tā ʻo e māmaní mo e māhiná

3–9 Sānuali

Sēnesi 1–2; Mōsese 2–3; ʻĒpalahame 4–5

“Naʻe Fakatupu ʻe he ʻOtuá ʻi he Kamataʻangá ʻa e Langí mo Māmani”

Tatau ai pē pe kuó ke lau fekauʻaki mo e Fakatupú kimuʻa, ʻoku ʻi ai maʻu pē ha meʻa lahi ange ke ako mei he ngaahi folofolá. Lotua ha fakahinohino mei he Laumālie Māʻoniʻoní ke tokoni ke ke maʻu ha mahino foʻou.

Lekooti e Ngaahi Ongo ʻOkú ke Maʻú

Koeʻuhí ʻoku mātuʻaki fakaʻofoʻofa mo fakaʻeiʻeiki ʻa e māmani ʻoku tau ʻi aí, ʻoku faingataʻa ai ke fakakaukauloto ki he māmaní ʻi he taimi naʻe “fuofuonoa … mo lala” aí (Sēnesi 1:2; ʻĒpalahame 4:2). Ko e me‘a ʻe taha ʻoku akoʻi mai ʻe he talanoa ʻo e Fakatupú, ʻe lava ʻe he ʻOtuá ʻo ngaohi ha meʻa fakaʻeiʻeiki mei ha meʻa fuofuonoa. ʻOku tokoni ke manatuʻi ia ʻi he taimi ʻoku ngali moveuveu ai ʻa e moʻuí. Ko e Tamai Hēvaní mo Sīsū Kalaisi ʻa e Tupuʻangá, pea ʻoku ʻikai ʻosi ʻa ʻEna ngāue fakatupu kiate kitautolú. Te Na lava ʻo fakamaama ʻa e ngaahi momeniti fakapoʻuli ʻi heʻetau moʻuí. Te Na lava ʻo fokotuʻu ha tuʻunga pau ʻi he lotolotonga ʻo e ngaahi tahi hou ʻi he moʻuí. Te Na lava ʻo fekauʻi ʻa e ngaahi meʻá, pea kapau te tau talangofua ki Heʻena folofolá ʻo hangē ko ia naʻe fai ʻe he ngaahi meʻá, te Na lava ʻo liliu kitautolu ki he ngaahi fakatupu fakaʻofoʻofa naʻe fakataumuʻa kitautolu ki aí. Ko e konga ia ʻo e ʻuhinga ke fakatupu ʻi he ʻīmisi ʻo e ʻOtuá, ʻo hangē ko Iá (vakai, Sēnesi 1:26). ‘Oku tau malava ʻo hoko ʻo hangē ko Iá: ko ha kakai hākeakiʻi, nāunauʻia, mo fakasilesitiale.

Ke maʻu ha vakai fakalūkufua ki he tohi ʻa Sēnesí, vakai, “Sēnesi” ʻi he Fakahinohino ki he Ngaahi Folofolá.

fakaʻilonga ʻo e ako fakatāutahá

Ngaahi Fakakaukau ki Hono Ako Fakataautaha ʻo e Folofolá

Sēnesi 1:1–25; Mōsese 2:1–25; ʻĒpalahame 4:1–25

Naʻe fakatupu ʻe Sīsū Kalaisi ʻa e māmaní, ʻi he malumalu ʻo e fakahinohino ʻa e Tamai Hēvaní.

Naʻe pehē ʻe ʻEletā D. Toti Kulisitofasoni, “ʻOku tatau ai pē pe ko e hā e fakaikiiki ki he founga ʻo e fakatupú, ʻoku tau ʻilo naʻe ʻikai ke fakatuʻupakē, ka naʻe tataki ia ʻe he ʻOtua ko e Tamaí pea fakahoko ia ʻe Sīsū Kalaisi” (“ ʻUhinga ʻo e Malí, ʻUhinga ʻo e Fāmilí,” Liahona, Mē 2015, 51). Neongo ʻoku lahi e meʻa ʻoku ʻikai ke tau ʻiloʻi fekauʻaki mo e founga pau naʻe fakatupu ai ʻa e māmaní, ka ke fakalaulauloto ki he meʻa ʻokú ke ako fekauʻaki mo e Fakatupú mei he meʻa kuo fakahā ʻe he ʻOtuá ʻi he Sēnesi1:1–25; Mōsese 2:1–25; mo e ʻĒpalahame 4:1–25. Ko e hā ʻokú ke fakatokangaʻi ʻoku faitatau ʻi he ngaahi fakamatala ko ʻení? Ko e hā ʻokú ke fakatokangaʻi ʻoku kehé? Ko e hā ha ngaahi fakakaukau ʻokú ke maʻu fekauʻaki mo e Tamai Hēvaní mo Sīsū Kalaisi ʻi hoʻo lau fekauʻaki mo e Fakatupú?

Vakai foki, Tokāteline mo e Ngaahi Fuakava 101:32–34.

monomono ʻoku fakaʻaliʻali ai e ngaahi tuʻunga kehekehe ʻo e fakatupú

Fakatupú, tā fakatātaaʻi ʻe Joan Hibbert Durtschi

Sēnesi 1:27–28; 2:18–25; Mōsese 3:18, 21–25; ʻĒpalahame 5:14–19

Ko e mali ʻi he vahaʻa ʻo ha tangata mo ha fefiné ko e tuʻutuʻuni ia ʻa e ʻOtuá.

“Naʻe fakatahaʻi ʻa ʻĀtama mo ʻIvi ʻi he mali ki taimi mo hono kotoa ʻo e nofo taʻengatá ʻaki e mālohi ʻo [e] lakanga fakataulaʻeiki taʻengatá” (Russell M. Nelson, “Lessons from Eve,” Ensign, Nov. 1987, 87). Ko e hā ʻoku mahuʻinga ai ke ʻiloʻi ʻa e moʻoni ko ʻení? Fakalaulauloto ki heni ʻi hoʻo lau ʻa e Sēnesi 1:27–28; 2:18–25; Mōsese 3:18, 21–25; mo e ʻĒpalahame 5:14–19. Kapau ‘okú ke fie ako lahi ange fekauʻaki mo e malí ʻi he palani ʻa e ʻOtuá, lau mo fakalaulauloto ki he ngaahi maʻuʻanga tokoni ʻoku ʻoatu ʻi laló. Ko e hā ʻoku ueʻi koe ʻe he ngaahi maʻuʻanga tokoni ko ʻení ke ke fai ke fakaleleiʻi hoʻo nofo-malí pe teuteu ki he malí ʻi he kahaʻú?

Vakai foki, Mātiu 19:4–6; 1 Kolinitō 11:11; Linda K. Burton, “Te ta Kaka Fakataha,” Liahona, Mē 2015, 29–32; “Ko e Fāmilí: Ko ha Fanongonongo ki Māmani,” ChurchofJesusChrist.org.

Sēnesi 2:2–3; Mōsese 3:2–3; ʻĒpalahame 5:2–3

Naʻe tāpuakiʻi mo fakamāʻoniʻoniʻi ʻe he ʻOtuá ʻa e ʻaho Sāpaté.

Naʻe ngaohi ʻe he ʻOtuá ʻa e ʻaho Sāpaté ke māʻoniʻoni, pea ʻokú Ne kole mai ke tau tauhi ia ke māʻoniʻoni. Naʻe akonaki ʻa ʻEletā Tēvita A. Petinā ʻo pehē, “Ko e Sāpaté ko e taimi ia ʻa e ʻOtuá, ko ha taimi toputapu ne tuku pau ke hū ai kiate Ia pea maʻu mo manatua ʻEne ngaahi talaʻofa lahi ʻaupito mo mahuʻingá” (“Ngaahi Talaʻofa Lahi ʻAupito mo Mahuʻingá,” Liahona, Nōvema 2017, 92). Te ke fakaʻaongaʻi fēfē ʻa e fakamatala ko ʻení mo e Sēnesi 2:2–3; Mōsese 3:2–3; pe ʻĒpalahame 5:2–3 ke fakamatalaʻi ki ha taha e ʻuhinga ʻokú ke fili ai ke tauhi ʻa e ʻaho Sāpaté? Kuo tāpuekina fēfē koe ʻe he ʻEikí ʻi hoʻo tauhi Hono ʻahó ke māʻoniʻoní?

Vakai foki, ʻĪsaia 58:13–14; Tokāteline mo e Ngaahi Fuakava 59:9–13 .

family study icon

Ngaahi Fakakaukau ki Hono Ako Fakafāmili ʻo e Folofolá mo e Efiafi ʻi ʻApí

Sēnesi 1:1–25; Mōsese 2:1–25; ʻĒpalahame 4:1–25.Te ke lava fēfē ʻo ʻai e ako kau ki he Fakatupú ke fakafiefia ki homou fāmilí? Te ke lava ʻo ʻave homou fāmilí ke nau fekumi ʻi tuʻa ki he faʻahinga meʻa naʻe ngaohi lolotonga e vahaʻataimi takitaha ʻi he talanoa ʻo e Fakatupú, ʻo hangē ko e ngaahi fetuʻú, ʻulu ʻakaú, pe fanga monumanú. Te ke lava foki ‘o fakaʻaliʻali ha ʻū tā ʻo e ngaahi meʻa naʻe fakatupu ʻi he vahaʻataimi takitaha pea fakaafeʻi e kau mēmipa ʻo e fāmilí ke nau fokotuʻutuʻu fakahokohoko ʻa e ʻū taá hili hono lau fakataha ha taha ʻo e ngaahi fakamatala ki he Fakatupú. Ko e hā ʻoku akoʻi mai ʻe he ngaahi fakatupu ko ʻení fekauʻaki mo e Tamai Hēvaní mo Sīsū Kalaisí?

Sēnesi 1; Mōsese 2; ʻĒpalahame 4.Ko e founga ʻe taha ke lau ai e talanoa ki he Fakatupú ko hono fakaafeʻi homou fāmilí ke kumi e lahi ʻo e taimi ʻi he Sēnesi 1 pe Mōsese 2 ʻoku ui ai ʻe he ʻOtuá ʻa e ngaahi meʻa naʻá ne ngaohí ʻoku “lelei.” Ko e hā ʻoku fokotuʻu mai ʻe he meʻá ni fekauʻaki mo e tōʻonga ʻoku totonu ke tau fai ki he ngaahi fakatupu ʻa e ʻOtuá—kau ai kitautolú? Ko e hā ʻoku tau ako mei he founga ʻoku fakalea ai e ngaahi meʻa ko ʻeni naʻe hokó ʻi he ʻĒpalahame 4?

Sēnesi 1:26–27; Mōsese 2:26–27; ʻĒpalahame 4:26–27.Ko e hā ʻoku mahuʻinga ai ke ʻiloʻi naʻe fakatupu ʻa kitautolu ʻi he ʻīmisi ʻo e ʻOtuá? ‘Oku kaunga fēfē ia ki he anga ʻetau ongoʻi kau kiate kitautolú, niʻihi kehé, mo e ʻOtuá?

Kapau ʻoku ʻi ai haʻamou fānau iiki, mahalo te mou fie lau fakataha ʻa e Mōsese 2:27 pea fai ha kiʻi vaʻinga faingofua: Fakaʻaliʻali ha tā ʻoku hā ai ʻa e Tamai Hēvaní mo Sīsū Kalaisi, ʻo hangē ko e tā 90 ʻi he Tohi Fakatātā ʻo e Ongoongoleleí (2009), pea kole ki he kau mēmipa ʻo e fāmilí ke nau taufetongi ʻi he tuhu ki ha konga ʻo e sino ʻo e Tamai Hēvaní pe ko Sīsū. ʻE lava leva e kau mēmipa kehe ʻo e fāmilí ʻo tuhu ki he konga tatau ko iá ʻi honau sinó.

Sēnesi 1:28; Mōsese 2:28; ʻĒpalahame 4:28.“ʻOku kei tuʻu maʻu pē ʻa e fekau ko ia ʻa e ʻOtuá ki Heʻene fānaú ke nau fanafanau mo fakatokolahi ʻa māmaní” (“Ko e Fāmilí: Ko ha Fanongonongo ki Māmani,” ChurchofJesusChrist.org). ʻE lava e kau mēmipa ʻo e fāmilí ʻo tulamaʻi e founga ke fakamatalaʻi ai ʻetau tuí fekauʻaki mo e fekaú ni kiate kinautolu ʻoku ʻikai ke nau ʻilo ʻa e moʻoni ko ʻení pe kehe ʻenau tuí.

Sēnesi 1:28; Mōsese 2:28; ʻĒpalahame 4:28.ʻOku ʻuhinga nai ki he hā ke “pule ki he … meʻa moʻui kotoa pē ʻa ia ʻoku ʻalu holo ʻi he funga fonuá”? (vakai foki, Tokāteline mo e Ngaahi Fuakava 59:16–21). ʻE fakahoko fēfē ʻe hotau fāmilí hotau fatongia ke tokangaekina ʻa e māmaní?

Ke maʻu ha ngaahi fakakaukau lahi ange ki hono akoʻi ʻo e fānaú, vakai, fokotuʻutuʻu fakalēsoni ʻo e uike ní ʻi he Haʻu, ʻo Muimui ʻIate Au—Maʻá e Palaimelí.

Hiva ʻoku fokotuʻu atú: “ ʻOku ʻOfa ʻEku Tamai Hēvaní ʻIate Au,” Tohi Hiva ʻa e Fānaú, 16–17.

Fakatupulaki ʻEtau Founga Akoʻí

Fakaʻaongaʻi e folofolá ʻi heʻetau moʻuí. Hili hono lau ha potufolofolá, fakaafeʻi e kau mēmipa ʻo e fāmilí ke fakaʻaongaʻi ia ki heʻenau moʻuí. Hangē ko ʻení, ʻoku fakaʻaongaʻi fēfē ʻa e Mōsese 3:1–3 ki heʻetau tauhi ʻa e ʻaho Sāpaté ʻi he uike takitaha? (Vakai, Ko e Faiako ʻi he Founga ʻa e Fakamoʻuí, 21.)

ʻOku tuʻu ʻa Sīsū Kalaisi ʻi he lotolotonga ʻo e ngaahi ʻaó

Ko e Fakatupú, tā fakatātaaʻi ʻe Annie Henrie Nader