« ថ្ងៃទី ១៣–១៩ ខែ វិច្ឆិកា ។ យ៉ាកុប ៖ ‹ ចូរឲ្យអ្នករាល់គ្នាប្រព្រឹត្តតាមព្រះបន្ទូលទៅ កុំឲ្យគ្រាន់តែស្ដាប់ប៉ុណ្ណោះ › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )

« ថ្ងៃទី ១៣–១៩ ខែ វិច្ឆិកា ។ យ៉ាកុប » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២៣

រូបភាព

យុវវ័យកំពុងសម្អាតជញ្ជាំង

ថ្ងៃទី ១៣–១៩ ខែ វិច្ឆិកា

យ៉ាកុប

« ចូរឲ្យអ្នករាល់គ្នាប្រព្រឹត្តតាមព្រះបន្ទូលទៅ កុំឲ្យគ្រាន់តែស្ដាប់ប៉ុណ្ណោះ »

នៅពេលបងប្អូនអាន សំបុត្ររបស់យ៉ាកុប សូមយកចិត្តទុកដាក់ទៅលើឃ្លាដែលលេចធ្លោចំពោះបងប្អូន ។ តើបងប្អូនទទួលការបំផុសឲ្យធ្វើជា « អ្នកប្រព្រឹត្តតាម » យ៉ាងដូចម្តេច ? ( យ៉ាកុប ១:២២ ) ។

កត់ត្រាចំណាប់អារម្មណ៍របស់បងប្អូន

ពេលខ្លះ គ្រាន់តែបទគម្ពីរមួយខក៏អាចផ្លាស់ប្ដូរពិភពលោកបានដែរ ។ យ៉ាកុប ១:៥ ហាក់ដូចជាការទូន្មានដ៏តូចមួយប៉ុណ្ណោះ—បើបងប្អូនត្រូវការប្រាជ្ញា ចូរសូមដល់ព្រះ ។ ប៉ុន្តែនៅពេលយ៉ូសែប ស៊្មីធ ដែលមានអាយុ ១៤ ឆ្នាំ បានអានខគម្ពីរនោះ វា « មើលទៅហាក់បីដូចជាចូលមកពេញដួងចិត្តខ្ញុំដោយឥទ្ធិពលដ៏មហិមា » ( យ៉ូសែប ស្ម៊ីធ—ប្រវត្តិ ១:១២ ) ។ ការណ៍នេះបានបំផុសគំនិត យ៉ូសែប ឲ្យធ្វើតាមការដាស់តឿនរបស់យ៉ាកុប ហើយស្វែងរកប្រាជ្ញាមកពីព្រះតាមរយៈការអធិស្ឋាន ។ ហើយព្រះពិតជាបានប្រទានសេរីភាព ដោយប្រទានដល់យ៉ូសែបនូវការនិមិត្តពីសួគ៌ាដ៏អស្ចារ្យបំផុតមួយនៅក្នុងប្រវត្តិសាស្ត្រមនុស្សគឺ—ការនិមិត្តដំបូង ។ ការនិមិត្តនេះបានផ្លាស់ប្ដូរទិសដៅនៃជីវិតរបស់យ៉ូសែប ហើយបាននាំទៅរកការស្ដារឡើងវិញនៃសាសនាចក្ររបស់ព្រះយេស៊ូវគ្រីស្ទនៅលើផែនដីនេះ ។ យើងទាំងអស់គ្នាត្រូវបានប្រទានពរសព្វថ្ងៃនេះ ដោយសារយ៉ូសែប ស្ម៊ីធ បានអាន ហើយធ្វើតាម យ៉ាកុប ១:៥ ។

តើបងប្អូននឹងរកឃើញអ្វីខ្លះ នៅពេលបងប្អូនសិក្សា សំបុត្ររបស់យ៉ាកុប ? ប្រហែលជាមួយ ឬពីរខគម្ពីរនឹងផ្លាស់ប្ដូរបងប្អូន ឬនរណាម្នាក់ដែលបងប្អូនស្រឡាញ់ ។ បងប្អូនអាចនឹងរកឃើញការណែនាំ នៅពេលបងប្អូនព្យាយាមបំពេញបេសកកម្មនៅក្នុងជីវិតរបស់បងប្អូន ។ បងប្អូនអាចនឹងរកឃើញការលើកទឹកចិត្តដើម្បីនិយាយដោយសន្ដានចិត្តល្អ ឬឲ្យកាន់តែមានការអត់ធ្មត់ ។ បងប្អូនអាចមានអារម្មណ៍បំផុសធ្វើឲ្យសកម្មភាពរបស់បងប្អូនស្របនឹងសេចក្ដីជំនឿរបស់បងប្អូនកាន់តែប្រសើរឡើង ។ អ្វីក៏ដោយដែលបំផុសគំនិតបងប្អូន សូមឲ្យពាក្យទាំងនេះ « ចូលមកពេញដួងចិត្ត [ បងប្អូន ]… » ។ ហើយបន្ទាប់មក នៅពេលបងប្អូន « ទទួលព្រះបន្ទូល … ដោយចិត្តសុភាព » ដូចជាយ៉ាកុបបានសរសេរ ចូរធ្វើជាអ្នកប្រព្រឹត្តតាមព្រះបន្ទូលទៅ កុំឲ្យគ្រាន់តែស្តាប់ប៉ុណ្ណោះឡើយ ( សូមមើល យ៉ាកុប ១:២១–២២ ) ។

រូបភាព

រូបសញ្ញាការសិក្សាផ្ទាល់ខ្លួន

គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន

តើយ៉ាកុបជានរណា ?

ជាទូទៅ វាត្រូវបានជឿថាអ្នកនិពន្ធ សំបុត្ររបស់យ៉ាកុប គឺជាកូនប្រុសរបស់ម៉ារា ដែលជាមាតារបស់ព្រះយេស៊ូវគ្រីស្ទ ហើយហេតុដូច្នេះគាត់គឺជាបងប្អូនប្រុសម្ដាយតែមួយនឹងព្រះអង្គសង្គ្រោះ ។ យ៉ាកុបត្រូវបានលើកឡើងនៅក្នុង ម៉ាថាយ ១៣:៥៥; ម៉ាកុស ៦:៣; កិច្ចការ ១២:១៧; ១៥:១៣; ២១:១៨ និង កាឡាទី ១:១៩; ២:៩ ។ វាបង្ហាញឲ្យឃើញមកពីបទគម្ពីរទាំងនេះថា យ៉ាកុបគឺជាអ្នកដឹកនាំម្នាក់ក្នុងសាសនាចក្រនៅទីក្រុងយេរូសាឡិម ហើយត្រូវបានហៅថាជាសាវកមួយរូប ( សូមមើល កាឡាទី ១:១៩ ) ។

យ៉ាកុប ១:២–៤; ៥:៧–១១

ការស៊ូទ្រាំអត់ធ្មត់ដឹកនាំទៅរកភាពល្អឥតខ្ចោះ ។

បន្ទាប់ពីការអាន យ៉ាកុប ១:២–៤; ៥:៧–១១ តើបងប្អូននឹងនិយាយយ៉ាងណាអំពីសារលិខិតចម្បងរបស់យ៉ាកុបអំពីការអត់ធ្មត់ ? វាអាចជួយបាន ដើម្បីគិតអំពីអ្វីដែលគ្រួសារអែលឌើរ ជែរមី អ័រ ចាហ្គី បានរៀនអំពីការអត់ធ្មត់ចេញពីខគម្ពីរទាំងនេះ ( សូមមើល « Let Patience Have Her Perfect Work, and Count It All Joy! » Liahona ខែ វិច្ឆិកា ឆ្នាំ ២០២០ ទំព័រ ៩៩–១០១ ) ។ តើអ្វីទៅជាការ « ធ្វើការឲ្យសម្រេចពេញលេញ » នៃការអត់ធ្មត់ ? ( យ៉ាកុប ១:៤ ) ។ តើបងប្អូនអាចបង្ហាញព្រះអម្ចាស់យ៉ាងដូចម្ដេចថា បងប្អូនមានឆន្ទៈដើម្បីមានភាពអត់ធ្មត់ ?

យ៉ាកុប ១:៣–៨, ២១–២៥; ២:១៤–២៦; ៤:១៧

សេចក្តីជំនឿតម្រូវឲ្យមានសកម្មភាព ។

តើបងប្អូនអាចដឹងថា បងប្អូនមានសេចក្ដីជំនឿទៅលើព្រះយេស៊ូវគ្រីស្ទយ៉ាងដូចម្ដេច ? តើកិច្ចការរបស់បងប្អូនបង្ហាញពីសេចក្ដីជំនឿរបស់បងប្អូនទៅលើព្រះយ៉ាងដូចម្ដេច ? សូមគិតអំពីសំណួរទាំងនេះ នៅពេលបងប្អូនសិក្សាពីការបង្រៀនរបស់យ៉ាកុបអំពីសេចក្ដីជំនឿ ។ វាអាចនឹងគួរឲ្យចាប់អារម្មណ៍ដើម្បីអានអំពីអ័ប្រាហាំ និង រ៉ាហាប ជាគំរូទាំងពីរដែលយ៉ាកុបបានថ្លែងផងដែរ ( សូមមើល លោកុប្បត្តិ ២២:១–១២; យ៉ូស្វេ ២ ) ។ តើពួកលោកបានបង្ហាញថា ពួកលោកមានសេចក្ដីជំនឿទៅលើព្រះយ៉ាងដូចម្ដេច ?

ការអាន យ៉ាកុប ១:៣–៨, ២១–២៥; ២:១៤–២៦; ៤:១៧ អាចជួយបងប្អូនឲ្យគិតអំពីវិធីដែលបងប្អូនអាចធ្វើជាអ្នកធ្វើតាមព្រះបន្ទូលបានកាន់តែល្អប្រសើរ ។ សូមកត់ត្រាចំណាប់អារម្មណ៍ទាំងឡាយដែលបងប្អូនបានទទួល ហើយធ្វើផែនការដើម្បីអនុវត្តតាមវា ។

សូមមើលផងដែរ អាលម៉ា ៣៤:២៧–២៩; នីហ្វៃទី៣ ២៧:២១ ។

« អ័ប្រាហាំបានជឿដល់ព្រះ ហើយសេចក្តីនោះបានរាប់ជាសេចក្តីសុចរិតដល់លោក » ( យ៉ាកុប ២:២៣ ) ។ អ័ប្រាហាំនៅលើវាលទំនាបម៉ាមរេ ដោយ ហ្គ្រែន រ៉មនី ខ្ល័រសុន

យ៉ាកុប ១:២៦; ៣:១–១៨

ពាក្យសម្ដីដែលខ្ញុំនិយាយមានអំណាចធ្វើឲ្យអ្នកដទៃឈឺចាប់ ឬប្រទានពរដល់អ្នកដទៃ ។

នៅក្នុងចំណោមការប្រៀបធៀបអំពីអ្នកមាន ដែលយ៉ាកុបបានប្រើនៅក្នុងសំបុត្ររបស់លោក ភាសាច្បាស់លាស់បំផុតមួយចំនួនរបស់លោក គឺអាចរកបាននៅក្នុងការទូន្មានរបស់លោក អំពី ភាសានិយាយ ។ សូមពិចារណាធ្វើជាបញ្ជីមួយអំពីរបៀបទាំងអស់ដែលយ៉ាកុបបានពិពណ៌នាអំពីអណ្ដាត ឬមាត់ ។ តើការប្រៀបធៀប ឬរូបភាពនីមួយៗផ្ដល់យោបល់អំពីពាក្យសម្ដីដែលយើងនិយាយអ្វីខ្លះ ? សូមគិតអំពីអ្វីមួយដែលបងប្អូនអាចធ្វើដើម្បីផ្ដល់ពរជ័យដល់នរណាម្នាក់ដោយពាក្យសម្ដីរបស់បងប្អូន ( សូមមើល គោលលទ្ធិ និង សេចក្ដីសញ្ញា ១០៨:៧ ) ។

យ៉ាកុប ២:១–៩

ក្នុងនាមជាសិស្សមួយរូបរបស់ព្រះយេស៊ូវគ្រីស្ទ ខ្ញុំគួរតែស្រឡាញ់មនុស្សទាំងអស់ មិនថាស្ថានភាពរបស់ពួកគេជាយ៉ាងណានោះទេ ។

យ៉ាកុបបានព្រមានដល់ពួកបរិសុទ្ធជាពិសេសកុំឲ្យចូលចិត្តអ្នកមាន ហើយស្អប់អ្នកក្រីក្រឡើយ ប៉ុន្តែការព្រមានរបស់លោកអាចប្រើចំពោះការលំអៀង ឬការកាត់សេចក្ដីមនុស្សជាមុនដែលយើងអាចមានចំពោះមនុស្សដទៃ ។ នៅពេលបងប្អូនសិក្សា យ៉ាកុប ២:១–៩ ប្រកបដោយការអធិស្ឋាន សូមស្វែងយល់ក្នុងចិត្តរបស់បងប្អូន ហើយស្ដាប់ការបំផុសគំនិតរបស់ព្រះវិញ្ញាណបរិសុទ្ធ ។ ការដាក់ជំនួសឃ្លាទាំងឡាយនៅក្នុងខគម្ពីរទាំងនេះ ដូចជា « អ្នកក្រម្នាក់ស្លៀកពាក់កខ្វក់ » ( ខទី ២ ) ជាមួយនឹងពាក្យ ឬឃ្លាផ្សេងទៀតដែលពិពណ៌នានរណាម្នាក់ ដែលបងប្អូនអាចនឹងត្រូវបានល្បួងឲ្យវិនិច្ឆ័យដោយមិនយុត្តិធម៌ អាចនឹងជួយបាន ។ តើបងប្អូនមានដឹងពីការផ្លាស់ប្ដូរដែលបងប្អូនចាំបាច់ត្រូវធ្វើនៅក្នុងការប្រព្រឹត្តិ ឬការគិតអំពីអ្នកដទៃដែរឬទេ ?

រូបភាព

រូបសញ្ញាការសិក្សាជាគ្រួសារ

គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្នុងគ្រួសារ

យ៉ាកុប ១:៥ ។បន្ទាប់ពីការអាន យ៉ាកុប ១:៥ ហើយ គ្រួសាររបស់បងប្អូនអាចសង្ខេបដំណើររឿងអំពីការនិមិត្តដំបូង ( សូមមើល យ៉ូសែប ស្ម៊ីធ—ប្រវត្តិ ១:៨–២០ ) ឬមើលវីដេអូ « Ask of God: Joseph Smith’s First Vision » បាន ( នៅលើគេហទំព័រ ChurchofJesusChrist.org ) ។ សូមអញ្ជើញសមាជិកគ្រួសារឲ្យចែកចាយទីបន្ទាល់របស់ពួកគេអំពីព្យាការី យ៉ូសែប ស្ម៊ីធ និងបទពិសោធន៍ទាំងឡាយនៅពេលព្រះវរបិតាសួគ៌បានឆ្លើយតបនឹងការអធិស្ឋានរបស់ពួកគេ ។

យ៉ាកុប ១:២៦–២៧ ។សូមពិចារណាក្នុងការមើលវីដេអូ « True Christianity » ( នៅលើគេហទំព័រ ChurchofJesusChrist.org ) ។ បន្ទាប់មក សូមអានការឲ្យនិយមន័យរបស់យ៉ាកុបអំពី« សាសនាបរិសុទ្ធ » នៅក្នុង យ៉ាកុប ១:២៦–២៧ ហើយពិភាក្សាអំពីរបៀបដែលគ្រួសាររបស់បងប្អូនអាចធ្វើការអនុវត្តសាសនារបស់បងប្អូនឲ្យកាន់តែបរិសុទ្ធ ។

យ៉ាកុប ៣ ។យ៉ាកុប ៣ មានបញ្ចូលនូវរូបភាពជាច្រើនដែលអាចបំផុសឲ្យគោលបំណងមេរៀនមានភាពគួរឲ្យចងចាំដើម្បីជួយសមាជិកគ្រួសាររបស់បងប្អូនឲ្យនិយាយគ្នាដោយសន្ដានចិត្តល្អ ។ ឧទាហរណ៍ បងប្អូនអាចបង្កាត់ភ្លើងជាមួយគ្នា ហើយនិយាយអំពីរបៀបដែលពាក្យសម្ដីមិនសប្បុសតែបន្តិចបន្តួច អាចបណ្ដាលឲ្យមានបញ្ហាធំបាន ( សូមមើល ខទី ៥–៦ ) ។ ឬបងប្អូនអាចយកអ្វីមួយជូរដាក់នៅក្នុងអ្វីមួយ ដែលជាធម្មតាត្រូវបានដាក់ក្នុងចំណីផ្អែមៗ—ដូចជាទឹកក្រូចឆ្មានៅក្នុងក្រឡទឹកឃ្មុំជាដើម ។ ការណ៍នេះអាចនាំឲ្យមានការពិភាក្សាមួយអំពីការប្រើប្រាស់ពាក្យសម្ដីផ្អែមល្ហែម និងលើកតម្កើង ( សូមមើលខទី ៩–១៤ ) ។

យ៉ាកុប ៤:៥–៨ ។ហេតុអ្វីក៏យើងគួរតែ « ចូលទៅជិតព្រះ » ( យ៉ាកុប ៤:៨ ) នៅពេលយើងជួបនឹងការល្បួង ?

យ៉ាកុប ៥:១៤–១៦ ។ប្រធាន ដាល្លិន អេក អូក បានបង្រៀនថា « ហើយឪពុកម្ដាយគួរលើកទឹកចិត្តឲ្យមានការប្រសិទ្ធពរបព្វជិតភាពឲ្យបានច្រើននៅក្នុងគ្រួសារ » ( « The Powers of the Priesthood » Liahona ខែ ឧសភា ឆ្នាំ ២០១៨ ទំព័រ ៦៧ ) ។ ប្រហែលជាការអាន យ៉ាកុប ៥:១៤–១៦ និងការចែកចាយបទពិសោធន៍អំពីការទទួលពរជ័យបព្វជិតភាព អាចលើកទឹកចិត្តសមាជិកគ្រួសារឲ្យទូលសូមពរជ័យមួយ ពេលដែលពួកគេឈឺ ឬត្រូវការកម្លាំងខាងវិញ្ញាណ ។

សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់អង្គការបឋមសិក្សា ។

ទំនុកតម្កើងដែលលើកទឹកចិត្តឲ្យប្រើ ៖ « តើខ្ញុំបានធ្វើល្អឬទេ ? » ទំនុកតម្កើង ល.រ. ១៣៨ ។

ការកែលម្អដល់ការសិក្សាផ្ទាល់ខ្លួន

អនុវត្តនូវអ្វីដែលបងប្អូនបានរៀន ។ នៅពេលបងប្អូនសិក្សា សូមស្ដាប់ការបំផុសគំនិតមកពីព្រះវិញ្ញាណអំពីរបៀបដែលបងប្អូនអាចអនុវត្តនូវអ្វីដែលបងប្អូនកំពុងរៀនទៅនឹងជីវិតរបស់បងប្អូន ។ សូមតាំងចិត្តធ្វើតាមការបំផុសគំនិតទាំងនេះ ហើយរស់នៅតាមដំណឹងល្អកាន់តែពេញលេញ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ៣៥ ) ។