« ថ្ងៃទី ១៤–២០ ខែ កុម្ភៈ ។ លោកុប្បត្តិ ១៨–២៣ ៖ ‹ តើមានការអ្វីដែលព្រះយេហូវ៉ាធ្វើមិនកើតដែរឬអី ? ›» ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )
« ថ្ងៃទី ១៤–២០ ខែ កុម្ភៈ ។ លោកុប្បត្តិ ១៨–២៣ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២២
សារ៉ា និងអ៊ីសាក ដោយ ស្កត ស្នូវ
ថ្ងៃទី ១៤–២០ ខែ កុម្ភៈ
លោកុប្បត្តិ ១៨–២៣
« តើមានការអ្វីដែលព្រះយេហូវ៉ាធ្វើមិនកើតដែរឬអី ? »
សូមអាន និងសញ្ជឹងគិត លោកុប្បត្តិ ១៨–២៣ ហើយកត់ត្រាចំណាប់អារម្មណ៍ណរបស់អ្នក ។ អ្នកអាចប្រើគំនិតនៅក្នុងគម្រោងនេះដើម្បីជួយអ្នកសិក្សាជំពូកទាំងនេះ ហើយអ្នកក៏អាចត្រូវបានបំផុសគំនិតផងដែរ ដើម្បីស្វែងរកសារលិខិតផ្សេងទៀតនៅក្នុងខគម្ពីរទាំងនេះដែលព្រះអម្ចាស់មានជាពិសេសសម្រាប់អ្នក ។
កត់ត្រាចំណាប់អារម្មណ៍របស់អ្នក
ជីវិតរបស់អ័ប្រាហាំ ពោរពេញដោយព្រឹត្តិការណ៍ មានទាំងការឈឺចាប់ និងការលួងលោម ដែលជាភស្តុតាងនៃសេចក្តីពិតដែលអ័ប្រាហាំបានរៀននៅក្នុងការនិមិត្ត—ថាយើងនៅលើផែនដី ត្រូវបញ្ជាក់ភស្តុតាង « មើលបើសិនជា [ យើង ] នឹងប្រព្រឹត្តនូវអ្វីៗគ្រប់យ៉ាង ដែលព្រះអម្ចាស់ដ៏ជាព្រះរបស់ [ យើង ] នឹងបញ្ជា » ( អ័ប្រាហាំ ៣:២៥ ) ។ តើអ័ប្រាហាំផ្ទាល់បញ្ជាក់ថាស្មោះត្រង់ឬទេ ? តើលោកនឹងបន្តមានសេចក្តីជំនឿនៅលើសេចក្តីសន្យារបស់ព្រះអំពីការមានកូនចៅដ៏ច្រើន ខណៈពេលដែលលោក និងសារ៉ាគ្មានកូនក្នុងវ័យចំណាស់របស់ពួកលោកដែរឬទេ ? ហើយនៅពេលអ៊ីសាកបានកើតមក តើសេចក្តីជំនឿរបស់អ័ប្រាហាំអាចទ្រាំទ្របានទេ—ចំពោះបញ្ញត្តិដែលឲ្យបូជាកូនប្រុសតែម្នាក់ដែលព្រះបានសន្យាដើម្បីបំពេញសេចក្តីសញ្ញានោះ ? អ័ប្រាហាំបានបញ្ជាក់ថាមានសេចក្តីស្មោះត្រង់ ។ អ័ប្រាហាំបានទុកចិត្តលើព្រះ ហើយព្រះបានទុកព្រះទ័យលើអ័ប្រាហាំដែរ ។ នៅក្នុង លោកុប្បត្តិ ១៨–២៣ យើងឃើញដំណើររឿងចេញពីជីវិតរបស់អ័ប្រាហាំ និងអ្នកដទៃទៀតដែលអាចបំផុសគំនិតយើងឲ្យគិតអំពីសមត្ថភាពផ្ទាល់ខ្លួនរបស់យើងដើម្បីជឿលើសេចក្តីសន្យារបស់ព្រះ ដើម្បីគេចចេញពីអំពើទុច្ចរិត ហើយមិនត្រឡប់ក្រោយវិញ និងត្រូវទុកចិត្តលើព្រះ ទោះជាមានការលះបង់ក៏ដោយ ។
គំនិតយោបល់ផ្សេងៗសម្រាប់ការសិក្សាព្រះគម្ពីរផ្ទាល់ខ្លួន
ព្រះអម្ចាស់បំពេញសេចក្តីសន្យារបស់ទ្រង់តាមពេលវេលារបស់ទ្រង់ ។
ព្រះអម្ចាស់បានធ្វើសេចក្តីសន្យាដ៏រុងរឿងចំពោះមនុស្សដែលស្មោះត្រង់ ប៉ុន្តែ នៅពេលខ្លះកាលៈទេសៈនៃជីវិតរបស់យើងអាចបណ្តាលឲ្យយើងឆ្ងល់ពីរបៀបដែលសេចក្តីសន្យាទាំងនោះអាចបំពេញបានយ៉ាងដូចម្តេច ? អ័ប្រាហាំ និងសារ៉ា អាចគិតបែបនោះជាច្រើនដង ។ តើអ្នកអាចរៀនអ្វីខ្លះ ចេញពីបទពិសោធន៍របស់ពួកគាត់ ? វាអាចមានអត្ថប្រយោជន៍ដើម្បីចាប់ផ្តើមសិក្សាដោយការពិនិត្យមើលអ្វីដែលព្រះអម្ចាស់បានសន្យាដល់អ័ប្រាហាំ នៅក្នុង លោកុប្បត្តិ ១៧:៤, ១៥–២២ ។ តើអ័ប្រាហាំ និង សារ៉ា បានមានប្រតិកម្មយ៉ាងណា ? ( សូមមើលផងដែរនៅក្នុង ការបកប្រែដោយយ៉ូសែប ស្ម៊ីធ លោកុប្បត្តិ ១៧:២៣ [ នៅក្នុង លោកុប្បត្តិ ១៧:១៧ ]; លោកុប្បត្តិ ១៨:៩–១២ ) ។ តើព្រះអម្ចាស់បានឆ្លើយតបយ៉ាងដូចម្តេចដើម្បីជួយពួកលោកឲ្យមានជំនឿកាន់តែខ្លាំងលើសេចក្តីសន្យារបស់ទ្រង់ ( សូមមើល លោកុប្បត្តិ ១៨:១៤ ) ។
តើអ្នករកឃើញអ្វីខ្លះនៅក្នុងខគម្ពីរទាំងនេះ ដែលស្ថាបនាសេចក្តីជំនឿរបស់អ្នក ? តើបទពិសោធន៍អ្វីផ្សេងទៀត—នៅក្នុងជីវិតរបស់អ្នក ឬនរណាផ្សេងទៀត—បានពង្រឹងសេចក្តីជំនឿរបស់អ្នកថាព្រះអម្ចាស់នឹងបំពេញសេចក្តីសន្យារបស់ទ្រង់ចំពោះអ្នក តាមពេលវេលាកំណត់របស់ទ្រង់ ?
សូមមើលផងដែរ គោលលទ្ធិ និង សេចក្ដីសញ្ញា ៨៨:៦៨ ។
ព្រះអម្ចាស់បញ្ជាយើងឲ្យគេចចេញពីអំពើទុច្ចរិត ។
តើអ្នកបានរៀនមេរៀនអ្វីខ្លះអំពីការគេចចេញពីអំពើទុច្ចរិតនៅពេលអ្នកអានអំពីឡុត និងក្រុមគ្រួសាររបស់គាត់ ? ឧទារហណ៍ តើអ្វីដែលធ្វើឲ្យអ្នកចាប់អារម្មណ៍អំពីអ្វីដែលពួកទេវតាបានមានបន្ទូល និងបានធ្វើដើម្បីជួយឡុត និងក្រុមគ្រួសាររបស់គាត់គេចពីការបំផ្លិចបំផ្លាញ ? ( សូមមើល លោកុប្បត្តិ ១៩:១២–១៧ ) ។ តើព្រះអម្ចាស់ជួយអ្នក និងក្រុមគ្រួសារអ្នកគេចចេញ ឬរកឃើញការការពារពីឥទ្ធិពលរបស់អារក្សនៅក្នុងពិភពលោកយ៉ាងដូចម្តេច ?
ចំពោះព័ត៌មានបន្ថែមទៀតអំពីអំពើបាបរបស់ សូដុំម និង កូម៉ូរ៉ា សូមមើល អេសេគាល ១៦:៤៩–៥០ និង ពួកចៅហ្វាយ ១:៧–៨ ។
សូមមើលផងដែរ ការបកប្រែដោយយ៉ូសែប ស្ម៊ីធ លោកុប្បត្តិ ១៩:៩– ១៥ ( នៅក្នុង សេចក្ដីណែនាំដល់បទគម្ពីរទាំងឡាយ ) ។
កំពុងគេចចេញពី សូដុំម និង កូម៉ូរ៉ា ដោយ ជូលៀស ឆ្នូ វន់ ខារូលស្វីល
តើប្រពន្ធរបស់ឡុតបានធ្វើខុសអ្វី ?
អែលឌើរ ជែហ្វ្រី អ័រ ហូឡិន បានបង្រៀន ៖
« តាមមើលទៅ អ្វីដែលប្រពន្ធរបស់ឡុតបានធ្វើខុសគឺថា នាងមិនគ្រាន់តែគិតចង់ត្រឡប់ក្រោយវិញនោះទេ គឺនាងមានបំណងប្រាថ្នាចង់ត្រឡប់ទៅវិញតែម្តង ។ វាហាក់ដូចជា សូម្បីតែពីមុននាងបានឆ្លងកាត់ព្រំប្រទល់ទីក្រុង នាងបាននឹកពីអ្វីដែល សូដុំម និង កូម៉ូរ៉ា បានផ្តល់ឲ្យនាងទៅហើយ ។… នាងពុំមានសេចក្តីជំនឿទេ ។ នាងមានការសង្ស័យលើសមត្ថភាពរបស់ព្រះអម្ចាស់ក្នុងការប្រទានអ្វីៗដែលល្អប្រសើរជាងអ្វីដែលនាងបានមានរួចទៅហើយ ។…
« ចំពោះ [ ប្រជាជន ] នៅគ្រប់ជំនាន់ ខ្ញុំសូមអំពាវនាវឲ្យ ‹ ចូរនឹកចាំពីប្រពន្ធលោកឡុត › [ លូកា ១៧:៣២ ] ។ សេចក្តីជំនឿគឺសម្រាប់អនាគត ។ សេចក្តីជំនឿគឺស្ថាបនាឡើងពីអតីតកាល ប៉ុន្តែពុំមានបំណងចង់នៅទីនោះទេ ។ សេចក្តីជំនឿដែលទុកចិត្តថា ព្រះមានអ្វីៗដ៏អស្ចារ្យរក្សាទុកសម្រាប់យើងម្នាក់ៗ ហើយថាព្រះគ្រីស្ទ ពិតជា ‹ សម្តេចសង្ឃ ខាងឯសេចក្តីល្អដែលត្រូវមក › ( ហេព្រើរ ៩:១១ ) » ( «The Best Is Yet to Be » Ensign ខែ មករា ឆ្នាំ ២០១០ ទំព័រ ២៤, ២៧ ) ។
អ័ប្រាហាំ សុខចិត្តបូជា អ៊ីសាក គឺជានិមិត្តរូបពីព្រះ និងព្រះរាជបុត្រារបស់ទ្រង់ ។
យើងពុំដឹងពីមូលហេតុទាំងអស់ដែលព្រះបានបញ្ជាឲ្យអ័ប្រាហាំ ត្រូវថ្វាយ អ៊ីសាក ជាការបូជានោះទេ យើងពិតជាដឹងថា វាគឺជាការសាកល្បងពីសេចក្តីជំនឿរបស់លោកនៅលើព្រះ ( សូមមើល លោកុប្បត្តិ ២២:១២–១៩ ) ។ នៅពេលអ្នកអាន លោកុប្បត្តិ ២២:១–១៩ តើអ្នកបានរៀនអ្វីពីបទពិសោធន៏របស់អ័ប្រាហាំ ?
អ័ប្រាហាំ សុខចិត្តបូជាកូនប្រុសរបស់លោកគឺជា « និមិត្តរូបអំពីព្រះ និងព្រះរាជបុត្រាបង្កើតតែមួយរបស់ទ្រង់ » ( យ៉ាកុប ៤:៥ ) ។ នៅពេលដែលអ្នកគិតពីភាពស្រដៀងគ្នារវាងការសាកល្បងរបស់អ័ប្រាហាំ និងព្រះជាព្រះវរបិតា ដែលបានប្រទានព្រះរាជបុត្រារបស់ទ្រង់ ឲ្យបូជាសម្រាប់យើង តើអ្នកមានអារម្មណ៍យ៉ាងណាចំពោះព្រះវរបិតាសួគ៌របស់អ្នក ?
ក៏មានភាពស្រដៀងគ្នារវាង អ៊ីសាក និងព្រះអង្គសង្រ្គោះផងដែរ ។ សូមពិចារណាអាន លោកុប្បត្តិ ២២:១–១៩ ម្តងទៀត ដោយរកមើលភាពស្រដៀងគ្នាទាំងនេះ ។
សូមមើលផងដែរ « Akedah ( The Binding ) » ( វីដេអូ ) ChurchofJesusChrist.org ។
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ
-
លោកុប្បត្តិ ១៨:១៤ ។តើមានដំណើររឿងចេញពីព្រះគម្ពីរ ចេញពី ពង្សប្រវត្តិរបស់អ្នក ឬចេញពីជីវិតរបស់អ្នកផ្ទាល់ ដែលអ្នកអាចចែកចាយអំពីអ្វីដែលវាបានបង្រៀនអ្នកថាគ្មានអ្វីពិបាកចំពោះព្រះអម្ចាស់ឡើយដែរឬទេ ?
-
លោកុប្បត្តិ ១៨:១៦–៣៣ ។តើយើងបានរៀនអ្វីពីបុគ្គលិកលក្ខណៈរបស់អ័ប្រាហាំ ចេញពីខគម្ពីរទាំងនេះ ? តើយើងអាចធ្វើតាមគំរូរបស់លោកយ៉ាងដូចម្តេច ? ( សូមមើលផងដែរ អាលម៉ា ១០:២២–២៣ ) ។
-
លោកុប្បត្តិ ១៩:១៥–១៧ ។ខគម្ពីរទាំងនេះអាចជួយសមាជិកក្រុមគ្រួសាររបស់អ្នករៀបចំខ្លួនសម្រាប់គ្រាដែលពួកគេត្រូវការគេចចេញពីស្ថានភាពទុច្ចរិត ។ តើស្ថានភាពទាំងនេះអាចមានអ្វីខ្លះ ? ឧទាហរណ៍ អ្នកអាចពិភាក្សាអំពីប្រព័ន្ធព័ត៌មានដែលមិនសមរម្យ ឬការល្បួងឲ្យនិយាយដើមគេ ។ តើយើងអាចគេចចេញពីស្ថានភាពបែបនេះយ៉ាងដូចម្តេច ?
-
លោកុប្បត្តិ ២១:៩–២០ ។តើអ្វីទៅដែលធ្វើឲ្យក្រុមគ្រួសាររបស់អ្នកចាប់អារម្មណ៍អំពីរបៀបដែលព្រះបានប្រព្រឹត្តចំពោះ ហាការ និង អ៊ីសម៉ាអែល បន្ទាប់ពី សារ៉ា និង អ័ប្រាហាំ បានបណ្តេចញពួកគេចេញ ?
-
លោកុប្បត្តិ ២២:១–១៤ ។តើអ្នកអាចជួយក្រុមគ្រួសាររបស់អ្នកមើលឃើញពី ទំនាក់ទំនងរវាងដំណើររឿងដែលព្រះបញ្ជាឲ្យអ័ប្រាហាំ បូជា អ៊ីសាក និងដង្វាយដ៏ធួនរបស់ព្រះអង្គសង្រ្គោះយ៉ាងដូចម្ដេច ? អ្នកអាចបង្ហាញរូបភាពរបស់អ័ប្រាហាំ និង អ៊ីសាក និងការឆ្កាង ( សូមមើល « អ័ប្រាហាំ និងអ៊ីសាក » នៅក្នុង ដំណើររឿងព្រះគម្ពីរសញ្ញាចាស់ ) ខណៈពេលដែលសមាជិកគ្រួសារពិភាក្សាអំពីភាព ស្រដៀងគ្នាដែលពួកគេមើលឃើញរវាងប្រព្រឹត្តិការណ៍ទាំងនេះ ។ អ្នកក៏អាចច្រៀងចម្រៀងអំពីការពលិកម្មរបស់ព្រះអង្គសង្គ្រោះ ដូចជាបទ « ទ្រង់បញ្ជូនបុត្រាទ្រង់មក » ( សៀវភៅចម្រៀងកុមារ ទំព័រ ២០–២១ ) ហើយសូមរកមើលឃ្លាដែលពិពណ៌នាពីការពលិកម្មរបស់ព្រះអង្គសង្រ្គោះ ។
តើយើងត្រូវបានសុំឲ្យបូជាជាលក្ខណៈក្រុមគ្រួសារមានអ្វីខ្លះ ? តើការបូជាទាំងនេះនាំឲ្យយើងខិតកាន់តែជិតព្រះយ៉ាងណាខ្លះ ?
សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនប្រចាំសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់ថ្នាក់បឋមសិក្សា ។
ចម្រៀងដែលបានស្នើ ៖ « ព្រះស្នេហ៍យើងទើបចាត់បុត្រាទ្រង់ » ទំនុកតម្កើង ល.រ ១១១ ។
ការកែលម្អដល់ការសិក្សាផ្ទាល់ខ្លួន
សូមស្ដាប់ព្រះវិញ្ញាណ ។ នៅពេលអ្នកសិក្សា សូមយកចិត្តទុកដាក់ទៅលើគំនិត និងអារម្មណ៍របស់អ្នក ទោះបីវាហាក់ដូចជាមិនទាក់ទងនឹងអ្វីដែលអ្នកកំពុងអានក្ដី ។ ចំណាប់អារម្មណ៍ទាំងនោះអាចជារឿងសំខាន់ដែលព្រះចង់ឲ្យអ្នកដឹង ។
រូបភាព របស់អ័ប្រាហាំ និងអ៊ីសាក ដោយ ជេហ្វ វួដ