« ថ្ងៃទី ៧–១៣ ខែ កុម្ភៈ ។ លោកុប្បត្តិ ១២–១៧; អ័ប្រាហាំ ១–២ ៖ ‹ ធ្វើជាអ្នកដើរតាមសេចក្ដីសុចរិតកាន់តែខ្លាំងឡើង › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )
« ថ្ងៃទី ៧–១៣ ខែ កុម្ភៈ ។ លោកុប្បត្តិ ១២–១៧; អ័ប្រាហាំ ១–២ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២២
ការរចនារូបភាពអ័ប្រាហាំ និង សារ៉ា ដោយ ឌីលលីន ម៉ាស
ថ្ងៃទី ៧–១៣ ខែ កុម្ភៈ
លោកុប្បត្តិ ១២–១៧; អ័ប្រាហាំ ១–២
« ធ្វើជាអ្នកដើរតាមសេចក្ដីសុចរិតកាន់តែខ្លាំងឡើង »
កាលណាអ្នកអានអំពីអាប់រ៉ាម និង សារ៉ាយ ( ដែលក្រោយមកត្រូវបានហៅថា អ័ប្រាហាំ និងសារ៉ា ) និងក្រុមគ្រួសាររបស់លោក សូមសញ្ជឹងគិតអំពីរបៀបដែលគំរូរបស់ពួកគាត់បំផុសគំនិតដល់អ្នក ។ សូមកត់ត្រាចំណាប់អារម្មណ៍របស់អ្នកអំពីអ្វីដែលអ្នកអាចធ្វើដើម្បី « ធ្វើជាអ្នកដើរតាមសេចក្ដីសុចរិតកាន់តែខ្លាំងឡើង » ( អ័ប្រាហាំ ១:២ ) ។
កត់ត្រាចំណាប់អារម្មណ៍របស់អ្នក
ដោយសារតែសេចក្តីសញ្ញាដែលព្រះបានធ្វើជាមួយលោក អ័ប្រាហាំ ត្រូវបានហៅ « ជាបិតានៃពួកស្មោះត្រង់ » ( គោលលទ្ធិ និង សេចក្តីសញ្ញា ១៣៨:៤១ ) និង « សំឡាញ់របស់ទ្រង់ » ( យ៉ាកុប ២:២៣ ) ។ មនុស្សរាប់លាននាក់នៅសព្វថ្ងៃនេះគោរពលោក ទុកជាបុព្វការីជនរបស់ពួកគេផ្ទាល់ និងអ្នកដទៃទៀតត្រូវបានយកទៅចិញ្ចឹមចូលក្នុងគ្រួសាររបស់លោក តាមរយៈការប្រែចិត្តជឿមកលើដំណឹងល្អនៃព្រះយេស៊ូវ គ្រីស្ទ ។ ប៉ុន្តែ អ័ប្រាហាំលោកផ្ទាល់កើតចេញពីក្រុមគ្រួសារដែលមានបញ្ហា—ឪពុករបស់លោក ដែលបានបោះបង់ចោលការថ្វាយបង្គំពិតប្រាកដដល់ព្រះ បានព្យាយាមយកអ័ប្រាហាំថ្វាយដង្វាយទៅព្រះក្លែងក្លាយ ។ ថ្វីបើមានរឿងនេះក្តី ក៏បំណងប្រាថ្នារបស់អ័ប្រាហាំ គឺ « ធ្វើជាអ្នកដើរតាមសេចក្ដីសុចរិតកាន់តែខ្លាំងឡើង » ដែរ ( អ័ប្រាហាំ ១:២ ) ហើយដំណើររឿងរបស់ជីវិតលោកបង្ហាញថា ព្រះបានគោរពបំណងប្រាថ្នារបស់លោក ។ ជីវិតរបស់អ័ប្រាហាំ ឈរជាទីបន្ទាល់ថា មិនថាបុគ្គលម្នាក់ណាធ្លាប់មានប្រវត្តិគ្រួសារយ៉ាងណាទេ អនាគតកាលអាចត្រូវបានបំពេញដោយសេចក្តីសង្ឃឹម ។
គំនិតយោបល់ផ្សេងៗសម្រាប់ការសិក្សាព្រះគម្ពីរផ្ទាល់ខ្លួន
ព្រះនឹងប្រទានពរដល់ខ្ញុំចំពោះសេចក្តីជំនឿ និងបំណងប្រាថ្នាសុចរិតរបស់ខ្ញុំ ។
ដូចជាយើងគ្រប់គ្នាដែរ អ័ប្រាហាំ បានរស់នៅក្នុងបរិយាកាសទុច្ចរិត ប៉ុន្តែលោកមានបំណងប្រាថ្នាសុចរិត ។ ប្រធាន ដាល្លិន អេក អូក បានបង្រៀនពីសារៈសំខាន់នៃការមានបំណងប្រាថ្នាសុចរិត ៖ « កាលដែលការបោះបង់បំណងប្រាថ្នាឈប់ធ្វើអំពើបាបគឺមានសារៈសំខាន់ នោះការមានជីវិតដ៏នៅអស់កល្បជានិច្ចតម្រូវឲ្យមានច្រើនជាងនោះទៀត ។ ដើម្បីសម្រេចបានជោគវាសនាដ៏នៅអស់កល្បជានិច្ចរបស់យើង នោះយើងនឹងមានបំណងប្រាថ្នា ហើយធ្វើការដើម្បីមានភាពស័ក្តិសមដែលត្រូវការដើម្បីក្លាយជាមនុស្សដ៏នៅអស់កល្បជានិច្ច ។… ប្រសិនបើការណ៍នេះ ហាក់ដូចជាពិបាក—ហើយពិតប្រាកដណាស់វាមិនមែនងាយស្រួលសម្រាប់យើងណាម្នាក់នោះទេ—នោះយើងគួរតែចាប់ផ្តើមជាមួយបំណងប្រាថ្នាដើម្បីមានភាពស័ក្តិសមបែបនោះ ហើយអំពាវនាវទូលសុំព្រះវរបិតាសួគ៌ជាទីស្រឡាញ់របស់យើងឲ្យជួយដល់អារម្មណ៍របស់យើង [ សូមមើល មរ៉ូណៃ ៧:៤៨ ] » ( «Desire » Liahona ខែ ឧសភា ឆ្នាំ ២០១១ ទំព័រ ៤៤–៤៥ ) ។ កាលអ្នកអាន អ័ប្រាហាំ ១:១–១៩ សូមពិចារណាពីរបៀបដែលខគម្ពីរទាំងនេះបង្ហាញពីអ្វីដែលប្រធាន អូក បានបង្រៀន ។ សំណួរបែបនេះអាចជួយ ៖
-
តើអ័ប្រាហាំមានបំណងប្រាថ្នាអ្វី ហើយស្វែងរកអ្វី ? តើលោកបានធ្វើអ្វី ដើម្បីបង្ហាញសេចក្តីជំនឿរបស់លោក ?
-
តើអ្នកមានបំណងប្រាថ្នាអ្វី ? តើមានអ្វីមួយដែលអ្នកមានអារម្មណ៍ថាអ្នកគួរតែធ្វើដើម្បីធ្វើឲ្យបំណងប្រាថ្នារបស់អ្នកបរិសុទ្ធដែរឬទេ ?
-
តើឧបសគ្គអ្វីដែលអ័ប្រាហាំបានប្រឈមមុខ ដោយសារតែបំណងប្រាថ្នាសុចរិតរបស់លោក ? តើព្រះបានជួយលោកយ៉ាងដូចម្តេច ?
-
តើសារលិខិតអ្វីដែលខគម្ពីរទាំងនេះផ្តល់ជូនចំពោះជនទាំងឡាយណាដែលសមាជិកគ្រួសារពុំមានបំណងប្រាថ្នាសុចរិត ?
សូមមើលផងដែរ ម៉ាថាយ ៧:៧; « Deliverance of Abraham » ( វីដេអូ ), ChurchofJesusChrist.org; « Educate Your Desires, Elder Andersen Counsels » ( ChurchofJesusChrist.org ) ។
តើនរណាត្រូវបានរាប់បញ្ចូលក្នុងសេចក្តីសញ្ញាអ័ប្រាហាំ ?
នៅពេលព្រះអម្ចាស់បានធ្វើសេចក្តីសញ្ញារបស់ទ្រង់ជាមួយអ័ប្រាហាំ ទ្រង់បានសន្យាថា សេចក្តីសញ្ញានេះនឹងបន្តទៅដល់កូនចៅ ឬ « ពូជ » របស់អ័ប្រាហាំ ហើយថា « ចំពោះមនុស្សជាច្រើនដែលទទួលដំណឹងល្អនេះ នោះនឹងត្រូវបាន…រាប់ថាជាពូជអ្នក » ( អ័ប្រាហាំ ២:១០–១១ ) ។ នេះមានន័យថា សេចក្តីសន្យានៃសេចក្តីសញ្ញា អ័ប្រាហាំអនុវត្តចំពោះសមាជិកនៃសាសនាចក្រនៅសព្វថ្ងៃនេះ ដែលពួកគេជាកូនចៅផ្ទាល់របស់អ័ប្រាហាំ ឬជាកូនចិញ្ចឹមក្នុងគ្រួសាររបស់លោក តាមរយៈពិធីបុណ្យជ្រមុជទឹក និងការប្រែចិត្តជឿចូលក្នុងដំណឹងល្អនៃព្រះយេស៊ូវ គ្រីស្ទ ( សូមមើល កាឡាទី ៣:២៦–២៩; គោលលទ្ធិ និង សេចក្តីសញ្ញា ១៣២:៣០–៣២ ) ។ ដើម្បីត្រូវបានរាប់ថាជាពូជរបស់អ័ប្រាហាំ បុគ្គលម្នាក់ៗត្រូវតែគោរពក្រិត្យវិន័យ និងពិធីបរិសុទ្ធទាំងឡាយនៃដំណឹងល្អ ។
លោកកុប្បត្តិ ១២:១–៣; ១៣:១៥–១៦; ១៥:១–៦; ១៧:១–៨, ១៥–២២; អ័ប្រាហាំ ២:៨–១១
សេចក្តីសញ្ញាអ័ប្រាហាំផ្តល់ពរជ័យដល់ខ្ញុំ និងក្រុមគ្រួសាររបស់ខ្ញុំ ។
ដោយសារសមាជិកទាំងអស់នៃសាសនាចក្រគឺត្រូវបានរាប់បញ្ចូលនៅក្នុងសេចក្តីសញ្ញាអ័ប្រាហាំ នោះអ្នកអាចចង់ចំណាយពេលខ្លះដើម្បីសញ្ជឹងគិតពីមូលហេតុដែលសេចក្តីសញ្ញានេះមានអត្ថន័យនៅក្នុងជីវិតរបស់អ្នក ។ សូមកត់ត្រាគំនិតរបស់អ្នកអំពីសំណួរដូចខាងក្រោម ៖
តើសេចក្តីសន្យាដែលមាននៅក្នុង អ័ប្រាហាំ ២:៨–១១ អាចផ្តល់ពរជ័យដល់ខ្ញុំ និងក្រុមគ្រួសារខ្ញុំយ៉ាងដូចម្តេច ? ( សូមមើលផងដែរ លោកុប្បត្តិ ១២:១–៣; ១៣:១៥–១៦ ) ។
តើខ្ញុំបានរៀនអ្វីអំពីសេចក្តីសញ្ញាអ័ប្រាហាំចេញពី លោកុប្បត្តិ ១៥:១–៦; ១៧:១–៨, ១៥–២២ ?
តើខ្ញុំមានអារម្មណ៍ថាបានបំផុសគំនិតឲ្យធ្វើអ្វីដើម្បីជួយបំពេញសេចក្តីសន្យានេះថា « អស់ទាំងគ្រួសារនៅលើផែនដីនឹងបានពរ » ? ( អ័ប្រាហាំ ២:១១ ) ។
អ្នកអាចពិចារណាថា ពរជ័យនៅលើផែនដីមួយចំនួនដែលបានសន្យាដល់អ័ប្រាហាំ និងសារ៉ា ដូចជា ការគ្រងដែនដីសន្យា និងការធ្វើជាឪពុកម្តាយនៃជំនាន់ដ៏អស្ចារ្យ មានភាពស្រដៀងគ្នាដ៏នៅអស់កល្បជានិច្ច ។ ទាំងនេះរួមទាំងការគ្រប់គ្រងនគរសេឡេស្ទាល ( សូមមើល គោលលទ្ធិ និង សេចក្តីសញ្ញា ១៣២:២៩ ) និងអាពាហ៍ពិពាហ៍ដ៏នៅអស់កល្បជានិច្ចជាមួយកូនចៅដ៏នៅអស់កល្បជានិច្ច ( សូមមើល គោលលទ្ធិ និង សេចក្តីសញ្ញា ១៣១:១–៤; ១៣២:២០–២៤, ២៨–៣២ ) ។ ប្រធាន រ័សុល អិម ណិលសុន បានបង្រៀនថា គឺនៅ « ក្នុងព្រះវិហារបរិសុទ្ធ » ដែល « យើងទទួលពរជ័យចុងក្រោយរបស់យើងជាពូជនៃអ័ប្រាហាំ អ៊ីសាក និងយ៉ាកុប » ( « The Gathering of Scattered Israel » Liahona ខែ វិច្ឆិកា ឆ្នាំ ២០០៦ ទំព័រ ៨០ ) ។
សូមមើលផងដែរ ការបកប្រែដោយយ៉ូសែប ស្ម៊ីធ លោកុប្បត្តិ ១៥:៩–១២; ១៧:៣–១២ ( នៅក្នុងសេចក្តីណែនាំដល់បទគម្ពីរទាំងឡាយ ) « អ័ប្រាហាំ សេចក្តីសញ្ញានៃ »; « Thoughts to Keep in Mind: The Covenant » នៅក្នុងធនធាននេះ ។
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ
-
លោកុប្បត្តិ ១៣:៥–១២ ។តើអ័ប្រាហាំបានធ្វើអ្វីដើម្បីបង្កើតសេចក្តីសុខសាន្តនៅក្នុងគ្រួសាររបស់លោក ? ប្រហែលជាសមាជិកគ្រួសាររបស់អ្នកអាចអនុវត្តធ្វើជាអ្នកផ្សះផ្សារដូចជា អ័ប្រាហាំ ដោយការសម្តែងដើម្បីដោះស្រាយជម្លោះដែលអាចកើតឡើងនៅក្នុងគ្រួសាររបស់អ្នក ។
-
លោកុប្បត្តិ ១៣:១៦; ១៥:២–៦; ១៧:១៥–១៩ ។តើអ្នកអាចជួយគ្រួសាររបស់អ្នកយល់សេចក្តីសន្យារបស់ព្រះអម្ចាស់នៅក្នុងខគម្ពីរទាំងនេះ—ថាទោះបីជាអ័ប្រាហាំ និង សារ៉ា មិនទាន់មានកូនក្តី ក៏កូនចៅរបស់ពួកលោកមានច្រើនឥតគណនាដូចជាធូលីនៅលើផែនដី ផ្កាយនៅលើមេឃ ឬខ្សាច់នៅលើឆ្នេរសមុទ្រយ៉ាងដូចម្តេច ? ( សូមមើលផងដែរ លោកុប្បត្តិ ២២:១៧ ) ។ ប្រហែលជាអ្នកអាចបង្ហាញសមាជិកគ្រួសារអ្នកនូវប្រអប់ដីខ្សាច់មួយ មើលទៅផ្កាយ ឬប្រើរូបភាពដែលភ្ជាប់មកជាមួយគម្រោងនេះ ។ តើយើងអាចទុកចិត្តលើសេចក្តីសន្យារបស់ព្រះ ទោះបីជាវាហាក់ដូចជាមិនអាចកើតឡើងក្តីយ៉ាងដូចម្តេច ?
-
លោកុប្បត្តិ ១៤:១៨–២០ ។តើយើងបានរៀនអ្វីអំពីមិលគីស្សាដែកចេញពី ការបកប្រែដោយយ៉ូសែប ស្ម៊ីធ លោកុប្បត្តិ ១៤:២៥–៤០ ? ( នៅក្នុងសេចក្តីណែនាំដល់បទគម្ពីរទាំងឡាយ សូមមើលផងដែរ អាលម៉ា ១៣:១៣–១៩ ) ។ តើយើងអាច « [ បង្កើត ] សេចក្តីសុចរិត » ដូចដែលមិលគីស្សាដែកបានធ្វើយ៉ាងដូចម្តេច ? ( សូមមើល ខទី ៣៦ ) ។ តើការងារបម្រើរបស់មិលគីស្សាដែកអ្វីខ្លះទៀតដែលបំផុសគំនិតដល់យើង ?
មិលគីស្សាដែកប្រសិទ្ធពរដល់អាប់រ៉ាមដោយ វ៉លធើរ រ៉េន
-
លោកុប្បត្តិ ១៦ ។ការអានអំពីហាការ អាចជាឱកាសដើម្បីពិភាក្សាពីរបៀបដែលព្រះអម្ចាស់ជួយយើងនៅពេលយើងមានអារម្មណ៍ថាខុស ។ អ្នកអាចលើកឡើងថា « អ៊ីសម៉ាអែល » មានន័យថា « ព្រះព្រះសណ្តាប់ » ។ តើនៅពេលណាដែលយើងមានអារម្មណ៍ថា ព្រះអម្ចាស់ បានព្រះសណ្តាប់យើង នៅពេលយើងបានមានអារម្មណ៍ថាធ្វើខុស ? ( សូមមើល លោកុប្បត្តិ ១៦:១១ ) ។
សម្រាប់គំនិតបន្ថែមដើម្បីបង្រៀនដល់កុមារ សូមមើល គម្រោងមេរៀនប្រចាំសប្ដាហ៍នេះនៅក្នុងសៀវភៅ ចូរមកតាមខ្ញុំ—សម្រាប់ថ្នាក់បឋមសិក្សា ។
ចម្រៀងស្នើ ៖ ខ្ញុំចង់រស់នៅតាមដំណឹងល្អ » សៀវភៅចម្រៀងកុមារទំព័រ ៧២ ។
ការកែលម្អការបង្រៀនរបស់យើង
មាន ហើយអាចប្រើប្រាស់បាន ។ គ្រាដ៏ល្អៗបំផុតមួយចំនួននៅក្នុងការបង្រៀនចាប់ផ្ដើមឡើងជាសំណួរ ឬកង្វល់មួយនៅក្នុងដួងចិត្តសមាជិកគ្រួសារ ។ សូមឲ្យសមាជិកគ្រួសារដឹងតាមរយៈពាក្យសំដី និងសកម្មភាពរបស់អ្នកថា អ្នកចង់ស្ដាប់ពួកគេ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ១៦ ) ។
ព្រះបានសន្យាថា កូនចៅរបស់អ័ប្រាហាំ និង សារ៉ានឹងមានច្រើន « ដូចផ្កាយនៅលើមេឃ » ( លោកុប្បត្តិ ២២:១៧ ) ។ សញ្ជឹងគិតពីសេចក្តីសន្យារបស់ព្រះ ដោយ ខឺធនី ម៉ាតស្ស ។