“O̧kwōj 23–29. Katak im Bujen Ko 93: ‘Bōk Tarlep eo An,’” Itok, Ļoor Eō—N̄an Kajjojo Armej im Baam̧le ko: Katak im Bujen Ko 2021 (2020)
“O̧kwōj 23–29. Katak im Bujen Ko 93,” Itok, Ļoor Eō—N̄an Kajjojo Armej im Baam̧le Ko: 2021
Ij Loe Nejin Armej ej Jutak Ituanm̧oon in Pein Anij, jān Walter Rane
O̧kwōj 23–29
Katak im Bujen Ko 93
“Bōk Tarlep eo An”
Katak im Bujen Ko 93 ej katakin bwe “m̧ool ej jeļāļo̧kjeņ kōn men ko āinwōt aer kiiō, im āinwōt aer kar waļo̧k, im āinwōt aer naaj waļo̧k tokālik” (eoon 24). Ilo am̧ ekkatak jākjōn in, kappukot m̧ool im rekoote ta eo kwoj ekkatak. Ta eo kwoj kōņaan kōm̧m̧ane n̄an bōk m̧ool eo? (lale eoon ko 27–28).
Je En̄jake ko Rej Im̧we Eok
“N̄e kwoj tallōn̄e juon jikinwe,” Josep ekar katakin, “kwoj aikuj jino jān laļtata, im wanlōn̄ļo̧k bun̄tōn kōn bun̄tōn, m̧ae kwoj tōpar ilōn̄tata; im kōn menin ejjeļo̧k oktak jān pedped ko an gospel—kwoj aikuj jino jān jinoin, im etal wōt m̧ae iien kwoj ekkatak aolep pedped ko an mour eo eutiej tata” (Teachings of Presidents of the Church: Joseph Smith [2007], 268).
Jet iien jikinwe eo n̄an mour indeeo ilo kalimjōke epen im eutiej, ak jekar ļotak tok n̄an tallōn̄e n̄an ijo ilōn̄tata. Jekdo̧o̧n jon̄an ko jemaron̄ loi ilo kōj make, Jemedwōj Ilan̄ im Eo Nejin rej lo juon men eaiboojoj ilo kōj, juon men āinwōt ļo̧k anij. Ejja ilo wāween in wōt Jisōs Kraist ekar “pād ilo jinoin ippān Jemān,” kōn menin “kom̧ ar barāinwōt” (Katak im Bujen ko 93:21, 23). Āinwōt kar E “ar wōnm̧aanļo̧k jān jouj n̄an jouj, m̧ae An kar bōk tarlep eo,” kōn menin barāinwōt “ “kom̧ naaj bōk jouj kōn jouj” (eoon ko 13, 20). Gospel eo me em̧ōj an jepļaaktok ej katakin kōj kōn piktok eo em̧ool an Anij, im kōn menin ej barāinwōt katakin kōj kōn kōj make im ta eo jemaron̄ erom̧. Jekdo̧o̧n kijejeto ko an “eo enana” (eoon 39)—im kōjekdo̧o̧n ta eo kwoj en̄jake ke kwomaron̄ likjab kake—kwoj juon ajri eo nejin Anij kōn maron̄ eo n̄an “ilo iien eo ejim̧we bōk tarlep eo An” (eoon 19).
Ļōmņak ko n̄an Ekkatak Jeje Ko Rekwojarjar Ippam̧ Make
Jej kabun̄-jar n̄an Anij Jemed im Eo Nejin, Jisōs Kraist.
Kōnono kōn revelesōn eo ilo Katak im Bujen ko 93, Irooj ekar kōmeļeļeiki, “Ij lewōj n̄an kom̧ ennaan kein bwe kom̧in maron̄ meļeļe im jeļā ekōjkan kabun̄-jar, im jeļā ta kom̧ij kabun̄-jar n̄an e, bwe kom̧in maron̄ itok n̄an Jemān ilo Eta, im ilo iien eo ejim̧we bōk tarlep eo An” (eoon 19). Ilo am̧ ekkatak kōn revelesōn in, kōkaļļeik m̧ool ko kwoj loi kōn Armej ro jej kabun̄-jar n̄an er: Anij Jemed im Eo Nejin, Jisōs Kraist. Ta eo kwoj ekkatak kōn “wāween n̄an kabun̄-jar” n̄an Er? kōn wāween n̄an “itok n̄an Jemān”?
Rikanaan Josep Smith ekar katakin, “Eļan̄n̄e armej rejjab meļeļe kadkad eo an Anij, rejjab maron̄ meļeļe kadkad eo aer make” (Teachings: Joseph Smith, 40). Ilo am̧ ekkatak kōn Rilo̧mo̧o̧r ilo am̧ katak Katak im Bujen ko 93, kappukot ta eo kwoj barāinwōt ekkatak kōn kwe make. N̄an waanjon̄ak, ta eo kwoj ekkatak kōn E jān eoon ko 3, 12, 21, im 26? Ta m̧ool ko me rej āinwōt me kwoj loi kōn eok make ilo eoon ko 20, 23, and 28–29? (Bar lale 1 Jon 3:2; 3 Nipai 27:27; Dean M. Davies, “The Blessings of Worship,” Ensign ak Liaona, Nob. 2016, 93–95.)
Aiboojoj eo an Anij ej meram im m̧ool.
Kwomaron̄ kile bwe aiboojoj, meram, im m̧ool ekkā aer ba kaki ilo revelesōn in. Ilo am̧ katak eoon ko 21–39 ilo jejjetin, ejaake juon laajrak in m̧ool ko me kwoj ekkatak kōn aiboojoj, meram, im m̧ool. Ekōjkan an m̧ool kein im̧we eok n̄an kappukot eļapļo̧k meram im m̧ool? Ekōjkan an m̧ool kein jelōt wāween am̧ mour kōn mour eo am̧ aolep raan?
Jej bōk meram im m̧ool n̄e jej kōjparok kien ko an Anij.
“Ko̧koņe m̧weo im̧ōm make.”
N̄an eoon 40, Katak im Bujen Ko 93 ilo kalimjōke n̄an oktak jān katak ko kōn aiboojoj an Anij im maron̄ eo ad ekwojarjar n̄an kōmeļeļe kōn wāween kōkajiriri im ko̧koņe m̧weo im̧ōd make. Ekōjkan an katak ko an Irooj kōn meram, m̧ool, im aiboojoj ilo eoon ko 1–39 jipan̄ eok meļeļe im ļoor kapilōk eo ilo eoon ko 40–50?
Bar lale David A. Bednar, “More Diligent and Concerned at Home,” Ensign ak Liahona, Nov. 2009, 17–20.
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota
-
Katak im Bujen Ko 93:2.Ekōjkan an Jisōs Kraist juon “meram em̧ool” ilo mour ko ad? Ewi wāween ad kar loe Meram eo An ippān armej ro jet ipeļaakid?
-
Katak im Bujen Ko 93:3–29.N̄an jipan̄ baam̧le eo am̧ kōmeļeļe ta eo rej ekkatak ilo jekjōn 93 kōn Rilo̧mo̧o̧r im er make, kwomaron̄ ikkure juon ikkure kōmmājāāj. N̄an waanjon̄ak, kwomaron̄ kōpooj juon set in kaaj kōn eoon ko jān jekjōn 93 me rej katakin m̧ool ko kōn Rilo̧mo̧o̧r (lale eoon ko 3, 12, 21, 26) im bar set eo juon me ej katakin juon men eo āinwōt kōn kōj make (lale eoon ko 20, 23, 28–29). Ro uwaan baam̧le eo remaron̄ juon ļo̧k juon ebbōk juon kaat jān set ko kajjojo, riiti eoon ko, im kajjieon̄ kappukot m̧ool ko me rekkar n̄ane. Ekōjkan an m̧ool kein jelōt wāween ad en̄jake kōn Rilo̧mo̧o̧r im kōn kōj make?
-
Katak im Bujen Ko 93:12–13, 20.Ta meļeļein n̄an bōk “jouj kōn jouj” im n̄an wōnm̧aanļo̧k wōt “jān jouj n̄an jouj”? (eoon ko 12–13). Ta eo eoon kein rej kwaļo̧k kōn wāween ad eddōkļo̧k im ekkatak? Ewi wāween ilo ad jeļā menin ejelōt wāween ad kōm̧m̧an n̄an ro jet—im kōj make?
-
Katak im Bujen Ko 93:24.Riiti meļeļein m̧ool eo kwoj loe ilo eoon in, im karuwaineneik ro uwaan baam̧le eo n̄an kwaļo̧k juon men jān jekjōn 93 me rej watōke bwe ej juon m̧ool ejjeļo̧k wōņeen. Ta meļeļe ko jet an m̧ool eo kwoj loe ilo Jon 14:6; Jekab 4:13; ak juon al kōn m̧ool, āinwōt “Oh Say, What Is Truth?” (Hymns, no. 272).
-
Katak im Bujen ko 93:40.Bolen n̄e kwoj riiti eoon in, baam̧le eo am̧ emaron̄ al juon al kōn ekkatak ilo m̧weo, āinwōt “Teach Me to Walk in the Light” (Children’s Songbook, 177). Ajri jidik ro remaron̄ itok limoer ilo aer kōm̧m̧an ākjen ko n̄an kōkkari n̄an naan ko. Ta eo kwoj en̄jake me ekar im̧we eok n̄an kōm̧m̧ane n̄an karuwaineneik eļapļo̧k “meram im m̧ool” n̄an ilowaan m̧weo im̧ōm?
-
Katak im Bujen ko 93:41–50.Kapilōk ippān doon āinwōt juon baam̧le kōn ta eo emaron̄ jab “jim̧we ilo m̧weo im̧ōm.” Ta eo jemaron̄ kōm̧m̧an n̄an “ko̧koņe m̧weo [im̧ōd] make”? (eoon ko 43–44).
N̄an ļōmņak ko rellōn̄ļo̧k kōn katakin ajri, lale unin tōl eo an wiik in ilo Itok, Ļoor Eō—N̄an Būraimere.
Al eo kar ļōmņake: “N̄a Nejin Anij,” Children’s Songbook, 2–3.
Kōkm̧anm̧anļo̧k Ad Katakin
Riit elōn̄ļo̧k jān juon kōttan. Kwomaron̄ kālet n̄an riiti Katak im Bujen Ko 93 elōn̄ļo̧k jān juon kōttan ilowaan juon wiik. Kajjojo iien kwoj riit, kwomaron̄ kile bwe oktak ko an m̧ool ko raorōk n̄an eok ak im̧we eok ilo juon wāween ekāāl. Riit elōn̄ļo̧k alen enaaj barāinwōt letok iien ko rem̧m̧an n̄an eok n̄an kejo̧kļo̧kjeņ kake eļap im em̧ūlaļļok.
Meram im M̧ool, jān Simon Dewey