Kōmeļeļe eo kōn an Noa em̧akūt jān wa eo, jān Sam Lawlor

Jānwōde 31–Pāpode 6

Jenesis 6–11; Moses 8

“Noa Ear Lo Jouj Im̧aan Mejān Irooj”

Bwebwento ko ilo jeje ko rekwojarjar emaron̄ ekkā an katakin kōn elōn̄ katak ko an jetōb. Ilo am̧ riiti kōn Ibwijleplep Eo im Bebel Tawōr, kappukot im̧we kōn ekōjkan an bwebwenato kein jerbal iookwaj eok.

Je En̄jake ko Rej Im̧we Eok

Epepen ko an ro rej riit Baibōļ eo kar im̧we er kōn bwebwenato ko an Noa im Ibwijleplep eo. Ak kōj ro jej jokwe ilo raan ko āliktata ewōr unin bwe jen leļo̧k ad n̄an menin. Ke Jisōs Kraist ekar katakin kōn ekōjkan ad aikuj reim̧aanļo̧k n̄an Itok eo An Kein Karuo, E ekar ba, “Āinwōt ekar ilo raan ko an Noa, āindein enaaj bar āinwōt ilo itok eo an eo Nejin Armej” (Josep Smith—Matu 1:41). N̄an kakkobaba, naan ko me rej kōmeļeļeik raan eo an Noa, āinwōt “ettoon” im “ekar obrak kōn aitwerōk,” emaron̄ lukkuun kōmeļeļeik tōre kein ad (Jenesis 6:12–13; Moses 8:28). Bwebwenato in Tawōr Bebel ej iooktok raan kein ad, kōn kōmeļeļe eo an kōn utiej bōro ippān tok tarpok im jepelļo̧k ilubwiljin ajri ro nejin Anij.

Bwebwenato kein jān etto raorōk ejjab wōt kōnke rej kwaļo̧k n̄an kōj ke nana ej waļo̧k elōn̄ alen ilo bwebwenato kein make. Men eo eaorōktata, rej katakin kōj ta eo jemaron̄ kōm̧m̧ane kōn men in. Noa “ear lo jouj im̧aan mejān Irooj” (Moses 8:27) jekdo̧o̧n nana ko kar jepooļe. Im baam̧le ko an Jered im ļōmaro jein im jatin rekar oktakļo̧k n̄an Irooj im rekar kattoļo̧k er jān nana ilo Bebel (lale Ether 1:33–43). Eļan̄n̄e jej bwūlōn̄ kōn ekōjkan n̄an dāpij kōj make im baam̧le ko ad ilo ineem̧m̧an ilo tōre kein ad me eļap nana im aitwerōk ie, ekanooj lōn̄ men ko rej katakin kōj jān bwebwenato kein me jejjeļā kaki ilo jebta kein.

Ļōmņak ko n̄an Ekkatak Jeje Ko Rekwojarjar Ippam̧ Make

Jenesis 6; Moses 8.

Ewōr ineem̧m̧an ilo jetōb ilo ad ļoor rikanaan eo an Anij.

Kam̧m̧olool kōn jepļaaktok eo an gospel eo, jejeļā eļapļo̧k kōn Noa jān ta eo jej loe ilo Kallim̧ur M̧okta. Ukook eo an Josep Smith me eim̧we ilo Jenesis 6, ej pād ilo Moses 8, ej kwaļo̧k bwe Noa ekar juon iaan rikanaan ro rem̧m̧an an Anij. Kar kapit E im jilkinļo̧k n̄an kwaļo̧k gospel eo an Jisōs Kraist, ekar etetal im bwebwenato ippān Anij, im kar kāālet e n̄an bar ejaake ajri ro Nejin ilo laļ in ālkin Ibwijleplep eo (barāinwōt lale Teachings of Presidents of the Church: Joseph Smith [2007], 104, 201). Ta eo kwoj ekkatak kōn rikanaan ro jān en̄jake ko an Noa?

Ilo am̧ riit kōn raan ko an Noa, kwomaron̄ kile men ko rej āinļo̧k wōt juon n̄an raan kein? N̄an waanjon̄ak:

• Moses 8:18, 20–21, 23–24 (jum̧ae ko an ro rikarejaran Anij)

• Moses 8:21 (kōņaan an armej make im wūjwaan mour in)

• Moses 8:22 (kōļmenļo̧kjeņ ko rettoon im ļōmņak ko)

• Moses 8:28 (aitwerōk im jorrāān ko)

Ta ko rikanaan ro rej katakin ilo raan kein kōn gospel eo an Jisōs Kraist me emaron̄ dāpij eok ineem̧m̧an ilo laļ in rainin? Ilo am̧ riit kōn en̄jake ko an Noa, ta eo ej im̧we eok n̄an ļoor rikanaan ro an Irooj rainin?

Barāinwōt lale Mosaia 13:33; Katak im Bujen Ko 21:4–7.

Jenesis 9:8–17

Token ko ak kōkaļļe ko rej jipan̄ kōj keememej bujen ko ad ippān Irooj.

Bujen ko an gospel eo emaron̄ bōk jikin kōn juon kōkaļļe, kōkaļļein, ak “token” (Jenesis 9:12). N̄an waanjon̄ak, ļōmņak kōn ekōjkan an pilawe im dān ko ilo kwojkwoj eo ak dān in peptaij ko bōktok n̄an kōļmenļo̧kjeņ m̧ool ko rekwojarjar ko rej iookļo̧k bujen ko ad. Ekkar n̄an Jenesis 9:8–17, ta eo juon iia emaron̄ bōktok n̄an kōļmenļo̧kjeņ eo am̧? Ta eo Ukook eo an Josep Smith, Jenesis 9:21–25 (in Baibōļ appendix eo) ej kobaikwaj n̄an kōļmenļo̧kjeņ eo am̧? Etke Irooj ekōņaan bwe kwon keememej E im bujen ko kwaar kōm̧m̧ani?

Barāinwōt lale Gerrit W. Gong, “Keememej E Iien Otemjeļo̧k,” Liahona, Māe 2016, 108–11.

Jenesis 11:1–9

Wāween eo wōt n̄an tōpar lan̄ ej ilo ad ļoor Jisōs Kraist.

Bebel eo etto, ak Bābilon, eto aer kōjerbale āinwōt juon kōkaļļein nana im juwa ko an laļ (lale Revelesōn 18:1–10; Katak im Bujen Ko 133:14). Ilo am̧ ekkatak Jenesis 11:1–9, kejōkļo̧kjeņ kōn ļōmņak ko kar litok jān rikanaan Mormon, eo ekar je bwe kar Setan eo “eo wōt eaar likūt ilo buruōn armej ro n̄an kalōk juon im̧ōn bar ebwe an utiej bwe ren maron̄ tōparļo̧k lan̄” (Hilamōn 6:28; barāinwōt lale eoon ko 26–27). Ta kakkōl ko repād n̄an kwe ilo bwebwenato in Tawōr Bebel?

Barāinwōt lale Sam Ko 127:1.

Kōmeļeļe kōn Tawōr Bebel, jān David Green

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Jenesis 6–8.Ekōjkan am̧ maron̄ kōjerbal bwebwenato in wa eo waan Noa n̄an katakin baam̧le eo am̧ wāween ļoor rikanaan eo emaron̄ dāpij kōj ilo ineem̧m̧an eo an jetōb? (lale “Noah and His Family,” ilo Old Testament Stories). Bōlen baam̧le eo am̧ emaron̄ jerbal ippān doon n̄an kalōk juon wa kein ikkure kōn peba ak m̧ōttan aļaļ ko. Ilo am̧ riiti Jenesis 6–7, kwomaron̄ keidi ineem̧m̧an eo kar leļo̧k jān wa eo n̄an ineem̧m̧an eo jej loe ilo ad ļoor rikanaan eo. Kwomaron̄ kōņaan ekkōnono kōn kapilōk eo ekāāltata jān rikanaan eo im je naan in kapilōk ko ioon wa eo.

Ta ko jet Anij ekar letok n̄an kōj me jemaron̄ keidi n̄an wa eo me ekar lo̧mo̧o̧ren baam̧le eo an Noa? Men kein rej leļo̧k ļōmņak ko kōn jet uwaak, men̄e elōn̄ men ko jet: 2 Nipai 9:7–13; Katak im Bujen Ko 115:5–6; im ennaan ko an Būreejtōn Russell M. Nelson “Erom̧ Riwaanjon̄ak ro rej Armej ro Rekwojarjar ilo Raan Ko Āliktata” (Liaona, Nob. 2018, 113–14).

Moses 8:17.Ta meļeļein an Jetōb eo an Irooj “pād” ippād? (lale 1 Nipai 7:14; Katak im Bujen Ko 1:33). Em̧ōj ke ad kar en̄jake an Jetōb pād ippād?

Jenesis 9:8–17.Ajri ro reddik remaron̄ jin̄n̄a ak kōļar e juon iia ilo aer kōnono kōn ta eo ej jutak kake (barāinwōt lale Ukook eo an Josep Smith, Jenesis 9:21–25 [ilo Baibōļ appendix]). Kwomaron̄ barāinwōt kōnono kōn men ko me rejipan̄ kōj keememej bujen ko ad, āinwōt kwojkwoj eo, eo me ejipan̄ kōj keememej bujen in peptaij ko ad n̄an ļoor Jisōs Kraist (lale Katak im Bujen Ko 20:75–79).

Jenesis 11:1–9.Emaron̄ lukkuun jipan̄ n̄an riiti Ether 1:33–43 ilo an baam̧le eo am̧ ekkatak Jenesis 11 im ekkatak kōn Tawōr Bebel eo. Ta eo jej ekkatak jān baam̧le eo an Jered im ļōmaro jein im jatin me remaron̄ jipan̄ baam̧le eo ad lo ineem̧m̧an eo an jetōb jekdo̧o̧n nana ko ilo laļ in? Ta katak ko jet jej ekkatak jān Noa im baam̧le eo an ilo aer kar jelm̧ae ejja kain idajon̄jon̄ rōt in? (lale Moses 8:13, 16–30).

N̄an ļōmņak ko reļļapļo̧k n̄an katakin ajri ro, lale laajrak in katak eo an wiik in ilo Itok, Ļoor Eō—N̄an Būraimere.

Al eo kar elmakote: “Follow the Prophet,” Children’s Songbook, 110–11 (verse 3).

Kōkōm̧anm̧anļo̧k Am̧ Ekkatak Ippam̧ Make

Kwaļo̧k en̄jake ko am̧. N̄e kwoj kwaļo̧k ta eo kwoj ekkatak jān jeje ko rekwojarjar, kwojjab kōjeraam̧m̧an wōt ro jet ak kwoj barāinwōt kam̧wūlaļļo̧k meļeļe eo am̧ make. Ta eo kwoj en̄jake eim̧we n̄an kwaļo̧k jān jeje ko rekwojarjar ippān baam̧le eo am̧, ro m̧ōttam̧, ak ro uwaan ward eo am̧?

Pija in Wa eo waan Noa, jān Adam Klint Day