសត្រូវដ៏សំខាន់ជាច្រើនយ៉ាងប្រាកដ ។ នៅក្នុង កណ្ឌទី ៨១ ព្រះអម្ចាស់បានប្រទានការប្រឹក្សាដល់លោកអំពីរបៀបបំពេញការទទួលខុសត្រូវទាំងនោះ ។ តើបងប្អូនរកឃើញអ្វីខ្លះនៅក្នុងកណ្ឌនេះ ដែលអាចជួយបងប្អូនឲ្យបំពេញការទទួលខុសត្រូវដែលបានផ្ដល់ឲ្យបងប្អូនដោយព្រះអម្ចាស់ ?

នេះគឺជាសំណួរមួយចំនួនដើម្បីជួយបងប្អូនឲ្យពិចារណាពី ខទី ៥ ៖

តើមានរបៀបណាខ្លះដែលបុគ្គលម្នាក់អាច « ទន់ខ្សោយ » នោះ ? តើការ « ជួយ » អស់អ្នកដែលទន់ខ្សោយមានន័យដូចម្ដេច ?
តើអ្វីទៅដែលអាចបណ្ដាលឲ្យដៃរបស់បុគ្គលម្នាក់ « រោយ » តាមន័យធៀប ? តើយើងអាច « លើក » ដៃទាំងនោះតាមរបៀបណា ?
តើឃ្លា « ក្បាលជង្គង់ដែលញ័រ » អាចមានន័យយ៉ាងណា ? តើយើងអាច « ចម្រើនកម្លាំង » ដល់ក្បាលជង្គង់ដែលញ័រទាំងនោះដោយរបៀបណា ?

ប្រហែលការសិក្សាខគម្ពីរនេះនាំមកក្នុងគំនិតបងប្អូននូវនរណាមា្នក់ ដែលបងប្អូនអាច « ជួយ » « លើក » ឬ « ចម្រើនកម្លាំង » បាន ។ តើបងប្អូននឹងធ្វើអ្វីខ្លះ ដើម្បីផ្ដល់ការងារបម្រើដល់បុគ្គលនោះ ?

គណៈប្រធានទីមួយ ៖ស៊ីឌនី រិកដុន, យ៉ូសែប ស្ម៊ីធ, ហ្វ្រែឌើរិក ជី វិលលាម្ស

គោលលទ្ធិ និង សេចក្ដីសញ្ញា ៨២:១–៧

ព្រះអម្ចាស់អញ្ជើញខ្ញុំឲ្យប្រែចិត្ត និងលះបង់អំពើបាបរបស់ខ្ញុំ ។

នៅពេលបងប្អូនអាន គោលលទ្ធិ និង សេចក្តីសញ្ញា ៨២:១–៧ សូមពិចារណាធ្វើបញ្ជីពីរនៃអ្វីដែលបងប្អូនបានរៀន ៖ ការព្រមានអំពីអំពើបាប និងសេចក្ដីពិតអំពីការអភ័យទោស ។ តើសេចក្ដីពិតទាំងនេះអាចជួយបងប្អូនឲ្យប្រឆាំងនឹងការល្បួងរបស់សត្រូវយ៉ាងដូចម្ដេច ?

គោលលទ្ធិ និង សេចក្ដីសញ្ញា ៨២:៨–១០

បទបញ្ញត្តិគឺសម្រាប់សេចក្ដីសង្គ្រោះ និងការការពារដល់ខ្ញុំ ។

ប្រសិនបើបងប្អូន—ឬនរណាម្នាក់ដែលបងប្អូនស្គាល់—ធ្លាប់បានឆ្ងល់ពីមូលហេតុ ដែលព្រះអម្ចាស់ប្រទានបទបញ្ញត្តិជាច្រើននោះ គោលលទ្ធិ និង សេចក្ដីសញ្ញា ៨២:៨–១០ អាចជួយបាន ។ តើការយល់ដឹងអ្វីខ្លះពីក្នុងខគម្ពីរនេះអាចជួយបងប្អូនឲ្យពន្យល់ដល់នរណាម្នាក់ ពីមូលហេតុដែលបងប្អូនជ្រើសរើសធ្វើតាមព្រះបញ្ញត្តិរបស់ព្រះអម្ចាស់ ? បងប្អូនក៏អាចពិចារណាពីរបៀបដែលព្រះបញ្ញត្តិរបស់ទ្រង់បានផ្លាស់ប្ដូរជីវិតរបស់បងប្អូនបានដែរ ។ តើបងប្អូនរៀនបានអ្វីខ្លះអំពីព្រះអម្ចាស់ កាលបងប្អូនអាន ខទី ១០ ?

សូមមើលផងដែរ គោលលទ្ធិ និង សេចក្ដីសញ្ញា ១៣០:២០–២១, ខារូល អិម ស្ទីហ្វិន « បើអ្នករាល់គ្នាស្រឡាញ់ខ្ញុំ ចូរកាន់តាមបញ្ញត្តិរបស់ខ្ញុំចុះ » Ensign ឬ Liahona ខែ វិច្ឆិកា ឆ្នាំ ២០១៥ ទំព័រ ១១៨–២០ ។

គោលលទ្ធិ និង សេចក្តីសញ្ញា ៨៣

« ពួកស្រីមេម៉ាយ និងកូនកំព្រាគួរត្រូវបានផ្គត់ផ្គង់ » ។

នៅខែ មេសា ឆ្នាំ ១៨៣២ ដូចបានណែនាំដោយព្រះអម្ចាស់ យ៉ូសែប ស្ម៊ីធ បានធ្វើដំណើរជិត ៨០០ ម៉ែលស៍ដើម្បីទៅសួរសុខទុក្ខពួកបរិសុទ្ធ ដែលបានប្រជុំគ្នានៅរដ្ឋមិសសួរី ( សូមមើល គោលលទ្ធិ និង សេចក្ដីសញ្ញា ៧៨:៩ ) ។ សហគមន៍មួយដែលលោកបានទៅសួរសុខទុក្ខរួមមានស្រីមេម៉ាយ ដែលបានចិញ្ចឹមកូនៗតែឯង ។ ក្នុងចំណោមពួកគេគឺ ហ្វែប ភែក និងអាណា រ៉ូជើរ ដែលព្យាការីស្គាល់ពួកគេផ្ទាល់ ។ នៅរដ្ឋមិសសួរីក្នុងទសវត្សរ៍ឆ្នាំ ១៨៣០ ច្បាប់រដ្ឋបានផ្ដល់សិទ្ធិមានកម្រិតដល់ស្រីមេម៉ាយ ចំពោះទ្រព្យរបស់ស្វាមីដែលបានស្លាប់ទៅរបស់ពួកគេ ។ តើបងប្អូនរៀនអ្វីខ្លះមកពី កណ្ឌទី ៨៣ អំពីរបៀបដែលព្រះអម្ចាស់មានព្រះទ័យអំពីស្រីមេម៉ាយ និងកូនកំព្រា ? តើបងប្អូនស្គាល់នរណាម្នាក់ក្នុងស្ថានភាពនេះ ដែលនឹងទទួលប្រយោជន៍ពីសេចក្ដីស្រឡាញ់ ឬការថែទាំរបស់បងប្អូនដែរឬទេ ?

សូមមើលផងដែរ អេសាយ ១:១៧; យ៉ាកុប ១:២៧ ។

គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ

គោលលទ្ធិ និង សេចក្ដីសញ្ញា ៨១:៣ ។បងប្អូនអាចឲ្យក្រដាសរូបបេះដូងទៅសមាជិកគ្រួសារ ហើយអញ្ជើញពួកគេឲ្យគូររូបភាព ឬសរសេរអ្វីមួយដែលពួកគេចង់អធិស្ឋានអំពី ។ សូមជជែកអំពីអត្ថន័យនៃការអធិស្ឋាន « រហូត ដោយចេញសំឡេង និងទាំងនៅក្នុងចិត្តអ្នក » ។

គោលលទ្ធិ និង សេចក្តីសញ្ញា ៨១:៥ ។ដើម្បីរៀនអំពីគោលការណ៍នានានៅក្នុងខគម្ពីរនេះ ប្រហែលសមាជិកគ្រួសារអាចចែកចាយគំរូនៃពេលដែលពួកគេបានមានអារម្មណ៍ « ទន់ខ្សោយ » ឬ « ញ័រ » ហើយនរណាម្នាក់បានជួយ ឬចម្រើនកម្លាំងដល់ពួកគេ ។ បងប្អូនក៏អាចមើលវីដេអូអំពីការបម្រើដល់មនុស្សដទៃបានដែរ ដូចជាវីឌេអូ « Works of God » ឬ « អព្ភូតហេតុនៃដំបូល » ( នៅលើគេហទំព័រ ChurchofJesusChrist.org ) ។ សូមពិភាក្សាពីរបៀបដែលគ្រួសារបងប្អូនអាចបម្រើដល់គ្នាជាប្រចាំតាមរបៀបសាមញ្ញៗ ។

គោលលទ្ធិ និង សេចក្ដីសញ្ញា ៨២:៨–១០ ។ប្រហែលល្បែងសាមញ្ញមួយនឹងជួយគ្រួសារបងប្អូនឲ្យមានអារម្មណ៍អរគុណដល់ព្រះបញ្ញត្តិរបស់ព្រះ ។ សមាជិកគ្រួសារម្នាក់អាចផ្ដល់ការណែនាំដើម្បីជួយសមាជិកគ្រួសារដែលចងភ្នែក ឲ្យធ្វើនំសាំងវិច ឬដើរកាត់ផ្លូវដែលមានឧបសគ្គមួយ ។ សូមគិតពីអ្វីមួយសប្បាយ និងច្នៃប្រឌិត ! រួចហើយពិភាក្សាពីរបៀបដែលព្រះបញ្ញត្តិរបស់ព្រះគឺដូចជាការណែនាំនៅក្នុងល្បែងនេះដែរ ។

គោលលទ្ធិ និង សេចក្តីសញ្ញា ៨២:១៨–១៩ ។តើសមាជិកគ្រួសារម្នាក់ៗអាចធ្វើអ្វីខ្លះដើម្បី « បានប្រសើរឡើងចំពោះការប៉ិនប្រសប់របស់ខ្លួន » និង « បានការប៉ិនប្រសប់ផ្សេងៗទៀត » ? វាអាចសប្បាយដើម្បីមានកម្មវិធីបង្ហាញការប៉ិនប្រសប់គ្រួសារមួយ ។ សូមគិតពីរបៀបដើម្បីបញ្ចូលការប៉ិនប្រសប់ ដែលមិនងាយបង្ហាញ ( ដូចជាអំណោយទានខាងវិញ្ញាណ, សូមមើល គោលលទ្ធិ និង សេចក្ដីសញ្ញា ៤៦:១១–២៦ ) ។ តើយើងអាចប្រើការប៉ិនប្រសប់របស់យើង ហើយចែកចាយអ្វីដែលយើងមានដើម្បីផ្ដល់ពរដល់គ្រួសារ និងអ្នកជិតខាងយើងតាមរបៀបណា ? តើការប្រើការប៉ិនប្រសប់របស់យើង « ដោយមានភ្នែកស្មោះស្ម័គ្រទាំងស្រុងចំពោះសិរីល្អនៃព្រះ » មានន័យដូចម្ដេច ?

សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនប្រចាំសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់ថ្នាក់បឋមសិក្សា ។

ចម្រៀងស្នើ ៖ « តើខ្ញុំបានធ្វើល្អ ? » ទំនុកតម្កើង ទំព័រ ១៣៨, សូមមើលផងដែរ « គំនិតយោបល់ដើម្បីកែលម្អដល់ការសិក្សាព្រះគម្ពីរជាគ្រួសាររបស់អ្នក » ។

ការកែលម្អការបង្រៀនរបស់យើង

សួរសំណួរដែលដឹកនាំទៅរកសកម្មភាព ។ សូមពិចារណាអំពីសំណួរទាំងឡាយដែលបំផុសគំនិតសមាជិកគ្រួសាររបស់បងប្អូនឲ្យនឹកគិតអំពីរបៀបដែលពួកគេអាចរស់នៅតាមដំណឹងល្អកាន់តែពេញលេញ ។ « ជាធម្មតាសំណួរទាំងនេះគឺពុំមែនជាសំណួរពិភាក្សានោះទេ ដ្បិតវាគឺសម្រាប់ធ្វើការនឹកគិតដោយផ្ទាល់ខ្លួន » ( ការបង្រៀនតាមរបៀបរបស់ព្រះអង្គសង្គ្រោះនេះ ទំព័រ ៣១ ) ។

គំនូរព្រះយេស៊ូវព្យាបាលបុរសម្នាក់ ដោយ ដាន ប៊ើរ