« ថ្ងៃទី ១០–១៦ ខែ កក្កដា ។ កិច្ចការ ៦–៩ ៖ ‹ តើទ្រង់សព្វព្រះហឫទ័យឲ្យទូលបង្គំធ្វើដូចម្តេច ? › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )

« ថ្ងៃទី ១០–១៦ ខែ កក្កដា ។ ម៉ាថាយ ៦–៩ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២៣

ការប្រែចិត្តជឿនៅតាមផ្លូវទៅក្រុងដាម៉ាស ដោយ ម៉ៃឃើលអេនជែឡូ មឺរីស៊ី ដា ខារាវាកជីអូ

ថ្ងៃទី ១០–១៦ ខែ កក្កដា

កិច្ចការ ៦–៩

« តើទ្រង់សព្វព្រះហឫទ័យឲ្យទូលបង្គំធ្វើដូចម្ដេច ? »

សូមចាប់ផ្ដើមដោយការអាន កិច្ចការ ៦–៩ ។ យោបល់នានានៅក្នុងគម្រោងមេរៀននេះអាចជួយបងប្អូនឲ្យស្គាល់ពីគោលការណ៍សំខាន់ៗមួយចំនួននៅក្នុងជំពូកទាំងនេះ ទោះជាបងប្អូនអាចរកឃើញគោលការណ៍ផ្សេងៗទៀតនៅក្នុងការសិក្សាផ្ទាល់ខ្លួនក្ដី ។

កត់ត្រាចំណាប់អារម្មណ៍របស់បងប្អូន

បើមាននរណាម្នាក់ហាក់ដូចជាមិនទំនងជានឹងមានការផ្លាស់ប្រែចិត្តជឿទេ នោះគឺប្រហែលជាសុលហើយ—ព្រោះគាត់ជាពួកផារិស៊ីដែលមានកិត្តិនាមខាងការធ្វើទុក្ខបៀតបៀនដល់ពួកគ្រិស្តសាសនិក ។ ដូច្នេះនៅពេលព្រះអម្ចាស់បានបន្ទូលប្រាប់សិស្សម្នាក់ដែលមានឈ្មោះថា អាន៉្នានាស ឲ្យទៅស្វែងរកសុល ហើយប្រទានពរដល់គាត់ នោះអាន៉្នានាសបានមានការស្ទាក់ស្ទើរ ។ គាត់ទូលឆ្លើយថា « ព្រះអម្ចាស់អើយ ទូលបង្គំបានឮមនុស្សជាច្រើននិយាយពីការអាក្រក់ទាំងប៉ុន្មាន ដែលអ្នកនោះបានប្រព្រឹត្តដល់ពួកបរិសុទ្ធរបស់ទ្រង់ » ( កិច្ចការ ៩:១៣ ) ។ ប៉ុន្តែព្រះអម្ចាស់ស្គាល់ចិត្ត និងសក្ដានុពលរបស់សុល ហើយទ្រង់មានបេសកកម្មមួយសម្រាប់សុល ៖ « អ្នកនោះជាប្រដាប់រើសតាំងដល់ខ្ញុំ សម្រាប់នឹងប្រកាសឈ្មោះខ្ញុំដល់ពួកសាសន៍ដទៃ និងពួកស្តេច ហើយនិងពួកកូនចៅសាសន៍អ៊ីស្រាអែលផង » ( កិច្ចការ ៩:១៥ ) ។ ដូច្នេះអាន៉្នានាសបានគោរពតាម ហើយនៅពេលគាត់បានរកឃើញអ្នកធ្វើទុក្ខបៀតបៀនពីមុនរូបនេះ នោះគាត់បានហៅលោកថា « អ្នកសុលអើយ » ( កិច្ចការ ៩:១៧ ) ។ បើសុលអាចផ្លាស់ប្ដូរទាំងស្រុង ហើយអាន្ន៉ានាសអាចស្វាគមន៍គាត់ដោយពេញបេះដូង ចុះតើយើងគួរតែពិចារណាថានរណាដែលទំនងជាមិនផ្លាស់ប្ដូរ—រួមទាំងខ្លួនយើងផងដែរឬទេ ?

គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន

កិច្ចការ ៦–៨

ដួងចិត្តរបស់ខ្ញុំត្រូវតែ « ត្រឹមត្រូវនៅក្នុងព្រះនេត្ររបស់ព្រះ » ។

ព្រះវិហារដ៏រីកចម្រើនមួយមានន័យថាមានតម្រូវការពួកសិស្សច្រើនដើម្បីបម្រើនៅក្នុងនគរ ។ យោងតាម កិច្ចការ ៦:១–១៥ តើមានគុណសម្បត្តិអ្វីខ្លះ ដែលពួកសាវកដប់ពីរនាក់ស្វែងរកនៅក្នុងអស់អ្នកដែលនឹងបម្រើជាមួយពួកលោក ? នៅពេលបងប្អូនអាន កិច្ចការ ៦–៨ សូមកត់ចំណាំពីរបៀបដែលគុណសម្បត្តិទាំងនេះ និងអ្វីដទៃទៀតដែលត្រូវបានបង្ហាញនៅក្នុងខ្លួនមនុស្សដូចជា ស្ទេផាន និងភីលីព ។ តើស៊ីម៉ូនមានអ្វីខ្លះដែលខ្វះខាត ហើយតើយើងអាចរៀនអ្វីខ្លះមកពីគាត់ អំពីការមានឆន្ទៈធ្វើការផ្លាស់ប្ដូរ ?

តើមានអ្វីខ្លះដែលបងប្អូនទទួលអារម្មណ៍បំផុសគំនិតដើម្បីផ្លាស់ប្ដូរ ដើម្បីប្រាកដថាដួងចិត្តរបស់បងប្អូនគឺ « ត្រឹមត្រូវនៅក្នុងព្រះនេត្ររបស់ព្រះ » ? ( កិច្ចការ ៨:២១–២២ ) ។ តើការធ្វើការផ្លាស់ប្ដូរនេះអាចប្រទានពរដល់បងប្អូន នៅពេលបងប្អូនបម្រើព្រះយ៉ាងដូចម្ដេចខ្លះ ?

កិច្ចការ ៦–៧

ការទាស់ទទឹងនឹងព្រះវិញ្ញាណបរិសុទ្ធអាចដឹកនាំទៅរកការបដិសេធព្រះអង្គសង្គ្រោះ និងពួកព្យាការីរបស់ទ្រង់ ។

ពួកអ្នកដឹកនាំសាសន៍យូដាមានទំនួលខុសត្រូវក្នុងការរៀបចំមនុស្សសម្រាប់ការយាងមករបស់ព្រះមេស៊ី ។ ប៉ុន្តែពួកគេមិនបានស្គាល់ទ្រង់ ហើយបានបដិសេធទ្រង់ ។ តើរឿងនេះបានកើតឡើងយ៉ាងដូចម្ដេច ? ផ្នែកនៃចម្លើយនោះអាចរកបាននៅក្នុងពាក្យសម្ដីរបស់ស្ទេផាន ៖ « អ្នករាល់គ្នាចេះតែទាស់ទទឹង នឹងព្រះវិញ្ញាណបរិសុទ្ធជាដរាប » ( កិច្ចការ ៧:៥១ ) ។ តើបងប្អូនគិតថា ការទាស់ទទឹងនឹងព្រះវិញ្ញាណមានន័យយ៉ាងណា ? ហេតុអ្វីក៏ការទាស់ទទឹងនឹងព្រះវិញ្ញាណបរិសុទ្ធអាចនាំទៅរកការបដិសេធព្រះអង្គសង្គ្រោះ និងពួកអ្នកបម្រើរបស់ទ្រង់ ?

នៅពេលបងប្អូនអាន កិច្ចការ ៦–៧ សូមស្វែងរកសារលិខិតផ្សេងទៀតដែលស្ទេផាន បានបង្រៀនដល់ពួកសាសន៍យូដា ។ តើគាត់ព្រមានទាស់នឹងអាកប្បកិរិយាអ្វីខ្លះ ? តើបងប្អូនសង្កេតឃើញអាកប្បកិរិយាស្រដៀងគ្នានេះមាននៅក្នុងខ្លួនបងប្អូនឬទេ ? តើពាក្យសម្ដីរបស់ស្ទេផានបង្រៀនបងប្អូនអ្វីខ្លះ អំពីលទ្ធផលនៃការទាស់ទទឹងនឹងព្រះវិញ្ញាណបរិសុទ្ធ ? តើបងប្អូនអាចកាន់តែងាយដឹង និងឆ្លើយតបតាមការបំផុសគំនិតពីព្រះវិញ្ញាណបរិសុទ្ធនៅក្នុងជីវិតរបស់បងប្អូនយ៉ាងដូចម្ដេច ?

សូមមើលផងដែរ « The Martyrdom of Stephen » ( វីដេអូ ) នៅលើគេហទំព័រ ChurchofJesusChrist.org ។

កិច្ចការ ៨:២៦–៣៩

ព្រះវិញ្ញាណបរិសុទ្ធនឹងជួយខ្ញុំឲ្យដឹកនាំមនុស្សដទៃទៅរកព្រះយេស៊ូវគ្រីស្ទ ។

តើបងប្អូនរៀនអ្វីខ្លះអំពីការចែកចាយដំណឹងល្អមកពីដំណើររឿងនៅក្នុង កិច្ចការ ៨:២៦–៣៩ ? តើព្រះវិញ្ញាណបរិសុទ្ធបានជួយភីលីពតាមរបៀបណា ? តើការចែកចាយដំណឹងល្អជាមួយមនុស្សដទៃគឺដូចជាការដឹកនាំមួយយ៉ាងដូចម្ដេច ? ( សូមមើល កិច្ចការ ៨:៣១ ) ។

អែលឌើរ អូលីសេស សូរ៉េស បានមានប្រសាសន៍ថា ដំណើររឿងនេះ « គឺជាការរំឭកមួយអំពីការត្រាស់បង្គាប់ពីព្រះដែលយើងទាំងអស់គ្នាត្រូវស្វែងរកការរៀនសូត្រ និងបង្រៀនគ្នាទៅវិញទៅមកអំពីដំណឹងល្អនៃព្រះយេស៊ូវគ្រីស្ទ ។ … យើងពេលខ្លះដូចជាសាសន៍អេធីយ៉ូពីដែរ— យើងត្រូវការជំនួយរបស់គ្រូបង្រៀនស្មោះត្រង់ និងបំផុសគំនិត ហើយយើងពេលខ្លះដូចជា ភីលីព— យើងចាំបាច់ត្រូវបង្រៀន និងពង្រឹងការផ្លាស់ប្រែចិត្តជឿរបស់អ្នកដទៃ » ( « How Can I Understand? » Liahona ខែ ឧសភា ឆ្នាំ ២០១៩ ទំព័រ ៦ ) ។ សូមពិចារណាក្នុងការអានសារលិខិតនៅសល់ទាំងប៉ុន្មានរបស់អែលឌើរ សូរ៉េស ហើយសញ្ជឹងគិតអំពីរបៀបដែលព្រះវិញ្ញាណបរិសុទ្ធអាចជួយបងប្អូនឲ្យក្លាយជាអ្នករៀន និងអ្នកបង្រៀនដំណឹងល្អដែលកាន់តែប្រសើរឡើង ។

កិច្ចការ ៩

នៅពេលខ្ញុំចុះចូលតាមព្រះទ័យរបស់ព្រះអម្ចាស់ នោះខ្ញុំអាចក្លាយជាឧបករណ៍មួយនៅក្នុងព្រះហស្តរបស់ទ្រង់ ។

ការប្រែចិត្តជឿរបស់សុលហាក់ដូចជាឆាប់ខ្លាំងណាស់ គាត់ផ្លាស់ពីការចាប់ពួកគ្រិស្តសាសនិកដាក់គុក មកជាផ្សាយអំពីព្រះគ្រីស្ទនៅក្នុងសាលាប្រជុំវិញយ៉ាងឆាប់រហ័ស ។ នៅពេលបងប្អូនអានដំណើររឿងរបស់គាត់ សូមពិចារណាថា ហេតុអ្វីក៏គាត់មានឆន្ទៈផ្លាស់ប្ដូរយ៉ាងខ្លាំងដូច្នេះ ។ ( ដើម្បីអានការពិពណ៌នាផ្ទាល់ខ្លួនរបស់សុលអំពីការផ្លាស់ប្រែចិត្តជឿរបស់គាត់ សូមមើល កិច្ចការ ២២:១–១៦ និង ២៦:៩–១៨ ។ សូមកត់ចំណាំថា នៅក្នុងដំណើររឿងទាំងនេះ សុលហៅឈ្មោះជាប៉ុលវិញ [ សូមមើល កិច្ចការ ១៣:៩ ] ) ។

ខណៈដែលវាគឺជារឿងពិតដែលបទពិសោធន៍របស់សុលគឺជារឿងខុសប្រក្រតី—ចំពោះមនុស្សភាគច្រើន ការប្រែចិត្តជឿមានដំណើរការដ៏យូរអង្វែងមួយ—តើមានអ្វីខ្លះដែលបងប្អូនអាចរៀនមកពីសុលអំពីការផ្លាស់ប្រែចិត្តជឿនេះ ? តើបងប្អូនរៀនអ្វីខ្លះពីរបៀបដែលអាន្ន៉ានាស និងពួកសិស្សដទៃទៀតមានប្រតិកម្មចំពោះការផ្លាស់ប្រែចិត្តជឿរបស់សុល ? តើបងប្អូននឹងធ្វើអ្វីខ្លះដើម្បីអនុវត្តការបង្រៀនទាំងនេះនៅក្នុងជីវិតរបស់បងប្អូន ? បងប្អូនអាចចាប់ផ្ដើមសួរនៅក្នុងការអធិស្ឋាន ដូចជាសុលបានធ្វើ « តើទ្រង់សព្វព្រះហឫទ័យឲ្យទូលបង្គំធ្វើដូចម្ដេច ? »

នៅពេលបងប្អូនអាន កិច្ចការ ៩:៣៦–៤២ សូមពិចារណាពីរបៀបដែលនាងតេប៊ីថាជាឧបករណ៍មួយនៅក្នុងព្រះហស្ដរបស់ព្រះ ។ តើអ្វីដែលបំផុសគំនិតលដល់បងប្អូនអំពីគំរូរបស់នាង ?

សូមមើលផងដែរ ឌៀថើរ អេហ្វ អុជដូហ្វ « Waiting on the Road to Damascus » Liahona ខែ ឧសភា ឆ្នាំ ២០១១ ទំព័រ ៧០–៧៧; « The Road to Damascus » ( វីដេអូ ) នៅលើគេហទំព័រ ChurchofJesusChrist.org ។

គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្នុងគ្រួសារ

កិច្ចការ ៦:៨; ៧:៥១–៦០ ។សូមប្រៀបធៀបដំណើររឿងរបស់ស្ទេផាននៅក្នុង កិច្ចការ ៦:៨ និង កិច្ចការ ៧:៥១–៦០ ទៅនឹងដំណើររឿងរបស់ព្រះអង្គសង្គ្រោះនៅក្នុង លូកា ២៣:១–៤៦ ។ តើស្ទេផានបានធ្វើតាមគំរូរបស់ព្រះអង្គសង្គ្រោះយ៉ាងដូចម្ដេច ?

កិច្ចការ ៧:៥១–៦០ ។តើព្រះវិញ្ញាណបរិសុទ្ធបានប្រទានពរដល់ស្ទេផានយ៉ាងដូចម្ដេច នៅពេលគាត់ត្រូវបានគេបៀតបៀន ? តើនៅពេលណាដែលយើងបានទទួលកម្លាំងមកពីព្រះវិញ្ញាណបរិសុទ្ធក្នុងអំឡុងពេលលំបាក ?

កិច្ចការ ៩:៥ ។ជន្លួញ គឺជាលំពែងស្រួច ដែលប្រើដើម្បីដឹកសត្វ ។ ជាញឹកញាប់ សត្វពាហនៈនឹងធាក់ជល់នឹងជន្លួញ ដែលបណ្ដាលឲ្យលំពែងចាក់កាន់តែជ្រៅទៅក្នុងសាច់របស់សត្វ ។ តើនៅពេលខ្លះការប្រៀបធៀបនេះអាចអនុវត្តចំពោះយើងយ៉ាងដូម្តេច ? តើយើងអាចធ្វើអ្វីខ្លះ ដើម្បីទទួលការកែតម្រូវពីព្រះអម្ចាស់កាន់តែប្រសើរឡើង ?

ពេត្រុសប្រោសតេប៊ីថាពីស្លាប់ — តេប៊ីថាបានប្រោសរស់ឡើងវិញ ដោយ សានឌី ហ្វ្រែក្លីតុន ហ្គាហ្គុន

កិច្ចការ ៩:៣២–៤៣ ។សូមពិចារណាធ្វើការអញ្ជើញសមាជិកគ្រួសារបងប្អូនឲ្យគូររូបពីដំណើររឿងនៅក្នុង កិច្ចការ ៩:៣២–៤៣ ។ តើយើងរៀនអ្វីខ្លះអំពីភាពជាសិស្សដ៏ពិតមកពីរឿងទាំងនេះ ? តើមនុស្សម្នាក់ដែល « បានធ្វើគុណជាច្រើន » ដូចជានាងតេប៊ីថា អាចជួយមនុស្សដទៃទៀតឲ្យជឿលើព្រះអម្ចាស់យ៉ាងដូចម្ដេច ? ( សូមមើល កិច្ចការ ៩:៣៦; « ជំពូក ៦០ ៖ ពេត្រុសធ្វើឲ្យតេប៊ីថារស់ឡើងវិញ » ( នៅក្នុង ដំណើររឿងព្រះគម្ពីរសញ្ញាថ្មី ទំព័រ ១៥៦–៥៧ ឬវីដេអូដូចគ្នានោះ នៅលើគេហទំព័រ ChurchofJesusChrist.org ) ។

សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់អង្គការបឋមសិក្សា ។

ទំនុកតម្កើងដែលលើកទឹកចិត្តឲ្យប្រើ ៖ « ខ្ញុំនឹងទៅដែលទ្រង់ឲ្យខ្ញុំទៅ » ទំនុកតម្កើង ល.រ. ១៦៨ ។

ការកែលម្អដល់ការសិក្សាផ្ទាល់ខ្លួន

ប្រដូចបទគម្ពីរមកជីវិតរបស់បងប្អូន ។ នៅពេលបងប្អូនអាន សូមពិចារណាអំពីរបៀបដែលដំណើររឿង និងការបង្រៀននៅក្នុងបទគម្ពីរអនុវត្តនៅក្នុងជីវិតរបស់បងប្អូន ។ ឧទាហរណ៍ តើឱកាសអ្វីខ្លះដែលបងប្អូនមានដើម្បីបម្រើដល់មនុស្សដទៃទៀត ដូចជានាងតេប៊ីថាបានធ្វើនៅក្នុង កិច្ចការ ៩:៣៦–៣៩ ?

ស្ទេផានត្រូវគេចោលនឹងដុំថ្មរហូតដល់ស្លាប់ — « គេចោលស្ទេផាននឹងថ្ម កំពុងដែលគាត់ទូលអង្វរដល់ព្រះថា ឱ ព្រះអម្ចាស់យេស៊ូវអើយ សូមទទួលវិញ្ញាណទូលបង្គំផង » ( កិច្ចការ ៧:៥៩ ) ។