“O̧kwōj 16–22. Katak im Bujen Ko 89–92: ‘Juon Pedped ippān Kallim̧ur,’” Itok, Ļoor Eō—N̄an Kajjojo Armej im Baam̧le ko: Katak im Bujen Ko 2021 (2020)
“O̧kwōj 16–22. Katak im Bujen Ko 89–92,” Itok, Ļoor Eō—N̄an Kajjojo Armej im Baam̧le ko: 2021
O̧kwōj 16–22
KKatak im Bujen Ko 89–92
“Juon Pedped ippān Kallim̧ur”
Jar ilo ekkatak Katak im Bujen Ko 89–92, im je jabdewōt en̄jake ko ilo jetōb kwoj būki. En m̧ōkaj am̧ kile ekōjkan an “Jetōb eo [ej kwaļo̧k] m̧ool eo” n̄an kwe n̄e kwoj ekkatak (Katak im Bujen Ko 91:4).
Je En̄jake ko Rej Im̧we Eok
Ilo Jikuuļ eo an Rikanaan ro, Rikanaan Josep Smith ekar katakin elder ro an Israel kōn kalōk aelōn̄ in kiin̄ eo an Anij ioon laļ in. Raar ekōnono kōn m̧ool ko ilo jetōb, jar ippān doon, jitlo̧k, im m̧aanjabpopo n̄an kwaļo̧k gospel eo. Bōtaab ekar wōr juon men kōn mejatoto eo me emaron̄ in kar āinwōt kōjak n̄an kōj rainin, im ekar jab āiniwōt jim̧we n̄an Emma Smith barāinwōt. Ilo iien kweilo̧k ko, em̧m̧aan ro raar kōbaatat im meme jikka, eo me kar jab jeļā kake ilo iien eo, bōtaab ekar kōmāār kilmej būļoor aļaļ eo im kar kōm̧m̧ane nām ko rekkajoor ilo mejatoto. Emma ekar kwaļo̧k inepata ko an ippān Josep, im Josep ekar kajjitōk ippān Irooj. Tōprak eo ekar juon revelesōn me ekar ļapļo̧k jān kōbaatat im māār ko an jikka. Ekar leļo̧k n̄an Armej ro Rekwojarjar, ium̧win epepen ko rej itok, “juon pedped ippān kallim̧ur”—kallim̧ur ko an ājmour ilo ānbwin, “mālōtlōt,” im “eļap mennin aorōk ko an jeļāļo̧kjeņ” (Katak im Bujen Ko 89:3, 19).
Lale barāinwōt Saints, 1:166–68.
Ļōm̧ņak ko n̄an Ekkatak Jeje Ko Rekwojarjar Ippam̧ Make
Naan in Mālōtlōt ej “juon pedped ippān kallim̧ur.”
Ke elder ro ilo Jikuuļ eo an Rikanaan ro m̧oktata kar ron̄ an Josep Smith riiti Naan in Mālōtlōt eo, em̧ōkj aer “kar julo̧k baid ko aer im m̧ōtta jikka ko kein aer meme n̄an lowaan kijeek eo” (Saints, 1:168). Ilo iien eo, Naan in Mālōtlōt eo ekar watōke eļapļo̧k an juon kakkōl jān juon kien, bōtaab raar kōņaan kwaļo̧k aer m̧ōņōņō in pokake. Bōlen em̧ōj kadede am̧ “kar julo̧k” jān mour eo am̧ men ko Naan in Mālōtlōt eo ekar kakkōl ņai, bōtaab ta bar ta eo komaron̄ ekkatak jān revelesōn in? Ļōmņak kōn aitia kein:
-
Kappukōt naan ko komoron̄ kar jab kili—ak kanooj ļōmņak kake—m̧okta. Ta eo kwoj ekkatak jāni?
-
Katak im Bujen Ko 89 epād ie jejjo kallim̧ur ko (lale eoon 18–21). Ta meļeļe in kallim̧ur kein ilo am̧ ļōmņak?
-
Ta eo revelesōn in katakin eok kōn Irooj?
-
Ta waanjon̄ak ko kwar loi kōn “nana ko im kōttōbalbal ko … ilo būruōn armej ro renana”? (eoon 4).
-
Ļōmņak kōn revelesōn in āinwōt “juon pedped ippān kallim̧ur” (eoon 3)—m̧ool ko indeeo me rej tōl jokāālet eo kōm̧m̧ane—ejjab baj juon laajrak in kōm̧m̧an im jab kōm̧m̧an ko. Ta pedped ko kwoj loi me remaron̄ jipan̄ tōl jokāālet ko am̧?
Rikanaan ro raan kein raar barāinwōt kakkōl kōn uno ko rekkajoor im m̧wil ko kobaiktok me kar kōnono kaki ilo Naan in Mālōtlōt eo (lale “Ājmour ilo Ānbwin im En̄jake,” N̄an Kōkajoorļo̧k Jodikdik ro, 25–27). Ta ko kwoj m̧weiur n̄an kōm̧m̧ani n̄an an em̧m̧anļo̧k am̧ kōjparok ļōmņak eo im ānbwinūm̧?
Lale barāiniwōt Daniel 1; 1 Korint 6:19–20; Gospel Topics, “Word of Wisdom,” topics.ChurchofJesusChrist.org; “The Word of Wisdom,” Revelations in Context, 183–91; addictionrecovery.ChurchofJesusChrist.org.
Naan in Mālōtlōt ej katakin kōj n̄an kōjparok ānbwin ko ad.
Būreejtōnji eo Kein Kajuon ej kabwijer “kii ko an aelōn̄ in kiin̄ eo.”
Ilo jekjōn 90, Irooj ekar leļo̧k naan in kōmeļeļe ko kōn “jerbal in im presidency in” (eoon 12) an Josep Smith Sidney Rigdon, im Frederick G. Williams—ro uwaan ta eo jej kiiō ņae etan Būreejtōnji eo Kein Kajuon. Ta eo kwoj ekkatak kōn Būreejtōnji eo Kein Kajuon jān eoon 1–17? Etale ennaan ko rekāāl jān ro uwaan Būreejtjōnji eo Kein Kajuon. Ekōjkan an naan ko aer “n̄an erļo̧ki mennin ittino ko an aelōn̄ eo” n̄an kwe? (eoon 14). Ekōjkan aer “im ko̧koņ aolep jerbal ko an kabun̄ im aelōn̄ in kiin̄ in.”? (eoon 16).
Lale barāinwōt Henry B. Eyring, “Kajoor eo ej Rie Tōmak,” Ensign ak Liaona, Māe 2019, 58–60.
“Aolep men ko naaj jerbal ippān doon n̄an em̧m̧an eo [aō.”
Kejekļo̧kjeņ kōn jabdewōt en̄jake ko ekar wōr ippam̧ n̄an kam̧ool kōn kallim̧ur eo an Irooj ilo Katak im Bujen Ko 90:24. Ļōmņak in je en̄jake ko am̧ im kwaļo̧ki ippān juon uwaan baam̧le eo am̧ ak juon eo kwoj iakwe—bōlen juon eo me ej aikuji bar kallim̧ur eo ak kōketak eo. Eļan̄n̄e ewōr kōjeraam̧m̧an ko kokab de kōttari, kejekļo̧kjeņ kōn ta eo komaron̄ kōm̧m̧ane n̄an pād wōt ilo tiljek ilo am̧ kōttar n̄an lo ekōjkan an “aolep men ko naaj jerbal ippān doon n̄an em̧m̧an eo ami.”
Wōn eo kar Vienna Jaques?
Vienna Jaques ekar ļotak ilo Juun 10, 1787, ilo Massachusetts. Juon kōrā in tōmak eo ekar bwe an ļap an jāān, Vienna ekar m̧oktata ioon mijenede ro ilo 1831 eo. Ālkin an bōk juon kam̧ool ilo jetōb bwe ennan eo aer ekar m̧ool, liin ekar ilo̧k n̄an an ioon Rikanaan eo ilo Kirtland, Ohio, ijo liin ekar peptaij ie.
Vienna ekar pokake kapilōk eo an Irooj n̄an e ilo Katak im Bujen Ko 90:28–31. An wujilepļo̧k n̄an Irooj, ekoba menin leļo̧k ko liin ekar kōm̧m̧ani m̧oktaļo̧k ilo Kirtland, rekar itok ilo juon iien eo aikuji n̄an Kabun̄ in, ke ritōl ro raar kajjieon̄ in wiaik bwidej eo ijo Kirtland Tampeļ eo enaaj kar ekkar ie. Vienna ekar “tiljek, jab pād … waan” ilo aolepān mour eo an im āliktata ekar maron̄ in “jokwe ilo aenōm̧m̧an” (verse 31) ilo Salt Lake Valley, ijo liin ekar mej ie ke ej 96 iiō.
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota
-
Katak im Bujen Ko 89.Baam̧le eo am̧ emaron̄ lem̧ōņōņō ilo jin̄a ak kappukōt pija in m̧ōn̄ā ko im ōn ko jet kar kōnono kaki ilo Katak im Bujen Ko 89. Innām kom̧ maron̄ ikkure juon ikkure—ro uwaan baam̧le eo remaron̄ bōk koņaer kāālet jabdewōt pija ko, likūt men ko jejjab aikuj in kōjerbali ilo jo̧kpej im men ko jej aikuj kōjerbali ilo juon piliej. Ekōjkan an kallim̧ur ko ilo eoon 18–21 kar kūrm̧ool ilo mour ko ad?
Riiti “Ājmour ilo Ānbwin im En̄jake” ilo N̄an Kōkajoorļo̧k Jodikdik ro (25–27) emaron̄ im̧we iien ekōnono eo kōn wāween ko jet n̄an kōjparok ājmour eo ad im kōn kōjeraam̧m̧an ko me Anij ej kallim̧ur kaki.
-
Katak im Bujen Ko 90:5.Kōnono kōn ekōjkan am̧ “bōk revelesōn ko [revelesōn ak rikanaan ro] jān Anij.” Ekōjkan ad maron̄ kwaļo̧k bwe rejjab “juon men eļam waan” n̄an kōj?
-
Katak im Bujen Ko 91.Kom̧ maron̄ ekōnono kōn ekōjkan an kapilōk eo an Irooj kōn Apocrypha (lale eoon 1–2) kōjerbale n̄an media ko baam̧le eo am̧ ej iooni rainin (lale barāinwōt Unin Tōl eo n̄an Jeje Ko Rekwojarjar, “Apocrypha,” scriptures.ChurchofJesusChrist.org). Komaron̄ barāinwōt kwaļo̧k en̄jake ko am̧ make ke kar “kōmeramļo̧k jān Jetōb” (eoon 5) kar jipan̄ eok jeļā ikōtaan m̧ool im bōd.
-
Katak im Bujen Ko 92:2.Ta meļeļe in n̄an erom “juon uwaan ekākemo̧o̧j” an Kabun̄ in?
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Al eo kar elmakote: “The Lord Gave Me a Temple,” Children’s Songbook, 153.
Kōkōm̧anm̧anļo̧k Ad Katakin
Kōjerbal elōn̄ jekjek ko. Kappukōt elōn̄ wāween ko rokoktaktak baam̧le eo am̧ ej bōk koņaan ilo ekkatak jejej ko rekwojarjar an baam̧le. N̄an waanjon̄ak, ro uwaan baam̧le eo remaron̄ al al in jar ko ak al ko an ajri reioktļo̧k juon eoon, jin̄aik pija ko kōn ta eo rej riiti, ak ba ilo tukadu in juon eoon ilo naan ko aer make.
“Im aolep ro rekwōjarjar … rej keememej n̄an kōjparok im kōm̧m̧an ennaan kein, im etetal ilo pokake kien ko, naaj bōk ājmour ilo bwijjier im ņoņņoņmeej n̄an di ko dier” (Katak im Bujen Ko 89:18).