Ebream im Sara

pija in Ebream im Sara, jān Dilleen Marsh

Pāpode 7–13.

Jenesis 12–17; Ebream 1–2

“Bwe N̄a Juon Riļoore Jim̧we”

Ilo am̧ riit kōn Ebram im Sarai (tok ālik kar ān̄inn̄in er Ebream im Sara) im baam̧le eo aer, kejōkļo̧kjeņ kōn ekōjkan an waanjon̄ak ko aer im̧we eok. Je im̧we ko kōn ta eo komaron̄ kōm̧m̧ane “bwe n̄a juon riļoore jim̧we” (Ebream 1:2).

Je En̄jake ko Rej Im̧we Eok

Kōnke kōn bujen eo Anij ekar kōm̧m̧ane ippān, Ebream kar ān̄inn̄in e “jemān ro ritōmak” (Katak im Bujen Ko 138:41) im “Jeran Anij” (Jemes 2:23). Milien rainin rej kautiej e āinwōt lukkuun eo jim̧m̧aer, im ro jet em̧ōj kajiririik er tok n̄an baam̧le eo an kōn oktak eo n̄an gospel eo an Jisōs Kraist. Kōn menin Ebream e make ekar itok jān juon baam̧le eo ejorrāān—eo jemān, eo ekar kōjojoļāār m̧ool in kabun̄ jar n̄an Anij, ekar kajjieon̄ kōm̧m̧an bwe Ebream en katok n̄an anij ko rōriab. Kōjekdo̧o̧n menin, ikdeelel eo an Ebream ekar “juon riļoore jim̧we” (Ebream 1:2), im bwebwenato eo kōn mour eo an ej kwaļo̧k bwe Anij ekar kautiej ikdeelel eo an. Mour eo an Ebream ej jutak āinwōt juon naan in kam̧ool bwe jekdo̧o̧n ta bwebwenato eo an baam̧le eo an juon armej ekar, ilju im jekļaj eo emaron̄ obrak kōn kōjatdikdik.

Learn More image

pija ej bōk jikin ekkatak ippam̧ make

Ļōm̧ņak ko n̄an Ekkatak Jeje Ko Rekwojarjar Ippam̧ Make

Ebream 1:1–19

Anij enaaj kōjeraam̧m̧an eō kōn aō tōmak im ikdeelel ko rejim̧we.

Āinwōt elōn̄ iaad, Ebream ekar mour ilo juon peļaak eo enana, mekarta ekar ikdeelel n̄an jim̧we. Būreejtōn Dallin H. Oaks ekar katakin kōn aorōk eo an wōr ikdeelel ko rejim̧we: “Ejja aorōk in wōt n̄an jerwane aolep ikdeelel ko n̄an jerawiwi, mour indeeo ej aikuj eļapļo̧k. N̄an bōk mejān kajjik eo ad indeeo, jenaaj ikdeelel im jerbal kōn m̧wil ko remenin aikuj n̄an erom juon armej indeeo. … Eļan̄n̄e menin āinwōt ekanooj in pen—im em̧ool ejjab pidodo n̄an jabdewōt iadwōj—innām jej aikuj jino kōn juon ikdeelel n̄an kain m̧wil kein im kūr ioon Jemedwōj Ilan̄ eo ej iakwe kōn jipan̄ kōn en̄jake ko ad [lale Moronai 7:48]” (“Desire,” Liahona, May 2011, 44–45). Ilo am̧ riiti Ebream 1:1–19, ļōmņak kōn ekōjkan an eoon kein kwaļo̧k ta eo Būreejtōn Oaks ekar katakin: Kajjitōk ko āinwōt kein remaron̄ jipan̄:

• Ta eo Ebream ekar ikdeelel kake im kappukōti? Ta eo ekar kōm̧m̧ane n̄an kwaļo̧k tōmak eo an?

• Ta ikdeelel ko am̧? Ewōr ke jabdewōt men kwoj en̄jake aikuj in kōm̧m̧an n̄an karreoik ikdeelel ko am̧?

• Ta apan̄ ko Ebream ekar jelm̧ai kōnke kōn ikdeelel jim̧we ko an? Ekōjkan an Anij kar jipan̄ e?

• Ta eo ewōr ilo ennaan eo an eoon kein n̄an ro uwaan baam̧le eo me ejjab ikdeelel jim̧we?

Lale barāinwōt Matu 7:7; “Deliverance of Abraham” (pija in alooj), ChurchofJesusChrist.org; “Educate Your Desires, Elder Andersen Counsels” (ChurchofJesusChrist.org).

Ebream 2:10–11

Wōn ejkoba ilo bujen eo an Ebream?

Ke Irooj ekar kōm̧m̧ane bujen eo An ippān Ebream, E ekar kallim̧ur bwe bujen in enaaj kar wōnm̧aanļo̧k wōt ilo bwijjin Ebream, ak “ineen,” im bwe “jon̄an wōt lōn̄in eo enaaj bōk Gospel in naaj … bōnbōn ineem” (Ebream 2:10–11). Menin ej meļeļe in bwe kallim̧ur ko an bujen eo an Ebream rej jerbal wōt n̄an membōr ro an Kabun̄ in rainin, men̄e rej lukkuun bwijjin Ebream ak kajjiriri n̄an baam̧le eo an kōn peptaij im oktak n̄an gospel eo an Jisōs Kraist (lale Galetia 3:26–29; Katak im Bujen Ko 132:30–32). N̄an bōnbōn āinwōt ineen Ebream, kajjojo armej ej aikuj pokake kien ko im kain̄i ko an gospel eo.

Jenesis 12:1–3; 13:15–16; 15:1–6; 17:1–8, 15–22; Ebream 2:8–11

Bujen eo an Ebream ej kōjeraam̧m̧an n̄a im baam̧le eo aō.

Kōnke aolep membōr ro an Kabun̄ in rej deļo̧n̄ ilo bujen eo an Ebream, komaron̄ in kōņaan joļo̧k jet iien kejōkļo̧kjeņ etke bujen in ej ļap meļeļe in ilo mour eo am̧. Ļo̧o̧ke ļōmņak ko am̧ kōn kajjitōk kein:

Ekōjkan an kallim̧ur ko loi ilo Ebream 2:8–11 maron̄ kōjeraam̧m̧an baam̧le eo aō? (lale barāinwōt Jenesis 12:1–3; 13:15–16).

Ta eo ij ekkatak kake kōn bujen eo an Ebream jān Jenesis 15:1–6; 17:1–8, 15–22?

Ta eo ij en̄jake eim̧we n̄an kōm̧m̧ane n̄an jipan̄ kakūrm̧ool kallim̧ur eo bwe “aolep nokwe ko an laļ jeraam̧m̧an”? (Ebream 2:11).

Komaron̄ ļōmņak bwe jet iaan kōjeraam̧m̧an ko an laļ kar kallim̧uri n̄an Ebream im Sara, ko āinwōt jolet juon āne in kallim̧ur im erom ro jinen im jemān an juon bwij eļap, elōn̄ men indeeo reier wōt juon. Men kein ekoba jolet ilo aelōn̄ selestial (lale Katak im Bujen Ko 132:29) im m̧are indeeo ippān juon bwij indeeo (lale Katak im Bujen Ko 131:1–4; 132:20–24, 28–32). Ej “ilo tampeļ,” Būreejtōn Russell M. Nelson ekar katakin, bwe “jej bōk kōjeraam̧m̧an ko ad reļļap tata, āinwōt ro ineen Ebream, Aijōk, im Jekab” (“The Gathering of Scattered Israel,” Liahona, Nob. 2006, 80).

Lale barāinwōt Joseph Smith Translation, Genesis 15:9–12; 17:3–12 (ilo Bible appendix); Bible Dictionary, “Abraham, covenant of”; “Thoughts to Keep in Mind: The Covenant,” in kein jipan̄ in.

pija eo ej bōk jikin ekkatak an baam̧le

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Jenesis 13:5–12.Ta eo Ebream ekar kōm̧m̧ane n̄an ejaake aenōm̧m̧an eo ilo baam̧le eo an? Bōlen ro uwaan baam̧le eo am̧ remaron̄ kōkemelmel kile juon rikōm̧m̧an aenōm̧m̧an āinwōt Ebream kōn kōm̧m̧an m̧akūtkūt in kwaļo̧k ekōjkan n̄an ņa mejļan aitwerōk ko me remaron̄ waļo̧k ilo baam̧le eo ami.

Jenesis 13:16; 15:2–6; 17:15–19.Ekōjkan am̧ maron̄ jipan̄ baam̧le eo am̧ meļeļe kallim̧ur eo an Irooj ilo eoon kein—bwe jekdo̧o̧n n̄e Ebream im Sara ekar ejjeļo̧k nejierro, bwij eo aer enaaj kar jon̄an oran in wōt bwin̄aln̄al in laļ, iju ko mejatoto, ak bok in parijet? (lale Jenesis 22:17). Bōlen komaron̄ kwaļo̧k n̄an ro uwaan baam̧le eo juon nien bok, reilo̧k n̄an iju ko, ak kōjerbal pija eo me ej itok ippān unin tōl in. Ekōjkan ad maron̄ lōke kallim̧ur ko an Anij jekdo̧o̧n n̄e rej āinwōt pen?

Jenesis 14:18–20.Ta eo jej ekkatak jān Melkisedek jān Josep Smith Ukok, Jenesis 14:25–40? (ilo Bible appendix; lale barāinwōt Alma 13:13–19). Ekōjkan ad maron̄ “[kajutak] jim̧we” āinwōt kar Melkisedek? (eoon 36). Bar ta eo kōn jerbal in karejar eo an Melkisedek ej im̧we kōj?

Melkisedek ej kōjeraam̧m̧an Ebream

Melkisedek ej kōjeraam̧m̧an Ebream, jān Walter Rane

Jenesis 16.Riit kōn Hegar emaron̄ in juon iien em̧m̧an n̄an ekōnono kōn ekōjkan an Irooj jipan̄ kōj n̄e jej en̄jake bōd n̄ae kōj. Komaron̄ kwaļo̧k bwe “Ishmael” ej meļeļe in “Ron̄jake Anij.” N̄āāt eo jaar en̄jake bwe Irooj ekar eo̧ron̄ im kar jipan̄ kōj ke jaar en̄jake bōd n̄ae kōj? (lale Jenesis 16:11).

Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “I Want to Live the Gospel,” Children’s Songbook, 148.

Kōkōm̧anm̧anļo̧k Ad Ekkatak

Kwōn pād im pidodo tōpare. Jet iaan iien ko rem̧m̧an tata n̄an katakin rej ijjino āinwōt juon kajjitōk ak n̄ūrbōktak ilo būruōn juon uwaan baam̧le. … Kōm̧m̧an bwe ro uwaan baam̧le eo ren jeļā kōn naan ko am̧ im kōm̧m̧an ko am̧ bwe kwoj kijooror in ron̄jake er. (Lale Teaching in the Savior’s Way, 16.)

Sara ej kalimjōk mejatoto eobrak kōn iju ko

Anij ekar kallim̧ur bwe ro bwijjin Ebream im Sara renaaj kar orļo̧k “āinwōt iju ko ilan̄” (Jenesis 22:17). Kejōkļo̧kjeņ kōn Kallim̧ur eo an Anij, jān Courtney Matz.