Kōmeļeļe kōn Rebeka jān Dilleen Marsh

Pāpode 21–27.

Jenesis 24–27

Bujen Em̧ōj An Bar Kōkāāl

Ilo am̧ riiti Jenesis 24–27, lukkuun lale en̄jake ko jān jetōb kwōj en̄jaki. Jar n̄an jeļā ekōjkan an pedped in katak ko kwoj loi raorōk n̄an mour eo am̧.

Je En̄jake ko Rej Im̧we Eok

Bujen eo an Anij ippān Ebream ekoba kallim̧ur eo me kōn Ebream im ro ineen “naaj aolep nokwe ko an laļ jeraam̧m̧an” (Ebream 2:11). Ejjab juon kallim̧ur me emaron̄ kūrm̧ool ilo juon epepen: ilo elōn̄ wāween ko, Baibōl eo ej bwebwenato in kakūrm̧ool ko rej wōnm̧aanļo̧k wōt an Anij kōn kallim̧ur eo An. Im E ekar jino ilo an kōkāāle bujen eo ippān baam̧le eo an Aisak im Rebeka. Kōn en̄jake ko aer, jej ekkatak juon men kōn ad m̧ōttan ļo̧k bujen eo. Waanjon̄ak ko aer rej katakin kōj kōn jouj, kijenmej, im lōke ilo kōjeraam̧m̧an ko an Anij me kar kallim̧ur kaki. Im jej ekkatak bwe eļap tokjen ilo ad kajejtokjen jabdewōt “m̧ōn̄ā” an wūjwaan mour in (Jenesis 25:30) bwe jen dāpij kōjeraam̧m̧an ko an Anij n̄an kōj make im ajri ro nejid n̄an epepen ko rej itok.

Ļōm̧ņak ko n̄an Ekkatak Jeje Ko Rekwojarjar Ippam̧ Make

Jenesis 24

M̧are eaorōk n̄an karōk eo an Anij indeeo.

Rainin elōn̄ armej rejjab kaorōk m̧are ak ļōmņak bwe ej juon eddodo. Ebream ekar wōr an kōļmenļo̧kjeņ eoktak—n̄an e, m̧are eo an ļaddik eo nejin etan Aisak ekar juon men eo eļap an aorōk. Etke kwoj ļōmņak ekar lukkuun aorōk n̄an e? Ilo am̧ riiti Jenesis 24, ļōmņak kōn aorōk in m̧are ilo karōk in lo̧mo̧o̧r eo an Anij. Kwomaron̄ barāinwōt riiti ennaan eo an Elder D. Todd Christofferson “Etke Jej M̧are, Etke Jej Baam̧le” (Liaona, Māe 2015, 50–53) im ļōmņak etke “juon baam̧le eo ej ekkal ioon m̧are an juon em̧m̧aan im kōrā ej kabwe n̄an karōk eo an Anij bwe en wōnm̧aanļo̧k” (peij 52).

Kajjitōk ko āinwōt kein rej ellaajrak emaron̄ jipan̄ eok ļōmņak kōn aorōk in pedped in katak ko jet ilo jebta in:

Jenesis 24:1–14. Ta eo Ebream im ļeo rikarejeran rekar kōm̧m̧ane n̄an kobaik Irooj ilo kijejeto ko aer n̄an kappukot juon pāleen Aisek?

Jenesis 24:15–28, 55–60. Ta men ko rem̧m̧an ewōr ippān Rebeka me kwonaaj kōņaan ļoore?

Ta men ko jet kwoj loi?

Barāinwōt lale Katak im Bujen Ko 131:1–4; “Baam̧le Eo: Juon Naan in Kean̄ n̄an Laļ in,” ChurchofJesusChrist.org.

Jenesis 25:29–34

Imaron̄ kāālet ikōtaan kōņaan kōttōbar im men ko eļap aer aorōk.

Ilo m̧anit eo an Ebream, ļaddik eo erūtto tata ilo juon baam̧le ej bōk juon taitōļ in tōl im eddo, ņa etan m̧aanje. Ļaddik in ekar bōk juon jolet eļap jān ro jinen im jemān, ippānļo̧k eddo ko reļļap n̄an kea im lale aolepān baam̧le eo an.

Ilo am̧ riiti Jenesis 25:29–34, ļōmņak etke Iso maron̄ kar kōņaan wia kake m̧aanje eo an im jeniji n̄an m̧ōn̄ā. Ta katak ko kwoj loi kōn kwe make ilo bwebwenato in? N̄an waanjon̄o̧k, ewōr ke jabdewōt “m̧ōn̄ā” me ej bōbrae eok jān kōjeraam̧m̧an ko me eļap aer aorōk n̄an kwe? Ta eo kwoj kōm̧m̧ane n̄an mije wōt im kam̧m̧olool kōn kōjeraam̧m̧an kein?

Barāinwōt lale Matu 6:19–33; 2 Nipai 9:51; M. Russell Ballard, “What Matters Most Is What Lasts Longest,” Liahona, Nov. 2005, 41–44.

Jenesis 26:1–5

Bujen eo an Ebream ekar kōkāāle ippān Aisak.

Bujen eo Anij ekar kōm̧m̧ane ippān Ebream unin n̄an kar wōnm̧aanļo̧k wōt n̄an epepen ko rellōn̄, kōn menin bwebwenato in Ebream im Serai kōn aer kōjparok bujen enaaj aikuj wanlaļļo̧k n̄an Aisek, im kōrā im m̧aan in tōmak ro jet ilubwiljin ineer. Ilo am̧ riiti Jenesis 26:1–5, kappukot kōjeraam̧m̧an ko an bujen eo me Anij ekar ba kake. Ta eo jej ekkatak kōn Anij jān eoon kein?

Jenesis 26:18–25, 32–33

Jisōs Kraist ej aebōj laļ in dān in mour.

Kwomaron̄ kile bwe aebōj laļ ko im unin dān ko im dān ko jet eļap tokjāer ilo elōn̄ bwebwenato ko ilo Kallim̧ur M̧okta. Ejjab juon menin kabwilōn̄lōn̄, kōnke elōn̄ iaan bwebwnato kein rekar waļo̧k ilo jikin ko relukkuun m̧ōrā. Ilo am̧ riiti Jenesis 26 kōn aebōj laļ eo an Aisak, kejekļo̧kjeņ kōn ta eo dān eo ej jutak kake ilo jeje ko rekwojarjar. Ta jeļā ko kwoj loi kōn aebōj laļ in jetōb ko an “dān in mour”? (lale Jon 4:10–15). Ekōjkan am̧ kūbwij aebōj laļ in jetōb ilo mour eo am̧? Ekōjkan an Rilo̧mo̧o̧r āinwōt dān in mour n̄an kwe? Keememej bwe Pilistia “ekar kōbōjrak” aebōj laļ ko (lale Jenesis 26:18). Ewōr ke jabdewōt men ilo mour eo am̧ me ej kōbōjrak aebōj laļ ko am̧ kōn dān in mour?

Juon aibōj laļ ilo Bier-shiba etto, ijo Ebream im Aisek rekar kūbwij aebōj laļ ko.

Jenesis 27

Rebeka im Jekob rekar ke bōd ilo aer m̧on e Aisek?

Jejjab jeļā un ko kōn ta eo Rebeka im Jekob rekar kōjerbale ak kōm̧m̧ane n̄an bōk juon kōjeraam̧m̧an n̄an Jekab. Elukkuun jipan̄ n̄an keememej bwe ilo Kallim̧ur M̧okta āinwōt ad wōr ippād kiiō ededeļo̧k (lale Moses 1:23, 41). Emaron̄ lōn̄ meļeļe ko rejako jān rekoot ko jinoin tata me enkar kōmeļeļeik ta eo enaaj kar kapok kōj. Ijoke, jejeļā bwe ekar ankilaan Anij n̄an Jekob n̄an bōk kōjeraam̧m̧an eo jān Aisak kōnke Rebeka ekar bōk juon revelesōn bwe Jekob ej aikuj kar irooj ioon Iso (lale Jenesis 25:23). Ālkin an Aisak kar kile bwe ekar kōjeraam̧m̧an Jekab ijjeļo̧kin Iso, ekar kapene bwe Jekob “enaaj jeraam̧m̧an” (Jenesis 27:33)—ej kwaļo̧k bwe ankilaan Anij em̧ōj an dedeļo̧k.

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Jenesis 24:2–4, 32–48.Ebream ekar kajjitōkin juon an rikarejaran eo ej lōke n̄an karōkļo̧k pāleen Aisak, im ļeo rikarejaran ekar bujen ippān Ebream ke enaaj. Ekōjkan an ļeo rikarejaran Ebream kwaļo̧k an tōmak ilo an kōjparok bujen eo an? Ekōjkan ad maron̄ ļoor waanjon̄ak eo an?

Jenesis 24:15–28, 55–60.Baam̧le eo am̧ emaron̄ kappukot ilo eoon kein m̧wil ko me ekar kōm̧m̧an bwe Rebeka en juon eo pāleen Aisak n̄an indeeo im erreo. Kapilōk ro uwaan baam̧le eo n̄an kāālet juon iaan m̧wil ko me rej en̄jake ke rej aikuj kōļapļo̧k.

Jenesis 25:19–34; 27.N̄an etale bwebwenato ko kōn ekōjkan an m̧aanje im kōjeraam̧m̧an eo kar itok n̄an Jekob ijjeļo̧kin, kwomaron̄ je jentōj ko jān “Jacob and Esau” (ilo Old Testament Stories) ilo juon pepa. Ro uwaan baam̧le eo remaron̄ jerbal ippān doon n̄an karōk jentōj kein ilo laajrak eo ejjejet.

Ilo am̧ ekkōnono kōn an Iso wiakaki m̧aanje eo an, kwomaron̄ barāinwōt kōnono kōn ta ko raorōk tata n̄an baam̧le eo am̧, āinwōt jem̧jerā ko ippā Jemedwōj Ilan̄ im Jisōs Kraist. Bōlen ro uwaan baam̧le eo remaron̄ kappukot men ko ak pija ko me rej bōk jikin ta eo rej ļōmņake ke raorōk n̄an indeeo. Kajjitōk ippāer n̄an kwaļo̧k etke rekar kāālet eoon ko.

Jenesis 26:3–5.N̄an jipan̄ baam̧le eo am̧ meļeļe bujen eo an Ebream, kwomaron̄ kajjitōk ippāer n̄an kappukot kallim̧ur ko kar kōmeļeļeiki ilo eoon kein. Etke eaorōk n̄an kōj bwe jen jeļā kōn kallim̧ur kein raan kein? (lale “Thoughts to Keep in Mind: The Covenant,” ilo kein jipan̄ in).

Jenesis 26:18–25, 32–33.Etke aebōj laļ ko raorōk? Ekōjkan an Jisōs Kraist āinwōt juon aebōj laļ?

N̄an ļōmņak ko reļļapļo̧k n̄an katakin ajri ro, lale laajrak in katak eo an wiik in ilo Itok, Ļoor Eō—N̄an Būraimere.

Al eo kar elmakote: “Choose the Right,” Hymns, nō. 239.

Kōkōm̧anm̧anļo̧k Am̧ Ekkatak Ippam̧ Make

Kakilōklōke juon eoon. Elder Richard G. Scott eaar katakin, “Kakilōklōke juon eoon ej erom̧ juon m̧ōttad indeeo me ejjab m̧ōjņo̧ļo̧k kōn tōre in iien” (“The Power of Scripture,” Liahona, Nov. 2011, 6).

Iso ej Wiakake M̧aanje eo An n̄an Jekob, jān Glen S. Hopkinson